བཤད་ཤེས་པ། ཉན་ཤེས་པ། སྒྲུབ་ཤེས་པ་དེ་གསུམ་གལ་ཆེན་པོ་རེད།

དྲ་གྲོགས་ལགས། བཤད་ཤེས་མཁན་གྱི་བཤད། ཉན་ཤེས་མཁན་གྱི་ཉན། བྱེད་ཤེས་མཁན་གྱི་བྱེད་པ་དགོས་པ་ནི་རང་བཞིན་གྱིས་འཇིག་རྟེན་གྱི་གྲུབ་ཚུལ་ཞིག་ཆགས་ཡོད་པ་རེད། འཛམ་གླིང་གི་ཡུལ་གྲུ་གང་མང་ཞིག་གི་ནང་དུ་ཡང་གཏམ་བཤད་བྱེད་མཁན་གྱི་གཏམ་བཤད་འགན་ཡོད་པ་རེད་སྤེལ། ཉན་ཤེས་མཁན་དག་གི་འགན་ཡོད་པའི་ཉན་ཤེས་རེ་བྱས། བྱེད་ཤེས་མཁན་དག་གི་འགན་ཡོད་པའི་ལས་ཀ་རེ་སྒྲུབ། དེ་ནས་སྤྱི་ཚོགས་ཟེར་བ་དེ་ནི་རང་བཞིན་གྱིས་གོ་རིམ་ལྡན་པ་ཞིག་ཆགས་ཀྱི་ཡོད་པ་རེད། ངས་དེའི་ཐད་དུ་བསམ་བློ་རྒྱུན་རིང་བོ་ཞིག་ལ་གཏོང་མྱོང་ཡོད། ལོ་ཁ་ཟླ་དང་། ལོ་ཁ་ལོ་མཐུད་ནས་བསམ་བློ་གཏོང་མྱོང་ཡོད། ང་ཚོ་ལ་ཤེས་ཡོན་ཡོད་མཁན་གྱི་ལམ་སྟོན་ཧ་ཅང་འཁོ་བ་དང་ཉན་ཤེས་བྱེད་ཐུབ་མཁན་གྱི་མི་དམངས་ཀྱང་དེ་ལས་འཁོ། འདི་ལྟར་ཟུང་འབྲེལ་བྱུང་ཉིན་ད་གཟོད་གྲུབ་འབྲས་ཟེར་བ་ནི་གདོན་མི་ཟ་བར་མིག་མཐོང་ལག་ཟིན་ཞིག་ཆགས་ཐུབ་ངེས་ཡིན། ང་ཚོ་ལ་ད་ལྟའི་འཆར་སྟོང་ཆ་ཞིག་ཡོད་པ་ནི་བཤད་ཤེས་མཁན་གྱི་ཤེས་ཡོན་པའི་གྲངས་འབོར་ཧ་ཅང་ཉུང་བ་མ་ཟད། ཉན་ཤེས་མཁན་གྱི་མི་དམངས་ཀྱང་དེ་ལས་ཉུང་ཉུང་ཞིག་ཆགས་ཡོད་སྟབས། ལས་དོན་གང་ཞིག་བྱེད་རྒྱུར་ཡང་དཀའ་ངལ་གྱི་ཁྲོད་དུ་ལུས་ཡོད་པ་ནས་ལམ་ལྷོངས་མ་བྱུང་བར་བསྡད་ཡོད་པ་རེད། མི་དམངས་ཟེར་བ་འདི་ལ་ཤེས་ཡོན་པའི་སྣེ་ཁྲིད་ཞིག་མེད་ཉིན་ནས་མི་དམངས་དེ་ནི་དུས་ནམ་ཡང་གཞན་གྱིས་བཙན་གནོན་དང་བརྙས་བཅོས་འོག་ནས་ཐར་མི་སྲིད་པ་ཡིན། དེའི་ཕྱིར་ཤེས་ཡོན་པའི་སྡེ་བསྐྱེད་བསྲུང་ཞིག་ཡོང་དགོས་པ་མ་ཟད། ཤེས་ཡོན་པའི་སྐད་ཆ་ལ་ཡང་འགན་ཡོད་པའི་སྐད་ཆ་ཞིག་བཤད་ཐུབ་དགོས་པ་མ་ཟད། ཤེས་ཡོན་པའི་ཁུངས་ལྡན་ཚུགས་ཐུབ་ཀྱི་གནས་ལུགས་ཀྱང་གང་ཙམ་རྟོགས་ཐུབ་དགོས། དེ་མིན་རྣ་ལ་སྙན་པོ་ཡོད་པའི་སྐད་ཆ་ནི་སྨྱོན་པ་ཚུན་ཆད་ཀྱིས་བཤད་མི་སྲིད་པ་ཞིག་མ་ཡིན། དེ་ནི་གནས་སྐབས་ཀྱི་རྣ་ལ་སྙན་པ་ཞིག་ལས་ཁུངས་ལྡན་ཚུགས་ཐུབ་མ་ཡིན་ལ། མི་རིགས་ཤིག་གཏན་ནས་ཡོང་མིན་གྱི་འགན་འཁུར་བསམ་བློའི་ཕུགས་བརྟན་རང་བཞིན་ཞིག་དེ་བས་ཀྱང་མིན། དེའི་ཕྱིར་ངས་བཤད་འདོད་པ་ནི། མི་རིགས་ཤིག་བཙན་གནོན་དང་བརྙས་བཅོས་ཁྲོད་དུ་ཡང་བླངས་བྱེད་དགོས་པ་ཡིན་ན་ནི། ཤེས་ཡོན་པའི་སྡེ་ཁག་མེད་དུ་མི་རུང་བ་ནས། ཉན་ཤེས་བྱེད་ཐུབ་མཁན་གྱི་མི་དམངས་ཀྱང་གལ་ཆེན་ཆགས་ཡོད་ལ། ལག་ལེན་བྱེད་པར་བརྟན་ཚུགས་འགྱུར་མེད་ཀྱི་སྤོབས་པ་ཡོད་མཁན་བཅས་ཡོད་པ་ཞིག་བྱུང་དགོས་ཀྱི་ཡོད་པ་རེད། ངས་མི་རིགས་ཤིག་འཇིག་རྟེན་འདིར་འཚོ་གནས་བྱེད་དོན་ནི་རང་རྒྱལ་གཞན་ཁོ་ནའི་ཆེད་དུ་ཡིན་་པར་འདོད་ཀྱི་མེད། དེ་འདྲ་ཞིག་ཡིན་ན་ནི་ནམ་ཡང་མིའི་རིགས་འདི་ལ་ཤེས་ཡོན་པའི་སྡེ་ཁག་ཟེར་བ་ཞིག་གཏན་ནས་དགོས་དོན་མི་འདུག་ལ་སྐད་ཆ་ཉན་ཤེས་བྱེད་མཁན་གྱི་མི་དམངས་ཀྱང་དགོས་དོན་མི་འདུག་ཟེར་ནས་བཤད་རྒྱུ་ཡིན། ང་ཚོ་ལ་དགོས་པ་ཁུངས་ལྡན་ཚུགས་ཐུབ་རང་བཞིན་གྱི་གནས་ལུགས་རྒྱུ་མཚན་དགོས་པ་དེ་ནི་གལ་ཆེན་ཞིག་ཆགས་ཡོད་པར་གླེང་གི་ཡོད། ངས་ཀྱང་སྐུ་ཉིད་ཀྱིས་གསུང་བ་དེ་གཏན་ནས་བདེན་པ་མེད་མཁན་ཞིག་རེད་ཟེར་ནས་བཤད་ཀྱི་མེད། གལ་ཏེ་ཤེས་ཡོན་ཡོད་མཁན་དང་ལམ་སྟོན་བྱེད་མཁན་ཡོད་ཚད་ཀྱིས་མགོ་བྱོས་དེ་སྣེ་འཁྲིད་དགོས་པ་དེ་ནི་དངོས་ནས་ཡིན་ན་ཡང་། འཐབ་རྩོད་ཟེར་ན་འདྲ། ལུས་ཤུགས་བཏོན་ས་དང་ལས་འགུལ་སྣ་ཚོགས་སྤེལ་སར་ལམ་སྟོན་པ་དེ་ཁོ་རང་དངོས་སུ་ཞུགས་དགོས་ཀྱི་མེད་པར་འདོད། གང་ཡིན་ཟེར་ན་ནི། དཔེར་ན་༧གོང་ས་མཆོག་ངེད་ཅག་གི་ལམ་སྟོན་གནང་མཁན་ཡིན་པས་སྐུ་ཉིད་དངོས་སུ་ང་ཚོའི་འཚེ་མེད་ཞི་བའི་ལས་འགུལ་སྤེལ་སེར་མཉམ་ཞུགས་གནང་དགོས་ཀྱི་མེད་པ་ལྟ་བུ་ཡིན།
སྔོན་ཆད་ང་རང་གིས་གྲོགས་པོ་མང་བོ་ཞིག་དང་གླེང་མོལ་བྱས་དུས། གྲོགས་པོ་ཁ་ཤས་ཀྱིས་༧གོང་ས་མཆོག་སྐུ་དངོས་སུ་ལས་འགུལ་ཁྲོད་ཞུགས་དགོས་པར་གླེང་མཁན་ཡང་བྱུང་། ངས་དེ་ལ་མོས་མཐུན་བྱེད་ཐུབ་མ་སོང་། ཁོང་གིས་དུས་དང་ནམ་པ་ཀུན་དུ་ཕྱག་ལས་གནང་བཞིན་ཡོད་པ་དེ་བོད་མི་རིགས་གཙོ་བའི་མིའི་རིགས་ཀྱི་བདེན་དོན་དང་ཞི་བདེའི་ཆེད་དུ་མཛད་པ་གནང་གི་ཡོད་པ་རེད།
འདི་ལྟར་ང་ཚོས་དངོས་ནས་རང་རང་བཤད་ཤེས་མཁན་ཡིན་ནམ། ཉན་ཤེས་མཁན་ཡིན་པ་སྒྲུབ་ཤེས་མཁན་གང་ཡིན་གྱི་ས་མཚམས་སོ་སོ་རང་ཉིད་ཀྱིས་བཟུང་དེ་ལས་ཀ་ཆེ་ཆུང་གང་བྱེད་པ་དང་གཏམ་བཤད་ཆེ་ཆུང་གང་སྤེལ་ཀྱང་འགན་ཡོད་པ་ཞིག་བྱེད་དགོས་པ་དེ་ནི་དངོས་ནས་གལ་ཆེན་ནང་གི་དོན་ཆེན་རེད་ཟེར་ནས་ཁྱེད་རང་གི་གཙོ་དྲ་གྲོགས་ཡོངས་ལ་ཞུ་འདོད་བྱུང་། དེ་མིན་ངས་མཐའ་གཅིག་དུ་ཁྱེད་རང་གི་རྒྱབ་སྐྱོར་གནང་ཚར་བས་མི་ནག་ཚང་ལུང་རིགས་རྒྱལ་གྱི་གཏམ་དེ་དག་ལ་བདེན་པ་གཏན་ནས་མེད་པར་ཐག་གཅོད་བྱས་པ་ཞིག་མ་ཡིན་པ་སེམས་སུ་ངེས་པར་གྱིས་ཤིག