༧གོང་ས་མཆོག་ལ་བྱ་དགའ།

འཇར་མིན་ནས་བཏང་འབྱོར་བྱུང་བའི་གནས་ཚུལ་ལྟར་ན། སྤྱི་ཟླ་གཉིས་པའི་ནང་༧གོང་ས་མཆོག་གི་ཨི་ཊ་ལིའི་མཛད་འཕྲིན་ཁག་ལེགས་པར་གྲུབ་རྗེས། སྤྱི་ཟླ་ ༢ གཉིས་པའི་ཚེས་ ༡༠ ཉིན་འཇར་མན་གྱི་གྲོང་ཁྱེར་བྷ་དན་དུ་ཆིབས་སྒྱུར་བསྐྱངས་ཏེ། འཇར་མིན་གསར་འགྱུར་བརྒྱུད་ལམ་གྱི་ཆེ་བསྟོད་གཟེངས་རྟགས་ Deutsch medienpreis ཞེས་པ་དེ་འབུལ་བཞེས་གནང་རྒྱུ་ཡིན་པ་དང་། གཟེངས་རྟགས་དེ་ནི་ ༡༩༩༢ ལོ་ནས་མགོ་བཙུགས་ཏེ། ལོ་རེ་བཞིན་རྒྱལ་ཁབ་དང་མི་རིགས་ལ་དབྱེ་བ་མེད་པར་འཛམ་གླིང་གི་ཁྱད་དུ་འཕགས་པའི་མི་ཆོས་ཀུན་སྤྱོད་ལེགས་པའི་ཡོན་ཏན་ལྡན་པའི་སྐྱེས་བུ་དམ་པ་དག་ལ་འབུལ་བཞིན་ཡོད་འདུག

 གཟེངས་རྟགས་འདི་བཞེས་མྱོང་མཁན་གྱི་གྲས་སུ་མཉམ་འབྲེལ་རྒྱལ་ཚོགས་ཀྱི་དྲུང་ཆེ་ཟུར་བ་ཁོ་ཧྤི་ཨ་ནཱན་དང་ལྷོ་ཨབ་རི་ཀའི་ཞི་བདེའི་དེད་དཔོན་ནེལ་སོན་མན་ཌ་ལ། པཱ་ལི་སི་ཐན་གྱི་དབུ་ཁྲིད་འདས་པོ་ཡེ་སེར་ཨ་ར་ཧྥ་ཐི། ཨ་རིའི་སྲིད་བློན་ཟུར་བ་བྷེལ་ཁི་ལིན་ཊོན་བཟའ་ཟླ་གཉིས་བཅས་ཡོད་འདུག་ལ། ༢༠༠༨ ལོའི་འཇར་མིན་གསར་འགྱུར་བརྒྱུད་ལམ་གྱི་བྱ་དགའ་དེ་བོད་མིའི་ཆོས་སྲིད་གཉིས་ཀྱི་དབུ་ཁྲིད་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ལ་འབུལ་འཆར་ཡོད་པ་དང་། དེ་ནི་༧གོང་ས་མཆོག་གིས་འགྲོ་བ་མིའི་རིན་ཐང་དང་འཚེ་མེད་ཞི་བའི་ལྟ་གྲུབ་ཐད་ཕྱག་ལས་གནང་བ། ལྷག་པར་ཏུ་འཛམ་གླིང་གི་ཆོས་ལུགས་ཁག་ཕན་ཚུན་ལ་མཐུན་སྒྲིལ་དང་བརྩི་བཀུར་བྱེད་དགོས་པའི་རླབས་ཆེན་གྱི་དགོངས་གཞི་བཅས་ལ་ཡི་རང་དང་། མངོན་པར་བསྟོད་དེ་ཕུལ་བ་ཞིག་འདུག