རྩ་བའི་བླ་མ་ས་མཐར་བཞུགས་ན།།
གངས་ཅན་བོད་མིའི་སྡུག་བསྔལ་ཇེ་ལྕི།།
རྩ་བའི་བླ་མ་བོད་དུ་ཕེབས་ན།།
གངས་ཅན་བོད་མིའི་བདེ་སྐྱིད་དེ་ཡིན།།
རྩ་བའི་བླ་མའི་སྐུ་ཚེ་བརྟན་དགོས།།
གངས་ཅན་བོད་ཀྱི་སྙིང་ནོར་ཁྱེད་ཡིན།།
གངས་ཅན་བོད་ཀྱི་ཚེ་སྲོག་ཁྱེད་ཡིན།།
གངས་ཅན་བོད་ཀྱི་བླ་མ་ཁྱེད་ཡིན།།
ང་ཚོ་གངས་ཅན་བོད་ཀྱི་མི་ལ།།
འདི་ཕྱིའི་སྐྱབས་གནས་ཁྱེད་ལས་མེད་པའི།།
རྩ་བའི་བླ་མ་བསྟན་འཛིན་རྒྱ་མཚོ།།
མ་འགོར་མྱུར་དུ་བོད་ལ་ཕེབས་ཤོག།
གངས་ཅན་བོད་ཀྱི་འགྲོ་ཚང་མས།།
ཁྱེད་ལ་སྒུག་ནས་ཡུན་རིང་འགོར་སོང་།།
མིག་ཆུའི་ཀློང་དུ་འཚོ་འདོད་མི་འདུག།
རེ་སྒུག་ཁྲོད་དུ་ཤི་འདོད་མི་འདུག།
རྨི་ལམ་ནང་དུ་འཇལ་གྱང་མི་ཕན།།
ད་ནི་མངོན་སུམ་མིག་གི་དཔྱིད་དུ།།
ཤར་བའི་དུས་སུ་སླེབས་པ་ཡིན་དུས།།
རྩ་བའི་བླ་མ་ས་མཐར་མ་བཞུགས།།
ང་ཚོ་གངས་ཅན་བོད་ཀྱི་ཡུལ་ན།།
ཆོལ་ཁ་གསུམ་གྱི་བོད་མི་ཚང་མས།།
སེམས་ཀྱི་དབྱངས་རྟ་གཅིག་དུ་བསྡུས་དེ།།
རྩ་བའི་བླ་མ་ཕེབས་རྒྱུར་སྒུག་ཡོད།།
༢༤།༢།༠༨ རྒྱ་གར་ལྷོ་ཕྱོགས་ནས་བྲིས།
དྲ་གྲོགས་སྤོབས་པ་མཐའ་ཡས་ལགས། ང་རང་དུས་ཚོད་གང་ཡོད་ལ་ཡོང་གི་ཡོད། ཁྱེད་རང་གི་སེམས་འཁྲལ་བྱས་པ་ཐུགས་རྗེ་ཆེ། ང་རང་གིས་གང་ཐུབ་ཐུབ་ཀྱིས་དྲ་གྲོགས་དག་གི་ཟིན་བྲིས་སྤེལ་བ་དག་ཀློག་བཞིན་ཡོད།
དེའི་བར་ལ་ཁྱོད་མཐོང་རྒྱུ་མེད་པ་ཆགས་སོང་། ང་ཚོས་སེམས་ཁྲལ་ཡང་བྱས་ཡོད། ཕྱིར་ཕེབས་པ་ལེགས་བྱུང་།