་་་་་་་་་སྒྱུ་མའི་བྲན་གཡོག་གི་མི།
སྟོང་བསམ་བྲག་ལ་འཕྱ་བའི་གླུ་སྐད་ཀྱིས།།
མི་མེད་ཐང་ལ་བརྡབས་པའི་གདངས་དབྱངས་ལ།།
བྲང་ན་མེ་ཏོག་འཛུམ་པའི་ཚོར་བ་འདིས།།
རང་སྡུག་གནམ་ལ་གཏད་པའི་ངག་ཞིག་འདར།།
ས་ཐག་རིང་བོ་གང་ནས་མ་ཡོང་བར།།
ཉེ་སར་མཛའ་བའི་མི་ཞིག་མ་ཐོབ་ཀྱང་།།
གཏིང་ནས་བཞུར་བའི་སེམས་ཀྱི་གཤིས་ལུགས་འདི།།
སྟོན་སའི་གྲོགས་ཀྱི་དངས་མ་སུ་ཞིག་མཆིས།།
འདྲིས་མེད་སྙིང་གི་ཚིག་གསུམ་མ་ལྷོད་པར།།
རྒྱུས་ཡོད་གྲོང་གི་བུད་མེད་གཅེར་བུ་ལ།།
ཆགས་པའི་བསྲེས་པ་མེད་པའི་གབ་ཚིགས་ཤིག།
ག་ལེར་གང་དུ་བྱུང་ཡང་འགྱུར་འགྲོས་རྒོད།།
ཀུ་རིང་བཏབ་ཀྱང་སྐྱེ་གཟུགས་མི་ཞུགས་ཀྱང་།།
ལན་ཞིག་སྤྲད་ཀྱང་སེམས་པ་མི་འཁུགས་པར།།
བྲིས་པའི་ཡི་གེ་ཤོག་ངོས་གསལ་ན་ཡང་།།
ཀློག་མཁན་སྟོང་གི་སེམས་པ་སྒོར་ལ་ཕྱོགས།།
དམ་བཅའི་རི་མོ་ཁ་ཡི་སྤུ་བ་བཞིན།།
ཚིག་གི་འཕྲེང་བ་སྙི་མོ་ཁ་སྐད་ལྟར།།
རྒས་པའི་སྐྲ་ཉེག་རེ་རེ་ལྷུང་ཤུལ་དུ།།
དགའ་བའི་འཕར་སྒྲ་བྲང་གི་གཉེན་པོ་ཞིག།
དོན་མེད་དུས་ཚོད་བཙལ་བའི་བར་གསེང་དུ།།
ཉེས་མེད་ཁྲིམས་ཀྱི་བཙོན་ལ་ཚུད་ཉིན་ནས།།
ཤུ་རིང་ངན་པ་འཐེན་པའི་འཁྱམ་པོ་ཞིག།
རང་གི་ཕ་ཡུལ་བྲལ་པའི་སེམས་སྡུག་ལྕི།།
གྲངས་ཀྱི་མི་ལོངས་མཚན་གྱི་སྐར་ཚོགས་ཤིག།
མཐོང་རྒྱུ་དཀོན་པ་བརྩེ་བའི་དངས་མ་ཞིག།
མི་འདོད་ནད་ཀྱི་སེམས་ཁམས་ཆལ་བོ་འདིས།།
ཕུང་བོ་འདི་ལ་བྲན་གཡོག་མཚམས་མ་ཆད།།
༡༧།༤།༠༩
རི་དགས་བསེ་རུ་ལགས། ངས་སྐུ་ཉིད་ལ་བཀའ་འདྲི་ཞིག་ཡོད་པ་འདིར་ལན་ཞིག་བཏབ་ན་འགྲིག་གམ། ཁྱེད་རང་ད་ལྟ་གང་དུ་གནས་བཞུགས་བྱེད་ཀྱི་ཡོད། ཕྱག་ལས་ག་རེ་གནང་བཞིན་ཡོད།
ཤ་ཁྲག་རུས་གསུམ་དྲ་ཐོག་ཏུ་ཕེབས་པ་ནས་ད་བར་སྐུ་ཉིད་ལ་གོ་སྐབས་གང་མང་ཞིག་བྱུང་སོང་། སྐུ་ཉིད་རྩོམ་གྱི་སྒྱུ་རྩལ་དང་ཡི་གེའི་དག་སྡེབ་སོགས་ལ་ཡར་རྒྱས་ཤུགས་ཆེན་ཕྱིན་པའི་ཚོར་སྣང་དང་མྱོང་སྣང་གཉིས་བྱུང་བས་ད་དུང་སྐུ་ཉིད་ཀྱིས་འབད་བརྩོན་གནང་རོགས་ལ། ཕྲན་སོགས་དྲ་གྲོགས་ཚོར་ཡང་ཁྱེད་ཀྱི་ཡི་ཐང་མ་ཆད་པའི་སེམས་ཀྱི་ཕོ་ཉ་དེའི་བགྲོད་ཚུལ་དང་བགྲོད་སྟངས་ཤིག་ང་ཚོར་གསུངས་དང་།
བཅོས། འགྲུབ་པའི་ནུས་པ་ང་ཚོས་མི་ཤེས་ཀྱང་།།
བཅོས། འགྲུབ་པའི་ནུས་པ་ང་ཚོས་མི་ཤེས་ཀྱང་།།
བལྟས་ཀྱང་མིག་གི་དབང་ནས་སེམས་ཀྱི་ཞིང་།།
ག་ལེར་འཛུལ་དེ་འོང་དུས་བོད་ཀྱི་བུ།།
ངེད་ཅག་ས་མཐའི་མགྲོན་པོ་ཆགས་ཉིན་ནས།།
ཚང་མས་སྐྱིད་སྡུག་གཅིག་གི་མངའ་ཁོངས་སུ།།
རང་རང་ནུས་པའི་སྲི་ཞུ་བོད་མི་ལ།།
སྒྲུབ་པའི་འདོད་བློ་ངེད་ཅག་ཀུན་ལ་ཡོད།།
འགྲུབ་པའི་ནུས་པ་ང་ཚོ་མི་ཤེས་ཀྱང་།།
ཕྱི་རབས་བོད་མིས་ངོས་ཟིན་ཐོབ་སོང་ན།།
དེ་འདྲ་དེ་ཙམ་ང་ཚོས་ཤུལ་རྗེས་ཡིན།།
ང་ཡིས་རྟག་དུ་དེ་ལྟར་བསམ་བཞིན་དུ།།
རང་གི་ནུས་པའི་ཅོག་ཚད་འབད་ཁུལ་གྱིས།།
ཟིན་བྲིས་ཁྲོད་དུ་ཡང་ཡང་ཞུགས་པ་དང་།།
རང་གི་ཤེས་ཚད་ཁྱེད་ཚོར་འབུལ་བཞིན་ཡོད།།
ཀློག་མཁན་མང་བོ་ཞིག་ལ་སྤྲིངས་བཞིན་ཡོད།།
བོད་མི་མང་བོ་ཞིག་ལ་བཤད་བཞིན་ཡོད།།
འདི་ནི་ང་ཚོས་ནུས་པའི་སྲུ་ཞུ་རེད།།
དེ་འདྲ་ཨེ་རེད་གྲོགས་ཀྱི་དངས་མ་ཚོ།།
ཁྱེད་ཅག་ཡང་ཡང་འདི་རུ་ཕེབས་ཐེངས་རེ།།
བུ་ངའི་སེམས་ཀྱི་དགའ་བ་ལྷག་དུ་འཕེལ།།
སླར་ཡང་མྱུར་དུ་ཕེབས་ནས་གླེང་མོལ་རེ།།
བྱེད་རྒྱུ་མ་བརྗེད་དྲ་ཐོག་སྤུན་ཟླ་ཚོ།།
བདེན་དོན་ཀ་བ་སྲོང་པོས།།
ལུགས་མཐུན་ལྕམ་དྲལ་འདེགས་སྐབས།།
ཞི་བདེའི་ཁང་ཁྱིམ་ནང་ནས།།
རིགས་མཐུན་དྲ་གྲོགས་མཇལ་བྱུང་།།
གྲོགས་པོ་བཟང་བོ། ང་ལས་ཀའི་བྲེལ་ཟིང་གིས་ཁྱེད་དང་ལབ་གླེང་གང་ཡང་བྱེད་རྒྱུ་མ་བྱུང་བར་ཉིན་འགའ་འགོར་སོང༌། དེ་རིང་ཆེད་དུ་ཉིད་ཀྱི་རྩོམ་ཡིག་དེ་ཐེངས་གཅིག་བཀླགས་རྗེས་བསམ་ཚུལ་འདི་འབྲི་བཞིན་ཡོད། ཤ་ཁྲག་ལགས། སྙན་ངག་འདི་ཡག་པོ་ཞིག་འཁྱོངས་འདུག འདི་ལྟར་སོང་ན་ཡར་རྒྱས་ཀྱི་རྣམ་པ་མངོན་གསལ་དོད་པོ་རེད། འདི་ནི་ངས་ཉིད་ལ་སེམས་ཤུགས་སྤར་བ་ཙམ་མིན་པར། དོན་དངོས་ཀྱི་སྐད་ཆ་ཡིན། མུ་མཐུད་དུ་འབད་བརྩོན་བྱོས། ང་ནམ་ཡང་ཁྱོད་དང་འགྲོགས་ནས་ཡོད།
དྲ་གྲོགས་བོད། ཤ་ཁྲག་རུས་གསུམ་ལ།
རྒྱ་རིང་ས་མཐའི་དྲ་གྲོགས་ལྷག་བསམ་ཅན། །
ཤ་ཁྲག་རུས་གསུམ་མིང་ཅན་འདི་རུ་ཉོན། །
ཁྱེད་ཀྱི་ལྷག་བསམ་དྭངས་མའི་བསམ་ཚུལ་དེ། །
ང་ཡི་ཡ་ཆུང་སེམས་ལ་ཆུ་ལྟར་བཞུར། །
ང་ནི་བདེན་དོན་སྐྱོང་བའི་བུ་ལ་དགའ། །
ང་ནི་དྲང་གཏམ་སྨྲ་བའི་གྲོགས་ལ་དགའ། །
ང་ནི་སེམས་རྒྱུད་བཟང་བའི་རིགས་ལ་དགའ། །
ང་ནི་ཁྱོད་ལྟའི་དྲ་གྲོགས་རྣམས་ལ་དགའ། །
རང་གི་བྱས་ཉེས་རང་གིས་ངོས་ཟིན་པས། །
ཁྱེད་ཀྱིས་གསུངས་པ་ང་ཡིས་ལེགས་སོ་ཞུ། །
དྲང་བདེན་སྐྱོང་བའི་ཁྱོད་ལྟའི་དྲ་གྲོགས་ཤིག །
དེ་རིང་འདི་རུ་ཕེབས་པར་སྐལ་བ་བཟང་། །
རེ་འགས་ཁྱོད་ལ་ཚོགས་གཏམ་བཏང་བ་མཐོང་། །
རེ་འགས་ཁྱོད་ལ་བསྟོད་བསྔགས་བྱེད་པ་ཐོས །
འགའ་ཞིག་བར་མར་གནས་པ་འགྲོ་ལུགས་ཙམ། །
ང་ནི་ཁྱོད་ཀྱི་གཤིས་ལ་ཤིན་ཏུ་དགའ། །
ཁྱོད་ལྟའི་དྲ་གྲོགས་སེམས་རྒྱ་ཡངས་པ་ཞིག །
དྲ་ཐོག་འདི་ན་མེད་ཅེས་བརྗོད་སྤོབས་ཀྱང་། །
གཡམ་ལ་རྒྱུག་མཁན་རེ་འགས་འུ་གཉིས་ལ། །
དོན་མེད་ཚིག་གིས་མདའ་གཞུ་བསྣུན་ལ་སྐྲག །
དེ་ལྟ་ལགས་པས་མང་དུ་འཆད་མི་འགྱུར། །
དོན་མེད་ཚིག་གིས་སྤྲོས་པ་ཙམ་ཞིག་ལས། །
ང་ཡི་གཏམ་ལ་ཆ་འཇོག་ཆེན་པོ་མེད། །
གཞན་གྱིས་མཐོང་ན་གད་མོ་འཆོར་བའི་རྒྱུ། །
གོང་གི་མཆན་དེ་ཕྲན་གྱི་ཟིན་བྲིས་སུ་བཞག་ནས་དེ་རིང་དང་ཉིན་ ༡༡ ཕྱིན་སོང་། དེ་ནི་ཁྱེད་ཀྱིས་བདག་ལ་བཞག་པའི་མཆན་ཞིག་གི་ལན་དུ་ཕུལ་བ་ཡིན་པས་གཟིགས་པར་འཚལ།