དཔལ་འབྱོར་འཚོལ་སྒྲུབ་ནི་གལ་ཆེན་པོ་ཡིན་ནའང། དཔལ་འབྱོར་གྱིས་ང་ཚོའི་རྩ་དོན་ཉོ་ཐུབ་པ་ཞིག་གཏན་ནས་མིན་པས། དཔལ་འབྱོར་དེ་བུད་མེད་ཀྱི་ནུས་པ་སྐྱེད་སྲིང་ཐད་བཏང་སྟེ། བོད་ཀྱི་བུད་མེད་རྒྱལ་སྤྱིའི་སྒང་ལ་སླེབས་ཐུབ་ཆེད་འབད་བརྩོན་བྱ་རྒྱུ་ཡིན་ཟེར།
བོད་ཀྱི་བུད་མེད་ལྷན་ཚོགས་ཀྱི་སྐབས་དགུ་བའི་ཚོགས་ཆེན་དེ་ཕྱི་ཚེས་ ༡༠ ཉིན་ངྷ་སྟེང་བོད་ཁྱིམ་བདེ་སྐྱིད་ཚེ་རིང་ཚོགས་ཁང་དུ་དབུ་འཛུགས་ཀྱིས་ཉིན་ལྔའི་རིང་ས་གནས་ ༣༡ ནས་ཕེབས་པའི་ཚོགས་མི་ ༡༧༠ ལྷག་འདུ་འཛོམས་ཐོག་བགྲོ་གླེང་གོ་བསྡུར་དང་གྲོས་གཞི་གྲོས་ཆོད་གཏན་འབེབས། རྒྱུན་ལས་གསར་བ་བསྐོ་འཇོག་བྱས་ཏེ་ཕྱི་ཚེས་ ༡༥ ཉིན་མཇུག་སྒྲིལ་སོང་ལ། ཐེངས་འདིའི་ཚོགས་ཆེན་སྟེང་བོད་ཀྱི་བུད་མེད་ལྷན་ཚོགས་ཀྱིས་སྔོན་མའི་གྲོས་གཞི་ཁག་མཇུག་སྣོན་དང་གྲོས་ཆོད་གསར་པ་གཏན་འབེབས་གནང་བ་དང་། མང་མོས་འོས་བསྡུའི་ལམ་ནས་སྐབས་དགུ་པའི་བུད་མེད་ལྷན་ཚོགས་ཀྱི་རྒྱུན་ལས་བཅུ་གཅིག་གསར་ཏུ་བསྐོ་བཞག་གནང་ཡོད།
སྐབས་དགུ་བའི་རྒྱུན་ལས་བདམས་ཁོངས་སུ། བུད་མེད་ལྷན་ཚོགས་ཀྱི་ཚོགས་གཙོ་ཟུར་བ་དང་མདོ་སྨད་སྤྱི་འཐུས་ཀིརྟི་སྒྲོལ་དཀར་ལྷ་མོ་ལགས་ཚོགས་གཙོར་བསྐོ་བཞག་དང་། སྤེལ་ཀོབ་ས་གནས་བུད་མེད་ཚོགས་གཙོ་བསམ་གཏན་ལགས་ཚོགས་གཞོན། དབུས་རྒྱུན་དྲུང་ཆེ་ཚེ་གཡང་ལགས་བསྐྱར་ཏུ་དྲུང་ཆེར་བསྐོ་བཞག དབུས་བུད་མེད་ལས་བྱེད་ཟླ་སྒྲོན་དབྱིན་ཇིའི་སྐད་ཡིག་ཐོག་བོད་ཀྱི་བུད་མེད་ཉམས་ཞིབ་པ་དང་གསར་འགོད་འབྲེལ་མཐུད་པ་གཅིག་ལྕོགས། དབུས་རྒྱུན་བསྟན་འཛིན་སྒྲོལ་མ་བསྐྱར་ཏུ་དབུས་རྒྱུན་ལ་བསྐོ་འཇོག བོད་ཀྱི་དུས་བབ་གསར་འགོད་པ་ཚེ་རིང་སྐྱིད་བོད་སྐད་ཡིག་ཐོག་བོད་ཀྱི་བུད་མེད་ཉམས་ཞིབ་པ་དང་གསར་འགོད་འབྲེལ་མཐུད་པ་གཅིག་ལྕོགས། དབུས་གཙང་སྤྱི་འཐུས་སྒྲོལ་མ་ཚེ་རིང་། དབྱངས་ཅན། པ་སངས་སྒྲོལ་མ། སྐལ་བཟང་དབང་མོ། བཀྲ་ཤིས་སྒྲོལ་མ་བཅས་དབུས་རྒྱུན་ལས་ལ་བསྐོ་བཞག་གནང་སོང།
ཉིན་མཐའ་མའི་མཇུག་སྡོམ་སྐབས་བུད་མེད་ལྷན་ཚོགས་ཀྱི་ཚོགས་གཙོ་ལས་འཁྱུར་བ་བུ་མོ་ཚེ་རིང་ལགས་ཀྱིས། ང་ཚོས་ད་ལྟའི་བར་དུ་བོད་ཀྱི་བུད་མེད་རང་བསམ་ནས་ལས་ཀ་བྱས་ཡོད། ང་ཚོ་མི་རིགས་ཤིག་གི་འཐབ་རྩོད་བྱེད་མཁན་ཡིན་པ་དང་འཚེ་མེད་ཞི་བའི་འཐབ་རྩོད་ཐོག་ངོ་རྒོལ་ལས་འགུལ་འདྲ་མིན་སྤེལ་བ་སོགས་ཀྱིས་རྒྱལ་སྤྱིའི་སྤྱི་ཚོགས་ཐོག་བོད་ཀྱི་བུད་མེད་ལ་མཐོང་སྤྲོད་བཞིན་པ་ཞིག་ཆགས་ཡོད་ལ། དེ་ནི་ང་ཚོ་བུད་མེད་ལྷན་ཚོགས་ཀྱི་གཟི་བརྗིད་རེད་བསམ། དེ་བཞིན། བུད་མེད་ཀྱི་རིག་གནས་འཕེལ་རྒྱས་དང་འཇོན་ནུས་སྐྱེད་སྲིང་ཐད་བུད་མེད་ཁོ་ནར་དམིགས་ཏེ་སྒྲོལ་མ་དུས་དེབ་སོགས་རིག་གནས་འཕེལ་རྒྱས་ཀྱི་སྡིངས་ཆ་གསར་བ་བསྐྲུན་ཡོད་ལ། དཔལ་འབྱོར་གྱི་ཐད་ནས་ཀྱང་ཧིམ་སྒོར་འབུམ་ ༩༨ ལྷག་མ་འོངས་པའི་རྒྱུན་ལས་ལ་བཞག་ཡོད། ད་ལྟའི་བར་གྱི་ལས་འགུལ་ཐད་བེད་སྤྱོད་བཏང་བ་བཞིན་གྲུབ་འབྲས་ཀྱང་མི་དམན་པ་བླངས་ཡོད་པས། དཔལ་འབྱོར་འཚོལ་སྒྲུབ་གལ་ཆེན་པོ་ཡིན་ནའང། དཔལ་འབྱོར་གྱིས་ང་ཚོའི་རྩ་དོན་ཉོ་ཐུབ་པ་ཞིག་གཏན་ནས་མིན་པས། དཔལ་འབྱོར་དེ་བུད་མེད་ཀྱི་ནུས་པ་སྐྱེད་སྲིང་བོད་དོན་ལས་འགུལ་ཐད་བཏང་སྟེ། བོད་ཀྱི་བུད་མེད་རྣམས་རྒྱལ་སྤྱིའི་སྒང་ལ་སླེབས་ཐུབ་ཆེད། ས་གནས་རྒྱུན་ལས་རྙིང་བ་རྣམས་ཀྱིས་རྒྱུན་ལས་གསར་པ་རྣམས་ལ་ལམ་སྟོན་དང་རྒྱབ་སྐྱོར་གནང་རྒྱུ་དེ་གལ་ཆེན་པོ་རེད། ཞེས་གསུངས་སོང།
བཀུར་འོས་སྤྱི་འཐུས་སྨོན་ལམ་མཐར་ཕྱིན་ལགས་སུ་ཞུ་དོན། གལ་ཏེ་ཉིད་ཀྱིས་ལྷག་བསམ་གྱི་ཐུགས་ཡངས་ཆེན་པོས་གུས་མོར་ལམ་སྟོན་གནང་བ་ཡིན་ན་ནི་ཐུགས་རྗེ་ཆེ་ཞུ་རྒྱུ་ཡིན་མོད། ཡིན་ཡང་གོང་གི་གསར་འགྱུར་དེ་འབྲི་མཁན་ང་ཚེ་རིང་སྐྱིད་མིན་ལགས།
རྒྱུན་ལས་བཅུ་གཅིག་གསར་ཏུ་བསྐོ་བཞག་གནང་འདུག
རྩོམ་སྒྲིག་པ་ལགས། ད་དུང་དངོས་གནས་མི་བཅུ་གཅིག་དང་བཅུ་གཉིས་གང་ཡིན་གསལ་པོ་མི་འདུག་ལགས།
གསལ་འདེབས་གནང་བར་ཐུགས་རྗེ་ཆེ། བཟོ་བཅོས་བརྒྱབས་ཡོད།
ཐོག་མའི་གསར་འགྱུར་ནང་བོད་ཀྱི་བུད་མེད་ལྷན་ཚོགས་ཀྱི་སྐབས་དགུ་པའི་རྒྱུན་ལས་བཅུ་གཅིག་གསར་དུ་བསྐོ་གཞག་གནང་ཡོད་སྐད་དང༌། དེ་རྗེས་རྒྱུན་ལས་གསར་པ་མི་བཅུ་གཉིས་ཀྱི་མིང་བགྲངས་འདུག་པ་མ་ཟད། བཀྲ་ཤིས་སྒྲོལ་མ་སོགས། ཞེས་སོགས་སྒྲ་ཞིག་ཀྱང་སྦྱར་འདུག་པས་སྡེ་ཚན་འདི་གསུམ་གང་ལ་ཆགས་འཇོག་དགོས་སམ། གསར་འགྱུར་འདི་ཚེ་རིང་སྐྱིད་ཀྱིས་བྲིས་པ་ཡིན་ན་བུད་མེད་ལྷན་ཚོགས་ཀྱི་བོད་ཡིག་གསར་འགོད་འབྲེལ་མཐུད་པའི་ལས་འགན་དངོས་སུ་མ་བླངས་གོང་ཚིག་སྡུད་ཀྱི་གོ་བ་ཡང་དག་པ་ཞིག་ལོན་པ་མ་གནང་ན་བོད་ཡིག་ཐོག་ནས་ཞབས་འདྲེན་ཞུ་ཉེན་འདུག
གསར་འགྱུར་དེ་མི་གཞན་ཞིག་གིས་བྲིས་པ་ཡིན་ཚེ་དེ་རང་ནས་འགན་ཁུར་དགོས་འདུག
ཀིརྟི་སྒྲོལ་དཀར་ལྷ་མོ་ལགས་བོད་ཀྱི་བུད་མེད་ལྷན་ཚོགས་ཀྱི་ཚོགས་གཙོ་དང་། བསམ་གཏན་ལགས་ཚོགས་གཞོན། ཚེ་གཡང་ལགས་དྲུང་ཆེ་དང་ ཟླ་སྒྲོན་དབྱིན་ཇིའི་སྐད་ཡིག་ཐོག་བོད་ཀྱི་བུད་མེད་ཉམས་ཞིབ་པ་དང་གསར་འགོད་འབྲེལ་མཐུད་པ་གཅིག་ལྕོགས། བསྟན་འཛིན་སྒྲོལ་མ་དབུས་རྒྱུན་ལས་དང་ཚེ་རིང་སྐྱིད་བོད་སྐད་ཡིག་ཐོག་བོད་ཀྱི་བུད་མེད་ཉམས་ཞིབ་པ་དང་གསར་འགོད་འབྲེལ་མཐུད་པ་གཅིག་ལྕོགས། བཅས་གསར་དུ་བསྐོས་པའི་ལས་བྱེད་ཡོངས་ཀྱིས་བསམ་དོན་འགྲུབ་པའི་སྨོན་འདུན་དང་བུད་མེད་ཚོ་ལ་ཐོབ་ཐང་རྩོད་མེད་ངང་སྤྲད་པ་ཡིན། ལྷག་པར་དུ་དྲ་གྲོགས་ཚེ་རིང་སྐྱིད་མ་འོངས་པར་བུད་མེད་ཚོགས་གཙོ་འདུག་ཐུབ་པའི་རེ་བ་དང་།དེ་དུས་བུད་མེད་ཐོབ་ཐང་་ཡར་རྒྱས་གོང་འཕེལ་ཡོངས་པར་ཞུ།
བུད་མེད་ཚོགས་པའི་ཚོགས་གཙོ་ཟུར་པས་སྔོན་ཆད་གཞན་གྱི་ས་མིག་འཕྲོགས་ནས་དེའི་ཚབ་ཏུ་ཁོང་རང་གི་བུ་མོ་མཐོ་སློབ་ནང་བཏང་ཡོད་པ་ཞིག་གོ་ཞིག་གོ་བྱུང་། དེའི་སྐོར་གསལ་པོ་ཤེས་མཁན་ཡོད་ཚེ་འདིར་གསལ་པོ་ཞིག་བཤད་རོགས།
གསུང་ཆོས་རེ་གནང་སར་ཁོར་ཡུག་གཙང་སྦྲ་དང་སྲུང་སྐྱོབ་ཀྱི་ལས་ཀ་བྱེད་ཐུབ་ཀྱི་རེད། དེ་མིན་བུད་མེད་ཚོགས་པ་ལ་རེ་བ་ཆེན་པོ་རྒྱག་ས་ཨེ་ཡོད།་ ངས་དངོས་གནས་བཤད་ཀྱིན་ཡོད། ད་ལྟ་བར་དུ་བུད་མེད་ཚོགས་པས་བྱས་རྗེས་ཡོད་མེད་ལ་མ་ལྟོས་པར་ངལ་བ་དང་བླངས་ཀྱི་ལས་ཀ་གང་དང་གང་བྱས་མྱོང་བ་རེད། བོད་ཀྱི་བསྟན་སྲིད་སྐྱོན་རྒྱུ་དང་བུད་མེད་ཀྱི་ཁ་ཕྱོགས་བསྒྱུར་རྒྱུ་ཟེར་བ་ཅུང་ཆེ་མེད་དམ།
ནོར་བཅོས། རྒྱན་ལས་ཞེས་པ་རྒྱུན་ལས་སུ་བཅོས་རོགས།
གསར་དུ་འདེམས་ཐོན་བྱུང་བའི་ཚོགས་གཙོ་ཚོགས་གཞོན་དང་། རྒྱན་ལས་ཡོངས་ལ་བཀྲ་ཤིས་བདེ་ལེགས་དང་ལས་དོན་ཆེན་པོ་བསྒྲུབས་ཐུབ་པའི་སྨོན་འདུན་ཡོད། ལྷག་པར་ཚེ་རིང་སྐྱིད་ཀྱིས་ད་ཕན་ལས་ཀ་བྱེད་མཁན་ཚོར་མ་འགྲིག་མ་འཐུས་པ་ཡིག་ངག་གཉིས་ཐོག་ནས་ལུང་པ་གང་བཤད་དང་ཤོད་བཞིན་པར་བརྟེན། ད་ཆ་རང་གི་དཔུང་པའི་སྒང་ལ་འགན་སླེབས་དུས། ཁ་ནས་བཤད་པ་བཞིན་ལག་ལེན་དུ་བསྟར་ཏེ་བྱས་རྗེས་འཇོག་ཐུབ་པའི་རེ་བ་ཡོད།
བུད་མེད་ཚོགས་པའི་ཚོགས་གཙོ་རྙིང་པས་དབུས་པའི་དབུས་རྒྱུན་འཁྱུར་འགྲོ་མཁན་ཚོས་འདས་པའི་ལོ་ཁ་ཤས་ནང། བུད་མེད་ཚོགས་པའི་སྒྲིག་འཛུགས་ཡར་རྒྱས་དང་། ལས་འགུལ་སྣ་མང་སྤེལ་བ། སྤྱི་ཚོགས་ནང་ཤ་མེད་ཁ་ལག་བཟོ་སྟངས་ཚུན་ནས་ཟབ་སྦྱོང་སྤྲད་པ། ལྷག་པར་བུད་མེད་ཚོགས་པའི་དཔལ་འབྱོར་གནས་སྟངས་ཡར་རྒྱས་དང་དྲིལ་བསྒྲགས་བྱེད་སྟངས་ལ་ནུས་པ་བཏོན་སོང་། དེ་ཚོར་ཐུགས་རྗེ་ཆེ་ཞུ་རྒྱུ་ཡིན།