བཞུགས་སྒར་གྱི་གཞུང་འབྲེལ་མ་ཡིན་པའི་ཚོགས་པ་བཞི་ཡིས་ད་ལོའི་ལོ་གསར་ལ་དགའ་སྟོན་བྱ་རྒྱུ་མིན་པར་ལོ་ནག་པོ་སྲུང་གཙི་བྱ་རྒྱུ་ཡིན་ཟེར།
ཚེས་ ༢༧ ཉིན་བོད་ཀྱི་བུད་མེད་ལྷན་ཚོགས་དང་དགུ་བཅུ་གསུམ་ལས་འགུལ་ཁང༌། བོད་རང་དབང་སློབ་ཕྲུག་ཚོགས་པ་དང་རྒྱལ་ཡོངས་མང་གཙོ་ཚོགས་པ་བཅས་ཀྱིས། ད་ལོ་ས་གླང་ལོའི་བོད་ལུགས་ལོ་གསར་འདི་སྲུང་གཙི་བྱ་རྒྱུ་མིན་པ་དང༌། དེའི་ཚབ་ཏུ་ལོ་ནག་པོ་ཞེས་པ་སྲུང་གཙི་བྱ་རྒྱུ་ཡིན་པའི་གསལ་བསྒྲགས་ཤིག་བསྐྱངས་ཡོད་པ་རེད། འདིའི་ཐད་ཚོགས་པ་བཞིའི་བོད་སྐད་མགྲིན་ཚབ་པ་དགུ་བཅུ་གསུམ་ལས་འགུལ་ཁང་གི་ཚོགས་གཙོ་ངག་དབང་འོད་འབར་ལགས་ཀྱིས་འདི་ག་གསར་ཁང་ལ་བརྗོད་དོན། ད་ལོ་༧གོང་ས་མཆོག་གཙོས་པའི་བོད་མི་རྣམས་བཙན་བྱོལ་ལ་སླེབས་ནས་མི་ལོ་ ༥༠ འཁོར་བ་དང༌། གཞིས་ལུས་བོད་མི་ཚོས་རྒྱ་ནག་གི་དྲག་གནོན་འོག་འཚོ་བ་རོལ་ནས་མི་ལོ་ ༥༠ འཁོར་གྱིན་ཡོད་པ་དང༌། དམིགས་བསལ་གྱིས་སྤྱི་ལོ་ ༢༠༠༨ ལོར་མདོ་དབུས་ཁམས་གསུམ་གྱི་བོད་རིགས་སྤུན་ཟླ་མང་པོས་རང་མི་རིགས་ཀྱི་དོན་དུ་རང་སྲོག་བློས་བཏང་བ་དང༌། ད་ལྟའི་ཆར་བཙོན་ཁང་དུ་སྡུག་པོ་མྱོང་བཞིན་པ་སོགས་བོད་ནང་གི་བོད་མི་ཚོའི་སེམས་ཤུགས་དང་ལ་རྒྱར་རང་དབང་ལུང་པར་ཡོད་པའི་བོད་མི་ཚོ་ཧང་སངས་དགོས་པ་དེ་འདྲ་རེད། བོད་མིའི་སྲོལ་རྒྱུན་དུ་ནང་གི་སྤུན་ཟླ་དང་ཉེ་མི་འདས་གྲོངས་ཕྱིན་སྐབས་ནང་མི་ཚོས་ལོ་གཅིག་ལ་མྱ་ངན་ཞུ་གི་ཡོད་པ་ལྟར། བོད་རིགས་སྤུན་ཟླ་མང་པོ་རང་གི་མི་རིགས་ཀྱི་ཆེད་དུ་རང་སྲོག་ཤོར་ཏེ་ལོ་གཅིག་གི་དུས་ཡུན་ད་དུང་རྫོགས་མེད་པས་ང་ཚོའི་བཙན་བྱོལ་བོད་མི་རྣམས་ཀྱིས་མྱ་ངན་ཞུ་དགོས་པ་དང༌། ཟླ་འདིའི་ཚེས་ ༢༣ ཉིན་ཆབ་མདོ་ཚ་བ་མཛོ་སྒང་དུ་བོད་མི་ཞི་རྒོལ་བ་ཞིག་བསད་པ་བཅས་གཞི་རྩར་བཞག་སྟེ། གཞུང་འབྲེལ་མ་ཡིན་པའི་ཚོགས་པ་བཞི་ཡི་ངོས་ནས་རང་དབང་ལུང་བའི་ནང་གི་བོད་རིགས་མི་མང་རྣམས་ལ་ལོ་གསར་བར་དགའ་སྟོན་ལ་མི་རོལ་བའི་འབོད་སྐུལ་ཞུ་གི་ཡོད། ལོ་ནག་པོ་གཙི་སྲུང་བྱེད་སྟངས་ནི་ལོ་གསར་ཚེས་ ༡ ཉིན་མི་མང་རྣམས་ཐེག་ཆེན་ཆོས་གླིང་གཙུག་ལག་ཁང་ལ་འཛོམས་ནས་བསྔོ་སྨོན་གསོལ་འདེབས་ཞུ་རྒྱུ་ཡིན། མི་མང་དེ་ཚོས་ནམ་རྒྱུན་ལོ་སར་ཆེད་དངུལ་འབོར་ཆེན་བེད་སྤྱོད་བཏང་ནས་སྤྲོ་སྐྱིད་ལ་རོལ་བའི་ལུགས་སྲོལ་ཡོད་ཀྱང། ད་ལོར་འགྲོ་སོང་དེ་ཚོའི་ཁྲོད་ནས་ཉུང་ཙམ་ལས་ཞལ་འདེབས་ལ་འདུལ་མི་ཐུབ་ཀྱང་འབུལ་རོགས་ཞུ་རྒྱུ་ཡིན། ༢༠༠༩ ལོ་ནི་བོད་མི་རིགས་ལ་མཚོན་ན་ལོ་རྒྱུས་ནང་གི་ལོ་ཁྱད་པར་བ་ཞིག་ཡིན་པས་ལས་འགུལ་གྱི་རིགས་མང་པོ་སྤེལ་གི་རེད། ས་གནས་སོ་སོ་ནས་ཚོགས་པ་གང་ཞིག་ཡིན་ཡང་བོད་དོན་ཆེད་ལས་འགུལ་སྤེལ་ཚེ་དེ་ལ་འགྲོ་སོང་དགོས་པ་བཞིན། བོད་མི་ཚོས་ལོ་སར་གྱི་འགྲོ་སོང་ནང་ནས་ཉུང་ཙམ་རེ་རང་རང་གི་ས་གནས་ནས་མི་རིགས་ཀྱི་རྩ་དོན་ཆེད་ལས་འགུལ་སྤེལ་མཁན་ཚོར་ཞལ་འདེབས་སུ་འབུལ་རོགས་ཞུ་རྒྱུ་ཡིན། ཞེས་གསུངས་བྱུང༌།
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
ད་ལོའི་ལོ་གསར་བརྩི་ལུགས་འདི།།
ལོ་ནག་མྱ་ངན་ལོ་རུ་བརྩི།།
ང་དགུ་དྲན་གསོའི་ལོ་རུ་བརྩི།།
ལོ་རྒྱུས་ནང་གི་བརྗེད་ཐོ་ཞིག།
ལོ་གསར་ཚེས་གཅིག་མྱ་ངན་བྱེད།།
ཆུ་ཕུད་ཇ་ཕུད་ཟས་ཕུད་སོགས།།
ཚེ་སྲོག་འབུམ་གྱི་རྣམ་ཤེས་ལ།།
མྱ་ངན་མཆོད་པའི་ཚུལ་དུ་འབུལ།།
ཕྱག་དང་མཆོད་པ་བསངས་གསོལ་རྣམས།།
འདས་ཟིན་དཔའ་བོ་དཔའ་མོ་ཡི།།
རྣམ་ཤེས་ཚུར་ལ་འགུག་བཞིན་དུ།།
དྲིན་བྱས་དྲིན་གཟོའི་སླད་དུ་འབུལ།།
ཕྱོགས་བཞི་མཚམས་བརྒྱད་བཞུགས་པ་ཡི།།
བོད་རིགས་མགོ་ནག་རྩམ་གཟན་རྣམས།།
ཡིད་གདུང་མཆི་མས་བརླན་བཞིན་དུ།།
ཉིས་སྟོང་དགུ་ཡི་ལོ་གསར་བསུ།།