ཉེ་སྔོན་མདོ་སྨད་རྭ་རྒྱ་དགོན་པའི་མཁན་ཟུར་བློ་བཟང་བསྟན་པའམ་མཚན་གཞན་བསྟན་པ་རྒྱ་མཚོ་ལགས་རྒྱ་ནག་བདེ་འཇགས་མི་སྣས་ཡང་བསྐྱར་འཛིན་བཟུང་གིས་ལོ་ལྔའི་བཙོན་འཇུག་ཁྲིམས་ཆད་བཅད་ནས་ཟི་ལིང་བཙོན་ཁང་དུ་བཅུག་ཡོད་པ་རེད།
འདི་ལོའི་ཕྱི་ཟླ་ ༨ ཚེས་ ༥ ཉིན་ཏེ། དབྱར་གནས་ཀྱི་སྐབས་སུ་མགོ་ལོག་ཁུལ་རྨ་ཆེན་རྫོང་སྤྱི་བདེ་ལས་ཁུངས་ཀྱི་བདེ་འཇགས་མི་སྣས་ཁོང་གི་གྲྭ་ཤག་གི་སྒོར། མི་གཞན་ནང་དུ་འགྲོ་མི་ཆོག་པའི་རྒྱ་ཡིག་གི་སྦྱར་བྱང་ཞིག་སྦྱར་ཡོད་པ་དང་། སྐབས་དེར་སུ་གང་གིས་ཀྱང་ཁོང་ལ་གནས་ཚུལ་ཅི་བྱུང་ཤེས་རྟོགས་བྱུང་མི་འདུག དེ་རྗེས་སུ་གོ་ཐོས་ལྟར་ན། ཉེན་རྟོག་པས་ཁོང་གི་གྲྭ་ཤག་ལ་བསྔོག་བཤེར་སྐབས། མཆོད་ཁང་ནང་དུ་༧གོང་ས་སྐྱབས་མགོན་ཆེན་པོའི་སྐུ་པར་དང་། དགོན་པ་དེའི་དགོན་བདག་སྐྱབས་རྗེ་ཤིང་བཟའ་རིན་པོ་ཆེའི་སྐུ་པར་ཁ་ཤས། ཡང་༧གོང་ས་མཆོག་གི་བཀའ་སློབ་རིགས་དང་། བརྙན་རིས་ཁ་ཤས་ཉར་ཚགས་བྱེད་སའི་མཐེབ་སྡེར་ཞིག་རྙེད་སོན་བྱུང་ཡོད་སྐོར་གནས་ཚུལ་དེའི་ཐད་རྒྱུས་ཡོད་མི་སྣ་ཞིག་གིས་བརྗོད་བྱུང་།
དེ་བཞིན་མཁན་ཟུར་བློ་བཟང་བསྟན་པ་ལགས་དེང་ཐོག་མགོ་ལོག་ཁུལ་ཐོག་ཏུ་བཙོན་འཇུག་བྱས་ཡོད་པ་དང་། ཉེ་སྔོན་གྱི་ཕྱི་ཟླ་ ༡༠ ཚེས་༥ ཙམ་དུ་ཁོང་ལ་ལོ་ལྔའི་ཁྲིམས་ཆད་བཅད་དེ་། མཚོ་སྔོན་ཞིང་ཆེན་གྱི་ཟི་ལིང་གི་བཙོན་ཁང་ཆེ་ཤོས་སྔོན་མ་སོ་ཕག་བཟོ་གྲྭ་ཞེས་བརྗོད་པ་དེའི་ནང་བཅུག་ཡོད་པ་ཤེས་རྟོགས་བྱུང་བ་ཙམ་ལས། ཁོང་ལ་ཁྲིམས་ཞིབ་སྐབས་སུ་ཁྲིམས་རྩོད་པ་ཡོད་མེད་དང་ནང་མིར་བརྡ་ཐོ་སྤྲད་ཡོད་མེད། ཉེས་པ་ཅི་ཞིག་བཙུགས་པ་སོགས་གསལ་ཁ་ཅི་ཡང་མེད་པ་རེད།
ཡང་ཁུངས་ལྡན་གནས་ཚུལ་མཁོ་སྤྲོད་པས་ནས་མུ་མཐུད་དུ་བརྗོད་དོན། མཁན་ཟུར་བློ་བཟང་བསྟན་པ་ལགས་ཀྱིས་ ༢༠༢༥ ལོར་༧གོང་ས་རྒྱལ་བ་རིན་པོ་ཆེ་མཆོག་གི་དགུང་ལོ་དགུ་བཅུའི་གོ་སྟོན་སྐབས། ས་གནས་མི་མང་ལ་༧གོང་ས་མཆོག་གི་ཞབས་བརྟན་དང་། མཚན་སྔགས་བློ་འཛིན་གྱི་དགེ་བསྐུལ་བྱས་ཏེ། ཞབས་བརྟན་མང་དུ་གསོག་མཁན་རྣམས་ལ། ༧གོང་ས་མཆོག་གི་བཀའ་སློབ་ཚན་པ་ཞིག་བྲིས་པའི་གཟེངས་རྟགས་སྤྲད་པར་བརྟེན། ཕྱི་ལོ་༢༠༢༥ ལོའི་ཟླ་ ༠༥ ནང་མགོ་ལོག་རྨ་ཆེན་རྫོང་ཉེན་རྟོག་པས་བཀག་འགོག་དང་། ཉིན་མང་པོའི་རིང་འདྲི་རྩད་དང་ཟླ་བ་ཁ་ཤས་རིང་འཛིན་བཟུང་བཀག་ཉར་བྱས་ཀྱང་རྗེས་སུ་གློད་གྲོལ་བཏང་ཡོད་འདུག
ཕྱི་ལོ་ ༢༠༡༧ ལོར་པར་བསྐྲུན་བྱས་པའི་རྭ་རྒྱ་དགའ་ལྡན་བཀྲ་ཤིས་འབྱུང་གནས་བཤད་སྒྲུབ་དར་རྒྱས་གླིང་གི་གདན་རབས་གསེར་གྱི་ཕྲེང་བ་ཞེས་བྱ་བའི་རྭ་རྒྱ་བཀྲ་ཤིས་ལྗོངས་ཨ་ཡིག་དཔེ་ཚོགས་ནང་དུ་བཀོད་པ་ལྟར་ན། རྭ་རྒྱ་དགོན་པའི་མཁན་ཟུར་བློ་བཟང་བསྟན་པ་ནི། རྭ་རྒྱ་དགོན་པའི་མཁན་རབས་ང་བཞི་བ་ཡིན་པ་དང་། ཁོང་ཕྱི་ལོ་༡༩༦༥ ལོར་ཙང་ཀི་ཚོ་སྡེ་བཞིའི་ནང་ཚན། ཧཱ་ཤིས་ཧ་སྡེ་བར་ཡབ་སྐལ་བཟང་དར་རྒྱས་དང་། ཡུམ་འཕགས་ཅ་གཉིས་ཀྱི་སྲས་སུ་འཁྲུངས། དགོང་ལོ་བརྒྱད་ནས་བཟུང་སློབ་གྲྭར་ཞུགས་ཏེ་སློབ་ཆུང་མཐར་ཕྱིན། བསྟན་པ་ཡང་དར་གྱི་སྐབས་ཏེ། ཕྱི་ལོ་༡༩༨༣ ལོར་དགེ་བའི་བཤེས་གཉེན་ཆེན་མོ་མཁན་ཟུར་བཟོད་པ་རྒྱ་མཚོའི་མདུན་ནས་རབ་ཏུ་བྱུང་སྟེ། རྭ་རྒྱ་དགོན་དུ་ཆོས་ཞུགས་བྱས་ཡོད་པ་རེད། ཕྱི་ལོ་ ༢༠༠༠ དགུང་ལོ་སུམ་ཅུ་སོ་ལྔའི་སྟེང་མཁན་པོའི་ལས་འཁུར་ཞུས་ཏེ། ཕྱི་ལོ་ ༢༠༠༥ ལོར་མཁན་པོའི་ལས་འཁུར་རྫོགས་ཡོད་པ་རེད་འདུག ཁོང་ནམ་རྒྱུན་སློབ་གཉེར་ལ་སྦྱང་བརྩོན་ཆེ་ཞིང་། མི་རིགས་གྱི་ལར་ཞེན་དང་། ༧གོང་ས་སྐྱབས་མགོན་ཆེན་པོ་མཆོག་ལ་དད་དམ་གཙང་བའི་སྐྱེས་མཆོག་ཅིག་རེད་འདུག
བདེ་འཇགས་མི་སྣས་ཁོང་འཛིན་བཟུང་སྐབས་ནང་མིར་བརྡ་ཐོ་བཏང་ཡོད་མེད་དང་། ཁྲིམས་བཤེར་སྐབས་རང་ཉིད་ལ་འདོད་པ་ཡོད་པའི་ཁྲིམས་རྩོད་པ་རག་ཡོད་མེད་བཅས་ལ་གསལ་ཁ་གང་ཡང་མི་འདུག་ལ། ད་ལྟ་ས་གནས་སུ་དམ་དྲག་ཆེན་པོ་ཡིན་པས་ཁོང་གི་སྐོར་གླེང་ཕོད་མཁན་མེད་པའང་བརྗོད་བྱུང་།
གསལ་བཤད། གནས་ཚུལ་མཁོ་སྤྲོད་བྱེད་མཁན་དང་པོ་ལྟར་ན། ནམ་རྒྱུན་ཁོང་གི་མཚན་ལ་བསྟན་པ་རྒྱ་མཚོ་ཞེས་འབོད་ཀྱི་ཡོད་སྐོར་གསུངས་བྱུང་བས། ཕྱི་ཚེས་ ༡༧ ཉིན་གནས་ཚུལ་སྤེལ་སྐབས་བསྟན་པ་རྒྱ་མཚོ་ཞེས་བཀོད་ཡོད། ཡང་གནས་ཚུལ་མཁོ་སྤྲོད་བྱེད་མཁན་གཉིས་པ་དགེ་བཤེས་བློ་བཟང་དཔལ་ལྡན་གྱིས་རྭ་རྒྱ་དགོན་པའི་གདན་རབས་མཁོ་སྤྲོད་གནང་བ་དང་སྦྲགས། དེའི་ནང་མཁན་ཟུར་ཁོང་གི་མཚན་བློ་བཟང་བསྟན་པ་ཞེས་བཀོད་ཡོད་པས་དེ་ལུགས་བཞིན་འགྱུར་བ་བཏང་ན་ལེགས་ཚུལ་བརྗོད་བྱུང་བས། ཁ་བྱང་གི་ནང་བློ་བཟང་བསྟན་པ་ཞེས་འགྱུར་བཅོས་བཏང་ཡོད། གཞུང་འབྲེལ་གྱི་ཡིག་ཆ་དང་ལག་འཁྱེར་སོགས་ཀྱི་ནང་མཚན་འདི་གཉིས་ལས་གང་བཀོད་ཀྱི་ཡོད་མེད་ཤེས་རྟོགས་དཀའ་བས་དེ་ལུགས་དགོངས་འཇགས་འཚལ།
བོད་ཀྱི་དུས་བབ་གསར་ཁང་གིས་སྤེལ།
