དབུས་གཞོན་ནུ་ལྷན་ཚོགས་ཀྱིས་ས་གླང་ལོའི་བོད་ཀྱི་ལོ་གསར་མི་གཏོང་བར་ལོ་ནག་སྲུང་གཙི་ཞུ་རྒྱུ་ཡིན་པ་དང༌། ཉིན་ལྔའི་རིང་ལ་ལས་འགུལ་ཁག་ལྔ་ས་གནས་སོ་སོའི་གཞོན་ནུའི་ཡན་ལག་ཁག་གི་གོ་སྒྲིག་འོག་སྤེལ་རྒྱུ་ཡིན་འདུག
ཚེས་ ༢༩ ཉིན་དབུས་གཞོན་ནུ་ལྷན་ཚོགས་ཀྱིས་ད་ལོ་ས་གླང་ལོའི་བོད་ཀྱི་ལོ་གསར་མི་གཏོང་བར་འཐབ་རྩོད་ཀྱི་སྒོ་ནས་ལོ་ནག་སྲུང་གཙི་ཞུ་རྒྱུའི་གསར་འགོད་གསལ་བསྒྲགས་ཤིག་བསྐྱངས་ཡོད་པ་དང༌། རྒྱ་ནག་གིས་བོད་ཡུལ་བཙན་འཛུལ་མགོ་བཙུགས་ནས་མི་ལོ་ ༦༠ འཁོར་བ་དང་བོད་རིགས་རྣམས་གཞིས་བྱེས་གཉིས་སུ་ཁ་གྱེས་ནས་མི་ལོ་ ༥༠ འཁོར་བ། དེ་བཞིན་སྤྱི་ལོ་ ༢༠༠༨ ལོར་བོད་མིའི་ཞི་རྒོལ་སྐབས། རྒྱ་གཞུང་གི་དྲག་གནོན་འོག་མདོ་དབུས་ཁམས་གསུམ་གྱི་བོད་མི་མི་ཉུང་བ་ཞིག་གི་ཚེ་སྲོག་ཤོར་བ་དང༌། བོད་མི་སྟོང་ཕྲག་ཁ་ཤས་ཀྱིས་བཙོན་དུ་མནར་གཅོད་མྱོང་བཞིན་པ་བཅས་ཀྱི་ཆེད་དུ། གཞོན་ནུ་ལྷན་ཚོགས་ཀྱི་ངོས་ནས་དོན་ཚན་ལྔ་ཡོད་པའི་ལོ་ནག་གཙི་བའི་ལས་འགུལ་ཞིག་ས་གནས་གཞོན་ནུ་ཁག་ཡོངས་ལ་བཀོད་ཁྱབ་བཏང་སྟེ། ས་གནས་སོ་སོར་ཡང་ལས་འགུལ་གཅིག་མཚུངས་སྤེལ་རྒྱུ་ཡིན་འདུག གསལ་བསྒྲགས་སུ་འཁོད་པའི་ལས་འགུལ་དང་པོ་ནི་བོད་ཟླ་ ༡༢ ཚེས་ ༢༩ ཉིན། ནམ་རྒྱུན་གྱི་གླུད་གཡུག་གཏོང་གི་ཚབ་ཏུ་མའོ་ཙེ་ཏུང་དང་ཧུའུ་ཅིན་ཐའོ་གཉིས་ཀྱི་འདྲ་གཟུགས་ཆེན་པོ་རེ་གཡུག་རྒྱུ་དང༌། ལས་འགུལ་ནང་དུ་ཞུགས་མཁན་སོ་སོས་ཀྱང་གླུད་ཚབ་ཏུ་སོ་སོའི་ནང་ནས་མའོ་དང་ཧུའུ་ཡི་འདྲ་གཟུགས་རེ་འཁྱེར་ཡོང་རྒྱུ། གཉིས་པ་ནི་བོད་ཟླ་ ༡༢ པའི་ཚེས་ ༣༠ སྟེ་གནམ་གང་ཉིན་བོད་ཀྱི་རྩ་དོན་སྐོར་མཉམ་སྦྲེལ་རྒྱལ་ཚོགས་དང༌། ཡུ་རོབ་གྲོས་ཚོགས་ལ་འབུལ་རྒྱུའི་མཚན་རྟགས་བསྡུ་རུབ་བྱས་ཏེ། ཁུངས་སོ་སོར་སྦྲགས་ཐོག་བརྒྱུད་འབུལ་གཏོང་བྱ་རྒྱུ། གསུམ་པ་ནི་ལོ་སར་ཚེས་ ༡ ཉིན་གྱི་ཞོགས་པ་ཆུ་ཚོད་ ༩ དང་ཕྱེད་ཀ་ནས་མགོ་འཛུགས་ཀྱིས་རྡ་རམ་ས་ལར་ཟས་བཅད་ངོ་རྒོལ་ཚེས་ ༣ བར་མི་གྲངས་ ༥༠ ཡས་མས་བརྗེ་ལེན་མེད་པའི་ལས་འགུལ་མུ་མཐུད་སྤེལ་རྒྱུ་དང༌། ཚེས་ ༡ དགོང་མོར་མྱ་ངན་མཚོན་ཆེད་སྒེར་སོ་སོའི་ཁང་བའི་ཕྱི་རོལ་ཏུ་མཆོད་མེ་དང་ཡང་ལྭ་སྒྲོན་འབུལ་ཞུ་རྒྱུའི་འབོད་སྐུལ་བྱ་རྒྱུ། ལས་འགུལ་བཞི་བ་དེ་ནི་ལོ་སར་ཚེས་ ༣ ཉིན་ཞོགས་པ་ཆུ་ཚོད་ ༩ དང་ཕྱེད་ཀར་ལྷ་རྒྱལ་རིར་དཔའ་བོ་ཐུབ་བསྟན་དངོས་གྲུབ་མཆོག་གི་སྐུ་བརྙན་མདུན་དུ་རྒྱལ་གཅེས་དཔའ་བོ་དཔའ་མོ་རྣམས་ལ་མྱ་ངན་རྗེས་དྲན་སླད་འདུ་འཛོམས་ཀྱིས། ལྷ་རྒྱལ་རི་ནས་རྡ་ཤོད་ཀ་ཅ་རི་བར་གཞི་རྒྱ་ཆེ་བའི་རྔམ་སྟོན་ཁྲོམ་སྐོར་བྱ་རྒྱུ། ལྔ་བ་སྟེ་ཚེས་ ༣ ཉིན་ ༢༠༠༨ ལོའི་བོད་ནང་གི་རྒྱལ་གཅེས་དཔའ་བོ་དཔའ་མོ་རྣམ་པས་གཙོས་ད་བར་བོད་རང་བཙན་གྱི་དོན་གཅེས་སྲོག་ཤོར་བའི་རྒྱལ་གཅེས་དཔའ་བོ་རྣམས་ཀྱི་སླད། བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་མ་ཎི་དང་སྨོན་ལམ་གསོག་སྒྲུབ་ཀྱི་འདས་མཆོད་རྒྱས་པ་ཞིག་དབུས་གཞོན་ལྷན་གྱི་སྤྱི་ཁྱབ་རྒྱུན་ལས་ཁང་ནས་གོ་སྒྲིག་ཞུ་རྒྱུ་བཅས་ཡིན་འདུག
![The Dalai Lama offers blessings to his followers at his Himalayan residence in the northern hill town of Dharamshala, India, on December 20, 2024 [Priyanshu Singh/Reuters]](https://tibettimes.net/wp-content/uploads/2025/05/Screen-Shot-2025-05-09-at-3.37.35-PM-360x180.png)
གཞོན་ནུ་ཚོགས་པར་ཟས་བཅད་ངོ་རྒོལ་ལས་གཞན་ཐབས་རྩོད་བྱེད་སྟངས་མེད་པ་རེད་དམ།
དེ་འདྲའི་ཐབས་རྡུགས་ཤིག ཟས་བཅད་ངོ་གོ་སྒྲིག་བྱ་རྒྱུ་ནི་ཆེས་ལས་སླ་བ་ཞིག་རེད་ལ། ལྷག་པར་མོའོ་དང་ཧའོ་ཡི་པར་གླུད་གཏོང་བའི་འཐབ་རྩོད་བྱ་སྟངས་དེ་ནི་དེ་འདྲའི་ཆོ་མེད་པ་ཞིག་མིན་ནམ། ཇི་འདྲའི་དགོད་བྲོ་བ་ཞིག་རེད། གཞོན་ནུ་ཚོགས་པ་ལ་ཟས་བཅད་ངོ་རྒོལ་བྱེད་དུས་ཁོང་ཚོའི་ཚོགས་མི་རྣམས་གར་སོང་ཆ་མེད་ཡིན་ལ། ཟབ་སྦྱོང་དང་རྩེད་མོའི་རིགས་འགྲན་སྡུར་བྱེད་དུས་ཚིང་ཁ་རྒྱག་གི་ཡོད། ལྷག་པར་དུ་ཚོགས་ཆེན་ཚོགས་སྐབས་འུར་རྒྱག་རྒྱུར་དགའ་བའི་ཚོགས་པ་འདི་ལྟ་བུས་ཅི་ཞིག་ཕན་ནམ། དེ་བས་ཁོང་ཚོར་ལྷག་པའི་གནད་དོན་ནི་རང་བཙན་གྱི་ལངས་ཕྱོགས་གཅིག་པུ་འཛིན་རྒྱུ་ཙམ་མ་ཡིན་པར་དངོས་ཡོད་ཀྱི་ཐོག་ནས་ལས་འགུལ་སྐད་གྲགས་ཆེ་བ་ཅི་ཞིག་སྤེལ་རྒྱུ་དང་དེའི་ཇི་ལྟར་སྤེལ་རྒྱུ་ཡིན་མན་ལ་བསམ་བློ་བཏང་ནས་འཇོན་ཐང་མངོན་རྒྱུ་དེ་རེད་དོ༎
གཙི་དང་བརྩི་གཉིས་ལ་ཁྱད་པར་ནི་དུས་བབ་ཀྱི་གསར་འགོད་པས་བཀས་བཅད་པའི་གྲས་ཀྱི་ཐ་སྙད་ཅིག་རེད།
གསར་འགྱུར་བརྒྱུད་ལམ་གཞན་རྣམས་སྲུང་བརྩི་འདི་བཞིན་འབྲི་མུས་རེད།
བཀུར་འོས་གསར་འགོད་པ་ལགས།
གཙི་དང་བརྩི་གཉིས་ཀྱི་ཁྱད་པར་ཅི་རེད།
ཁྱེད་ཀྱིས་གསར་འགྱུར་ཕལ་ཆེ་བར་་བརྩི་ཡི་ཚབ་ལ་གཙི་བེད་སྤྱད་བཏང་འདུག
བཙན་བྱོལ་དུ་གཞོན་ནུའི་ཡན་ལག་ཁག་ག་ཚོད་ཡོད་དམ།
བཀུར་འོས་གསར་འགོད་པ་ལགས།
ལོ་ནག་སྲུང་གཙི་མ་རེད། ལོ་ནག་སྲུང་བརྩི་རེད།
འདྲེ་རིག་ལྡན་ལ་རྒྱུན་དུ་རྒྱབ་སྐྱོར་ཡོད།
གཞོན་ནུ་ལ་ནམ་ཡང་རྒྱབ་སྐྱོར་ཡོད།