གསུམ་བཅུའི་དུས་དྲན་གྱི་དམ་བཅའ།

པདྨ་ཚེ་དབང་ཤཱསྟྲི།
——–
རང་ཡུལ་གངས་ཅན་གྱི་ལྗོངས་ སུ་སྲིད་པ་ཆགས་པ་ནས་བཟུང་སྟེ་རང་ཅག་གངས་ཅན་པ་རྒན་གཞོན་བར་གསུམ་ཚང་མས་རང་རང་ སོ་སོའི་བསམ་བློའི་འཁྱེར་སོ་དང་། ལངས་ཕྱོགས། སྙིང་སྟོབས། ཆོད་སེམས་སོགས་ལ་ལྟོས་ཏེ་མི་ཚེའི་ནང་དམ་བཅའམ། ཁས་ལེན་ཆེ་ཆུང་དུ་མ་ཞིག་གནང་ཡོད་པ་ནི་གོར་མ་ཆགས། ལྷག་པར་དུ་ནང་ཆོས་དར་ཁྱབ་བྱུང་ནས་བཟུང་སྟེ། ཆེ་ས་ནས་འགའ་ཞིག་གིས་ཇི་སྲིད་ནམ་མཁའི་མཐའ་དང་མཉམ་པའི་མར་གྱུར་སེམས་ཅན་ཐམས་ ཅད་ཐར་པ་དང་། ཐམས་ཅད་མཁྱེན་པའི་ས་ལ་འགོད་མ་ཐུབ་ཀྱི་བར་དུ་རང་ཉིད་ཚངས་མི་རྒྱ་བའི་དམ་བཅའ་ གནང་བ་དང་། འགའ་ཞིག་གིས་རང་ཉིད་འཁོར་བ་དང་ངན་སོང་གི་གནས་ལས་གྲོལ་ཕྱིར་ལས་ཉོན་གྱི་གཞན་ དབང་དུ་མི་གཏོང་བའི་དམ་བཅའ་གནང་བ། འགའ་ཞིག་གིས་རང་ཉིད་མངོན་མཐོ་ལྷ་མིའི་གོ་འཕང་ཐོབ་ཕྱིར་དགེ་བ་བཅུ་སྒྲུབ་པ་ དང་། མི་དགེ་བཅུ་སྤོང་བའི་དམ་བཅའ་གནང་བ། འགའ་ཞིག་གིས་ཇི་སྲིད་བོད་དོན་བདེན་མཐའ་མ་གསལ་གྱི་བར་དུ་ལྷོད་སྡོད་མི་བྱེད་ པའི་དམ་བཅའ་གནང་བ། དེ་བཞིན་འགའ་ཞིག་གིས་༸གོང་ས་མཆོག་གིས་ཅི་གསུངས་བཀའ་བསྒྲུབ་ཞུ་རྒྱུའི་དམ་ བཅའ་གནང་བ་སོགས་དུ་མ་ཞིག་བྱུང་ཡོད།་ ཡང་འགའ་ཞིག་ལོ་ནའི་བབ་དང་། ཁོར་ཡུག་གནས་སྟངས། བསམ་བློའི་གནས་ཚད་སོགས་རྒྱུ་མཚན་དུ་མའི་རྐྱེན་གྱིས་དམ་བཅའ་གང་ཡང་མ་གནང་མཁན་ ཡང་ཉུང་ཉུང་ཡིན་མདོག་ཁ་པོ་མ་རེད།
འོན་ཀྱང་རང་ཡུལ་གངས་ཅན་གྱི་ལྗོངས་དེར་རྒྱ་ནག་གིས་བཙན་འཛུལ་བྱས་ཏེ་མི་ལོ་དྲུག་ཅུ་དང་། བཙན་བཟུང་བྱས་ཏེ་མི་ལོ་ལྔ་བཅུ་འཁོར་བའི་སྐབས་དང་། ལྷག་པར་དུ་སྔ་ལོ་གསུམ་བཅུའི་དུས་དྲན་ནས་བཟུང་སྟེ་བོད་རྒྱ་ཁྱབ་ཏུ་བོད་མི་ཚོས་རང་གི་མི་རིགས་དང་རྒྱལ་ཁབ་ཀྱི་དོན་དུ་རང་སྲོག་ཚུན་བློས་གཏོང་གིས་ཞི་ རྒོལ་ལོ་རྒྱུས་ཀྱི་སྙིང་དོན་ལྡན་པ་གནང་རྗེས་སུ་རྒྱ་ནག་གཞུང་གིས་སྙིང་རྗེ་ཡ་ང་སྤུ་ཙམ་མེད་པར་དྲག་གནོན་བྱས་ཏེ། ཉེས་མེད་བོད་མི་གྲངས་ལས་འདས་པ་གསོད་རྡུང་བཙོན་འཇུག་བྱས་དང་བྱེད་བཞིན་པ་ སོགས་རྒྱུ་མཚན་སྣ་མང་ལ་བརྟེན་ནས་གཞིས་བྱེས་བོད་མི་ཡོངས་ནས་ས་གླང་ལོ་འདིར་ལོ་གསར་གྱི་སྤྲོ་སྐྱིད་གནང་རྒྱུའི་ཚབ་ཏུ་བོད་ནང་འདས་གྲོངས་སུ་གྱུར་བ་དང་། བཙོན་དུ་ཡོད་པ། དེ་བཞིན་དྲག་གནོན་དམ་དྲག་ཇི་བྱས་ལ་ལྟོས་མེད་ཀྱིས་རང་གི་རྒྱལ་ཁབ་དང་མི་རིགས་ཀྱི་དོན་དུ་ཞི་རྒོལ་འཐབ་རྩོད་གནང་དང་གནང་བཞིན་པ་རྣམས་ལ་བསྔོ་སྨོན་དང་། རྒྱབ་སྐྱོར་། གདུང་སེམས་མཉམ་སྐྱེད་མཚོན་ཕྱིར་༢༠༠༩ འདི་བཞིན་བོད་ཀྱི་ལོ་ནག་ཏུ་རྩི་སྲུང་བྱེད་རྒྱུར་གཞིས་བྱེས་མང་ཚོགས་གྲུ་ནང་ བསམ་པ་གཅིག་མཐུན་བྱུང་བ་དང་ལྷན་དུ་མི་ལོ་ལྔ་བཅུ་འཁོར་བའི་གསུམ་བཅུའི་དུས་ དྲན་གྱི་ཉིན་མོ་འདིར་གངས་ཅན་པ་མི་རེ་ངོ་རེ་ནས་དམ་བཅའ་གསར་པ་ཞིག་འཇོག་དགོས་པ་གལ་ཆེར་མངོན། དེ་ཡང་ཇི་སྲིད་བོད་ལ་བདེ་སྐྱིད་ཀྱི་ཉི་མ་མ་ཤར་གྱི་བར་དུ་གངས་ཅན་པ་ཡོངས་ ཀྱིས་།
ཀླད་པའི་དཀྱིལ་འཁོར་མ་ཞིག་བར་དུ།།
རང་ཡུལ་བསམ་པའི་དམ་བཅའ་དགོས།།
སྲོག་གི་རྒྱུ་བ་མ་ཆད་བར་དུ།།
རང་ཡུལ་སྲུང་བའི་དམ་བཅའ་དགོས།།
ལྕེ་ཡིི་གཡོ་འགུལ་མ་འགག་བར་དུ།།
རང་སྐད་སྤྱོད་པའི་དམ་བཅའ་དགོས།།
འབྲི་སྙུག་སྣག་ཚ་མ་རྫོགས་བར་དུ།།
བོད་དོན་འབྲི་བའི་དམ་བཅའ་དགོས།།
ལག་པའི་ནུས་རྩལ་མ་ཉམས་བར་དུ།།
བོད་དོན་བྱེད་པའི་དམ་བཅའ་དགོས།།
མིག་གི་རྒྱང་ཤེལ་མ་ཆག་བར་དུ།།
བོད་དོན་ལྟ་བའི་དམ་བཅའ་དགོས།།
རྐང་པའི་འཁོར་ལོ་མ་རྫོགས་བར་དུ།།
བོད་དོན་འགྲིམ་པའི་དམ་བཅའ་དགོས།།
མདང་སྐྱེས་བྱིས་པའི་རྣ་བ་ཕྲ་ཡང་།།
བོད་དོན་ཐོས་པའི་དམ་བཅའ་དགོས།།
རྣམ་གཡེངས་དྲི་བཟས་མདའ་མཚོན་སྣུན་ཀྱང་།།
བོད་དོན་དྲན་པའི་དམ་བཅའ་དགོས།།
གྲུབ་ཆེན་ཕུག་ཏུ་ཏིང་འཛིན་མངར་ཡང་།།
བོད་དོན་སྒོམ་པའི་དམ་བཅའ་དགོས།།
མཁས་དབང་ཚོགས་སུ་ངག་རྩལ་མཐོ་ཡང་།།
བོད་དོན་ཤོད་པའི་དམ་བཅའ་དགོས།།
མི་དབང་མཐོན་པོའི་ཁྲི་ལ་བཞུགས་ཀྱང་།།
བོད་དོན་སྤྱོད་པའི་དམ་བཅའ་དགོས།།
སྤྲང་ཕྲུག་ཉིན་རེའི་བཟས་ལ་རྒྱུ་ཡང་།།
བོད་དོན་མི་བརྗེད་དམ་བཅའ་དགོས།།
འགྲོ་བའི་དོན་དུ་རྫོགས་སངས་རྒྱས་ཀྱང་།།
བོད་དོན་སྟོན་པའི་དམ་བཅའ་དགོས།།
བྱང་ཆུབ་སེམས་མཆོག་དངོས་སུ་སྐྱེས་ཀྱང་།།
བོད་མིར་བྱམས་པའི་དམ་བཅའ་དགོས།།
མི་ཡུལ་ལུང་པའི་རྩྭ་ཁ་བཟང་ཡང་།།
རང་ཡུལ་མི་བརྗེད་དམ་བཅའ་དགོས།།
གཞིས་བྱེས་གཉིས་སུ་གྱེས་པར་གྱུར་ཀྱང་།།
མྱུར་དུ་འཛོམས་རྒྱུའི་དམ་བཅའ་དགོས།།
སྐར་མ་ལྔ་ཅན་དམར་དར་ཕབ་སྟེ།།
སེང་དར་བསྒྲེངས་པའི་དམ་བཅའ་དགོས།། །།