ཕྱི་ཚེས་ ༢༦ ཉིན་འདི་གར་གནས་ཚུལ་བཏང་བ་ལྟར་ན། དབྱིན་ཡུལ་བོད་རིགས་ཡོངས་ནས་ད་ལོ་བོད་ཀྱི་ལོ་གསར་གྱི་རྟེན་འབྲེལ་མཛད་སྒོ་རྟེན་འབྲེལ་མེད་ཟེར།
དབྱིན་ཡུལ་བོད་རིགས་ཚོགས་པའི་ཆབ་སྲིད་འགན་འཛིན་པ་བསྟན་འཛིན་རབ་འབྱོར་ལགས་ཀྱིས་འདི་གར་བཏང་གནས་ལྟར་ན། དབྱིན་ཡུལ་བོད་རིགས་ཡོངས་ནས་ད་ལོ་བོད་ཀྱི་ལོ་གསར་གྱི་རྟེན་འབྲེལ་མཛད་སྒོ་རྟེན་འབྲེལ་མེད་ཟེར་ལ། ཡིན་ཡང་། འདས་ཟིན་པའི་རང་རིགས་དཔའ་བོ་དཔའ་མོ་རྣམས་ལ་མྱ་ངན་དང་སྡུག་བསྔལ་གྱིས་གཟིར་བཞིན་པའི་ཆབ་སྲིད་བཙོན་པ་རྣམས་ལ་གདུང་སེམས་མཉམ་སྐྱེད་ཀྱི་ཆེད་ལྷན་འཛོམས་གནང་སྟེ་མཉམ་དུ་མཆོད་མེ་འབུལ་བ་དང་ཞལ་འདོན་སྐྱོར་བ། གཞན་ཡང་འདས་ལོར་བོད་ཆོལ་ཁ་གསུམ་ཡོངས་ཀྱི་ཞི་བའི་སྒེར་ལངས་ལ་རྗེས་དྲན་གྱི་ཆེད། ༢༠༠༨ ལོའི་བོད་ནང་སྒེར་ལངས་ཆེན་མོ་ཞེས་པའི་གློག་བརྙན་དེ་ཚང་མར་གཟིགས་འབུལ་ཞུ་རྒྱུ་ཡིན་ཟེར།
དབྱིན་ཡུལ་བོད་མི་རྣམས་ཀྱིས་ལོ་གསར་ཚེས་གཅིག་གི་དགོང་དྲོ་དེར་རྒྱ་མིའི་གཞུང་ཚབ་མདུན་ནས་མྱ་ངན་གྱི་མར་མེ་ཁྲོམ་སྐོར་རྒྱ་ཆེན་པོ་ཞིག་གནང་རྒྱུ་ཡིན་འདུག་ལ། དེ་བཞིན་རྒྱལ་ཁབ་གཞན་དུ་གནས་བཞུགས་བོད་མི་རྣམས་ནས་ཀྱང་སོ་སོའི་ས་གནས་ཁག་ནས་ཆབ་སྲིད་ཀྱི་ལས་འགུལ་སྣ་ཚོགས་སྤེལ་ཐུབ་པའི་རེ་བ་ཡོད་ཅེས་འདི་གར་བརྗོད་བྱུང་།
