བརྒྱ་དཔོན་ཚོར་ཟབ་སྦྱོང་།

མཉམ་འབྲེལ་ཚོགས་གཙོ་སྤྱི་ཟུར་པདྨ་བདེ་ལེགས་མཆོག་གིས་མཉམ་འབྲེལ་གྱི་ལས་དོན་བྱེད་ཕྱོགས་སྐོར་ལ་བཀའ་སློབ་གནང་བཞིན་པ།

ཟླ་སྔོན་མའི་ཟླ་མཇུག་ནས་མགོ་འཛུགས་ཀྱིས་ཟླ་འདིའི་ཟླ་མགོ་བར་སྦེལ་ཀོབ་ལུགས་བདེ་གཉིས་ཀྱི་གཞིས་གྲོང་ཁག་གི་བརྒྱ་དཔོན་རྙིང་པ་རྣམས་བརྗེ་བསྒྱུར་བྱས་ཡོད་ལ། ཕྱི་ཚེས་ ༧ ཉིན་བཀྲ་ཤིས་བདེ་ལེགས་དང་ཚེ་རིང་ལྷུན་འགྲུབ་རྣམ་གཉིས་ཀྱིས་གོ་སྒྲིག་འོག སྦེལ་ཀོབ་ལུགས་ཟུང་མཉམ་འབྲེལ་ཚོགས་ཁང་དུ་གཞིས་གྲོང་ཁག་གི་བརྒྱ་དཔོན་གསར་བ་རྣམས་ལ་ས་གནས་གཞིས་ལས་ཁང་དང་མཉམ་འབྲེལ་གྱི་ལས་དོན་བསྒྲུབ་ཕྱོགས། གནས་ཡུལ་རྒྱལ་ཁབ་དང་མངའ་སྡེའི་ཁྲིམས་ཀྱི་སྐོར། དེ་བཞིན་གསར་འགོད་དང་འབྲེལ་བའི་རྒྱལ་སྤྱིའི་ནང་བོད་དོན་ལས་འགུལ་སྤེལ་ཕྱོགས་བཅས་ཀྱི་བརྗོད་གཞིའི་ཐོག་བགྲོ་གླེང་ཟབ་སྦྱོང་ཞིག་གོ་སྒྲིག་བྱས་ཏེ། མཉམ་འབྲེལ་ཚོགས་གཙོ་སྤྱི་ཟུར་པདྨ་བདེ་ལེགས་མཆོག་གིས་མཉམ་འབྲེལ་གྱི་ལས་དོན་བྱེད་ཕྱོགས་སྐོར་ལ་བཀའ་སློབ་དང་། བོད་རིགས་ཁྲིམས་རྩོད་པ་འཕྲིན་ལས་ལགས་ཀྱིས་གནས་ཡུལ་རྒྱ་གར་གྱི་ཡུལ་ཁྲིམས་སྐོར། གཞིས་མགོ་བཀྲ་ཤིས་དབང་འདུས་ལགས་ཀྱིས་གཞིས་ལས་ཁང་གི་ལས་དོན་བྱེད་ཕྱོགས། གཞོན་ནུའི་ཚོགས་གཞོན་ཟུར་བ་བློ་བཟང་ཡེ་ཤེས་དང་བོད་ཀྱི་བང་ཆེན་གསར་འགོད་པ་བཀྲ་ཤིས་བདེ་ལེགས་ཀྱིས་གསར་འགོད་དང་འབྲེལ་བའི་བོད་དོན་ལས་འགུལ་སྤེལ་ཕྱོགས་བཅས་ཀྱི་ཐད་དུ་གསུང་བཤད་གནང་བ་དང་། དྲི་བར་ལན་འདེབས་ལན་གནང་ཡོད།

འདིའི་ཐད་བཀྲ་ཤིས་བདེ་ལེགས་ཀྱིས་བརྗོད་དོན། ༸གོང་ས་མཆོག་གིས་མི་སོ་སོ་ལ་དཔག་པའི་འགན་རེ་འཁུར་དགོས་པ་རེད་ཅེས་གསུངས་པ་ལྟར། ངེད་གཉིས་ཀྱིས་ཀྱང་སོ་སོའི་སྤྱི་ཚོགས་དང་མི་མང་ལ་འགན་འཁུར་ཏེ། ཕན་ཐོགས་ཤིག་བྱུང་ན་བསམ་སྟེ་ཟབ་སྦྱོང་འདི་གོ་སྒྲིག་བྱས་པ་ཡིན་ལ། འདིར་བརྒྱ་དཔོན་དེ་ཚོར་ཟབ་སྦྱོང་སྤྲོད་དགོས་དོན་ནི། ཁོང་ཚོ་སྤྱི་ཚོགས་དང་དཔལ་འབྱོར། ཆབ་སྲིད་བཅས་ཀྱི་གནས་སྟངས་ཐད་མི་མང་དང་ཐད་ཀར་འབྲེལ་བ་ཡོད་སྟབས། ཁོང་ཚོ་ལ་ཟབ་སྦྱོང་སྤྲད་པ་ཡིན་ན་མི་མང་ལ་ཕན་ཐོགས་ཡོང་གི་རེད་བསམ་པ་ཡིན་ཞེས་བརྗོད་ཡོད།