གསར་དུ་ཕྱེས་པའི་ལེའུ་ནག་པོ།

སྐུ་ཞབས་བསྟན་འཛིན་ལགས། ཟིན་བྲིས་ར་བར་ཕེབས་དང་། ཉིད་ཀྱི་ཟིན་བྲིས་བཟོས་ཟིན་ཡོད། ནམ་མཁའ་བསྟན་འཛིན་དང་ལྷ་ཆབ་སྦྱིན་པ། རིག་འབྱུང་དོན་འགྲུབ་བཀྲ་ཤིས་བཅས་ཀྱིས་རེ་སྐུལ་ལྟར། དེ་རིང་སྐུ་ཞབས་བསྟན་འཛིན་དངོས་སུ་བོད་ཀྱི་དུས་བབ་ཟིན་བྲིས་སུ་ཞུགས་སོང་། རྒྱ་ཆེ་ཞིང་ཁོད་ཡངས་པའི་གཞིས་ཀ་འདི་ནས་ང་ཚོས་ཀ་ལེར་འགྲོ་འོང་བྱ་ཆོག

བསྟན་འཛིན་གྱིས་སྐྱོན་ལ་མཛུབ་མོ་བཙུགས་ནས་བཤད་པར་རྗེས་སུ་ཡི་རང་ཡོད། དུས་བབ་ཚང་གི་ལས་བྱེད་ཡོངས་ཀྱི་སེམས་ལ་ཕོག་གི་མ་རེད་བསམ། གལ་སྲིད་ཕོག་པ་ཡིན་ན་རང་ཉིད་ནོར་བ་རང་རེད། ཡིག་ནོར་ཙམ་གྱིས་དུས་བབ་ཚང་གི་ལས་བྱེད་ཚོའི་ཤེས་ཚད་ཡོངས་སུ་རྫོགས་པ་འདི་རེད་ཅེས་བཤད་མི་ཐུབ་ནའང་ཚང་མས་མ་འོངས་པར་ཡིག་ནོར་ལ་གཟབ་ཙམ་གནང་རྒྱུ་ཧ་ཅང་གལ་ཆེ་བར་མཐོང༌།

བོད་ཀྱི་དུས་བབ་ཀྱི་རྩོམ་སྒྲིག་པའི་གཏམ་ནི་ཆེས་ལྟ་འདོད་ཆེ་ཤོས་ཀྱི་ལེ་ཚན་ཞིག་ཡིན་མོད། ད་སྐབས་ཅུང་ཟད་འགྱུར་བཞིན་པའི་སྣང་བ་བྱུང༌། སྔོན་མའི་དུས་བབ་ཀྱི་ཚིག་སྦྱོར་མཛེས་པོ་དེ་ཡང་བར་སྐབས་ཤིག་ནས་འགྱུར་སོང་བའི་སྣང་བ་བྱུང་བས། རྩོམ་སྒྲིག་པ་དང༌། གསར་འགོད་པ་སོགས་ལས་བྱེད་ཚོས་དགོངས་པ་བཞེས་དགོས་པ་འདྲ།

ད་ཐེངས་རྩོམ་སྒྲིག་པས་ངོས་ཀྱི་ཞེས་པའི་ཚིག་གི་མགོ་ནས་བཟུང་སྟེ་ལོ་རྒྱུས་ལ་ཕྱིར་དྲན་གྱིས་རང་ཉིད་ཀྱི་བསམ་ཚུལ་གཞན་ཐོག་ནས་མངོན་ཐབས་བྱས་འདུག་ཀྱང༌། དེ་ནི་སྤྱི་ཡོངས་ཀྱི་བསམ་ཚུལ་ཞིག་ཡིན་སྟབས་རྩོམ་སྒྲིག་པའི་གཏམ་དུ་འགོད་འོས་སུ་མ་མཐོང༌། ལྷག་པར་ངོས་ཀྱི་ཞེས་པའི་ཚིག་འདི་ཡུལ་གྱི་རྒྱལ་བོ་དང་བདག་པོ་ལྟ་བུ་ལ་སྤྱོད་པ་ལས་མི་དཀྱུས་མ་ལ་སྤྱོད་པ་ཞིག་ཡིན་སྟབས་ང་བྲི་བ་ལས་ངོས་བྲིས་ན་མི་ལེགས།

བསྟན་འཛིན་ལགས་ཀྱིས་ཉིན་དེ་རིང་བར་གསུངས་པ་གང་འཚམ་ཞིག་ཁོ་བོས་ཀྱང་བདེན་དོན་དུ་བརྩི་བཞིན་ཡོད།
ཁོ་བོས་ཀྱང་སྔར་དུས་བབ་གསར་ཤོག་ཐོག་ལ་སེམས་འཚབ་ཡོང་བའི་སྐད་ཆ་ཚིག་འགའ་བཤད་མྱོང་།
ཡིན་ན་ཡང་དུས་བབ་ཀྱི་ལས་བྱེད་རྣམ་པས་ཨུ་ཚུགས་ཀྱིས་བདེན་དོན་ལ་དེ་ཙམ་དོ་སྣང་མི་སྣང་བའི་ཚོར་ཤུགས་སླེབས་བྱུང་བས་ཅུང་ཡིད་མི་བདེ་བར་གྱུར།
ང་ཚོས་ད་དུང་དུས་བབ་འདི་ཉིད་སྔར་ལས་ལྷག་པ་མ་བྱུང་ཡང་སྔར་དང་མཚུངས་པའི་གསར་ཤོག་ཚད་ལྡན་ཞིག་ཡོང་བའི་རེ་བ་དང་། དུས་དང་རྣམ་པ་ཀུན་ཏུ་སྐུལ་ལྕག་གཏོང་དགོས་པ་ནི་གཟུར་གནས་སྐྱེ་བོའི་ལས་འགན་ཞིག་ཏུ་སེམས་བཞིན་ཡོད།

བསྟན་འཛིན་ལགས། ཁྱེད་ཀྱིས་དུས་ཚོད་གང་འཚམ་བཏོན་ནས་ཡིག་ནོར་ལ་སྐྱོན་འདོན་གནང་བར་བཀའ་དྲིན་ཆེ་ཞེས་ཞུ་འདོད་བྱུང་།

དུས་བབ་ཀྱི་གསར་འགོད་པ་རྣམ་པ་ཚོས་ཀྱང་ལས་བྲེལ་ལ་མ་བལྟོས་པར་ཚིག་འབྲུ་རེ་རེ་ནས་དག་བཤེར་གནང་རྒྱུར་འབད་བརྩོན་གནང་ན་ནོར་འཁྲུལ་གྱི་ཡིག་འབྲུ་འདི་དག་ང་ཚོའི་མིག་ཡུལ་ན་མངོན་མི་སྲིད།།

དྲ་གྲོགས་བསྟན་འཛིན་ལགས།
ཁོམ་པ་ཡོད་ན་ངེད་ཚང་ལ་ཐེངས་གཅིག་ཕེབས་དང་མཁས་དབང་པདྨ་འབུམ་ཚང་གིས་ངེད་གཉིས་ལ་བསམ་འཆར་འཕྲིན་ཐུང་ཞིག་བསྐུར་འདུག
ད་དུང་ངེད་གཉིས་ནས་ཁོང་ལ་བསམ་ཚུལ་གཞན་ཞིག་ཕུལ་རྒྱུའི་ཐད་ལ་ཡང་ཁ་བརྡ་རེ་བྱེད་ཡ།

དགོངས་དག གོང་དུ་མ་ཞིག་ཆད་འདུག དོན་འགྲུབ་བཀྲ་ཤིས་ཀྱི་ཤེས་ཚད་ཀྱིས་མ་འདང་བ་རེད།

༼བོད་ཀྱི་དུས་བབ་༽སྤྱིའི་འདོན་ཐེངས་ ༤༤༤ བཀླགས་བྱང༌།

ངས་ལོ་ངོ་བརྒྱད་རིང་གི་དུས་བབ་ཚགས་ཤོག་འདོན་ཐེངས་ཆ་ཚང་བཀླགས་མྱོང༌། ད་དུང་ཡང་མུ་མཐུད་ཀློག་གིན་ཡོད་པ་དང༌། རང་ཉིད་ནི་༼བོད་ཀྱི་དུས་བབ༽་འདི་སྤྱི་ཚོགས་ནང་དགོས་མཁོ་ག་ཚད་ཡོད་པ་དང༌། སྤྱི་ཚོགས་ཀྱིས་གདེང་འཇོག་ག་ཚད་ཅིག་བྱེད་ཀྱི་ཡོད་པའི་རིན་ཐང་ཆ་ཚང་ཤེས་མཁན་ཅིག་ལ་ངོས་འཛིན་བྱེད་ཀྱི་ཡོད། ངོས་འཛིན་འདིས། དུས་བབ་ཀྱི་གསར་འགོད་པ་འདི་ཚོས། ཚགས་ཤོག་དང་དྲ་ངོས་སུ་ཡིག་ནོར་སྤེལ་ནས་སླེབས་ཐེངས་རེར། སེམས་ལ་འཚབ་ཤ་ལངས་ཀྱི་འདུག འཚབ་ཤ་ལངས་ཐེངས་རེར་བསམ་ཚུལ་རེ་འདོན་གྱི་ཡོད།

ད་ལྟ་ངས། ཟླ་ ༣ ཚེས་ ༣༡ ཉིན་གྱི་༼བོད་ཀྱི་དུས་བབ༽་གསར་ཤོག་བམ་ཀློག་ཅིག་གྲུབ་པ་ཡིན། བམ་ཀློག་གི་ཞོར་ལ། ཡིག་ནོར་བརྡ་ནོར་མང་པོ་ཞིག་མཐོང༌། ཞིབ་མོའི་ལུགས་སུ་བྱས་པས་ནི། ཡིག་ནོར་བརྡ་ནོར། དོན་ནོར་འགོད་ནོར་གྱི་རིགས་ཅི་བས་མང་བར་ངེས་ནས་འདུག དེ་ནི། ཆུ་སྐྱར་ལས་ནི་ཆུར་ཤེས་དང༌། དུ་བ་ལས་ནི་མེར་ཤེས་ཀྱི་ཚུལ་དུའོ།། ད་ནི། ཚང་མར་དོ་སྣང་དང་སེམས་འཚབ་ཅིག་ཡོང་བ་དང༌། ཚང་མས་དུས་བབ་ལ་ཐུགས་ཁུར་གནང་བའི་ཆེད་དུ་ཀློག་མཁན་ཚོར་ཞུ་འབོད་ཅིག་བྱ་འདོད་བྱུང༌། ཡང་སྒོས་ཁྱད་པར་ཅན་གྱི་དབང་དུ་བྱས་ཏེ། དུས་བབ་གསར་འདོན་བྱེད་པོ་གཞོན་སྐྱེས་མཁས་པ་དགེ་འདུན་རབ་གསལ་ལགས་གཙོ་བྱས་པའི་འབྲེལ་ཡོད་རྣམས་ལ། དུས་བབ་ཀྱི་ཁ་ལོ་འདི་སྔོན་དང་འདྲ་མཚུངས་ཀྱི་ཕྱོགས་སུ། རིན་ཐང་གི་སྐས་རིམ་མཐོ་ས་དེར་དཀྱུ་གནང་ཡོང་བའི་ཞུ་འབོད་ཅིག་གྀ་ཆེད་དུ་ཡིན།

ངས་ཕངས་སེམས་ཆེན་པོས་ཞུ་རྒྱུ་གཅིག་ནི། ད་རེས་ཀྱི་དུས་བབ་འདོན་ཐེངས་འདིའི་ནང༌། བམ་ཀློག་ཅིག་བྱས་པས་ཀྱང་ཡིག་ནོར་བརྒྱ་ཕྲག་མ་ཟིན་ཙམ་སྤེལ་འདུག་པ་མིག་ལ་མངོན་པར་གྱུར། དོན་ནོར་བཅུ་གྲངས་འདུག ཚིག་སྡེབ་ཡ་ལད་དུ་གྱུར་པ་བཅུ་གྲངས་འདུག་སྟབས། ད་ནི་དངོས་འབྲེལ་བསམ་བློ་གཏོང་རན་ནས་འདུག

ཁ་སྔོན་དུས་བབ་ཀྱི་གསར་འགོད་པ་དོན་འགྲུབ་བཀྲ་ཤིས་ཟེར་བས་ངའི་སྟེང་ལ་བཀྲ་མི་ཤིས་པའི་རྫིག་གཏམ་ཉོག་པོ་ཞིག་སྤེལ་སོང་བའི་ནང༌། ༼བོད་ཀྱི་དུས་བབ་དྲ་ཤོག་གཉིས་ཀའི་སྟེང་ཡིག་ནོར་ཡོད་དམ་ཟེར་ན། ཡོད་ཟེར་རྒྱུ་ཡིན། གསར་འགྱུར་བརྒྱུད་ལམ་གཞན་ལས་མང་ངམ་ཉུང་ཟེར་ན། སྤོབས་པ་ཆེན་པོས་ཉུང་ཟེར་རྒྱུ་ཡིན།༽ ཅེས་བཤད་སོང༌། ཁོ་རང་གིས་བསྡུར་སའི་གསར་འགྱུར་བརྒྱུད་ལམ་གཞན་དེ་གང་ཞིག་ཡིན་ང་ལ་ཆ་མེད་རྒྱུས་མེད་ཡིན་ལ། བསྡུར་ཡུལ་དེ་གང་ཡིན་བཙལ་འདོད་དང༌། རྙེད་འདོད་ཀྱི་རེ་བའང་མེད།

དེས་ན། དེ་རིང་གི་ཁོམ་སྐབས་འདི་དང་བསྟུན་ནས། ར་རྒྱ་བློ་དབང་ཟེར་བ་ཞིག་དང༌། ལྷ་ལུང་རྒྱལ་ཟེར་བ་གཉིས་སྒེར་གྱི་རྩོམ་ཡིག་དེ་གཉིས་བཏང་སྙོམས་སུ་བཞག་པའི་འཕྲོས་ཀྱི་གསར་གནས་ཁག་གི་ནང་ཡིག་ནོར་བརྡ་ནོར་དང༌། ཚིག་སྡེབ་ཉོག་པར་གྱུར་པ་ཚབས་ཆེའི་རིགས་མཛུབ་མོས་རི་སྟོན་གྱིས་དཔེས་ཐར་ཆགས་སུ་དགོད་རྒྱུར།

ཤོག་ངོས་དང་པོའི་ངོས་སུ་གསལ་བ། བཙན་བྱོལ་བོད་གཞུང་༼གི༽ཕྱི་རྒྱལ་ཁག་༼གི༽སྐུ་ཚབ་དོན་གཅོད་ཁག་༼གི༽ཞེས་པ་ལྟ་བུ་གི་སྒྲའི་འཚང་ཁ་ཅན་གྱི་ཚིག་ཕྲེང་དེ་ནས་མགོ་བཙུགས་ཏེ་ཞུས་ན། བཞེངས་༼རྒྱུར༽ཞེས་འབྲི་དགོས་རྒྱུ་ལ་བཞེངས་༼རྒྱུ༽ཞེས་དང༌། ཚེས་ཉེར་བརྒྱད་ཉིན་དུས་དྲན་སྲུང་བརྩི་བྱས་ཟིན་འདས་པའི་བྱ་བ་སྟོན་དགོས་སར་༼བྱ་འཆར༽ཞེས་དང༌། མངོན་འདོད་དང་༼འཚམ་༽པ་ཞེས་འབྲི་དགོས་རྒྱུ་ལ་༼འཚམས་༽པ། ༼སྔ༽ལོ་ལ་༼སྔར་༽ལོ། ༼དགུང༽ལོ་ལ་༼དགོང༽་ལོ། འགུལ་༼བསྐྱོད༽་ལ་འགུལ་༼དཀྱོག༽ སྐུ་ངལ་༼བསྐྱོན༽པ་ལ་སྐུ་ངལ་༼སྐྱོན་༽པ། འགྲོ་༼ཡི༽རེད་ལ་འགྲོ་༼བ༽་རེད། གླ་གཞས་དག་༼ཏུ༽ལ་གླ་གཞས་དག༼དུ༽སོགས་སུ་ནོར་ནས་བྲིས་འདུག་པ་དང༌། དེ་སྟེང་གོ་རྒྱུ་མེད་པའི་ཚིག་དག་བསྣན་པས་ཡིད་སྐྱོ་བ་ལ་ཚད་མེད་པ་ཞིག་ཏུ་བྱས་འདུག

རྩོམ་སྒྲིག་པའི་གཏམ་གྱི་ནང་དུ། བཅིངས་༼འགྲོལ༽་ལ་བཅིངས་༼གྲོལ༽ དུས་༼རབས༽ལ་དུས་༼རབ༽བཀྲེས་༼ལྟོགས་༽ལ་བཀྲེས༼ལྟོག༽ མྱངས༼པ༽ལ་མྱངས་༼བ༽གཅེས་སྲོག་༼འཕྲོག༽ལ་གཅེས་སྲོག་༼ཕྲོགས༽ སྒེར་༼སྡོམ༽་ལ་སྒེར༼བསྡོམས༽ཞེས་ནོར་ནས་སྤེལ་འདུག་པ་དང༌། ཡང་ཚིག་གི་ཆ་ནས་བཤད་ན། གསོ་བ་རིག་པའི་གཞུང་ལུགས་དག་གི་ནང༌། ནད་གང་ཞིག་འཇུག་སྒོ་དྲུག་ཏུ་ཇི་ལྟར་འཇུག་ཚུལ་གྱི་སྐབས་སུ། པགས་ལ་གྲམ་ཞིང་ཤ་ལ་རྒྱས་པ་དང༌།། རྩ་རུ་རྒྱུ་ཞིང་རུས་ལ་ཞེན་པ་དང༌།། དོན་ལ་འབབ་ཅིང་སྣོད་དུ་ལྷུང་བ་འོ།། ཞེས་པའི་ཚིག་གི་འགྲོས་ལ་ཞུགས་པ་སྐབས་དོན་དང་འབྲེལ་མིན་ཇི་ལྟར་ཡང༌། ༼རུས༽་ལ་ཞེན་ལ་༼རིས༽་ལ་ཞེན། པགས་ལ་༼གྲམ༽་ལ་པགས་ལ་༼བཀྲམས༽ ཞེས་ནོར་ནས་བཀོད་འདུག་པས་མཚོན་བརྡ་ནོར་ཡིག་ནོར་དང༌། དེ་བས་ཚབས་ཆེ་བ་ནི། ད་ལྟ་བར་རྒྱ་ནག་གཞུང་དང་བོད་གཞུང་གང་གིས་ཀྱང་གླེང་མྱོང་མེད་ཅིང༌། དོན་དངོས་དང་རྒྱབ་འགལ་༼བོད་དུ་བཅོས་བསྒྱུར་སྒོ་འབྱེད་བྱས་ཏེ་མི་ལོ་ ༥༠ འཁོར་བ༽ཟེར་བ་ནི་དུས་ཀྱི་གཏམ་ཙམ་ཡང་མ་ཐོས་པའི་མཚང་དུ་འདུག་ལ། རྒྱ་ནག་གཞུང་གི་བཅོས་སྒྱུར་སྒོ་འབྱེད་སྲིད་བྱུས་ནི་ད་ལྟ་ལོ་ངོ་སུམ་ཅུའི་ཡུན་དུ་འདུག ཡང༌། འཛུམ་མདངས་༼ཀྱིས༽་བདེ་སྐྱིད་མཚོན་ན་ཞེས་འབྲི་དགོས་རྒྱུར་འཛུམས་མདངས་༼ཀྱི་༽བདེ་སྐྱིད་མཚོན་ན་ཞེས་དང༌། ཕུན་ཚོགས་དབང་རྒྱལ་༼གྱིས༽་བརྩམས་པ་ལ་ཕུན་ཚོགས་དབང་རྒྱལ་༼གྱི་༽བརྩམས་པ་སོགས་སུ་ནོར་ནས་བྲིས་པ་རེ་རེ་ནས་བྲི་བས་མ་ལངས།

དེ་ནས་རིམ་བཞིན། ༼ཐོངས་མཆན༽ལ་༼མཐོང་ཆེན༽ཞེས་དང༌། ཡང་སྐབས་མཚམས་འགའ་ཞིག་ཏུ༼མཐོང་མཆན༽ཞེས་བྲིས་འདུག་པས་མཚོན། ཐོངས་མཆན་གྱི་དག་སྡེབ་བྲིས་སྟངས་གཉིས་སུ་ནོར་ཐལ་དེ་སྐོར་གནས་ཚུལ་གཅིག་གི་ནང༌། འགོད་ཐེངས་བརྒྱད་དུ་ནོར་ནས་བཀོད་འདུག་པ་དང༌། འགྲེལ་བཤད་༼རྒྱག༽ལ་འགྲེལ་བཤད་༼བརྒྱག༽ ༼གོད་ཆག༽་ལ་༼བཀོད་ཆགས༽ ༼གུ་༽ཡངས་ལ་༼ཀུ་༽ཡངས། གྲོས་༼མཐུན༽་དོན་ཚན་བཅུ་བདུན་ལ་གྲོས་༼ཆོད༽་དོན་ཚན་བཅུ་བདུན། དགེ་༼བསྐོས༽ལ་དགེ་༼སྐོས༽ གོ་གནས་མར་༼ཕབ་༽ལ་གོ་གནས་མར་༼འཕབ༽ ༼འཚོགས༽ལ་༼ཚོགས༽ འགྲེལ་བཤད་༼བསྐྱོན༽ལ་འགྲེལ་བཤད་༼སྐྱོན༽ སྐད་ཆ་༼ཤོད༽་ཀྱིན་ལ་སྐད་ཆ་༼བཤད༽་ཀྱིན། ༼སྐྱེ༽སྒོ་ལ་༼སྐྱེས༽སྒོ། བསྐྱེད་༼བསྲིང་༽ལ་སྐྱེད་༼སྲིང༽ ཚོར་ཤུགས༼བསླངས་༽ལ་ཚོར་ཤུགས་༼སླངས༽ ཡོ་༼བསྲང་༽ལ་ཡོ༼སྲང༽ ཁྱོད་༼ཀྱིས༽བཤད་ལ་ཁྱོད་༼ཀྱི༽བཤད། གང་༼འཚམ་༽ལ་གང་༼འཚམས༽ ལོ་གཉིས༼རེའི༽མཚམས་ལ་ལོ་གཉིས་༼རེ་༽མཚམས། གོ་༼བསྡུར༽་ལ་གོ་༼སྡུར༽ ༼དམིགས༽་བསལ་ལ་༼དམགས༽་བསལ། ༼གོ་ལའི་༽ཚ་དྲོད་ལ་༼གོ་ལོའི་༽ཚ་དྲོད། རྩེ་༼ཕུད༽ལ་རྩེ་༼ཕུལ༽ ༼དགོང༽་དྲོ་ལ་༼དགུང༽་དྲོ། ༼གཅར༽རྡུང་ལ་༼བཅར་རྡུང༽ ཞིང་༼བྲན༽ལ་ཞིང་༼བྲིན༽ ༼སྔ་༽ནུབ་ལ་༼སྔར་༽ནུབ། རྡུང་རྡེག་ཚ་ནན་༼གྱིས༽་ཁ་གཏད་གཅོག་ལ་རྡུང་རྡེག་ཚ་ནན་༼གྱི་༽ཁ་གཏད་གཅོག དུས་རབས་དང་༼འཚམ་༽ལ་དུས་རབས་དང་༼འཚམས༽ཞེས་ནོར་ནས་བྲིས་འདུག་པ་སོགས་ཡིག་ནོར་བརྡ་ནོར་མང་པོ་སྤེལ་འདུག་པ་དང༌། མཇུག་མཐར། བོད་ཀྱི་དུས་བབ་གསར་ཁང་ནས་༼དཔར་༽འགྲེམས་ཞུས་ཞེས་བྱ་ཚིག་གིས་བསྙད་དགོས་རྒྱུ་ལ། བོད་ཀྱི་དུས་བབ་གསར་ཁང་གིས་༼པར་༽འགྲེམས་ཞུས་ཞེས་མིང་ཚིག་གིས་བསྙད་ནོར་བྱས་འདུག་པའི་བར་དུ། ཡིག་ནོར་མི་ཉུང་བ་ཞིག་སྤེལ་འདུག་སྟབས། ད་ནི་དངོས་འབྲེལ་ཤེས་ཡོན་གྱིས་ཕྱུག་པ་གང་ན་སུ་བཞུགས་སྤྱི་དང༌། བྱེ་བྲག་བོད་ཀྱི་དུས་བབ་གསར་ཤོག་དང་འབྲེལ་ཡོད་གང་ན་སུ་བཞུགས་དག་གིས་ལམ་སྟོན་མགོ་འདྲེན་ཅིག་གནང་རྒྱུ་འཕྱིས་ཚད་དུ་འདུག་ཅེས་ཞུ་བར་ཐལ་ལོ།།

བམ་ཀློག་ཅིག་གི་རྙེད་དོན་གོང་དུ་བསྟར་ནས་ཡོད་པ་འདི་ཡིན། ད་ནི། ༼བོད་ཀྱི་དུས་བབ་དྲ་ཤོག་གཉིས་ཀའི་སྟེང་ཡིག་ནོར་ཡོད་དམ་ཟེར་ན། ཡོད་ཟེར་རྒྱུ་ཡིན། གསར་འགྱུར་བརྒྱུད་ལམ་གཞན་ལས་མང་ངམ་ཉུང་ཟེར་ན། སྤོབས་པ་ཆེན་པོས་ཉུང་ཟེར་རྒྱུ་ཡིན།༽ ཅེས་ཨུ་ཚུགས་ཕོད་དམ་ཅི། དངོས་འབྲེལ་མི་འདི་ཚོར་དགོས་རྒྱུའི་ཤེས་ཡོན་ནི་མི་འདུག་ཐག་ཆོད་རེད། མི་དགོས་རྒྱུའི་ཨུ་ཚུགས་ཚ་ཙམ་ཡོད་ཐག་ཆོད་འདུག དུས་བབ་འདི་ལྟར་ཉམས་འགྲོ་ཡི་འདུག ཕངས་པ་ལ་ཨང༌། ཞེས་ཞུའོ།།