ཕྱི་རྒྱལ་ཡུལ་སྐོར་སྤྲོ་འཆམ་པའི་ཚོགས་པ་ཞིག་ལྷ་སར་འབྱོར་ཡོད་པ་དང༌། རྒྱ་གཞུང་གིས་བོད་དུ་ཡུལ་སྐོར་སྤྲོ་འཆམ་གྱི་སྒོ་མོ་ཕྱེས་ཡོད་ཚུལ་བསྒྲགས་ཀྱང༌། འགྲོ་བ་མིའི་ཐོབ་ཐང་ཚོགས་པ་དང༌། གསར་འགོད་པ་བོད་དུ་བསྐྱོད་རྒྱུར་མུ་མཐུད་དམ་དྲག་བྱ་རྒྱུ་ཡིན་འདུག
ཚེས་ ༥ ཉིན་འཇར་མན་ནས་ཡིན་པའི་མི་གྲངས་ ༡༡ ཅན་གྱི་ཡུལ་སྐོར་ཚོགས་པ་ཞིག་བོད་ཀྱི་རྒྱལ་ས་ལྷ་སར་འབྱོར་ཡོད་པ་དང༌། ཡུལ་སྐོར་བ་དེ་དག་གིས་པོ་ཏཱ་ལ་སོགས་སུ་ལྟ་སྐོར་ལ་འགྲོ་སྐབས་ཀྱི་པར་རྒྱ་ནག་གཞུང་འབྲེལ་ཚགས་ཤོག་དང་དྲ་རྒྱ་སོགས་སུ་བཀྲམས་ཏེ། བོད་དུ་སླར་ཡང་ཡུལ་སྐོར་བའི་སྒོ་ཕྱེས་ཡོད་ཚུལ་གསལ་བསྒྲགས་བྱས་ཡོད་འདུག དེ་ནི་སྤྱི་ཟླ་ ༡ པོའི་ཚེས་མགོར་རྒྱ་ནག་གིས་གཞུང་འབྲེལ་གསལ་བསྒྲགས་ཤིག་སྤེལ་ཏེ། བོད་ཆོལ་ཁ་གསུམ་གྱི་བོད་རིགས་འདུས་སྡོད་བྱེད་སའི་ས་ཁུལ་གང་སར་ཡོད་པའི་ཕྱི་རྒྱལ་ཡུལ་སྐོར་ལྟེ་གནས་ཁག་སྒོ་རྒྱག་དགོས་པའི་བཙན་བཀའ་བཏང་བ་དང༌། ཐེངས་འདིའི་འཇར་མན་ཡུལ་སྐོར་བ་དེ་དག་ནི་ཕྱི་རྒྱལ་ཡུལ་སྐོར་བ་བོད་དུ་ཡོང་མ་ཆོག་པར་ཟླ་གསུམ་ལྷག་འགོར་བའི་རྗེས་བོད་དུ་ཡུལ་སྐོར་བ་འབྱོར་ཐེངས་དང་པོ་ཡིན་འདུག
རྒྱ་ནག་གིས་སླར་ཡང་བོད་ཀྱི་ཡུལ་སྐོར་སྤྲོ་འཆམ་ལྟེ་གནས་ཁག་གི་སྒོ་ཕྱེ་ཡོད་སྐོར་དང་ཟླ་ ༤ བའི་ནང་དུ་ཨ་རི་དང་ཁེ་ན་ཌ། ཧཕ་རན་སི། ཉི་ཧོང༌། ཨི་ཊི་ལི་སོགས་གཙོས་པའི་ཕྱི་རྒྱལ་ཡུལ་གྲུ་ཁག་ནས་ཡུལ་སྐོར་བ་གྲངས་ ༤༠༠ ལྷག་བོད་དུ་སྤྲོ་འཆམ་ལ་ཡོང་རྒྱུ་ཡིན་སྐོར་བསྒྲགས་འདུག འོན་ཀྱང༌། སི་ཁྲོན་དང་ཀན་སུའུ། མཚོ་སྔོན་སོགས་ཀྱི་བོད་རིགས་འདུས་སྡོད་ཁུལ་གྱི་ཡུལ་སྐོར་ལྟེ་གནས་ཁག་གིས་ཕྱི་རྒྱལ་ཡུལ་སྐོར་སྤྲོ་འཆམ་པར་སྣེ་ལེན་བྱ་ཆོག་མིན་གོང་རིམ་ནས་གསལ་བཤད་གང་ཡང་བྱས་ཡོད་མི་འདུག དམིགས་བསལ་གྱིས་ཕྱི་རྒྱལ་ཁག་གི་འགྲོ་བ་མིའི་ཐོབ་ཐང་ཚོགས་པའི་ཚོགས་མི་དང་རྒྱལ་སྤྱིའི་གསར་འགོད་པ་སོགས་བོད་དུ་བསྐྱོད་པར་རྒྱ་ནག་གཞུང་གིས་མུ་མཐུད་དམ་དྲག་བྱ་རྒྱུ་ཡིན་འདུག
ཕྱི་ཟླ་ ༢ བའི་ཚེས་ ༡༢ ཉིན་གསར་འགོད་ལྷན་ཚོགས་ཤིག་གི་ཐོག་རྒྱ་ནག་གི་ཕྱི་སྲིད་མགྲིན་ཚབ་པ་ཅང་ཡུའུ་ཡིས་གསར་འགོད་པ་བོད་ནང་དུ་གཏོང་གི་མེད་པ་དེ་ནི། བོད་ནང་གི་བརྟན་བརླིང་དང་བདེ་འཇགས་ཀྱི་ཆེད་དུ་ཡིན་ཚུལ་གསར་འགོད་པར་ལན་འདེབས་བྱས་ཡོད་ཀྱང༌། རྒྱལ་སྤྱིའི་གསར་ལམ་ཁག་ནས་ད་ལོ་ནི་བོད་ཀྱི་དབུ་ཁྲིད་༧གོང་ས་མཆོག་གཞན་ཡུལ་ལ་བྲོས་བྱོལ་དུ་ཕེབས་ནས་མི་ལོ་ ༥༠ འཁོར་བ་དང༌། བོད་ས་བཙན་བཟུང་བྱས་ནས་མི་ལོ་ ༥༠ འཁོར་བའི་དམིགས་བསལ་གྱི་ལོ་ཞིག་ཡིན་ཁར། རྒྱ་ནག་གཞུང་གིས་བོད་ཁུལ་གྱི་དམ་དྲག་དང་གནས་སྟངས་དངོས་དེ་སྦས་གསང་བྱ་ཐབས་ལ་ཕྱི་རྒྱལ་ཡུལ་སྐོར་བ་དང་གསར་འགོད་པ་བོད་ནང་དུ་གཏོང་གིན་མེད་པར་ངོས་འཛིན་བྱས་ཡོད།
གོང་གི་གསར་འགྱུར་འདིའི་ཁྲོད་དུ་༧གོང་ས་མཆོག་བྲོས་བྱོལ་དུ་ཕེབས་ནས་ཞེས་པ་༧གོང་ས་མཆོག་དང་བོད་གཞུང་དམངས་བཙན་བྱོལ་དུ་ཕེབས་ནས་ཞེས་བཅོས་རྒྱུ་དང་། བོད་ས་བཙན་བཟུང་བྱས་ནས་མི་ལོ་༥༠འཁོར་བ་ཞེས་པ་ཡོངས་སུ་ནོར་ཏེ་བོད་ས་བཙན་བཟུང་བྱས་ནས་མི་ལོ་༦༠དང་། བོད་ཡོངས་བཙན་བཟུང་བྱས་ནས་མི་ལོ་༥༠འཁོར་ཞེས་བརྗོད་དགོས་པ་ལགས། བཙན་བྱོལ་བོད་གཞུང་གི་ཚིག་བརྗོད་ལྟར་ན་བོད་གཞུང་དམངས་བཙན་བྱོལ་དུ་འབྱོར་ནས་མི་ལོ་༥༠འཁོར་བ་ཞེས་སུ་ཡོད། འདི་དག་གིས་གོ་དོན་སྟེར་སྟངས་དང་བརྗོད་སྲོལ་མི་འདྲ་བ་ཡོད་པ་ནི་ཚིག་གི་གནད་དོན་ཙམ་མ་ཡིན་པ་ངེས་པར་ཐུགས་འཇགས་ཡོད་པ་ཞུ།