ང་ཐང་ཆད་ཀི

བོད་ཤ་ཁྲག་རུས་གསུམ་ལ་ཕུལ་བ།

གལ་གནད་ཆེ་བའི་ཤ་ཁྲག་རུས་གསུམ་དང་། །
མཐུ་སྟོབས་ཆེ་བའི་ལྷ་ྐླུ་གཉན་གསུམ་དང་། །
རིན་ཐང་ཆེ་བའི་ལུས་ངག་ཡིད་གསུམ་བཅས། །
གཅིག་ལས་དུ་མར་འཆར་བའི་གྲོགས་མཆོག་ལགས། །

ཕ་ནོར་དབྱངས་གསལ་སོ་བཞིའི་མུ་ཏིག་ཕྲེང་། །
དྲྭ་འཕྲུལ་དར་གྱི་སྲད་བུར་བརྒྱུས་པའི་གཏམ། །
རིགས་མཐུན་གྲོགས་ལ་ཕངས་མེད་སྦྱིན་པའི་གཉེན། །
མ་མཐོང་རྒྱང་ན་གནས་པའི་མཛའ་བཤེས་ཡིན། །

འདི་ན་བྷོ་ཊའི་བསྟན་སྲིད་ནོར་འཛིན་མ། །
ཉམས་རྒུད་ཆུ་གཏེར་ྐློང་དུ་བྱིངས་ཉེ་བའི། །
ངང་ཚུལ་བསམ་ཞིང་བརྩོན་པའི་གོ་བགོས་ཏེ། །
ཁ་བ་རི་པའི་ཕ་ཆུས་སྲུང་བར་མཛོད། །

ཕྱི་ནང་འགལ་རྐྱེན་མུན་ནག་སྟུག་པོའི་་ཁྲོད། །
ལེགས་བྱས་མར་མེའི་འོད་སྣང་ཉམ་ཆུང་ཡང་། །
བདེན་པའི་མཐུ་ལ་འགྲན་ཟླ་མ་དམིགས་པས། །
ཉིན་ཞིག་རྒྱལ་ཁའི་སྐྱ་རེངས་མཐོང་བར་ངེས། །

བདག་ཀྱང་འབྱུང་འདུས་ལུས་ཀྱི་ཐོ་ཡོར་འདིར། །
རྣམ་ཤེས་འཁྱམས་པོས་བདག་འཛིན་མ་དོར་བར། །
ཁྱེད་དང་ཁྱེད་བཞིན་མཛངས་པའི་སྤུན་ཟླ་ཚོར། །
འགྲོགས་ནས་རང་སྡེའི་སྲི་ཞུ་བསྒྲུབ་པར་ངེས། །

མཚམས་རེར་མཛའ་ཞིང་མཚམས་རེར་འགྲས་པའི་དྲྭ་གྲོགས་བོད་ཤ་ཁྲག་རུས་གསུམ་གྱི་ཡིད་ཐང་ཆད་བཞིན་ཡོད་ཚུལ་གྱི་རྩོམ་ཡིག་ཅིག་སྤེལ་བ་མཐོང་བས་སེམས་གསོའམ་སྐུལ་མའི་ཆེད་དུ་ཕུལ།

བོད།
ཤ་ཁྲག་རུས་གསུམ་ལགས།
ཡིད་ཐང་མ་ཆད་རོགས།
བསེ་རུའི་ཟིན་བྲིས་སུ་སྐུ་ངལ་གསོ་བར་ཕེབས་དང་།
མི་ཡུལ་གྱི་སྦྲང་ཆང་ཤེལ་ཕོར་གང་བཏེག་ཆོག
ཐང་ཆད་ཀྱང་འགྲོ་དགོས་ལ།
ཐང་མ་ཆད་ཀྱང་འགྲོ་དགོས།
དེའི་ཕྱིར།
རྐང་ལག་ཡོད་ཚད་བཅིངས་ཀྱང་འགྲོ་དགོས་ལ།
ཕྱི་དབུགས་རྫོགས་ཀྱང་འགྲོ་དགོས།