སྐྱབས་བཅོལ་ནང་གི་མི་ལོ་ལྔ་བཅུའི་དུས་དྲན།

༄༅། ། ཕྱི་ལོ་ ༢༠༠༩ ཕྱི་ཟླ་ ༣ ཚེས་ ༡༠ ནས་ཕྱི་ལི་ ༢༠༡༠ ཕྱི་ཟླ་ ༣ ཚེས་ ༡༠ བར་བོད་མིའི་ཞི་བའི་གྱེན་ལངས་དང་གཞུང་མང་བཙན་བྱོལ་དུ་འབྱོར་ནས་ལོ་ལྔ་བཅུ་འཁོར་བའི་དུས་དྲན་སྲུང་བརྩི་བྱ་ཕྱོགས་འཛིན་སྐྱོང་གི་རྩ་འཛིན་ལམ་སྟོན།

དང་པོ། ངོ་སྤྲོད།
ཕྱི་ལོ་ ༢༠༠༩ ཕྱི་ཟླ་ ༣ ཚེས་ ༡༠ ཉིན་བོད་མི་རྣམས་ཀྱིས་རྒྱ་དམར་གྱི་བཙན་གནོན་ལ་ཞི་བའི་ངོ་རྒོལ་དང༌། སྤྱི་ནོར་༧གོང་ས་མཆོག་༧སྐྱབས་མགོན་རིན་པོ་ཆེ་མཆོག་གིས་དབུས་བོད་གཞུང་དགའ་ལྡན་ཕོ་བྲང་དང༌། བོད་མི་འབུམ་ལ་ཉེ་བ་རྒྱ་གར་དུ་སྐྱབས་བཅོལ་དུ་འབྱོར་ནས་ལོ་ལྔ་བཅུ་ཐམ་པ་ཧྲིལ་པོར་འཁོར་རྒྱུ་ཡིན་ཞིང༌། དུས་ཡུན་དེའི་རིང་གཞིས་ལུས་བོད་མི་རྣམས་དམྱལ་བ་མི་ཡུལ་དུ་མྱངས་པ་ལྟ་བུའུ་སྡུག་སྦྱོང་མི་བཟད་པའི་འོག་གནས་དགོས་བྱུང་བ་མ་ཟད། བོད་གངས་ཅན་ལྗོངས་ཀྱི་སྣོད་བཅུད་ཡོངས་ལ་བསམ་བརྗོད་ལས་འདས་པའི་གཏོར་བཤིག་དང༌། བཙན་བྱོལ་དུ་འབྱོར་ནས་བོད་མི་རྣམས་ཀྱང་ཟས་ཀོས་གནས་མལ་གྱིས་ཕོངས་པ་དང་ཡུལ་ལུང་ས་ཆ་མ་འཕྲོད་པ་སོགས་ཀྱི་ངལ་བ་ཇི་སྙེད་ཅིག་མྱངས་དགོས་བྱུང་བ་བཅས་བོད་ཀྱི་བྱུང་རབས་སུ་མ་གྲགས་པའི་གནས་ཚུལ་ཐ་ཞན་བྱུང་ཡོད། ཕྱོགས་གཞན་ནས་གཞིས་ལུས་བོད་མི་རྣམས་ཀྱིས་རྒྱལ་ཞེན་ལྷག་བསམ་འདོར་བ་མེད་པར་ལུས་སྲོག་ལྟོས་མེད་ཀྱིས་མི་རིགས་ཀྱི་རྩ་དོན་དམ་འཛིན་ཐོག ཐབས་བརྒྱ་བྱུས་སྟོང་གིས་དངོས་ཤུགས་བརྒྱུད་གསུམ་ནས་བོད་ཀྱི་ཆོས་དང༌། རིག་གཞུང༌། སྐད་ཡིག ཡུལ་གོམས་གཤིས་ལུགས་བཅས་མ་ཉམས་རྒྱུན་གནས་ཐུབ་ཐབས་བྱས་པ་ལ་བརྟེན་ནས་ད་ལྟའང་དེ་དག་རྩ་མེད་དུ་བཏང་མ་ཐུབ་པར་གནས་ཐུབ་པ་བྱུང་བ་དང༌། དུས་ནས་དུས་སུ་རྒྱ་མིའི་བཙན་གནོན་ལ་ཞི་བའི་ངོ་རྒོལ་རྒྱུན་བསྟུད་ཀྱིས་བོད་དོན་བདེན་མཐའ་གསལ་ཐབས་ཀྱི་ལས་འགུལ་གོང་མཐོར་སྤེལ་བཞིན་པ་མ་ཟད། ལྷག་བསམ་འདི་ལོའི་ཕྱི་ཟླ་ ༣ པའི་ཚེས་ ༡༠ ནས་བཟུང་ཆོལ་གསུམ་བོད་ས་ཡོངས་ལ་སྔར་མ་གྲགས་པའི་ཞི་བའི་གྱེན་ལངས་ཀྱིས་བོད་མི་བརྒྱ་ཕྲག་མང་པོས་ལུས་སྲོག་བཏང་སྟེ་རྒྱལ་སྤྱིའི་ནང་བོད་ཀྱི་ད་ལྟའི་གནས་བབ་གསལ་སྟོན་ཐུབ་པ་དང༌། བྱེས་འབྱོར་བོད་མི་རྣམས་ཀྱིས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་བླ་ན་མེད་པའི་དབུ་ཁྲིད་འོག་གཞིས་ཆགས་དང་ ། སློབ་གྲྭ། དགོན་སྡེ། རིག་གཞུང་དང་བཟོ་ལས་བསྟི་གནས་སོགས་གསར་བསྐྲུན་གྱིས་ཆོས་དང་རིག་གཞུང༌། ཤེས་ཡོན། འཕྲོད་བསྟེན། མང་ཚོགས་ཀྱི་འཚོ་ཐབས་སོགས་སྒོ་ཀུན་ནས་བཟང་ཕྱོགས་ཀྱི་ཡར་རྒྱས་བློ་ཡུལ་ལས་འདས་པ་བྱུང་ཡོད་པའི་ཁར། འཛམ་གླིང་ཤར་ནུབ་ཀྱི་ཡུལ་གྲུ་ཀུན་ཏུ་བོད་བརྒྱུད་ནང་བསྟན་གྱི་སྲོལ་རྒྱུན་ཁྱབ་བརྡལ་གྱིས་འགྲོ་བ་ཡོངས་ལ་འཕྲལ་ཡུན་གྱི་ཕན་བདེ་རླབས་པོ་ཆེ་བསྐྲུན་ཐུབ་པ་དང༌། སྤྱི་ནོར་༧གོང་ས་༧སྐྱབས་མགོན་ཆེན་པོ་ཆེའི་སྐུའི་གསང་བ་གསུམ་གྱི་མཛད་འཕྲིན་ཕྱོགས་ཀུན་ཏུ་རྒྱས་ནས་འཇིག་རྟན་ཞི་བདེའི་དེད་དཔོན་ཆེན་པོར་བཞེངས་ཏེ་མིའི་གཞི་རིམ་གྱི་བཟང་སྤྱོད་དང༌། ཆོས་ལུགས་ཕན་ཚུན་གྱི་མཐུན་འབྲེལ། ཁོར་ཡུག་སྲུང་སྐྱོབ་སོགས་མདོར་ན་བྱམས་བརྩེའི་སྙིང་པོ་ཅན་གྱི་ཀུན་ཁྱབ་འགན་འཁུར་ལྷག་བསམ་སྐྱེན་ཚུལ་འགྲོ་བ་ཡོངས་ལ་རྒྱ་ཁྱབ་ཏུ་ལམ་སྟོན་བཀའ་དྲིན་བསྩལ་བ་སོགས་གསང་བ་བ་བསམ་གྱིས་མི་ཁྱབ་པའི་རྣམ་ཐར་ངོ་འཚར་ཅན་གྲངས་ལས་འདས་པ་ཞིག་བདག་གིར་མཛད་པར་མ་ཟད། བཙན་བྱོལ་བོད་མིའི་ཆབ་སྲིད་ཀྱི་རང་བཞིན་ཡང་དག་པའི་མང་གཙོའི་ལམ་སྲོལ་དུ་བསྒྱུར་གནང་མཛད་པ་དང༌། བོད་མིའི་བདེན་པའི་འཐབ་རྩོད་འཚེ་མེད་ཞི་བའི་ལམ་ཕྱོགས་སུ་བསྒྱུར་གནང་མཛད་པ་སོགས་བཟང་ཕྱོགས་ཀྱི་གྲུབ་འབྲས་ཀྱང་བསམ་ཡུལ་ལས་འདས་པ་ཞིག་ཞིག་བྱུང་ཡོད་པ་བཅས་ཕྱི་བལྟས་བསྐྱར་ཞིབ་ཀྱིས་འགྱོད་སྡོམ་འོས་པ་ལ་འགྱོད་སྡོམ་དང༌། ཡི་རངས་འོས་པ་ལ་ཡི་རངས། དགའ་སྤྲོ་དང་སྤོབས་པ་ཆེན་པོས་འདས་པའི་བྱུང་རབས་ལས་བསླབ་བྱ་བླངས་རྒྱུ་དང༌། འབྱུང་འཆར་ཡང་སྤྱི་ནོར་༧གོང་ས་༧སྐྱབས་མགོན་ཆེན་པོས་རེ་བ་བཟང་ས་དང་གྲ་སྒྲིག་སྡུག་ས་ནས་བྱེད་དགོས་པའི་བཀའ་སློབ་ཕེབས་དགོངས་ལྟར། འབྱུར་འགྱུར་གཞུང་མང་གཉིས་ཐད་ནས་བོད་མི་རིགས་ཀྱི་ཕན་བདེ་སྒྲུབ་ཐབས་ཀྱི་ལས་རིམ་སྤེལ་ཕྱོགས་ཇི་དགེ་བསམ་གཞིགས་བྱ་རྒྱུ་བཅས་ཀྱི་ཆེད། ཕྱི་ལོ་ ༢༠༠༩ ཟླ་ ༣ ཚེས་ ༡༠ ནས་ཕྱི་ལོ་ ༢༠༡༠ ཟླ་ ༣ ཚེས་ ༡༠ བར་ལོ་འཁོར་གཅིག་རིང་བོད་མི་བཙན་བྱོལ་དུ་འབྱོར་ནས་མི་ལོ་ལྔ་བཅུ་ཐམ་པ་འཁོར་བའི་རྗེས་དྲན་དོན་ལྡན་ཞིག་བཙན་བྱོལ་བོད་གཞུང་ལས་ཁུངས་མ་ལག་དང་བཅས་པས་འཆར་གཞི་དང་ལྡན་པའི་སྒོ་ནས་སྲུང་བརྩི་བྱ་རྒྱུ་ཧ་ཅང་གལ་ཆེར་བརྟེན། དེའི་ཆེད་སྲུང་བརྩི་ཞུ་ཕྱོགས་ལྷག་ཆད་ཟློས་གསུམ་གྱི་སྐྱོན་དང་བྲལ་བ་ཞིག་དགོས་གལ་ཆེ།

གཉིས་པ། དམིགས་ཡུལ།
དུས་ཚིགས་རྗེས་དྲན་སྲུང་བརྩི་བྱ་དགོས་ཀྱི་དམིགས་ཡུལ་ཁག་ནི།
ཀ༽ ཕྱི་ལོ་ ༡༩༥༩ ལོར་བྱུང་བའི་བོད་ཀྱི་གོད་ཆགས་དང་དེའི་རྗེས་འབྲས་བོད་མིས་བསམ་བརྗོད་ལས་འདས་པའི་སྡུག་སྦྱོང་ཇི་མྱོང་བཅས་ལ་བསྐྱར་ཞིབ་གཏིང་ཟབ་ཅིག་བྱ་རྒྱུ་དང༌།
ཁ༽ སྐྱབས་བཅོལ་དུ་འབྱོར་བ་ནས་བཟུང་བཙན་བྱོལ་སྒྲིག་འཛུགས་དང་མང་ཚོགས་བཅས་ཀྱི་ཆབ་སྲིད་དང༌། ཆོས་རིག ཤེས་ཡོན། སྤྱི་ཚོགས། དཔལ་འབྱོར་སོགས་ཀྱི་འཕེལ་རིམ་དང་གནས་བབ་ལ་བསྐྱར་ཞིབ་ཀྱིས་བོད་མིའི་ཞན་ཆ་དང༌། ནུས་སྟོབས། གོ་སྐབས། ཀླན་ཀ་བཅས་ངོས་འཛིན་ཐུབ་པ་བྱ་རྒྱུ།
ག ༽སྤྱི་ནོར་༧གོང་ས་༧སྐྱབས་མགོན་ཆེན་པོའི་བླ་ན་མེད་པའི་མཛད་འཕྲིན་ལས་འཛམ་གླིང་ཁྱོན་ཡོངས་སུ་བོད་བརྒྱུད་ནང་བསྟན་གྱི་ལེགས་བྱང་ཁྱབ་སྤེལ་གྱིས་སེམས་ཅན་ཡོངས་ཀྱི་བདེ་རྩར་རླབས་ཆེན་གྱི་དོན་ཕན་དང༌། བོད་རིགས་ཆིག་སྒྲིལ། མང་གཙོ་དང་འཚེ་མེད་ཞི་བའི་ལྟ་གྲུབ་གོང་འཕེལ་སོགས་བསམ་གྱིས་མི་ཁྱབ་པའི་གྲུབ་འབྲས་ཀག་ངོས་འཛིན་བྱ་རྒྱུ།
ང༽འདས་པའི་ལོ་ལྔ་བཅུའི་ཉམས་མྱོང་ལས་མ་འོངས་པའི་ལས་འཆར་སྒྲིག་པྱོགས་ལ་བསམ་ཞིབ་བྱ་རྒྱུ་བཅས་ཡིན།

གསུམ་པ། དུས་དྲན་སྲུང་བརྩི་ཞུ་ཕྱོགས།
གལ་ཆེའི་དུས་དྲན་འདི་སྲུང་བརྩི་ཞུ་ཕྱོགས་ནི་དགའ་སྟོན་སྤྲོ་སྐྱིད་དང༌། འཆར་ཅན་ཆོ་ག་ཕྱག་ལེན་ལྟ་བུ་མ་ཡིན་པར་བོད་མིའི་བཟོད་དཀའི་དཀའ་སྡུག་ཇི་མྱོང་གི་གནས་བབ་གཞོན་སྐྱེས་མི་རབས་གསར་པའི་ཡིད་ངོར་འཇགས་ཐབས་དང༌། དེ་ལ་བརྟེན་ནས་བོད་དོན་བདེན་མཐའ་གསལ་ཐབས་ཀྱི་ལས་འགུལ་ཐོག་སྤྱི་ནོར་༧གོང་ས་༧སྐྱབས་མགོན་ཆེན་པོའི་ཡང་དག་པའི་ལམ་སྟོན་འོག་ཤར་བསྐྱོད་ཀྱིས་འཚེ་མེད་ཞིའ་བའི་ལྟ་སྤྱོད་ལ་ཡིད་ཆེས་འགྱུར་མེད་ཀྱི་ངང་ནས་བོད་ཀྱི་བདེན་པའི་འཐབ་རྩོད་རྒྱུན་སྐྱོང་བྱ་རྒྱུའི་སྙིང་སྟོབས་དང་ཆོད་སེམས་སྤེལ་ཐབས། དེ་བཞིན་གཞིས་ལུས་བོད་མི་རྣམས་ཀྱི་སྙིང་སྟོབས་ལ་ཡི་རངས་རྒྱབ་སྐྱོར་མཚོན་ཐུབ་པའི་ལས་རིམ་སྤེལ་དགོས། ལས་རིམ་དེ་དག་ཀྱང་རྒྱས་སྤྲོས་དང་འགྲོ་གྲོན་ཆེ་བ་མ་ཡིན་པ། དེ་བཞིན་འགྲན་བསྡུར་དང༌། འཚེ་མེད་རྣམ་པ་ཅན་མ་ཡིན་པ། ལས་གཞི་རེ་རེ་བཞིན་འགྲོ་བ་མིའི་ཕན་བདེ་དང༌། མཉམ་མཐུན། ཁོར་ཡུག་སྲུང་སྐྱོབ། བོད་ཀྱི་རྩ་དོན་བཅས་ལ་འཕྲལ་ཡུན་དུ་དོན་ཕན་ཡོད་པ་ཞིག་དགོས།
ཁ་ དུས་དྲན་གྱི་མཚོན་རྟགས་དང༌། འབོད་སྒྲ་གོ་སྒྲིག་ཚོགས་ཆུང་གིས་འཆར་འབུལ་ལྟར། བཀའ་ཤག་ནས་གཏན་འབེབས་ཀྱིས་ཡོངས་ཁྱབ་བེད་སྤྱོད་བྱ་རྒྱུ།

བཞི་བ། དུས་དྲན་སྲུང་བརྩིའི་ལས་རིམ།
ཆོས་ཕྱོགས།
ཀ༽ དུས་དྲན་འགོ་འཛུགས་དང་མཇུག་བསྡོམས་གཉིས་ཀར་༧གོང་ས་༧སྐྱབས་མགོན་ཆེན་པོར་བོད་གཞིས་བྱེས་གཞུང་མང་ལྷ་མི་ཡོངས་ནས་བརྟན་བཞུགས་རྒྱས་པ་རེ་བསྟར་འབུལ་ཞུ་རྒྱུ་དང༌། དེ་ཡང་དབུ་འཛུགས་ཀྱི་བརྟན་བཞུགས་ ༢༠༠༩ ཕྱི་ཟླ་ ༣ ཚེས་ ༩ འམ་ ༡༨ གང་རུང་ལ་འཁེལ་བ་བྱ་རྒྱུ། མཐའ་མའི་བརྟན་བཞུགས་ ༢༠༡༠ གསུམ་བཅུའི་དུས་དྲན་གྱི་སྔོན་རྗེས་གང་རུང་ལ་འཁེལ་བ་བྱ་རྒྱུ། ཆོས་རིག
ཁ།༽བཙན་བྱོལ་བོད་གཞུང་བཀའ་ཤག་གིས་༧གོང་ས་༧སྐྱབས་མགོན་ཆེན་པོར་གསོལ་འདེབས་ཞུས་ཟིན་པའི་གསུང་རྩོམ་དང༌། གསུང་ཆོས་ཁག་དུས་དྲན་གྱི་ལོ་འཁོར་འདིའི་ནང་ཡོང་ཐབས་གསོལ་འདེབས་ཞུ་རྒྱུ། བཀའ་ཤག ཆོས་རིག
ག༽ རྒྱལ་སྤྱིའི་བོད་བརྒྱུད་ནང་བསྟན་གྱི་ཚོགས་ཆེན་རྒྱས་པ་ཞིག་འབྲེལ་ཆགས་རྒྱལ་ཁབ་གང་རུང་ནང་བསྐོང་ཚོགས་ཐུབ་ཐབས་བྱ་རྒྱུ། ཆོས་རིག ཕྱི་དྲིལ།
ང༌། བོད་ཀྱི་གཡུང་དྲུང་བོན་དང༌། ནང་བསྟན་ཆོས་བརྒྱུད་ཆེན་པོ་བཞིའི་ཆོས་ཚོགས་རྒྱས་པ་ཞིག་ལོ་འཁོར་འདིའི་ནང་ཚོགས་བསྐོང་བྱ་རྒྱུ་དང༌། དེའང་ཐོག་མའི་བརྟན་བཞུགས་སྐབས་དང་བསྟུན་ཐུབ་ཐབས་བྱ་རྒྱུ། ཆོས་རིག
ཆབ་སྲིད་ཀྱི་སྤྱི་ཚོགས།
ཀ༽ ཕྱི་ལོ་༢༠༠༩ ཟླ་ ༣ ཚེས་ ༣༡ ཉིན་རྒྱ་གར་གཞུང་མང་ཡོངས་ལ་གཞིས་བྱེས་བོད་མི་ཚང་མས་ཐུགས་རྗེ་ཆེ་ཞུའི་རྣམ་འགྱུར་མཚོན་སླད་མང་ཚོགས་ཀྱི་མཛད་སྒོ་རྒྱས་པ་ཞིག་རྒྱ་གར་གྱི་རྒྱལ་ས་ལྡི་ལིར་བྱ་རྒྱུ། དེ་བཞིན་བོད་མིའི་གནས་ཡུལ་མངའ་སྡེ་ཚང་མའི་ནང་རིམ་བཞིན་གོ་སྒྲིག་བྱ་རྒྱུ། མཛད་སྒོའི་ལས་རིམ་དང༌། ལྷག་པར་ཐུགས་རྗེ་ཆེ་ཞུ་མཚོན་པའི་ལས་གཞྀ་ཇི་འདྲ་ཞིག་རྩོམ་ན་དགེ་མཚན་ཆེ་མིན་གནད་ཡོད་མི་སྣ་ཁག་ལ་གྲོས་འདྲི་དང༌། བསམ་འཆར་བསྡུས་ཏེ་ལས་རིམ་བསྒྲིག་རྒྱུ། བཀའ་ཤག ཕྱི་དྲིལ། ལྡི་ལི་དོན་གཅོད།
ཁ༽ རྒྱལ་སྤྱིའི་ནང་བོད་དོན་ཐོག་ཐུགས་སྣང་རྒྱབ་སྐྱོར་ཡོད་པའི་གཞུང་མང་སྤྱི་དང༌། ཁྱད་པར་བོད་དོན་རྒྱབ་སྐྱོར་ཚོགས་པ་དང་རོགས་ཚོགས་ཡོངས་ལ་ཐུགས་རྗེ་ཆེ་ཞུ་དང་ཆབས་ཅིག འབྱུང་འགྱུར་རྒྱབ་སྐྱོར་མུ་མཐུད་ཡོངས་བའི་འབོད་བསྐུལ་བྱ་རྒྱུ་བཅས་ཀྱི་ཆེད་འོས་འཚམས་ཀྱི་ལས་རིམ་བསྒྲིག་རྒྱུ། ཕྱི་དྲིལ།
ག༽ བོད་གཞུང་ལས་ཁུངས་སོ་སོའི་ཁྱབ་ཁོངས་སུ་ཡོད་པའི་ཆོས་སྡེ་ཁག་དང༌། གཞུང་སྒེར་ཆོས་གསུམ་གྱི་སློབ་གྲྭ་ཁག་ བོད་རིགས་མཐོ་རིམ་སློབ་ཕྲུག་འདུས་སྡོད་ཡོད་ས་ཁག ཆེས་མཐོའི་སལྦ་ཁང་དང་སྦྱོང་བརྡར་ཁང་ཁག བོད་མིའི་གཞིས་ཆགས་ཁག འཕྲོད་བསྟཻན་སྨན་ཁང་ཁག གཞུང་གི་འཛིན་སྐྱོང་བཏང་འཛིན་འོག་ཡོད་པའི་རང་སྐྱོང་སྡེ་ཚན་ཁག་དང༌། མཉམ་འབྲེལ་ཅན་གྱི་རང་སྐྱོང་སྡེ་ཚན་ཁག་བཅས་ནས་ལྔ་བཅུའི་དུས་དྲན་ལ་དམིགས་པའི་དམིགས་བསལ་ལས་རིམ་འོས་འཚམས་ཤིག་རང་ངོས་ནས་འཆར་འགོད་ཀྱིས་འབྲེལ་ཡོད་ལས་ཁུངས་དང་གོ་བསྡུར་གྱིས་གཞུང་འབྲེལ་དུས་དྲན་ལས་རིམ་ཁོངས་སུ་ངོས་འཛིན་བྱ་རྒྱུ།
ང༽ ཕྱི་རྒྱལ་སྐུ་ཚབ་དོན་གཅོད་སོ་སོ་ནས་ཀྱང་ལྔ་བཅུའི་དུས་དྲན་ལ་དམིགས་པའི་དམིགས་བསལ་ལས་རིམ་འོས་འཚམས་ཤིག་རང་ངོས་ནས་འཆར་འགོད་དང༌། དེ་བཞིན་སོ་སོའི་ཁྱབ་ཁོངས་སུ་ཡོད་པའི་བོད་རིགས་ཚོགས་པ་ཁག་ནས་ཀྱང་ལས་རིམ་རེ་འཆར་འགོད་ཀྱིས་ཕྱི་དྲིལ་ལས་ཁུངས་དང་གོ་བསྡུར་གྱིས་གཞུང་འབྲེལ་དུས་དྲན་ལས་རིམ་ཁོངས་སུ་ངོས་འཛིན་བྱ་རྒྱུ།
དཔེ་དེབ་རྩོམ་སྒྲིག་དང་པར་སྐྲུན།
ཀ༽ སྤྱི་ནོར་༧གོས་ས་སྐྱབས་མགོན་ཆེན་པོ་མཆོག་གི་ཕྱི་ལོ་ ༡༩༥༩ ནས་བཟུང་ད་ལྟའི་བར་དགེ་ཚུལ་སློང་གི་སྡོམ་རྒྱུན་དང༌། དབང་ལུང་ཁྲིད་གསུམ་སོགས་གསུང་ཆོས་ཇི་གནང་དང༌། སྐད་ཡིག་སྣ་ཚོགས་སུ་གསུང་འབུམ་ལྗག་རྩོམ་ཇི་གནང་བཅས་ཀྱི་དཀར་ཆག་འཁོད་པའི་རྣམ་ཐར་ཟུར་བཀོད་ཞིག་རྩོམ་སྒྲིག་པར་སྐྲུན་བྱ་རྒྱུ། ཆོས་རིག།
ཁ༽ བོད་ཀྱི་དགོན་སྡེ་ཁག་གི་འདས་པའི་ལོ་རྒྱུས་དང༌། ད་ལྟའི་གནས་བབ། རྒྱ་བལ་འབྲུག་གསུམ་གྱིས་མཚོན་ཕྱི་རྒྱལ་ཁག་ཏུ་ཕྱི་ལོ་ ༡༩༥༩ རྗེས་གསར་དུ་བཞེངས་པའི་དགོན་སྡེ། བཙུན་དགོན། སྔགས་གྲྭ་བཅས་ཀྱི་ལོ་རྒྱུས་རྒྱས་བསྡུས་འཚམས་པ་ཞིག་རྩོམ་སྒྲིག་དང་པར་སྐྲུན་བྱ་རྒྱུ། ཆོས་རིག།
ག འཛམ་གླིང་ཡུལ་གྲུ་ཁག་ཏུ་བོད་བརྒྱུད་ནང་པའི་ཆོས་ཚོགས་ཇི་ཡོད་དང༌། དེ་བཞིན་ལྔ་བཅུ་ང་དགུའི་རྗེས་རྒྱལ་སྤྱིའི་ནང་བོད་བརྒྱུད་ནང་ཆོས་སློབ་ཁྲིད་གནང་མཁན་གྱི་བླ་མ་ཇི་བྱུང་རྣམས་ཀྱི་རྣམ་ཐར་རྒྱུས་བསྡུས་འཚམས་པ་ཞིག་རྩོམ་སྒྲིག་དང་དཔར་བསྐྲུན་བྱ་རྒྱུ། ཆོས་རིག།
ང༽ བཙན་བྱོལ་དུ་བཤད་གྲྭ་བསྐྱར་གསོ་དང་གསར་འཛུགས། སྒྲུབ་གྲྭ་བསྐྱར་གསོ་དང་གསར་འཛུགས། ཁྱད་པར་གདན་ས་ཆེན་པོ་རྣམས་སུ་གཞུང་ཆེན་སློབ་གཉེར་བྱེད་ཕྱོགས་དང༌། རྒྱུགས་སྤྲོད་དང་མིང་རྟགས་གཏོང་ཕྱོགས་ལ་བསྒྱུར་བཅོས་ལེགས་བཅོས་ཇི་གཏོང་བཅས་ཀྱི་སྐོར་ལོ་རྒྱུས་ཕྱོགས་བསྡུས་དང་རྩོམ་སྒྲིག་པར་སྐྲུན་བྱ་རྒྱུ། ཆོས་རིག།
ཅ༽ བཙན་བྱོལ་བོད་གཞུང་གི་ལས་ཁུངས་མ་ལག་དང་བཅས་པའི་ལོ་རྒྱུས་ཕྱོགས་བསྒྲིགས་ཀྱིས་ལས་རིམ་འགྲོ་བཞིན་པ་ནས་ལོ་རྒྱུས་རྒྱུ་ཆའི་ཡིག་ཆ་ཆ་ཚང་མཁོ་སྒྲུབ་གོ་སྒྲིག་ཟིན་ན་དཔྱད་ཞིབ་ཡིག་ཆར་དམིགས་ཏེ། དེབ་གྲངས་ལྔ་བཅུ་ཙམ་རེ་པར་སྐྲུན་བྱ་རྒྱུའམ། ཡང་ན་བཙན་བྱོལ་བོད་གཞུང་ལས་ཁུངས་མ་ལག་དང་བཅས་པའི་ལས་ཁུངས་སོ་སོའི་ལོ་རྒྱུས་མདོ་བསྡུས་རེ་རྗེས་སུ་ལོ་རྒྱུས་རྒྱས་པའི་ཆ་ཤས་སུ་ཕན་ངེས་རེ་རྩོམ་སྒྲིག་ཀྱིས་པར་འགྲེམས་བྱ་རྒྱུ། ལས་ཁུངས་སོ་སོ།
ཆ༽ བཙན་བྱོལ་དུ་སལྦ་གྲྭའི་བྱུང་རིམ་གྱི་ལོ་རྒྱུས་ཞིབ་ཕྲ་དང་སློབ་ཁག་སོ་སོའི་ལོ་རྒྱུས་དང་སློབ་ཆོན་གྱི་གྲངས་འབོར། དེ་བཞིན་སྐབས་སོ་སོའི་སློབ་ཚན་དང་སློབ་དེབ། སློབ་དགེ་རིམ་བྱོན་བཅས་ཀྱི་ལོ་རྒྱུས་མདོར་བསྡུས་རེ་ཕྱོགས་སྒྲིག་དང་པར་སྐྲུན་བྱ་རྒྱུ། ཤེས་རིག།
ཇ༽ བཙན་བྱོལ་བོད་མིའི་གཞིས་ཆགས་སོ་སོའི་ཐོག་མའི་བྱུང་རབས་དང་ད་ལྟའི་གནས་བབ་ཞིབ་གསལ་འཁོད་པའི་བྱུང་རབས་རྩོམ་སྒྲིག་དང་པར་སྐྲུན་བྱ་རྒྱུ། ནང་སྲིད།
ཉ༽ འཕྲོད་བསྟེན་སྨན་ཁང་ཁག་གི་བྱང་བྱུང་རབས་དང་ད་ལྟའི་གནས་བབ་རྩོམ་སྒྲིག་དང་པར་སྐྲུན་བྱ་རྒྱུ། འཕྲོད་བསྟེ།
ཏ༽ བོད་ཀྱི་ཆེས་མཐོའི་སློབ་ཁང་ཁག་དང་དཔེ་མཛོད། ཤེས་ཡོན་སྦྱོང་བརྡུར་སྡེ་ཚན་ཁག་གི་བྱུང་རབས། ད་ལྟའི་གནས་བབ། ཆོས་རིག ཤེས་རིག།
ཐ༽ རྒྱ་བལ་འབྲུག་གསུམ་ལས་གཞན་པའི་ཡུལ་ལུང་ཁག་ཏུ་གནས་འཁོད་བོད་མི་རྣམས་ཀྱིས་བྱུང་རབས་དང་ད་ལྟའི་གནས་བབ། ན་སྲིད། ཕྱི་དྲིལ
ད༽ དབུ་མའི་ལམ་གྱི་བྱུང་རབས་དང་བོད་རྒྱ་འབྲེལ་མོལ་ལས་རིམ། ད་ལྟའི་གནས་བབ། བཀའ་ཡིག།
འགྲེམས་སྟོན་དང་གློག་བརྙན།
༧གོང་ས་སྐྱབས་མགོན་ཆེན་པོའི་མཛད་འཕྲིན་དང་བཙན་བྱོལ་བོད་མིའི་ཆོས་དང་རིག་གཞུང༌། ལེགས་བྱང༌། ཤེས་ཡོན། སྤྱི་ཚོགས་ཀྱི་གནས་སྟངས་བཅས་དང་བཟོ་ཞིང་འབྲོག་གསུམ་གྱི་ཐོན་སྐྱེད་འབྲེལ་བའི་པར་རིས་དང་གློག་བརྙན། སྒྱུ་རྩལ་ཁག་གི་འགྲེམས་སྟོན་དང་འཁྲབ་སྟོན། རོལ་དབྱངས་དང་རྟ་དབྱངས་སོགས་ཀྱི་གཟིགས་མོ་རྒྱལ་ས་ལྡི་ལིའི་མཚོན་གལ་ཆེའི་ས་གནས་ཁག་ཏུ་གོ་སྒྲིག་བྱ་རྒྱུ།

ཤོག་ངོས་བརྒྱད་ཀྱི་ནང་དོན་མདོར་བསྡུས་ཤིག་འདིར་འགོད་ཆོག་པ་ཡིན་ན་ནི་འགོད་རོགས་ཞུ། ཀློག་འདོད་འདུག་གོ