བཀའ་ཁྲི་རིན་པོ་ཆེ་ལགས། ཁྱོད་ནི་དུས་ཀྱི་འགྱུར་ཁུགས་དང་དགུང་ལོའི་བབ་ཁྲིམས་ཀྱི་དབང་འགྱུར་སོགས་རྒྱུ་རྐྱེན་དུ་མ་ཞིག་ལ་རྟེན་ནས་ལུགས་ཟུང་ནོར་ལས་བཞེངས་པའི་ཁྲི་མཐོན་པོ་དེ་ནས་ཕེབས་དགོས་བྱུང་བ་ནི་བདག་ཅག་གངས་ཅན་པ་རྣམས་ཀྱི་བསོད་ནམས་གོ་སྐལ་དམན་པའི་རྐྱེན་ལས་བྱུང་བ་ནི་གོར་མ་ཆགས། འོན་ཀྱང་བཞུད་ཟིན་པའི་ལོ་ཟླ་དང་དེའི་ཁྲོད་ཀྱི་བཀའ་ཁྲི་ཁྱོད་ཀྱི་མཛད་པ་ལ་ཕྱི་མིག་དང་རྒྱང་བལྟ་ཞིག་བྱས་ནས་ཉུལ་ཞིབ་བྱེད་ཁུལ་བྱེད་ན། སྐུ་ཉིད་ཀྱི་དབྱུགས་འབྱུང་རྔུབ་ཚུན་ཆད་བདག་ཅག་བསིལ་ལྡན་པ་རྣམས་ཀྱི་དོན་དུ་ཡིན་པ་ནི། ང་ཚོ་ཚང་མའི་ཤེས་གསལ་དང༌། གཅིག་དང་གཉིས་སུ་བགྲངས་མི་ནུས་པ་ནི་རྗེ་བདག་ཉིད་ཆེན་པོའི་ ཁྱོད་ཀྱི་ཡོན་ཏན་བརྗོད་པ་སུ་ཡི་ནུས། ཞེས་གསུངས་པ་ལྟར་ ཁོ་བོས་དེ་བས་ག་ལ་ནུས། དེ་ནས་ཁོ་བོས་མིག་ལམ་དུ་འགྱུར་བའི་ལས་དོན་གལ་འགངས་ཆེ་བ་འགའ་ཞིག་ནི་ མཉམ་མེད་ཤཱཀྱ་སེང་གེས་བདུད་བཏུལ་བས་མཛད་པ་ལྟ་བུ་གང་ཉིད་བཀའ་ཁྲིར་བཞེངས་མ་ཐག དཔལ་འབྱོར་ལམ་ལུགས་ལ་སྒྲིག་སྲོལ་བླ་ན་མེད་པ་ཞིག་གསར་གཏོད་བྱས་ནས་སྤྱི་རྒྱུ་སྒེར་སྤྱོད་རིང་ལུགས་པ་རྣམས་ཐལ་བའི་རྡུལ་ཕྲན་བཞིན་དུ་བརླག་པར་མཛད་ནས་དེ་སྔ་བུ་ལོན་གྱི་རི་རབ་སྤུངས་པའི་བཙན་བྱོལ་བོད་གཞུང་དེ་ད་ལྟ་སྤྲིན་རྡུལ་གྱིས་ཡོངས་སུ་དག་པའི་སྟོན་དུས་ཀྱི་ལྷ་ལམ་ལྟ་བུར་གཞུང་བཟང་བཙུགས་པ་ནི། ཁྱོད་ཀྱི་མཛད་ཆེན་དང་པོ་དང༌། ༧གོང་ས་རྒྱལ་དབང་ཡིད་བཞིན་ནོར་བུའི་དགོངས་གཞི་བླ་ན་མེད་པ་དང༌། ལྷག་པར་དུ་ཡང་པཎ་ཆེན་ཐམས་ཅད་མཁྱེན་པས་བཙན་བྱོལ་གཞུང་གི་སྐུ་ཚབ་རྣམས་ལ་བསྩལ་བའི་བཀའ་སློབ་ཟབ་མོའི་ནང་ད་རེས་ཁྱེད་ཚོས་དབུས་གཞུང་དང་བཀའ་མོལ་གསལ་པོ་ཡག་པོ་བྱུང་འདུག དོན་དག་ལམ་སེང་འགྲུབ་རྒྱུ་ཁག་པོ་རེང༌། སེམས་ཤུགས་ནམ་ཡང་ཆག་མི་རུང༌། འབྲེལ་བ་མུ་མཐུད་བྱེད་རྒྱུ་བྱས་པ་དེ་ཡག་པོ་རེད། ལན་དགུ་ཆད་དགུ་མཐུད་ཀྱི་དཔེ་ལྟར་འབད་བརྩོན་བྱེད་དགོས། ཞེས་རྒྱལ་བ་ཡབ་སྲས་གཉིས་ཀྱི་དགོངས་གཞི་དང་བཀའ་སློབ་ཉམས་ལེན་གྱི་སྙིང་པོར་བྱས་ནས་རྒྱལ་བོད་འབྲེལ་མོལ་ལམ་བོད་རྒྱ་ཞི་མོལ་གྱི་ལམ་སྲོལ་བཟང་པོ་དེ་སླར་ཡང་འབྲེལ་མཐུད་བྱེད་ཐུབ་པ་ཙམ་དུ་མ་ཟད། རྒྱལ་དབང་བསྟན་འཛིན་རྒྱ་མཚོའི་མཛད་པ་འཕྲིན་ལས་དང༌། ད་ལྟའི་བཙན་བྱོལ་བོད་གཞུང་གི་ཆབ་སྲིད་བཞེངས་ཕྱོགས་གཞི་ལུས་བོད་མིའི་དཀའ་སྡུག་དང༌། དེ་གསལ་ཐབས་སྐོར་ངག་ལམ་ནས་རྒྱ་ཡི་དཔོན་རིགས་རྣམས་ལ་ར་སྤྲོད་དང༌། དག་ཐེར་བྱེད་རྒྱུ་བྱུང་བ་དེ་གང་གི་ཕུལ་བྱུང་གི་མཛད་པ་དང༌། གཞིས་ཆགས་སྲ་བརྟན་དང་མི་རིགས་མཉམ་གནས། ཤེས་ཡོན་རྒྱུན་འཁྱོངས་ཐུབ་ཐབས་སུ་མི་རིགས་རང་ཉིད་ཤིན་ཏུ་གོམས་འདྲིས་དང༌། མེས་པོ་གོང་མ་རྣམས་ཀྱིས་དེ་བས་བསྔགས་པ་ནི། སོ་ནམ་ཞིང་ལས་ཡིན་ལ་དེ་དེ་ལྟར་ཡོང་ཐབས་སུ་ལྷོ་ཕྱོགས་གཞིས་ཆགས་རྣམས་སུ་སྐལ་བ་བརྒྱ་ཕྲག་དང་འབད་པ་སྟོང་ཕྲག་གི་ལམ་ནས་སྲོལ་རྒྱུན་གྱི་སོ་ནམ་འདེབ་ལས་ཐོག་དམིགས་ཀྱིས་བཀར་ནས་ཆེད་ལས་མི་སྣ་མགྲོན་འབོད་དང༌། ཟབ་སྦྱོང་སོགས་མི་རྒྱུ་གང་ཐད་ནས་རོགས་སྐྱོར་དང་ཐུགས་འཁུར་བདག་གིར་བཞེས་ཡོད་པ་དང༌། དེ་དང་དེས་མཚོན་པའི་བདག་ལྟ་བུ་བྱིས་བའི་བློས་གཞལ་དུ་མེད་པའི་ཆོས་སྲིད་ཀྱི་མཛད་ཆེན་དུ་མ་ཞིག་མ་འོངས་བཀའ་ཁྲི་འོས་མི་རྣམས་ལ་སློབ་གསོའི་ཚུལ་དུ་བཞག་ཡོད་ལ། དེ་དང་ཕྱོགས་མཚུངས་བཀའ་ཁྲི་ཟམ་གདོང་རིན་པོ་ཆེ་ལ་སྐྱོན་བརྗོད་དང་མ་འཐུས་པ་དང་མ་འགྲིག་པའི་རྣམ་འགྱུར་སྟོན་མཁན་ཡང་ཡོད་ལ། དེ་ནི་མང་གཙོ་གཞུང་ཞིག་ལ་མཚོན་ན་ངེས་པར་དུ་དགོས་པའང་ཡིན་ལ་ཕན་ཐོགས་ཀྱང་གང་འཚམ་ཡོད། དེ་ལས་དཔེ་མཚོན་གཞན་ཞིག་ནི། ཟླ་མེད་སྟོན་པ་ཐུགས་རྗེ་ཆེན་པོ་དེ་ལའང་སྐྱོན་བརྗོད་བྱེད་མཁན་བྱུང་ཡོད་པས་དེ་དག་ལ་ཡ་མཚན་དོན་མེད་ལ། ཁོང་གི་བཀའ་དྲིན་ཆ་ཙམ་གསབ་ཕྱིར་དུ་བདག་ཅག་གངས་ཅན་པ་རྣམས་ཀྱིས་སྟོང་གསུམ་གསེར་ཏུ་བསྐངས་ནས་ཕུལ་ནའང་ག་ལ་འཐུས། མཚམས་དེར་ཁོ་བོའི་བསམ་གཞིགས་ངོ་མ་ནི་གྲྭ་རྐྱང་གི་རྣམ་ཐར་འཛིན་ལ་ཤེས་ཡོན་གྱི་རི་རབ་སྤུངས་པའི་བཀའ་ཁྲི་མཆོག་གོང་གསལ་ཁྲི་མཐོན་པོ་དེ་ནས་བཞུད་ཟིན་པའི་རྗེས་ལ་ཁྱེད་ལྟ་བུས་གལ་འགངས་ཆེ་བའི་བཀའ་ཁྲིར་འོས་པའི་མི་སྣ་ཞིག་བཙན་བྱོལ་བོད་མིའི་གནས་སྡོད་གང་སར་ཕྱག་སྟོང་གིས་སྦར་ཉུལ་དང་སྤྱན་སྟོང་གིས་འཚོལ་བར་འབད་ནའང་རྙེད་ཐབས་མེད་པ་ནི། ངའི་ལུས་སེམས་གཉིས་ཀར་ཟློག་ཏུ་མེད་པའི་དཀའ་ངལ་ལྕི་མོ་ཞིག་ཡིན་ན། དེའི་རྒྱུ་མཚན་ནི་ཤེས་ཡོན་དང་ལྷག་བསམ། བྱམས་རྩེ་དང་ཐུགས་འཁུར། དྲང་བདེན་དང་ལ་རྒྱ། བོད་མི་ས་ཡ་དྲུག་ལ་ཤིན་ཏུ་བརྩེ་བའི་སེམས་བསྐྱེད་ལྷག་པར་དུའང་༧གོང་ས་སྐྱབས་མགོན་ཆེན་པོས་བཀའ་དགོངས་ཆ་ཙམ་ཞིག་ཀྱང་འགལ་མེད་ཐོག་ཆོས་སྲིད་ཀྱི་འཁོར་ལོ་སྐོར་མཁས་པ་གང་ཉིད་ལྟ་བུ་ཞིག་ད་ལྟ་ཕན་བྱུང་མ་མྱོང་ལ་ད་ལྟའང་འཇིག་རྟེན་འདིར་བྱོན་མེད་ལ། མ་འོངས་པའང་དཀའ་བར་གནས་པ་དེ་ཡིན། མཐའ་དོན་དུ་མ་འོངས་བཀའ་བློན་ཁྲི་པ་དེ་ག་འདྲ་ཞིག་ཡོང་མིན་ད་ལྟ་ང་ཚོའི་ལག་ན་ཡོད་པའི་སྐབས་འདིར་དུས་ཚོད་ཀྱི་འགྲོ་གྲོན་དང༌། རྣམ་དཔྱོད་ཀྱི་རྒྱ་མཚོ་དཀྲུགས། འཐེན་འཁྱེར་གྱི་དུག་རྩ་སྤངས་ནས་མི་རེ་ངོ་རེས་བཀའ་ཁྲི་དེ་ད་ལྟ་ནས་འཚོལ་དགོས་ལ། དེ་ཡང་བཙན་བྱོལ་བོད་གཞུང་གི་ཆབ་སྲིད་ཀྱི་ལངས་ཕྱོགས་མེ་ལྕེ་གྱེན་དུ་འབར་བཞིན་པའི་དུས་སྐབས་འདིར་དེ་དག་བདག་ཉར་དང་གཅེས་སྐྱོང་བྱེད་ཐུབ་པའི་མི་སྣ་ཟམ་གདོང་གཉིས་པ་ལྟ་བུ་ཞིག་ངེས་པར་དུ་འཚོལ་རོགས་གནང༌།
སེར་སྨད་ཨེམ་རྗེ་བློ་བཟང་ཤེས་རབ།
བཀའ་བློན་ཁྲི་བ་ཟེར་བ་དེ་བོད་པའི་སྤྱི་ཚོགས་ཁྲོད་དུ་སྔར་གྲགས་མ་མྱོང་བ་ཞིག་གཏན་ནས་ཡོངས་མི་སྲིད་པ་རེད། རྒྱུ་མཚན་དེའི་ཕྱིར་ང་ཚོས་ཕར་བཙལ་དགོས་རྒྱུ་མ་རེད་ལ། བཙལ་ནའང་ས་འོག་གི་གཏེར་ནང་བཞིན་སྔར་མེད་པ་ཞིག་གསར་དུ་རྙེད་ཀྱི་མ་རེད་། བཀའ་བློན་ཁྲི་བའི་འོས་གཞི་ནི་བཙན་བྱོལ་བོད་གཞུང་གི་ལས་བྱེད་བྱས་མྱོང་མཁན་ཤེས་འཇོན་གཉིས་ལྡན་ཞིག་ངེས་པར་དུ་ཡིན་དགོས་རྒྱུ་རེད་། དེ་ཡང་དམངས་གཙོ་རྒྱལ་ཁབ་དང་བསྟུན་ན་སོ་སོའི་འོས་མཁན་ཚོས་རང་ངོས་ནས་བོད་མི་དམངས་ལ་ཞབས་འདེགས་སྒྲུབ་ཕྱིར་བཀའ་བློན་ཁྲི་བར་ཕེབས་རྒྱུ་འདུན་པ་ཆེ་ཆེར་ཡོད་པ་དང་། དེའི་དོན་དུ་རང་ཉིད་ཐོབ་ཐབས་ལ་ལས་འགུལ་སྣ་ཚོགས་སྤེལ་བ་སོགས་བྱེད་དགོས་པ་དེ་ཀ་རང་རེད་། ང་ཚོའི་ངོས་ནས་ཉེ་རིང་ཆགས་སྡང་སྤངས་ཏེ་བློ་གཟུ་བོར་གནས་པའི་སྒོ་ནས་མི་ཤེས་འཇོན་གཉིས་ལྡན་ཞིག་འདེམས་རྒྱུ་དེ་རེད་། བོད་པའི་སྤྱི་ཚོགས་ཁྲོད་དུ་རྨོངས་དད་ཤུགས་ཆེན་པོ་ཡོད་སྟབས་བླ་མ་ཞིག་འདེམས་མི་སྲིད་མ་རེད་། འོན་ཀྱང་དེ་ནི་ཤིན་དུ་ནོར་འཁྲུལ་རེད་། རྒྱུ་མཚན་ནི་བླ་མ་རྣམས་ཆོས་ཀྱི་རྣམ་ཐར་གཙང་མ་ཞིག་བཟུངས་ནས་གཞན་ལ་ཕན་ཇི་ཐོགས་བྱེད་རྒྱུ་དང་། ཆབ་སྲིད་པ་ཚོས་རང་གི་མི་རིགས་དང་རྒྱལ་ཁབ་ཁོ་ནར་དམིགས་ནས་ཁེ་ཕན་བསྒྲུབ་རྒྱུ་དེ་རེད་། ཆོས་དང་ཆབ་སྲིད་གཉིས་ནི་ཁ་ཁ་རེད་། ཆོས་ཕྱོགས་ནས་ཁེ་དང་རྒྱལ་ཁ་གཞན་ལ་སྦྱིན་། གྱོང་དང་ཕམ་ཁ་རང་གིས་ཁུར་ཟེར་བ་ལྟར་སྒྲུབ་དགོས། སྲིད་ཕྱོགས་ནས་རང་གི་མི་རིགས་དང་རྒྱལ་ཁབ་ཀྱི་་ཁེ་ཕན་ཁོ་ན་སྒྲུབ་དགོས། རྒྱུ་མཚན་འདི་དག་ལ་བརྟེན་ནས་བླ་མ་ཞིག་མ་འདེམས་ན་དགེ་མཚན་ཆེན་པོ་ཡོད་པ་མཁྱེན་རོགས་ཞུས། འོས་གཞི་དེ་ཡང་རང་ལོ་བཞི་བཅུ་ཡན་དང་དྲུག་ཅུ་མན་གྱི་བར་ན་ཡོད་པའི་མི་ཤེས་འཇོན་གཉིས་ལྡན་། ལོ་མང་རིང་བཙན་བྱོལ་བོད་གཞུང་གི་ལས་བྱེད་བྱས་མྱོང་ཡོད་པ་ཅིག་འདེམས་ན་ལེགས་པར་མངོན་ནོ་། །
བཀའ་ཁྲིའི་སྐུ་དྲིན་དྲན་དགོས་མིན་ནི་གནས་ཚུལ་གཞན་ཞིག་རེད། བཀའ་ཁྲིའི་ལས་འགན་གྱི་ཆ་ནས་བརྗོད་ན། བཀའ་ཁྲིའི་ལས་འགན་གཙོ་བོ་ནི་སྲིད་དོན་ཡིན་དགོས་པ་ལས་ཆོས་དོན་མིན། སྲིད་དོན་གཙོ་བོར་མ་གནང་ན་མི་རིགས་ཤིག་གི་སྲིད་བློན་ལྟ་བུ་སྟེ་བཀའ་ཁྲིའི་ལས་འགན་གཙོ་བོ་དེ་མ་བསྒྲུབས་པ་ཡིན་ལ། མི་མང་གིས་འོས་འདེམས་བྱས་པའི་བཀའ་ཁྲིའི་དགོས་དོན་ཡང་གཏན་ནས་མ་བྱུང་བ་ཡིན། ད་ལྟའི་བཀའ་ཁྲི་ལ་བསྟོད་བསྔགས་བྱེད་འོས་པའི་ཆ་མང་ན་ཡང་། མི་རིགས་ཤིག་གི་སྲིད་དོན་གཙོ་བོར་བསྒྲུབ་དགོས་པའི་བཀའ་ཁྲིའི་ངོས་ནས་སྐྱོན་ཆ་ཡང་མང་པོ་ཞིག་ལྷག་འདུག བོད་མི་རིགས་ལ་ཆོས་དོན་གཙོ་སྒྲུབ་བྱེད་མཁན་གྱི་མི་སྣའི་རིགས་ནི་མང་སྐྱོན་ཡིན་པ་ལས་ཉུང་སྐྱོན་གཏན་ནས་མིན། ཁ་དན་ཚིག་ལ་མི་གནས་པ་དང་། མི་རིགས་དང་སྲིད་དོན་ལ་བསམ་ཤེས་མེད་མཁན་ཞིག་གིས་ཆབ་སྲིད་ཀྱི་ལྟ་གྲུབ་གཙོ་བོར་འཁྱེར་དགོས་པའི་སྲིད་གཞུང་ཞིག་གི་དབང་འཛིན་སྣེ་ཁྲིད་བྱེད་པ་ནི་ཡང་དག་པའི་ལས་ཤིག་ཏུ་མ་མཐོང་། དེའི་ཕྱིར་མ་འོངས་པའི་བཀའ་ཁྲི་ལ་མི་སྐྱ་ཞིག་འོས་འདེམས་བྱེད་ཐུབ་ན་ལེགས་པར་མཐོང་ངོ་།།
དྲ་གྲོགས་ཚང་མ་ལ་དགོངས་དག་ཞུ་གི་ཡིན་
ལོ་ངོ་ལྔ་བཅུའི་ན་ཟུག
ན་ཟུག་དེས་བསླངས་བའི་ཞེ་སྡང༌།
ཟ་ལེ་རྒྱལ།
བཙོན་དུ་ཚུད་པའི་སྤུན་དག་དྲན་ནས་ཨུ་ཐུག་ཐབས་ཀྱི་མཐའ་མ་སྟེ།།
བཅོས་མིན་མིག་ཆུའི་དོ་ཤལ་དང་བཅས་སྟེང་ཕྱོགས་ལྷ་ལ་ཞུ་རུ་སོང༌།།
ལྷ་དང་ལྷ་མོས་ཞིབ་དུ་ཉན་རྗེས་དོན་ཆེན་ལས་ཀྱི་དང་པོ་སྟེ།།
ལྷ་ཡི་བིས་བ་བསྟན་འཛིན་རྒྱལ་མཚོའི་གྲོགས་སུ་འགྲོ་ཅེས་གྲོས་མཐུན་བྱུང༌།།
མཚོན་སྣ་ལྔ་ལྡན་འཇའ་ཡི་སྐས་འཛེག་དམར་པོ་རི་ཡི་སྟེང་དུ་བཙུག།
གནམ་བསྐོས་དཔའ་བོ་བྱེ་བ་ཕྲག་བརྒྱས་གངས་ཅན་བོད་ལ་དཔུང་རོགས་མཛད།།
རྒྱ་དགའ་བོད་སྡང་རྒྱ་བོད་གཉིས་ཀ་པོ་ཏ་ལ་ཡི་མདུན་དུ་བཀུགས།།
བུན་ཅ་པོ་ཡི་གསོན་སྙིང་བཏོན་ནས་ཧུའུ་ཅིན་ཐོའོ་ཡི་ཁུ་རུ་བརྫངས།།
གདོང་དམར་བོད་ཀྱི་ལག་དམར་རྣམས་ལ་ལས་འབྲས་ལྟད་མོ་དང་བོ་བསྟན།།
ཧུའུ་མགོ་ཅང་མགོ་དམ་དུ་བཅད་དེ་མི་མགོ་རློན་པོས་འཕྲེང་བ་ལས།།
མོའོ་མགོ་སྐམ་པོ་འཕྲེང་དཔོན་བྱས་ཏེ་ཏུན་མགོ་ཏོག་གི་ཚབ་ཏུ་བཞག།
རྒྱ་དཔོན་བརྒྱ་དང་བརྒྱད་ཀྱི་རྒྱུ་མས་རྒྱ་མཁར་སྨུག་པོར་རྨི་ཐག་འཐེན།།
དམངས་གཙོའི་ཕ་རྒྱ་མ་རྒྱ་ཚང་མ་གངས་ཅན་བོད་ཀྱི་མགྲོན་ལ་བོས།།
ཤི་བོའི་རོ་ལ་ཚོར་བ་མེད་ཀྱང་རང་གི་ན་ཟུག་དྭངས་བའི་ཆེད།།
མགོ་མེད་རོ་ཡི་རྨ་ཁའི་ཐོག་ལ་ཚྭ་དང་སྒོག་པ་ལྭ་ཙི་བཏབས།།
དམར་བོའི་ལྟ་བ་སྲོག་ལ་ཟུག་པའི་གནོད་སྦྱིན་དུ་མའི་སྙིང་ཁྲག་གིས།།
ཀྲིག་ཨན་ལེ་ཡི་རོ་སྒམ་ཐོག་ལ་རྒྱ་ཀྲམ་དམར་པོས་ཏམ་ཀ་བྲིས།།
གངས་རིའི་གཤེད་མ་ཀུན་གྱི་མིག་འབྲས་གསོན་པོར་དྲུས་ནས་འཕྲེང་བར་བརྒྱུས།།
ཡུགས་ཕོ་ཡུགས་མོའི་སྐེ་ལ་བཏགས་ཏེ་ཀི་ཀི་སོ་སོའི་ལྷ་རྒྱལ་འཐེན།།
ཕྱི་མའི་ཡུལ་ན་འཇིགས་པ་ཡོད་མེད་ཟ་ལེ་རྒྱལ་ངས་མི་ཤེས་པས།།
གཤིན་རྗེ་ཁྲིམས་ཁར་མ་བསླེབས་སྔོན་ལ་རང་གི་མིག་གིས་རིག་ས་ནས།།
མ་ལུས་འཇིགས་པའི་རྣམ་གྲངས་ཀུན་ལ་མི་ཡུལ་འདི་ནས་རྫོགས་ཚིག་བྲིས།།
རྒྱ་བོད་གཉིས་ཀ་སོ་སོར་བགར་ཏེ་རང་རང་སོ་སོའི་ས་མཚམས་བྲིས།།
དེ་ཡི་མོད་ལ་ཧད་ཀྱིས་སད་དེ་ས་ཡི་གོ་ལ་ཧྲིལ་པོ་ནས།།
ཏ་ལེ་བླ་མ་ང་ཡི་གྲོགས་ཞེས་འཛམ་བུ་གླིང་གི་དཔོན་ཆེན་ཚོས།།
ཁ་པར་ཁ་བརྡའི་སྔ་བཞུག་བརྩད་དེ་བར་སྣང་དྲ་རྒྱའི་བརྡ་རྟགས་གད།།
ལོ་ངོ་ལྔ་བཅུར་བཙན་གྱིས་སྒོམ་ཡང་རྨི་མལ་ལ་ཡང་མ་ཤར་བའི།།
མ་གཉིད་སེམས་ཀྱི་སྟོང་སེམས་འདི་ལ་བལྟས་ཀྱིན་བལྟས་ཀྱིན་སེམས་པ་སྐྱིད།།
གལ་ཏེ་ང་རང་སྟོང་སེམས་སྟོང་གི་འཇིག་རྟེན་ངོ་མཚར་ཆེན་པོ་ནས།།
ད་དུང་མ་སད་ཡུན་རིང་འགོར་ཚེ་ང་ཡང་མི་ཡི་འཇིག་རྟེན་འདིར།།
མི་ལུས་ཞིག་གི་བགོ་སྐལ་ཐོབས་པ་བདེ་སྐྱིད་ཅིག་གི་རྟེན་དུ་གྱུར།།
ཡིན་ཡང་ལས་ངན་བོད་པ་ང་ལ་དེ་ཡི་ལས་ཀྱང་མ་བྱུང་བས།།
མིག་ཆུ་ཕྱི་བཞིན་གཡོག་ལ་བུད་སོང་དྲ་གྲོགས་ཚང་མ་བདེ་མོ་བྱོས།།
ངས་ཨེམ་རྗེ་དེའི་སྐོར་གང་ཡང་མི་ཤེས། རྩོམ་ཡིག་འདི་འབྲི་མཁན་ཡིན་པ་ཙམ་ནི་ཁོང་གི་མཚན་རྩོམ་ཡིག་གི་མཇུག་ཏུ་བཀོད་ཡོད་པ་འདི་ཙམ་གྱིས་ཤེས་པ་ཡིན་ལགས།
རྟ་བདུན་རྒྱལ་བོ་ཟེར་ན་རེད། རྟ་བདུན་དབང་བོ་ཟེར་ན་ཡང་འགྲིག གང་ལྟར། གྲ་གྲོགས་ཁྱེད་ཀྱིས་ང་རང་ལ་དག་འབུལ་ཞུས་པ་དེར་ངས་རྗེས་སུ་ཡི་རུང་བྱེད། ཡིན་ཡང་། ཁྱེད་རང་གིས་བསམ་ཚུལ་བསྐོར་ལོག་དུ་འཁྱེར་འདུག དངོས་ནས་བཤད་པ་ཡིན་ན་ནི་ང་རང་གིས་སེར་སྨན་སྨན་པ་དེའི་བསྐོར་གང་ཡང་མི་ཤེས་ལ། མི་ཤེས་པ་ཞིག་ཤེས་འདོག་ངས་དུས་གཏན་དུ་ག་ལ་བྱེད། དེ་ཡིན་དུས་སྐུ་ཉིད་ཀྱིས་སེམས་ལྷོད་ལྷོད་གནོང་རོགས། འོན་ཀྱང་། དྲ་གྲོགས་སྤོབས་པ་མཐའ་ཡས་ཀྱིས་སྨན་པ་དེའི་བསྐོར་ཅུང་ཙམ་གསལ་ཆ་ཡོད་ས་རེད། དེ་ཡིན་ན་དྲ་གྲོགས་དག་ལ་གསལ་ཆ་དེའི་བསྐོར་ཞིག་ངོ་སྤྲོད་བྱས་པ་ཡིན་ན་ག་འདྲ་འདུག་ལགས།
སེར་སྨད་ཨེམ་རྗེ་འདིས་ཅུང་ཙམ་མིན་ན་ཟམ་གདོང་སྤྲུལ་སྐུའི་སྣབ་ལ་ཚྭ་བྲོ་བ་རེད་ཅེས་པའི་བསྟོད་པ་ཡང་བྱེད་གྲབས་ཤིག་བྱས་འདུག་མོད་ཟམ་གདོང་གི་ཕྱག་ལས་གལ་ཆེ་བ་གཅིག་མཐོང་མི་འདུག དེ་ནི་ཤེས་ཡོན་སྲིད་ཇུས་གསར་པའི་ལམ་སྲོལ་བཏོད་པ་དེ་རེད།
ཤ་ཁྲག་རུས་གསུམ་ལགས་དགོངས་འགལ་མེད་པར་ཞུ། ངས་སེར་སྨད་ཨེམ་རྗེ་ལ་བསྟོད་པ་བཏངས་བ་དེར་། མཆོག་ཉིད་ནས་ཕྲག་དོག་བྱེད་པ་མིན་ནམ། ཁོ་བོས་མི་ཁ་ཤས་ཀྱིས་མིང་ཆད་ངན་པ་བྲིས་པ་མཐོང་སོང་། དེ་རྣམས་ལ་བཤད་པ་ཡིན་མ་གཏོགས་མཆོག་ཉིད་ལ་ཟུར་ཟ་གང་ཡང་མིན་། སྤྱིར་ཕ་རོལ་བ་ཞིག་དགག་པ་ལ་རྒྱུ་མཚན་དང་རིག་པས་སྒྲུབས་ནས་བཀགས་ན་ཚུད་དང་མཐུན་པ་ལས། ཚིག་ངན་པ་བེད་སྤྱོད་བཏངས་ན་སྨད་ན་ལེགས་པའི་ཆ་གང་ཡང་མཐོང་གི་མི་འདུག་གོ
རྟ་བདུན་རྒྱལ་བོ་མིང་ཅན་ལགས། ད་དུང་ཁྱེད་ཀྱིས་བོད་ཀྱི་སྐད་ཡིག་ཁྲོད་དུ་ཕལ་བའི་སྐད་ཡིག་ཟེར་སྲོལ་ལ་བལྟས་པ་ཡིན་ན། ཁྱེད་རང་གིས་ཕལ་བའི་མི་ཟེར་ནས་དམའ་སར་འཇོག་མཁན་གྱི་གྲངས་དེ་ཡིན་པ་འདྲ། ང་རང་གིས་སེམས་བསམ་པའི་གཏིང་ནས་རེ་སྐུལ་ཞིག་ཞུ་འདོད་པ་ནི་བོད་ཟེར་བ་ནི་གཅིག་ལས་གཉིས་མེད་པ་དང་བོད་སྐད་ཟེར་བ་ནི་གཅིག་ལས་གཉིས་མེད་པའི་ལྟ་ཚུལ་ཞིག་བཟུང་དེ་བོད་པ་ཚང་གི་སྐྱིད་སྡུག་ལེགས་ཉེས་བསྐོར་ལ་བསམ་ཚུལ་རེ་སུས་བཤད་ཀྱང་དེར་སེམས་གཏིང་ནས་རྒྱབ་སྐྱོར་ཡོད། འོན་ཀྱང་། ཤེས་ཡོན་དང་ཉམས་མྱོང་གང་ཅིའི་ཐད་དུ་མི་རེ་རེ་ལ་མ་འདྲ་བའི་བསམ་བློ་རེ་ཡོད་ཆོག་པའི་དེ་ལ་ལྟ་ཚུལ་སྡུག་ཆག་དེ་འདྲ་ཡོང་དགོས་དོན་མེད་པར་སྣང་།
ལྷག་པར་དུ་དྲ་གྲོགས་རྙིང་བ་གནས་ཚང་ལགས། ངས་གོང་ནས་བཤད་མ་ཐག་པ་ལྟར། ངེད་ཅག་ལ་བག་ལེབ་བཙོང་མཁན་ཟེར་ནས་ཟུར་དུ་འཇོག་པའི་ལྟ་བ་དེ་འདྲ་ཡོད་མི་རུང་བ་སེམས་ལ་འཇོག་རོགས་ཞུ། བོད་པ་ཚང་གི་མི་སུས་ལས་ཀ་ཆེ་ཆུང་གང་ཞིག་བྱེད་བཞིན་ཡོད་མེད་ཀྱི་སྟེང་ནས་དབྱེ་བ་མི་ཕྱེ་བར་བསམ་བློའི་འཇོན་ཐང་དང་ཤེས་ཡོན་གྱི་གནས་ཚད་ནས་ངེད་ཅག་གི་མི་ལ་བརྩི་བཀུར་དང་ཡི་རུང་བྱེད་དགོས་པར་སྣང་། འདི་ནི་ང་རང་གི་སེམས་བསམ་པའི་སྐད་ཆ་ཞིག་ལས་མཁས་གྲགས་མིང་འདོད་ཀྱི་གཏམ་གང་ཡང་མེད་པ་སེམས་གཏིང་དུ་འཇོག་རོགས་གནོང་།
སེར་སྨད་ཨེམ་རྗེ་བློ་བཟང་ཤེས་རབ་ལགས་ཀྱིས་བྲིས་པ་དེ་ཚིག་སྦྱོར་དང་བཤད་སྟངས་ལེགས་པོ་འདུག་པས། ང་ཚོ་དྲ་གྲོགས་ཚང་མས་འདི་བཞིན་འབྲི་རྒྱུ་འབད་བརྩོན་གནང་ན་ལེགས་པར་མངོན་། བསྟོད་དགོས་ས་བསྟོད་པ་དང་སྨད་དགོས་ས་སྡིག་ར་སོགས་དགོས་ནའང་། ཕལ་བའི་མིང་ཚིག་ངན་པ་བེད་སྤྱོད་མ་བཏངས་ན་ལེགས་སྙམ།
ནོར་བཅོས། ང་ཚོ་བོད་རྒྱལ་ཁབ་ལ
༼གང་ཉིད་ལྟ་བུ་ཞིག་ད་ལྟ་ཕན་བྱུང་མ་མྱོང་ལ་ད་ལྟའང་འཇིག་རྟེན་འདིར་བྱོན་མེད་ལ། མ་འོངས་པའང་དཀའ་བར་གནས་པ་དེ་ཡིན། ༽
གལ་སྲིད་དངོས་གནས་འདི་ལྟར་ཡིན་ན། ཁོང་བཀའ་དྲིན་ཆེ་གི ང་ཚོ་སེམས་པ་སྐྱོ་གི གང་ཡིན་ཟེར་ན་ཚོ་བོད་རྒྱལ་ཁབ་ལ་བཀའ་བློན་ཁྲི་བ་ཞིག་དགོས་པས།
མ་འོངས་པར་དེ་ལྟར་བྱེད་ཆོག་གི་རེད། ད་དུང་ལོ་གཉིས་ལྷག་ཡོད་པས། འོས་ལངས་ཀྱི་དུས་ཚོད་ལ་སླེབས་ཡོད་པ་མ་རེད། ཡིན་ནའི། ངས་ཁྱོད་རང་ཚོ་ཤེས་ཡོན་པའི་དཔུང་ཁག་ཁྲོད་དུའང་ཁ་ཤས་འོས་མིར་ལངས་དགོས་ཀྱི་འདོད། སྐབས་དེར་པཱ་ལེ་བའི་འོས་མི་དང་ཤེས་ཡོན་པའི་འོས་མིས་འགྲན་རྩོད་བྱེད་རྒྱུ་ཡིན་པས། དེ་ནི་ལོ་རྒྱུས་དམིགས་བསལ་བ་ཞིག་ཀྱང་ཆགས་ཡོད་པ་རེད།
གཞན་དེ་ཁྱོད་རང་གིས་ང་སེམས་ནང་ཉར་ཡོད་པར་ཐུགས་རྗེ་ཆེ།
རེད་ལགས། དྲ་གྲོགས་གནས་ཚང་མིང་འཛིན་པ་ལགས། སྐུ་ཉིད་མཐོང་རྒྱུ་མེད་པར་ཡུན་རིང་བྱིན་ཐལ། དེ་རིང་འདི་ནས་བཀའ་ཁྲིའི་བསྐོར་གྱི་བསམ་ཚུལ་ཐུང་ཐུང་ཞིག་བྲིས་འདུག་པ་དེའི་ནང་གི་རང་རང་གིས་བཀའ་ཁྲིའི་འོས་འགྲན་བྱེད་དགོས་པར་སྐུལ་བཞིན་འདུག་ན་ཐོག་མར་སྐུ་ཉིད་ནས་བཀའ་ཁྲིའི་འོས་བླངས་ཐེངས་ཤིག་གི་གསལ་བསྒྲགས་བྱོས་དང་ད་གཟོད་བོད་པ་ཚང་གི་མི་མང་གིས་ག་རེ་བཤད་པར་བལྟས་དེ་ཐག་གཅོད་བྱེད་དགོས་པ་མ་རེད་དམ།
ད་དེ་འདྲ་ཞེ་དྲག་གནང་དགོས་ཀྱི་མ་རེད། འཛིན་སྐྱོང་གི་ཐད་ནས་ཅུང་ཙམ་ལམ་སྟོན་བྱེད་ཐུབ་ཡོད་པ་ཙམ་རེད། འདི་གཅིག་ཡིན།
གཞན་དེ་ད་རེས་ཡིན་ན། བཀའ་ཁྲི་འོས་མི་རང་ཉིད་ཀྱི་ངོས་ནས་ཡར་ལངས་ནས་ཕྱོགས་གང་ཅིའི་ཐད་ཀྱི་སྲིད་ཇུས་སྔོན་བསྒྲགས་བྱེད་མཁན་ཞིག་དགོས་པ་ལས་ང་ཚོས་ཕར་བཙལ་བ་དེས་འགན་ཞེ་དྲག་ཐེག་གི་མ་རེད་ལ། སྐྱོན་ཡང་འཁུར་གྱི་མ་རེད། དེ་བས། ཐེངས་འདིར་རྒན་དར་གཞོན་གསུམ་ཁྲོད་བཀའ་ཁྲིའི་འོས་གཞིར་ལངས་མཁན་ཡོད་སྲིད་ལ། འགྲན་རྩོད་ཅིག་ཀྱང་ཡིན་པས། ང་ཚོས་བལྟད་མོར་ལྟ་ཞོར་དང་བསམ་བློ་གཏོང་ཞོར་སོ་སོའི་འོས་ཤོག་བླུགས་རྒྱུ་ལས་ལྷག་མེད་ཅིང་། སྒོས་སུ་བཤད་ཡམས་ཀྱི་རྗེས་སུ་མི་འབྲངས་རྒྱུ་དེ་བཀའ་ཁྲིའི་འོས་མི་བཙལ་བ་ལས་ཀྱང་གལ་ཆེ། དེ་འདྲ་ཞིག་རེད་དམ།