༼འགྱུར་བ་༽ཞེས་པའི་གློག་བརྙན།

འགྱུར་བ་ཞེས་པའི་གློག་བརྙན་འདི་ནི་བཙན་བྱོལ་བོད་མིའི་ཁྱིམ་ཚང་ཞིག་གི་མི་རབས་གསུམ་བར་གྱི་འགྱུར་བ་དང་འཕེལ་རིམ་སྐོར་ཡིན་ལ། དེ་བཞིན་ཕ་མས་བུ་ཕྲུག་གསོ་སྐྱོང་གི་འགན་བླངས་ཡོད་མེད་སོགས་སྤྱི་ཚོགས་ཡོངས་ལ་འཇགས་པའི་སྐྱོན་གྱི་ཟུར་ངོས་རེ་དང་། བོད་ཀྱི་གཉེན་སྲོལ་སོགས་སྲོལ་རྒྱུན་རིག་གཞུང་གི་ཕྱོགས་ཀྱང་ཡོད། འདི་ནི་སྐུ་ཞབས་བློ་བཟང་རྡོ་རྗེ་ལགས་ཀྱི་གློག་བརྙན་ཐོག་མ་དེ་ཡིན།

ཚེས་ ༡༧ ཉིན་བོད་གཞུང་ཕྱི་དྲིལ་ལྷག་པ་ཚེ་རིང་ཚོགས་ཁང་དུ་རྡོ་རྗེ་གདན་ས་གནས་གཞོན་ནུའི་ཚོགས་གཙོ་ཟུར་བ་བློ་བཟང་རྡོ་རྗེ་ལགས་ཀྱིས། འགྱུར་བ་ཞེས་པའི་གློག་བརྙན་ཕབ་ལེན་གནང་བ་ཐོག་མའི་དབུ་འབྱེད་གཟིགས་འབུལ་ཞུས་ཡོད་ལ། བོད་གཞུང་བཀའ་ཤག་གི་སྐུ་ཚབ་དུ་ཆོས་དོན་བཀའ་བློན་ཚེ་རིང་ཕུན་ཚོགས་མཆོག་དང་ཁྲིམས་ཞིབ་པ་ཨ་མྱེས་ཚང་ཐུབ་བསྟན་བཀྲ་ཤིས། བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་དང༌། ཚོགས་གཞོན་རྒྱ་རི་སྒྲོལ་མ་བཅས་སྤྱི་འཐུས་རྒྱུན་ལས་དང་མི་མང་ ༥༠ ལྷག་འཛོམས་སར་གློག་བརྙན་དབུ་འབྱེད་ཀྱི་གཟིགས་འབུལ་ཞུས་ཡོད།

གློག་བརྙན་དེ་ནི་འབྲས་ལྗོངས་རྒྱལ་ས་སྒང་ཏོག་གི་ཀུན་ཕན་གླིང་བོད་མིའི་གཞིས་ཆགས་སུ་འཁྲབ་ཁྲིད་བྱས་པ་ཞིག་ཡིན་པ་དང༌། གློག་བརྙན་ནང་གི་མི་སྣ་གཙོ་བོ་རྣམས་ཀྱང་གཞིས་ཆགས་དེའི་མི་མང་དཀྱུས་མ་རྣམས་ཡིན་འདུག གློག་བརྙན་འདིའི་ནང་དུ་ཕ་མས་བུ་ཕྲུག་གསོ་སྐྱོང་གི་འགན་བླངས་ཡོད་མེད་དང༌། ཁྱིམ་ཚང་ཞིག་གི་མི་རབས་གསུམ་བར་གྱི་འགྱུར་བ་དང་འཕེལ་རིམ། དེ་བཞིན་བོད་མིའི་སྲོལ་རྒྱུན་རིག་གནས་གཉེན་སློང་སྟངས་སོགས་ཀྱང་ཚུད་འདུག གློག་བརྙན་དེའི་རིང་ཐུང་ལ་ཆུ་ཚོད་གཅིག་དང་སྐར་མ་བཅུ་ཡོད་པ་དང༌། གློག་བརྙན་འདི་ནི་གློག་བརྙན་བཟོ་བསྐྲུན་པ་བློ་བཟང་རྡོ་རྗེ་ལགས་ཀྱི་ལེགས་གྲུབ་བྱུང་བའི་གློག་བརྙན་ཐོག་མ་ཡིན་འདུག

བློ་བཟང་རྡོ་རྗེ་ཡིས་གློག་བརྙན་གཟུགས་འབུལ་མ་ཞུས་པའི་སྔོན་དུ་གསུངས་དོན།  ང་རང་གློག་བརྙན་ཆེད་ལས་པ་དེ་འདྲ་མིན་ཡང༌། ༧གོང་ས་མཆོག་གིས་བོད་མི་མི་རེ་ངོ་རེ་ལ་འགན་ཡོད་པའི་ཐོག་ལས་ཀ་བྱ་དགོས་པར་གསུངས་པ་བཞིན། ང་རང་གིས་ཀྱང་འགན་བླངས་པ་ཡིན་བསམ་ཡོད། ཅེས་ངོ་སྤྲོད་གནང་བ་དང༌། གློག་བརྙན་གཟིགས་འབུལ་གྲུབ་རྗེས་བཀའ་བློན་ཚེ་རིང་ཕུན་ཚོགས་མཆོག་གིས། བོད་མི་མི་རེ་ངོ་རེ་ནས་ཆེ་ཆུང་ལ་མ་ལྟོས་པར་འགན་བླངས་ནས་ལས་ཀ་བྱ་དགོས་ལ། གློག་བརྙན་གྱི་བརྒྱུད་ལམ་འདི་ནས་མི་རྣམས་ཀྱི་ཀུན་སློང་དང་བྱ་སྤྱོད་འཁུར་སྟངས་ལ་ཏན་ཏན་ཕན་ཐོགས་གི་རེད་བསམ་གྱིན་ཡོད། དམིགས་བསལ་གྱིས་ཡ་རབས་སྤྱོད་བཟང་དང་ཆོ་ག་ཕྱག་ལེན་གྱི་ཐད་ནས་དགེ་འདུན་པས་གསུངས་པ་ལས། ལོ་ཆུང་ཕན་ཚུན་བར་དུ་བསམ་བློ་བརྗེ་རེས་དང་གོ་བརྡ་སྤྲོད་རེས་བྱས་ན་ཕན་ཐོགས་དང་དོ་སྣང་ཆེ་རུ་ཡོང་གི་རེད། དེ་བཞིན་གློག་བརྙན་གྱི་ནང་དུ་ཁྲ་ཁྲ་ཟང་ཟིང་དེ་འདྲ་ཡང་འདུག་མོད། འཛམ་གླིང་གི་གློག་བརྙན་སྤྱི་མཚུངས་ལྟར་མི་རྣམས་ཀྱི་དང་བ་དང་དོ་སྣང་འདྲེན་བྱེད་ཀྱི་ཐབས་ཤེས་ཡིན་པས་ཕྱོགས་གཅིག་ནས་དེ་ཡང་ཡག་པོ་རེད། བོད་མིའི་སྲོལ་རྒྱུན་རིག་གནས་གཉེན་སློང་སྟངས་ཀྱི་ཐད་ནས་ཡིན་ཡང་བོད་ཀྱི་ས་ཁུལ་རེ་རེ་ལ་མ་འདྲ་བ་ཡོད་ཀྱང༌། བོད་དོན་བདེན་མཐའ་སེལ་ནས་བོད་མི་རྣམས་བོད་ལ་ལོག་སྐབས་རང་རང་གི་ལུགས་སྲོལ་རྣམས་ཕར་ཁུར་ནས་འགྲོ་དགོས་པས། ས་ཁུལ་རེ་རེ་ཡི་ལུགས་སྲོལ་དང་རིག་གནས་དེ་ཚོ་ཉར་དགོས་པ་རེད། ཅེས་གསུངས་བྱུང་།

འདི་གའི་གསར་འགོད་པས་བློ་བཟང་རྡོ་རྗེ་ལ་བཅར་འདྲི་ཞུ་སྐབས། ཁོང་གིས།  གློག་བརྙན་འདིའི་འཁྲབ་གཞུང་གཙོས་པའི་འཁྲབ་གཞུང་ལྔ་ལོ་གཉིས་ཀྱི་ནང་དུ་བྲིས་ཡོད་ལ། ད་ལོ་༧གོང་ས་མཆོག་གཙོས་པའི་བོད་མི་རྣམས་བཙན་བྱོལ་ལ་ཕེབས་ནས་ལོ་ངོ་ ༥༠ འགོར་བ་དང་སྟབས་བསྟུན་འགྱུར་བ་ཞེས་པའི་འཁྲབ་གཞུང་འདི་ཕབ་ལེན་བྱས་པ་ཡིན། ཡང་ཁོང་གིས་གློག་བརྙན་འདི་ཕབ་ལེན་བྱས་སྐབས་ཀྱི་དཀའ་སྡུག་དང་འགྲོ་སོང་ཐད། གློག་བརྙན་འདིའི་འགྲོ་སོང་ཁྱོན་རྒྱ་གར་དངུལ་སྒོར་འབུམ་བཞི་ཙམ་ཡིན་པ་དང༌། གློག་བརྙན་ཁྲོད་ཀྱི་མི་སྣ་རྣམས་ལ་གླ་ཆ་སོགས་གང་ཡང་མེད་པར་ཚང་མ་དང་ལེན་བྱས་པ་རེད། གློག་བརྙན་ཕབ་ལེན་སྐབས་གནམ་གཤིས་འགྱུར་ལྡོག་གིས་དཀའ་ངལ་བཟོས་སོང་ཡང་མི་མང་ཚོས་དཀའ་ངལ་ལ་གདོང་ལེན་བྱས་པ་དང༌། རམ་འདེམས་གང་ལེགས་གནང་བར་ཐུགས་རྗེ་ཞུ་འདོད་འདུག་ལ། མ་འོངས་པར་བྱིས་པ་དེ་དག་གི་སློབ་སྦྱོང་དང་མི་མང་དེ་ཚོར་འཚོ་བའི་རམ་འདེགས་སོགས་ལ་ཕན་རེ་ཐོགས་ན་བསམ་ཡོད། ཅེས་གསུངས་བྱུང༌། ཁོང་གིས་འོད་སྡེར་འགྲེམས་སྤེལ་བྱེད་ཕྱོགས་ཐད་ནས་གསུངས་དོན། ད་སྐབས་གཞས་གཏོང་མཁན་ཚོ་དང་གློག་བརྙན་བཟོ་བསྐྲུན་པར་དཀའ་ངལ་ཞིག་ཡོད་པ་ནི་ཁྲོམ་རྭ་མེད་པ་དེ་རེད། འོད་སྡེར་གང་ཞིག་ཁྲོམ་རྭར་ཐོན་རྗེས་ཚོང་པ་ཚོས་འོད་སྡེར་རྫུན་མ་བཟོ་བར་གོམས་ཡོད་པས། གནས་སྐབས་ངས་འོད་སྡེར་འགྲེམས་སྤེལ་བྱ་རྒྱུ་མིན་པར། རང་ཉིད་དངོས་སུ་བོད་མིའི་གཞིས་ཆགས་དང་དགོན་སྡེ་ཁག་ལ་བསྐྱོད་ནས་གློག་བརྙན་འདི་གཟིགས་འབུལ་ཞུ་རྒྱུ་ཡིན་ཞེས་གསུངས་བྱུང༌།