ཉེ་སྔོན་མདོ་སྨད་རྭ་རྒྱ་དགོན་པའི་མཁན་ཟུར་བསྟན་པ་རྒྱ་མཚོ་ལགས་རྒྱ་ནག་བདེ་འཇགས་མི་སྣས་ཡང་བསྐྱར་འཛིན་བཟུང་གིས་ལོ་ལྔའི་བཙོན་འཇུག་ཁྲིམས་ཆད་བཅད་ནས་ཟི་ལིང་བཙོན་ཁང་དུ་བཅུག་ཡོད་པ་རེད།
འདི་ལོའི་ཕྱི་ཟླ་ ༨ ཚེས་ ༥ ཉིན་མགོ་ལོག་ཁུལ་རྨ་ཆེན་རྫོང་སྤྱི་བདེ་ལས་ཁུངས་ཀྱི་བདེ་འཇགས་མི་སྣས་མདོ་སྨད་རྭ་རྒྱ་དགོན་པའི་མཁན་ཟུར་བསྟན་པ་རྒྱ་མཚོ་ལགས་༢༠༢༦ལོའི་དབྱར་གནས་སྐབས་འཛིན་བཟུང་གིས་ཁོང་གི་གྲྭ་ཤག་ལ་སྒོ་ཐེལ་བརྒྱབ་ནས་མི་གང་རུང་ནང་ལ་འགྲོ་མི་ཆོག་པ་བྱས་བ་དང་། བདེ་འཇགས་མི་སྣས་ཁོང་གི་གྲྭ་ཤག་ལ་བསྔོག་བཤེར་སྐབས་སུ་མཆོད་སྒམ་ནང་༧གོང་ས་རྒྱལ་བ་རིན་པོ་ཆེ་མཆོག་གི་སྐུ་པར་དང་དགོན་པ་དེའི་དགོན་བདག་སྐྱབས་རྗེ་ཤིང་བཟའ་རིན་པོ་ཆེའི་སྐུ་པར་ཁ་ཤས། ཡང་༧གོང་ས་མཆོག་གི་བཀའ་སློབ་གསོག་འཇོག་བྱས་པའི་མཐེབ་སྡེར་ཞིག་བཅས་ཐོན་ཡོད་པ་བོད་ནང་གི་རྒྱུས་ཡོད་མི་སྣ་ཞིག་གིས་བརྗོད་བྱུང་།
དེ་བཞིན་མཁན་ཟུར་བསྟན་པ་རྒྱ་མཚོ་ལགས་དེང་ཐོག་མགོ་ལོག་ཁུལ་ཐོག་ཏུ་བཙོན་འཇུག་བྱས་ཡོད་པ་དང་། ཉེ་སྔོན་གྱི་ཕྱི་ཟླ་བཅུ་བའི་ཚེས་༥ཙམ་དུ་ཁོང་ལ་ལོ་ལྔའི་ཁྲིམས་ཆད་བཅད་དེ་། མཚོ་སྔོན་ཞིང་ཆེན་གྱི་ཟི་ལིང་གི་བཙོན་ཁང་ཆེ་ཤོས་སྔོན་མ་སོ་ཕག་བཟོ་གྲྭ་ཞེས་བརྗོད་པ་དེའི་ནང་བཅུག་ཡོད་པ་ཤེས་རྟོགས་བྱུང་བ་ཙམ་ལས། ཁོང་ལ་ཁྲིམས་ཞིབ་སྐབས་སུ་ཁྲིམས་རྩོད་པ་ཡོད་མེད་དང་ནང་མིར་བརྡ་ཐོ་སྤྲད་ཡོད་མེད། ཉེས་པ་ཅི་ཞིག་བཙུགས་པ་སོགས་གསལ་ཁ་ཅི་ཡང་མེད་པ་རེད།
ཡང་བོད་ནང་གི་གནས་ཚུལ་ཡོངས་ཁུངས་ནས་མུ་མཐུད་དུ་བརྗོད་དོན། ན་ནིང་སྟེ་ཕྱི་ལོ་༢༠༢༥ ལོར། ༧གོང་ས་རྒྱལ་བ་རིན་པོ་ཆེ་མཆོག་གི་གོ་སྟོན་གྱི་འཁྲུངས་སྐར་དགྱེས་སྟོན་དུས་སུ་མཁན་ཟུར་བསྟན་པ་རྒྱ་མཚོ་ལགས་ཀྱིས་ས་གནས་འབྲོག་པ་མང་ཚོགས་ལ་སྐུའི་ཞབས་བརྟན་གསོལ་འདེབས་བློ་འཛིན་བྱེད་དུ་བཅུག་པ་མ་ཟད། བློ་རུ་སྐྱོར་མཁན་རྣམས་ལ་བྱ་དགའ་སྤྲད་ཡོད་པས། གནས་ཚུལ་དེའི་རྐྱེན་གྱིས་སྐབས་དེར་ས་གནས་ཉེན་རྟོག་པས་ཁོང་ཟླ་བ་ཁ་ཤས་རིང་འཛིན་བཟུང་བཀག་ཉར་བྱས་ཀྱང་རྗེས་སུ་གློད་གྲོལ་བཏང་ཡོད་འདུག
ད་ལྟ་ས་གནས་སུ་དམ་དྲག་ཆེན་པོ་ཡིན་པས་ཁོང་གི་སྐོར་གླེང་ཕོད་མཁན་མེད་པའང་བརྗོད་བྱུང་།
བོད་ཀྱི་དུས་བབ་གསར་ཁང་གིས་སྤེལ།
