བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༤༤༧ སྟེང་གི་རྩོམ་སྒྲིག་པའི་གཏམ།
ཉེ་ལམ་ཕྱི་རྒྱལ་དུ་ཡོད་པའི་གྲོགས་པོ་ཞིག་ཕ་ཡུལ་བོད་ནས་ཕྱིར་ལོག་སླེབས་ཏེ། ཁོང་གིས་ང་ལ་ད་སྐབས་བོད་ནང་སྐྱིད་པོ་མི་འདུག་ལ། མ་གཞི་ནས་ང་ཚོའི་ཕ་ཡུལ་མཇུག་སྒྲིལ་བ་འདྲ་ཟེར། ཁོང་གི་སེམས་ཁྲལ་གཅིག་ནི་ད་ནས་བཟུང་བོད་ཡུལ་ཅེས་པ་ཞིག་ངོས་འཛིན་ས་མེད་པ་དང་། མི་འགྱངས་པར་མདོ་དབུས་མཐོ་སྒང་དུ་འབྲོག་པ་ཞེས་པ་ཞིག་ནམ་ཡང་གནས་མི་སྲིད་པ་དེ་རེད།
ཁོང་ལ་ཅི་ཁག ཡུལ་མདོ་སྨད་ཀྱི་འབྲོག་པའི་ལོ་རྒྱུས་དེ་ལོ་གཉིས་ཀྱི་རྗེས་ནས་མཇུག་སྒྲིལ་རྒྱུ་རེད། ༢༠༡༡ ལོའི་ལོ་མཇུག་ནི་གནའ་བོའི་བཙན་པོའི་དམག་སྡེ་ཆེན་པོ་འདིའི་སྒར་ཁ་ཡོངས་སུ་བསྡུས་ཤིང་། མདོ་སྨད་ཀྱི་འབྲོག་པ་ཡོངས་རྒྱ་ནག་གི་མཁར་གྲོང་ལ་འཇུག་རྒྱུ་རེད། གོ་ཚོད་ལ་ ༢༠༡༡ ལོར་མཚོ་སྔོན་ཞིང་ཆེན་མཚོ་ལྷོ་ཁུལ་གྱི་འབྲོག་སྡེ་རྣམས་གྲོང་སྡེ་ལ་བསྒྱུར་རྒྱུ་ནི་ཡུལ་མདོ་སྨད་ཀྱི་འབྲོག་སྡེ་མཐའ་མ་དེ་མཇུག་སྒྲིལ་བ་ཡིན་པར་བཤད། ཟླ་གཉིས་ཀྱི་སྔོན་ལ་མཚོ་ལྷོ་ཁུལ་གུང་ཧོ་རྫོང་གི་འབྲོག་པ་ཞིག་གིས་ཁ་པར་བརྒྱུད་བཤད་དོན། མཚོ་སྔོན་པོའི་ལྷོ་བརྒྱུད་ཀྱི་འབྲོག་སྡེ་རྣམས་ལ་ ༢༠༠༩ ལོ་ནས་བཟུང་རྒྱལ་ཁབ་ཀྱིས་རོགས་དངུལ་སྤྲད་དེ་ཁང་བ་རྒྱག་རྒྱུ་ཡིན་འདུག་ཟེར། རྒྱ་ནག་གཞུང་གི་འཆར་གཞི་འདི་ནི་ ༢༠༠༢ ལོའི་ཕྱི་ཟླ་དང་པོའི་ཚེས་ ༢༨ ཉིན་མཚོ་སྔོན་ཉིན་རེའི་ཚགས་པར་སྟེང་བཀོད་ཅིང་། འདས་པའི་ལོ་བརྒྱད་རིང་གི་འཆར་གཞི་དེ་ད་ལོ་ནས་བཟུང་མཚོ་ལྷོའི་འབྲོག་སྡེ་ཁག་ཏུ་དངོས་སུ་ལག་ལེན་བསྟར་མགོ་བརྩམས་པ་རེད། ཁོང་ཚོའི་དམིགས་ཚད་ནི་སྔར་གྱི་འཆར་གཞི་ལྟར་ ༢༠༡༡ ལོ་ཡིན་ངེས། འདིའི་རྗེས་ཀྱི་ལག་བསྟར་ནི་བོད་ལྗོངས་ཡིན་པར་བཤད།
མིའི་རིགས་ཀྱི་དཔལ་ཡོན་གྱི་འཕེལ་ཕྱོགས་ནས་བལྟས་ན། འབྲོག་པ་རྣམས་ཀྱང་ཁྱིམ་ཚང་ཁེར་ཆད་ནས་མཁར་གྲོང་དུ་བསླེབས་པ་ནི་གོ་སྐབས་ལེགས་པོ་ཞིག་ཡིན་སྲིད་ཀྱང་། རྒྱ་ནག་གི་སྲིད་བྱུས་ཀྱི་འབབ་ས་ནི། སྨད་རྒྱ་རྣམས་ཡར་བོད་ཀྱི་ས་ཁུལ་དུ་སྤོ་རྒྱུ་དང་། སྟོད་ཀྱི་འབྲོག་པ་རྣམས་མར་མཁར་གྲོང་ལ་འབབ་རྒྱུ། འདི་ལྟར་བོད་རྒྱ་གཉིས་ཀྱིས་བོད་ས་ཁུལ་གྱི་མཁར་གྲོང་གསར་པ་དག་ནས་གཞིས་མཉམ་དུ་འཛིན་རྒྱུ་དང་། ཕྱོགས་གཉིས་ཀར་ཐུན་མོང་དུ་དབང་བའི་ཕ་ཡུལ་གྲོང་ཁྱེར་ཞིག་འཛུགས་སྐྲུན་བྱ་རྒྱུ་དེ་ཡིན། འོན་ཀྱང་། འདིའི་ཕུག་ནས་ངེས་པར་དུ་འགྱུར་ཏེ་ཤུལ་མེད་དུ་འགྲོ་དགོས་པ་ནི་བོད་པ་རྣམས་ཡིན། དཔེར་ན། ད་སྐབས་མཚོ་སྔོན་གྱི་ཟི་ལིང་གྲོང་ཁྱེར་གྱི་བོད་པ་རྣམས་ཡིན། ཟི་ལིང་དུ་བོད་པ་ཉིས་ཁྲི་ལྷག་ཡོད་ཀྱང་། དེ་དག་གི་བུ་རབས་ཚ་བརྒྱུད་རྣམས་ལ་བོད་པའི་སློབ་གྲྭ་ཁེ་གཙང་ཞིག་འཛུགས་རྒྱུའི་ཐོབ་ཐང་མེད། འདིའི་ཐད་ལོ་སྔོན་མ་ནས་ཟི་ལིང་གྲོང་ཁྱེར་དུ་རྩོད་གླེང་རིམ་པར་བྱུང་ཡང་གྲུབ་འབྲས་མ་ཐོན་པ་ལྟར་རེད། དེ་བས་ང་ཚོས་བོད་ནང་གི་སྐབས་ཐོག་གི་བསྒྱུར་བཅོས་འདི་དག་ལ་དཔག་པའི་ལས་གཞིའམ། ལས་འགུལ་རེ་སྤེལ་རྒྱུ་ཡོད་མེད་ལའང་ཅིས་ཀྱང་བསམ་དགོས་པར་འདོད་དོ།།
