ང་རང་བཙན་བྱོལ་དུ་འབྱོར་ནས་ལོ་ངོ་མང་བོ་ཞིག་འདི་ལྟར་འབུད་སོང་། ངས་ཀྱང་ཞིབ་འདང་རབ་དང་རིམ་ཞིག་བརྒྱབ་མྱོང་ཡོད་པ་མ་ཟད། གྲོགས་པོ་དང་གྲོགས་མོ་ངོ་ཤེས་རྒན་གཞོན་མང་བོ་ཞིག་དང་ལྷན་དུ་སྐད་ཆ་ཡང་རང་གི་ཚོད་ཀྱི་མི་ཉུང་བ་ཞིག་གླེང་ཁུལ་བྱས་པ་རེད། འོན་ཀྱང་། ངས་ནམ་རྒྱུན་དུ་རྣ་ལམ་དུ་མི་འདོད་ཀྱང་ཐོས་དེ་འོང་བ་ནི་བཙན་བྱོལ་བས་སློབ་གསོའི་ཁ་ཕྱོགས་ནོར་གྱི་ཡོད་པ་དེ་རེད། མི་སུས་ང་ལ་སྐད་ཆ་དྲིས་ཀྱང་ད་ནི་ཁྱེད་རང་གི་དབྱིན་ཡིག་གི་ཤེས་ཚད་གང་འདྲ་ཡོད་ཟེར་བ་དང་ཁྱེད་རང་གི་དབྱིན་སྐད་ཡག་པོ་ཤེས་ཀྱི་ཡོད་མེད་དང་ཁྱེད་རང་གི་དབྱིན་ཡིག་སྤྱོང་དེ་ཕྱི་རྒྱལ་གང་རུང་ཞིག་ལ་འགྲོ་ཐབས་བྱོས་དེ་རང་གི་ལྟོ་གོས་སྲ་ཐག་ཐག་ཞིག་བཟོ་དགོས་ཀྱི་ཡོད་པའི་བསྐོར་གླེང་མཁན་ལས་ཁྱེད་རང་གི་བོད་ཡིག་གི་ཤེས་ཚད་མཐོ་རུ་བཏང་ནས་བོད་པ་ཚང་གི་སྐད་ཡིག་གི་ཞབས་འདེགས་ཞུ་ཨེ་ཐུབ་ལྟ་དགོས་ཀྱི་ཡོད་པ་རེད་ཟེར་ནས་གླེང་མཁན་ཞིག་ལ་ཕལ་ཆེར་ང་རང་ཐུག་མ་སོང་ཟེར་ནས་བཤད་ཀྱང་མི་ཆོག་པ་མེད་ལ། ང་རང་གིས་རང་གི་ཤེས་མི་ཤེས་ལ་མ་བལྟས་པར་ཤི་འཐམ་རོ་འཐམ་བྱས་དེ་བོད་ཡིག་གི་དེབ་ཀློག་པ་དང་བོད་ཡིག་འབྲི་བ་སོགས་རང་གི་ཐུབ་ཚོད་ཀྱིས་ཉིན་མ་རེ་རེ་བཞིན་བསྐྱེལ་ཐུབ་བྱས་མོད། ད་དུང་ང་རང་གི་གྲོགས་པོ་ངོ་ཤེས་མི་ཤེས་གང་མང་གིས་ད་ཁྱེད་རང་འདི་ལྟར་བསྡད་དེ་རང་གི་རྐང་བའི་སྟེང་དུ་འང་ལངས་ཐུབ་ཀྱི་མ་རེད་ཟེར་བ་ལས་ཁྱེད་རང་གི་དེ་ཡག་པོ་རེད་ཟེར་མཁན་གང་ཡང་བྱུང་མ་སོང་། དེ་མཚུངས་ཀྱིས་ང་རང་གི་ཉེ་འཁོར་དང་ཁོར་ཡུག་གི་སྐད་ཆ་ཡང་དེ་མཚུངས་ཀྱི་བྱིས་པ་སློབ་གྲ་འགྲིམ་མཁན་དག་ལ་སློབ་གསོ་བྱེད་པ་གོ་དུས་ཀྱང་དེ་ལྟར་རེད། དབྱིན་ཡིག་ཡག་པོ་སྤྱོང་དགོས་ཀྱི་ཡོད་པ་རེད། དབྱིན་སྐད་ཤེས་མི་ཤེས་གླེང་བ་ལས་བོད་ཡིག་གི་ཤེས་ཚད་མཐོ་རུ་འགྲོ་བཞིན་ཡོད་མེད་དང་བོད་ཡིག་ནི་བོད་ཀྱི་བླ་སྲོག་ཡིན་པས་བོད་ཡིག་མེད་པར་བོད་པ་ཟེར་བ་ནི་ཤིང་སྡོང་སྐམ་པོ་ལྟ་བུ་ཞིག་ཆགས་ཀྱི་ཡོད་པའི་བསྐོར་གླེང་ནས་རང་གི་བྱིས་པ་དག་ལ་བོད་ཡིག་ལ་ཤུགས་རྒྱག་དགོས་པ་དང་སློབ་གྲ་དག་ན་བོད་ཡིག་གི་དགེ་རྒན་ཚད་ལྡན་ཡོད་མེད་སོགས་འདྲི་མཁན་ནི་ཉིན་སྐར་གྱི་སྐར་མ་ལྟ་བུ་ཞིག་ཡིན་པ་གླེང་མཁན་ནི་ང་རང་གི་ཐོས་མ་སོང་ལ། བོད་ཡིག་ཤེས་མཁན་ལས་དབྱིན་ཡིག་དང་དབྱིན་སྐད་ཤེས་མཁན་ལ་གཙུག་ཆེན་བྱེད་པ་ང་རང་གི་རྟག་དུ་མིག་གིས་མཐོང་བ་ནས་རྣ་བའི་ཐོས་དེ་འོང་དུས་བཙན་བྱོལ་བས་སློབ་གསོའི་ཁ་ཕྱོགས་གཏན་ནས་ནོར་བཞིན་ཡོད་པ་ཤེས་ཀྱི་འདུག ད་ལྟ་ཡང་བཙན་བྱོལ་ཁྲོད་དུ་བོད་མི་མི་ཉུང་བ་ཞིག་གིས་རང་གི་གང་ཐུབ་ཅི་ཐུབ་ཀྱིས་བོད་ཡིག་ནི་བོད་ཀྱི་ཚེ་སྲོག་དང་གཅིག་མཚུངས་ཡིན་པར་གླེང་བཞིན་ཡོད་ན་ཡང་། བོད་ཡིག་ལ་བཟུང་བའི་གོ་གནས་ནི་ད་དུང་ཡང་སྔར་ལས་ཇེ་སྡུག་དུ་འགྲོ་བཞིན་འདུག བོད་ཡིག་ཤེས་མཁན་དག་ལ་བོད་ཡིག་གི་ལྟོ་གོས་ཡང་མི་སྤྲོད་པའི་བསླབ་བྱ་རྒྱག་མཁན་ནི་ཇེ་མང་དུ་སོང་དེ་བོད་ཡིག་ལས་དབྱིན་ཡིག་སྤྱོང་བར་སྐུལ་མ་བྱེད་མཁན་ནི་སྔར་ལས་ཇེ་མང་དུ་འགྲོ་བཞིན་འདུག་ལ། བོད་ཡིག་གི་ཚགས་ཤོག་དང་དུས་དེབ། དྲ་རྒྱ་སོགས་ཀློག་པ་ལས་དབྱིན་ཡིག་གི་ཚགས་ཤོག་དང་དུས་དེབ། དབྱིན་ཡིག་གི་དྲ་རྒྱ་ལ་དོ་སྣང་བྱེད་མཁན་ནི་བྱིས་པ་ལོ་ཆུང་ཡན་ནས་དྲ་ཁང་ནང་དུ་མཐོང་རྒྱུ་འདུག འདི་ལྟར་བཙན་བྱོལ་བས་མིག་ནང་དུ་བོད་ཡིག་ལས་དབྱིན་ཡིག་གི་གོ་རིམ་མཐོ་བ་དང་བོད་ཡིག་ལས་དབྱིན་ཡིག་ཤེས་མཁན་ལ་བརྩི་མཐོང་ཆེ་བའི་ནད་་ཚ་དེ་ནས་ཇེ་སྡུག་དུ་འགྲོ་བཞིན་ཡོད།
མུ་མཐུད་དུ་འགོད་རྒྱུ་ཡིན།
