དགའ་ཞིང་གུས་པའི་ཏཱ་ལའི་བླ་མ་མཆོག་ལ།
ངས་གང་ཉིད་ལ་མ་ཞུས་རང་ཞུས་ཤིག་ལ། ངའི་ལོ་གཞོན་དུས་རིམ་གྱི་བག་ཆགས་ནང་དུ་ཁྱེད་ནི་མི་ལྤགས་བཤུ་ཞིང༌། མི་རུས་འཆའ་བའི་གདོན་འདྲེ་ཞིག་ཡིན་པར་བསམས་ཡོད།ལྟ་ཚུལ་འདི་ཁོ་ནས་གཅིག་བྱས་ན་ཁྱེད་ཀྱིས་ང་རང་རྒྱ་མི་ཞིག་ཡིན་པ་དཔོག་ཐུབ། རེད་དེ། ང་ནི་དམར་ཤོག་གི་སློབ་གསོའི་སྒྲིག་གཞིའི་ནང་འཚར་ལོངས་བྱུང་བ་ཞིག་ཡིན། ཕྱི་ལོ༡༩༩༧ལོར་སྟེས་དབང་ཞིག་གིས་ང་རང་བོད་ནང་དུ་རྐང་རྡོག་སྤོ་རྒྱུའི་གོ་སྐབས་ཤར་བྱུང༌། ལོ་དེར་ངས་གསང་སྟབས་ཀྱིས་གང་ཉིད་ཀྱི་སྐུ་པར་ཐོག་མར་མཇལ་བ་ཡིན་ལ་སྐུ་ཉིད་ཀྱི་བླ་རུ་འཕགས་པའི་མཉེས་གཤིན་གྱི་རྣམ་འགྱུར་དེས་ང་རང་དམར་ཤོག་གི་དྲིལ་སྒྲོག་ལ་ཡིད་གཉིས་སྐྱེ་རུ་བཅུག
ལོ་དེ་གའི་དཔལ་ལྷའི་དུས་མཆོད་ཉིན་མོར་ང་རང་སྔ་ས་ནས་གཙུག་ལག་ཁང་དུ་སླེབས་ཡོད་ལ། བཀྲ་ཤིས་དཔལ་ལྷ་མོའི་ཞལ་ཁེབས-ཀྱང་ཕྱེས་ཚར་འདུག་པས། ངས་གློག་སྒྲོན་གྱི་ངོགས་ནས་མགོ་བོ་བསྲིངས་ཏེ་དཔལ་ལྷ་མོའི་ཞལ་མཇལ་ཞུ་བའི་ཚེ་གློ་བུར་དུ་ངའི་རྒྱབ་ཕྱོགས་ནས་གླུ་སྒྲ་ཞིག་ཐོས་བྱུང༌། དེ་ནི་མི་རྒན་ཞིག་གི་ཡིད་སྐྱོ་དང་ཁྲོ་ཉམས་འདྲེས་པའི་གླུ་སྐད་ཅིག་རེད། ཁོང་གིས་སྲོང་བཙན་སྒམ་པོའི་འདྲ་སྐུའི་གམ་དེ་ནས་གླུ་ལེན་ཞོར་དང་ཆང་ཕུད་མཆོད་ཀོང་དུ་འབུལ་བཞིན་ཡོད་ལ་དེའི་ཕྱོགས་བཞི་ན་འཁོད་པའི་སྐྱེས་པ་དང༌། བུད་མེད། ཐ་ན་ཕྲུ་གུ་ཆུང་ཆུང་ཚོས་ཀྱང་མྱུར་སྟབས་ཀྱིས་མི་རྒན་ཁོང་དང་གླུ་ངག་འཐེན་བཞིན་ཡོད། ཉེན་རྟོག་པ་སླེབས་སོང་འོན་ཏེ་ཁོང་ཚོའི་གླུ་སྐད་ནི་སྔར་བས་སྐད་གསང་་་་་་་་་་་་་་་་་ ངའི་ཉེ་མཁྲིས་ཀྱི་དགེ་འདུན་པ་ཞིག་གིས་ཤུབ་ཤུབ་ངང་སྐྱབས་མགོན་ཏཱ་ལའི་བླ་མར་བསྟོད་གླུ་འབུལ་བཞིན་ཡོད་པ་རེད་ཟེར།
ཉིན་མོ་དེར་ང་རང་མགྲོན་ཁང་ནས་བར་སྐོར་ཁྲོམ་གཟིགས་ཁང་དུ་ཡོད་པའི་དེ་སྔའི་ཚོང་པ་ཞིག་གི་ཁྱིམ་དུ་གནས་སྤོ་བྱས། ༡༩༥༩ལོའི་སྔོན་ཚུད་ལྟར་ན་ཁྱིམ་འཛིན་མ་འདིའི་རྒྱུན་གཏན་གྱི་འཚོ་བའི་གོས་རྒྱན་ལ་ཡང་མི་དམངས་ཤོག་སྒོར་ཁྲི་ཚོ་གསུམ་བཞི་ལོན་པ་ཡོད་མྱོང-མོད། ད་ཆ་གྱོན་གོས་བརྗེ་མོ་བྱེད་སྤྱད་རེ་གཉིས་ཙམ་ལས་ཅི་ཡང་ལྷག་ཐུབ་མེད་པ་མ་ཟད། ཕ་མེས་ནས་བཞག་པའི་སྡོད་ཁང་ཡང་བཤིག་སྤོ་བྱེད་དུ་བཅུག་འདུག ཁང་གསར་དེའི་ཉི་འོད་སྔ་མ་ལས་ཅུང་བཟང་ནའང་རྒྱ་ཁྱོན་ཐད་གཉིས་ཆ་གཅིག་ལྷག་ཆུང་དུ་ཕྱིན་ཡོད་ལ་ཆུ་ཀ་ལ་ཡང་སྒྲིག་སྦྱོར་བྱས་མེད། སྤྱི་སྤྱོད་གསང་གཅོད་འགག་ཆོག་ཆོག་དུུ་ཡོད་པས་བཙོག་དྲི་བཟོད་དཀའ་བ་དེ་ཐ་ན་བར་སྐོར་ཁྲོམ་གཞུང་དུའང་ཁྱབ་འགྲོ། ཁྱིམ་བདག་མ་འདིས་ནི་རྒྱ་ནག་གི་བཙན་འཕྲོག་ལ་འཁང་ར་སྣེ་ཙམ་ཡང་བྱེད་མྱོང་མེད་ལ་ཁོང་གིས་དལ་ལྷོད་མེད་པར་སྐད་ཡིག་གཞན་ཞིག་གི་ཐོག་ནས་ཅི་ཞིག་འདོན་གྱིན་ཡོད་མོད་སྐད་འཕང་ཧ་ཅང་དམའ། ངས་ཁོང་གི་ཁ་ལྕེའི་འགུལ་སྐྱོད་ཙམ་ཞིག་མཐོང་མོད་དེ་ནི་མ་ཎི་ཡིག་དྲུག་ཟློ་ཡི་ཡོད་པ་བསམ་བཞིན་ཡོད་ལ་ཁོང་གི་སྐྱེ་བ་ཕྱི་མ་ཡང་འདི་ལས་ལྷག་པའི་ལུས་རྟེན་ཞིག་ཡོང་ན་འདོད། འོན་ཏེ། ཉིན་ཞིག་ང་གཉིས་གཅིག་པུར་གནས་པའི་སྐབས་ཤིག་ཁོང་གིས་མིས་སྟོང་པའི་སྒེའུ་ཁུང་ཕྱི་རུ་སོ་ལྟ་འགའ་བྱས་རྗེས་ངས་གོང་ས་མཆོག་གི་ཞབས་བརྟན་འདོན་བཞིན་ཡོད་ཟེར།
༡༩༩༩ལོའི ༤ པར་ང་བོད་དུ་ཐེངས་གཉིས་པ་འབྱོར་ཞིང་དེ་དུས་ང་ལྷོ་ཁ་ས་ཁུལ་གྲ་ནང་རྫོང་ཅི་རུ་ཤང་རུ་ཁ་གྲོང་པའི་ཞིང་ཁྱིམ་ཞིག་ཏུ་གནས་མལ་བྱས། ས་གནས་དེར་ཆུ་ཀ་ལ་མི་འདུག་ལ་གློག་ཀྱང་མེད། ཞོགས་པ་ཉིན་ལྟར་གཙང་པོའི་འགྲམ་ནས་ལྗིད་ལྗིད་ཏིག་ཏིག་གི་ཆུ་ཟོམ་འཁུར་དགོས་ཀྱི་ཡོད། དགོང་ཁར་ཕྲུ་གུ་ཚོས་ཀྱང་ཉམས་དམའ་བའི་གློག་སྒྲོན་དེའི་འགྲམ་ངོགས་ན་བལ་ལས་བྱེད་དགོས། སྣམ་བུ་འཚོང་བ་ནི་གྲོང་ཁུལ་འདིའི་འཚོ་བརྟེན་ཉག་ཅིག་ལྟ་བུར་སོང་བས་རེད། ང་ཚོའི་བཟའ་བཅའ་ཡང་ཆེས་སྟབས་བདེ་ཞིག་སྟེ་ཞོགས་ཟས་རྩམ་པ་ཕུད་ཉིན་རཻར་རྒྱས་སྤྲོས་ཀྱི་ཟ་མ་ཞོག་ཁོག་ཐུན་གཉིས་རེ་བཟའ། ཡིན་ནའང༌། ཐོག་ཁང་ཉི་འོད་ལེན་ཤོས་ཀྱི་ཁང་པ་དེའི་ནང་པར་སྒྲོམ་སྤུས་དག་ཅིག་ཏུ་སྐུ་ཉིད་ཀྱི་འདྲ་པར་བཤམས་ཡོད་ལ་དེའི་ཐོད་དུ་དཀར་གཙང་གི་མཇལ་དར་རིང་པོ་ཞིག་བསྒྲོན་ཡོད། དེའི་རྗེས་ཕྱོགས་ཞིག་ནས་ངས་བོད་དུ་ལས་ཀར་བྱེད་པར་བདམས་ཡོད་ལ་རྩོམ་སྒྲིག་པ་དང་གསར་འགོད་པ་ཞིག་གི་ངོས་ཐད་ནས་རྒྱ་གཞུང་ལས་ཁུངས་ནང་ཕྱག་ལས་གནང་བཞིན་པའི་བོད་པའི་ལས་བྱེད་འགའ་དང་ཐུག་འཕྲད་བྱེད་རྒྱུའི་གོ་སྐབས་བྱུང༌། ཁོང་ཚོ་ལ་ཤས་ཀྱི་ཁྱིམ་དུ་གསང་ཆའི་སྒོ་ནས་སྐུ་ཉིད་ཀྱི་འདྲ་པར་དང་ནམ་ཡང་འདའ་མ་མྱོང་བའི་མཆོད་མེ་སྒྲིག་གཤོམ་བྱས་ཡོད་པ་ངས་མངོན་སུམ་དུ་མཐོང་བྱུང༌། དེ་ག་རེད་དེ། ཁྱེད་ནི་བོད་མིའི་དགྲ་ཟླ་མིན་པར་བོད་མིའི་ཡབ་ཆེན་རེད་ལ། བོད་མིའི་བྱམས་སྙིང་རྗེ་དང་བདེ་སྐྱིད་ཀྱི་འབྱུང་གཞི་རེད། ཡིད་བཞིན་ནོར་བུ་རེད། དགོས་འདོད་དགོས་འབྱུང་རེད། སྐུ་མདུན་རེད། བོད་མིས་གདུང་འབོད་ཀྱི་སྐབས་སུ་ནམ་ཡང་མདུན་དུ་ཐོན་ཡོང་གི་རེད། རྒྱལ་བ་རིན་པོ་ཆེ་རེད། བླ་ན་མེད་པའི་ཆོས་རྗེ་དང་ཆེས་མཆོག་ཏུ་བཀུར་འོས་ཀྱི་རིན་པོ་ཆེ་ཡིན་པ་ཧ་གོ་དོན་གསལ་རེད། རྒྱ་ནག་སྲིད་དབང་གིས་བོད་བཅིངས་འགྲོལ་བཏང་བ་མ་རེད་བཙན་བཅོམ་བྱས་པ་རེད། བདེ་སྐྱིད་ཀྱི་ས་བོན་བཏབ་པ་མ་རེད་སྡུག་བསྔལ་བཟོ་སྐྲུན་བྱས་པ་རེད།
སྐུ་ཉིད་ཀྱི་ཨ་རིའི་ཝས་སི་ཁང་སིའི་མངའ་སྡེའི་མུ་ཏི་ཤུན་གྱི་གཏམ་བཤད་ལས་ང་ཚོར་སྣང་ཁྲི་སྟོང་སྐྱེ་རུ་བཅུག རྒྱ་མཚོ་དང་འདྲ་བའི་ནང་བསྟན་རིག་པའི་མཁྱེན་དཔྱོད་དེས་གོ་རིམ་ལྡན་པའི་སྒོ་ནས་རགས་པ་ནས་རིམ་པས་ཟབ་སར་འཇུག་པའི་འགྲེལ་བརྗོད་སྟངས་དེ་ནི་ཆེས་ངོ་མཚར་བའི་སྦྲང་ཆར་དུ་གྱུར་ཏེ་ཉན་པོ་དག་བཅུད་ཀྱིས་འཚོ་བ་དང་སྐུ་ཁམས་དྭངས་གསལ་དུ་བསྐྲུན་འོང༌། སྐུ་ཉིད་ནས་གང་ནུས་ཅི་འཇོན་གྱིས་མི་ཚོགས་ཀྱི་དྲི་བ་དག་རེ་རེ་བཞིན་ལན་ལྡོན་སོང་ལ་བཤད་རིན་ཆུང་བའི་གང་ཟག་སྒེར་སོ་སོའི་སྡུག་བསྔལ་དང་སེམས་གཅོང་ལ་ཡང་ཐུགས་ཁུར་གནང་བཞིན་ཡོད། ལྷག་ཏུ་མི་རེ་འགས་རྒྱ་ནག་དང་བོད་ཀྱི་གནད་དོན་སྐོར་དྲི་བ་ཕུལ་བའི་ཚེ། སྐུ་ཉིད་ནས་ནམ་ཡང་དྲེགས་མེད་ཁེངས་སྐྱུང་ཞིག་གིས་ཀྲུང་ཧྭ་མི་རིགས་ཀྱི་ལེགས་པའི་ངོས་དག་ནན་བརྗོད་བྱེད་པ་དང༌། བོད་རྒྱ་མི་རིགས-ཀྱི་མཛའ་མཐུན་མཉམ་ལས་ལ་སྐུལ་ལྕག་བྱེད་ཀྱི་ཡོད། རྒྱ་གུང་ཁྲན་གྱི་གདུག་རྩུབ་དང་ལྐོག་གཡོ། རུལ་སུངས། སྒེར་སྡེམ་བཅས་དང༌། སྐུ་ཉིད་ཀྱི་བྱམས་སྙིང་རྗེ་དང༌། ཕྱི་གསལ་ནང་གསལ། སྤྱོད་གཙང༌། དམངས་གཙོ་བཅས་ལ་མི་རིང་བར་དུས་ཚོད་ཀྱིས་བདེན་ཁ་སྦྱིན་ངེས་རེད།
མི་ལོ་ལྔ་བཅུའི་རིང་དུ་རྒྱ་གཞུང་ནས་བོད་ས་ཐོག་ཏུ་ཡ་ང་སྙིང་རྗེ་མེད་པར་དབང་སྒྱུར་བྱས་ཏེ་མི་སེར་སྤེལ་བའི་སྟབས་ཀྱིས་ལོ་འདིའི་ཟླ་བ་གསུམ་པའི་ནང་བོད་ས་རྒྱ་ཁྱབ་སྟེ་ས་གནས་བརྒྱ་ལྷག་ཙམ་དུ་སྔར་བྱུང་མྱོང་མེད་པའི་ཞི་རྒོལ་ལས་འགུལ་འདི་བསླངས་པ་རེད། ཡིད་སྐྱོ་དགོས་པ་ཞིག་ལ་རྒྱ་གཞུང་མགོ་ཁྲིད་ནས་རང་སྐྱོན་རང་བརྟག་དང་བོད་དུ་འཛིན་པའི་སྲིད་ཇུས་ལེགས་སྒྲིག་མེད་པ་མ་ཟད། ད་དུང་མཐོ་རྒྱག་དམའ་རྒྱག་གིས་སྐུ་ཉིད་ཀྱི་ཕྱོགས་ལ་བཀའ་མོལ་གྱི་སྔོན་འགྲོའི་ཆ་རྐྱེན་དུ་རྒྱབ་སྐྱོར་མི་རུང་བ་བཞི་གཏན་འབེབས་བྱས་པ་དང་མིག་གི་མདུན་ཐད་དུ་ལྷག་པའི་བོད་པའི་ཛ་དྲག་གི་གནད་དོན་དེ་གང་ཉིད་ཀྱི་སྐུ་སྒེར་རྐྱང་པའི་ངོ་བོར་བསྒྱུར་བ་དང༌། དེའི་ངོ་བོ་ནི་བོད་དོན་འགེབས་སྲུང་བྱེད་པ་དང་ཐ་ན་ཁྱད་གསོད་བྱེད་ཀྱི་ཡོད་པ་རེད། མིག་སྔར་བོད་ས་ཡོངས་བཙོན་རྭ་ཆེན་མོ་ཞིག་ཏུ་བསྒྱུར་ཚར་ཡོད། གོ་ཐོས་ལྟར་ན། ལྷ་ས་རུ་མི་གསུམ་རེའི་ནང་དུ་སྒྲིག་ཆས་མ་སྤྲས་པའི་ཉེན་རྟོག་པ་རེ་ཡོད་ལ་དམག་དཔུང་ལུང་པ-ཁུག་ཀྱོག་གི་གྲོང་གསེབ་ཏུའང་བརྫངས་ཚར་ཡོད་པར་བཤད། ལྗོངས་ཕྱིའི་ཁ་པར་དང་ལྷག་ཏུ་རྒྱལ་ཕྱི་ནས་འབྱོར་བའི་ཁ་པར་དག་དེ་བས་དོ་དམ་ནན་པོས་ལྟ་སྲུང་བྱེད་བཞིན་ཡོད།
བོད་ཀྱི་རིག་གཞུང་ནི་ཟབ་ཅིང་རྒྱ་ཆེ་ལ་ལོ་རྒྱུས་ཡུན་རིང་ལྡན་པས་མ་ཚད་སྔོན་ཐོན་ཀྱང་ཡིན་པས། ངས་སྔ་མོ་ཞིག་ནས་བོད་མིའི་ལུས་སྟེང་ནས་མཐོང་བའི་མཛེས་སྡུག་ལྡན་པའི་གོམས་སྲོལ་ཏེ། དད་འདུན་དང༌། སེམས་བཟང༌། དྲིན་བཟོ་བཅས་རེད། ཀྲུང་གོའི་མི་ལོ་ལྔ་སྟོང་གི་རིག་གཞུང་གླེང་བ་དེས་ཉིང་བཅུད་ཙམ་ཞིག་མ་ཡིན་པར་རྒྱ་མི་རིགས་ཚོ་ལ་ཅི་ཞིག་བཞག་ཡོད་དམ། ད་དུང་རྒྱ་གཞུང་གི་སྲིད་དབང་འདིས་མངོན་སུམ་ངང་མིའི་རིགས་ལ་ངེས་པར་ཁེ་ཕན་ལྡན་པའི་བོད་མིའི་གོམས་སྲོལ་གཅིག་པུ་འདིར་འབག་བཙོག་དང་འཆིང་སྡོམ། སྐེ་བཙིར་ནས་དམར་གསོད་གཏོང་གི་ཡོད། དུས་རབས་ཉི་ཤུ་རྩ་གཅིག་པ་འདིར་མི་བུ་རྣམས་ཀྱིས་རྒྱལ་ཁབ་གི་འགག་སྒོ་ཐོད་བརྒལ་བྱས་ཏེ་མཉམ་དུ་རང་དབང་དང་དམངས་གཙོ། འགྲོ་བ་མིའི་ཐོབ་ཐང༌། མི་རིགས་རང་གི་ཐུན་མིན་རིག་གཞུང་ལ་གུས་བརྩི་བཅས་འཚོལ་སྙེག་བྱེད་བཞིན་པའི་སྐབས་འདིར་ཤ་ཁྱི་རྦོད་པ་ལྟ་བུའི་མི་སེར་སྤེལ་བའི་རྣམ་འགྱུར་འདི་ནི་ཏག་ཏག་འཛམ་གླིང་འདིས་ངོས་ལེན་བྱ་ཐབས་ཡེ་མེད་པའི་སྐྱུག་བྲོའི་རང་བཞིན་ཞིག་རེད།རྒྱ་ནག་ནང་དུ་ཤེས་ཡོན་མཐར་སོན་ཞིང་ཚོར་ཤེས་རྣོ་བའི་ཡོན་ཏན་པ་ཇེ་མང་ཇེ་མང་དུ་འགྲོ་བཞིན་པ་ཚོས་རྒྱ་གཞུང་གི་གདོང་རིས་ངོ་མ་མཐིལ་རྟོགས་ཐུབ་བཞིན་ཡོད་ལ། ཕྱི་གསལ་ནང་གསལ་གྱི་སྒོ་ནས་ཁོ་པ་ཚོས་བོད་དོན་ཐད་འཛིན་པའི་རང་དབང་གི་ལྟ་ཚུལ་འདོན་བཞིན་ཡོད་པ་དང༌། སྒེར་སྡེམ་གྱི་དབང་སྒྱུར་ལ་ཐ་མའི་རྫོགས་ཚིག་འགོད་རྒྱུ་དང༌། སྨྲ་བརྗོད་རང་དབང་དང་བརྒྱུད་ལམ་སྒོ་དབྱེ་དོན་འཁྱོལ་བྱས་ཏེ་སྐུ་ཉིད་ལ་རྒྱལ་ཁབ་ཁ་བྲལ་ཞེས་པའི་ཉེས་མིང་ཕྱིར་བསྡུ་དགོས་པའི་རེ་བ་ཤུགས་ཆེ་འདོན་བཞིན་པ-མ་ཟད། གུས་བཀུར་དང་བཟོད་བསྲན། གླེང་མོལ་གྱི་ལམ་ནས་བོད་དོན་ཐག་གཅོད་བྱེད་དགོས་པའི་རེ་བ་འདོན་བཞིན་ཡོད། བལྟས་ཚོད་ཙམ་བྱས་ན་མི་ལོ་ལྔ་བཅུའི་བསྒྱུར་བཅོས་སྒོ་དབྱེས་རྒྱ་ནག་རྒྱལ་ཁབ་ཆེན་པོའི་དར་འཕེལ་གྱི་རྣམ་པ་མངོན་མོད། དོན་དམ་དུ། རྒྱ་ནག་འཛམ་གླིང་གི་འཕེལ་ཕྱོགས་ནང་ཚུད་པ་དང་མཉམ་དུ་གོ་ལ་རང་བཞིན་ཅན་གྱི་ཟུར་བྱུང་རླངས་འཁོར་དུ་འབུད་ཐུབ་པ་ཙམ་ཞིག་རེད། སྤྱོད་ལམ་ཆག་གྲུམ་ཤོར་བ་དེ་རྒྱ་ནག་གི་ཐག་རིང་ལུང་ཁུག་ཏུའང་ཁྱབ་ཚར་ཡོད་ལ། བྱ་ངན་དང་བག་མེད་ལོངས་སྤྱོད་བྱེད་རྒྱུར་དར་སྲོལ་ཅན་ཆགས་ནས་ཡོད། འདི་ལྟ་བུའི་གནས་སྟངས་ཤིག་གི་འོག་ནས་རྒྱ་ནག་གིས་ཨོ་རྩེད་གཉེར་བ་དེ་ནི་ཨོ་རྩེད་དགོངས་དོན་དང་རང་ཤུགས་ཀྱིས་འགལ་བ་ལྟག་སྤྲོད་དུ་སོང་ཡོད། ཕྱི་ཚུལ་གྱི་དར་རྒྱས་དེས་ནང་ངོས་ཀྱི་སྟོང་ཆ་འགེབས་ཐབས་བྲལ་བས། གདུག་རྩུབ་ཀྱི་སྲིད་དབང་གསར་བརྗེ་བྱ་རྒྱུ་ནི་ཀྲུང་གོ་བ་རེ་རེའི་མདུན་ཐད་དུ་བསྟར་བའི་དངོས་དོན་ཞིག་རེད། གལ་ཏེ་རྒྱ་ནག་གི་དབུ་ཁྲིད་ཚོས་བོད་ཀྱི་གནད་དོན་དེ་མུ་མཐུད་བཙན་པོ་དབང་ཡོད་དང་འཇིགས་སྐུལ། རྡོག་བརྫིས། རྒྱ་ནག་མི་དམངས་ཚོར་མགོ་སྐོར་དང་ལོག་འཁྲིད། སྐུ་ཉིད་ནས་མི་ཡུལ་འདིར་སུས་ཀྱང་ཚབ་བྱེད་ཐབས་བྲལ་བའི་ཞི་བདེའི་རིན་ཐང་དང་འགྲན་ཟླ་བྲལ་བའི་ནང་བསམ་པའི་ལེགས་སྐྱེས་བཅས་ལ་རྩིས་མེད་གཏོང་བ། མིའི་རིགས་ལ་རྒོལ་བའི་གཏན་ཚིགས་ཏེ་མེ་མདའི་ཁ་ནས་སྲིད་དབང་འཛིན་པའི་སྣང་ཚུལ་འདི་མཁྲེགས་བཟུང་བྱས་པ་ཡིན་ཚེ། རིང་པོར་མི་ཐོགས་པར་ཐོལ་གྱིས་འཆི་ལམ་དུ་འགྲོ་བར་ཐེ་མི་ཚོམ་པས་གང་ཉིད་རང་སར་རང་ཡུལ་དུ་ཞབས་སོར་འཁོད་ཐུབ་ངེས་རེད། སྐུ་ཉིད་དང་དཀའ་སྡུག་གི་བོད་མི་ཚོར་མཉམ་འཛོམས་བྱུང་བ་དེའི་ཚེ། གང་ཉིད་ཀྱི་བྱམས་པ་དང་བརྩེ་བའི་འོད་ཕུང་དེས་སྡིག་ཉེས་ཆེ་བའི་རྒྱ་ནག་གི་ས་ཆེན་པོར་ཡང་ཐུགས་ཁུར་གཟིགས་སྐྱོང་འདོར་མེད་དང༌། གང་ཉིད་ཀྱི་བྱམས་བརྩེའི་གྲུ་ཆེན་དེ་ནམ་ཡང་མི་ཡུལ་འདིར་གཏན་སྡོད་ཀྱི་སྨོན་པ་བྱེད་ཀྱིན་ཡོད།
བོད་མིའི་དཀའ་སྡུག་ལ་གདུང་སེམས་མཉམ་སྐྱེ་དང་མགོན་པོ་གང་ཉིད་ལ་དད་གུས་དཔག་མེད་ཀྱི་རྒྱ་མི་རིགས་བ་ཀྲུའུ་རས་ནས།།
ཡེ་ཤེས་བསྟན་འཛིན་ནས་བསྒྱུར།
རྒྱ་མི་རིགས་ཀྱི་ནང་དུ་བོད་དོན་ལས་འགུལ་སྤེལ་རྒྱུ་ནི་དོན་དངོས་སྟེང་ཕན་འབྲས་ལྡན་པ་ཞིག་ཡིན་པའི་བདེན་དབང་ལྟ་བུ་འདིས་ང་ཚོ་ལ་ལམ་སྟོན་ཞིག་བྱས་འདུག
མཁྱེན་ལྡན་མ་ཀྲུ་རས་མཆོག་གིས་བདེན་པ་ཁོ་ནའི་རྒྱབ་རྩར་འགྲེངས་བའི་སྐད་ཆ་འདི་ཙམ་བཤད་པ་དེས་ཀྱང་རླབས་ཆེན་རྒྱ་མི་རིགས་ཀྱི་ནང་གི་རྣམ་ཤེས་ཤི་མེད་པའི་རྣམ་པ་ཞིག་བསྟན་འདུག མཁྱེན་ལྡན་མ་འདི་ཉིད་ཀྱིས་བདེན་པ་ཁོ་ནའི་རིན་ཐང་ལ་དགོངས་ཏེ་རང་གི་མི་རིགས་དང་། རྒྱལ་གཞུང་། ཐ་ན་རང་གི་གཉེན་འབྲེལ་ནང་མི་བཅས་ཀྱི་ཀྱང་ཁ་གཏད་དུ་འགྲེངས་ཤིང་འདི་ལྟ་བུའི་རྒྱབ་སྐྱོར་གནང་བ་ལ་སྙིང་ཁུངས་རུས་པའི་གཏིང་ནས་ཐུགས་རྗེ་ཆེ་ཞེས་ཞུ་བར་འོས། སྤྱི་ཚོགས་ཤིག་གི་ནང་ནས་གཞན་དང་མི་མཚུངས་པ་ཞིག་བྱེད་པ་ནི་ཧ་ཅང་དཀའ་ངལ་ཆེ་བ་ཡིན་སྟབས་མཁྱེན་ལྡན་མ་འདི་ཉིད་ལ་ཡང་མ་འོངས་པར་དཀའ་ངལ་དང་ཉེན་ཁ་མང་པོ་འཕྲད་རྒྱུ་ཡིན་པར་ཐག་ཆོད་པས་ང་ཚོས་སྙིང་ཐག་པས་གདུང་སེམས་མཉམ་བསྐྱེད་བྱ་རྒྱུ་ཡིན།
༄༅།།་བློ་ཕམ་དགོས་པ་ཞིག་ལ་ཕྱི་རྒྱལ་དུ་ཡོད་པའི་རྒྱ་རིགས་གཞོན་སྐྱེས་མང་པོ་ཞིག་དམར་ཞེན་ཆེན་པོ་འདུག ན་ནིང་ཁེ་ན་ཊའི་གྲོང་ཁྱེར་ཊོ་རོན་ཊོ་དང་། ཨོ་ཌ་ཝ། ཝེན་ཁུ་བར་བཅས་སུ་རྒྱ་རིགས་ཁྲི་ཚོར་ཉེ་བས་བོད་དོན་དང་ཁ་གཏད་དུ་ལངས་ཏེ་སྐད་འབོད་བྱས་སོང་བ་མ་ཟད་དབྱིན་ཡུལ་དང་ཨོ་སི་ཊོ་རི་ཡའི་ནང་དུ་ཡང་རྒྱ་རིགས་གཞོན་ནུ་མང་པོ་ཞིག་གིས་ལས་འགུལ་འདི་འདྲའི་ཐོག་མཉམ་ཞུགས་བྱས་སོང་ངོ་། །
དངོས་ནས་རླབས་ཆེན་རང་བཞིན་གྱིས་བསམ་བློ་གཏོང་སྟངས་ཤིག་རེད་ཟེར་ནས་བཤད་ཆོག་ལ། རྒྱ་རིགས་མི་ཉུང་བ་ཞིག་འདི་ལྟར་ལམ་ཁ་ཡོད་སར་འབུད་དེ་བོད་མིའི་སྐྱིད་སྡུག་ལ་རྒྱབ་སྐྱོར་ཡོང་བར་ང་ཚོ་བོད་པ་ཚང་ལ་འདོད་པ་ཆེན་པོ་ཡོད།