མནར་གཅོད་ཀྱི་ནད་གཞི།

གསེར་རྟ་སེ་ར་དགོན་པའི་གྲྭ་བློ་བཟང་སྙན་གྲགས་ ༡༩༩༨ ལོར་རྒྱ་གར་དུ་ཡོང་སྟེ། འབྲས་སྤུངས་སྒོ་མང་གྲྭ་ཚང་དུ་ཞུགས་ཡོད་པ་དང༌། ༢༠༠༠ ལོར་ཕྱིར་བོད་དུ་ལོག་སྐབས་བཀྲ་ཤིས་ལྷུན་པོ་ནས་ཉེན་རྟོག་པས་འཛིན་བཟུང་བྱས་ཏེ་ལོ་བཞིའི་རིང་མནར་གཅོད་བཏང་སྟབས། ༢༠༠༥ ལོར་གློད་གྲོལ་ཐོབ་ཀྱང་ཉེ་ཆར་འདས་གྲོངས་སུ་སོང་ཡོད་འདུག  

གསེར་རྟ་སེ་ར་དགོན་པའི་གྲྭ་བློ་བཟང་སྙན་གྲགས་ལགས་སྤྱི་ལོ་ ༡༩༩༨ ལོར་རྒྱ་གར་ལ་བཙན་བྱོལ་དུ་འབྱོར་ཏེ། འབྲས་སྤུངས་སྒོ་མང་གྲྭ་ཚང་ནས་སློབ་གཉེར་གནང་ཡོད་པ་དང༌། ༢༠༠༠ ལོར་ཁོང་དང་ཕ་ཡུལ་གཅིག་པའི་གྲྭ་ཚེ་དབང་དང་དཔལ་ལྡན་འོད་ཟེར། མི་སྐྱ་བསོ་རྡོ་བཅས་མི་ ༤ ཤར་ཁུམ་པོ་བརྒྱུད་དེ་ཕྱིར་བོད་དུ་ལོག་སྐབས། ༢༠༠༡ ལོར་སྟབས་མ་ལེགས་པར་གཙང་བཀྲ་ཤིས་ལྷུན་པོ་ནས་རྒྱ་གཞུང་གི་ཉེན་རྟོག་པས་འཛིན་བཟུང་བྱས་འདུག་ལ། སྐབས་དེ་ཁོང་ཅག་གི་ལག་ནས་པཎ་ཆེན་རིན་པོ་ཆེར་ཐུགས་ཐག་བཅད་པའི་སྐོར་གྱི་༧གོང་ས་མཆོག་གི་བཀའ་སློབ་དང། ཆབ་སྲིད་ལམ་སྟོན། ངོས་ཀྱི་ཡུལ་དང་ངོས་ཀྱི་མི་མང༌། དེ་བཞིན་སྒྲ་ཐག་སོགས་རྒྱ་གར་ནས་འཁྱེར་ཡོང་བའི་བཅའ་དངོས་མང་པོ་ཞིག་ཐོན་ཡོད་སྟབས། ལོ་བརྒྱད་རེར་ཁྲིམས་ཐག་གཅོད་རྒྱུའི་ཉེན་ཁ་བྱུང་ཡང་དངུལ་ངོས་ཀྱི་འགྲོ་སོང་འབོར་ཆེན་བཏང་མཐར་ཁོང་དང་རོགས་པ་ཚེ་དབང་གཉིས་ལ་ལོ་ ༤ རེ་ཡི་ཁྲིམས་ཐག་བཅད་དེ་གྲྭ་བཞིའི་བཙོན་ཁང་དུ་བསྐྱལ་འདུག ༢༠༠༥ ལོར་ཁོང་གཉིས་གློད་གྲོལ་ཐོབ་ཡོད་ཀྱང། ལོ་ ༤ རིང་བཙོན་ཁང་ནས་མནར་གཅོད་ཚད་མེད་བཏང་བར་བརྟེན། ཁོང་ལ་ནད་གཞི་ལྕི་མོ་ཞིག་ཕོག་སྟེ་ཉེ་ཆར་འདས་གྲོངས་སུ་སོང་འདུག་ལ། ཁོང་གི་རོགས་པ་ཚེ་དབང་དང་བསོ་རྡོ་གཉིས་ལའང་གོང་བཞིན་ནད་གཞི་ཚབས་ཆེན་ཞིག་ཕོག་སྟེ། ཡར་ཀླུང་གཙང་པོའི་འགྲམ་ངོགས་སུ་གཡུགས་ཡོད་འདུག