༡༩༧༡ ལོའི་གསུམ་བཅུའི་དུས་དྲན་གྱི་གསུང་འཕྲིན།

    ༡༩༥༩ ཟླ་ ༣ ཚེས་ ༡༠ ཉིན་ལྷ་སར་བོད་མི་མང་ནས་རང་དབང་སྒེར་ལངས་ཀྱི་ལས་འགུལ་བྱས་པར་རྒྱ་མི་གུང་བྲན་གྱིས་བཙན་དབང་གདུག་རྩུབ་དྲག་པོས་འགྲོ་བ་མིས་རྩ་ཆེར་འཛིན་པའི་གནས་ལ་ཇི་མི་སྙམ་པར་བོད་མི་སྟོང་ཕྲག་མང་པོ་དམར་གསོད་དྲག་གནོན་བྱས་པ་རེད། དེ་འདྲའི་ཉིན་མོ་དེ་ལ་ང་ཚོས་རྗེས་དྲན་གང་གི་དོན་དུ་བྱེད་ཀྱི་ཡོད་དམ་ཟེར་ན༑ ང་ཚོས་བོད་རང་དབང་གི་དོན་དུ་ལུས་སྲོག་གཏོང་མཁན་བོད་མི་ཚོར་རྗེས་དྲན་བྱེད་པ་ཙམ་དུ་མ་ཟད། དེ་ཉིན་རྒྱལ་ཁ་ཐོབ་པའི་ཉིན་མོ་ཞིག་ཏུ་ངོས་འཛིན་བྱས་ནས་ཀྱང་རྗེས་དྲན་བྱེད་ཀྱི་ཡོད། ཅིའི་ཕྱིར་ཞེ་ན། དེའི་ཉིན་རྒྱ་མི་གུང་བྲན་གྱིས་བཙན་དབང་གིས་འཛིན་སྐྱོང་བྱེད་པའི་སྲིད་བྱུས་ལ་ཕམ་ཉེས་ཕྱིན་པ་གསལ་པོར་བསྟན་པའི་ཐོག ཁོང་ཚོ་འུ་ཐུག་ཐབས་ཟད་ཀྱིས་དྲག་པོའི་ལམ་ནས་གུང་བྲན་ལྟ་སྤྱོད་ཀྱི་ལྡོག་ཕྱོགས་མི་སེར་སྤེལ་སྲོལ་འཛིན་ཐབས་བྱེད་དགོས་པར་ཐུག་པ་དང༌། ང་ཚོའི་ཕྱོགས་སུ་ཕམ་ཉེས་མིན་པའི་ཁར། ཕྱི་རྒྱལ་བཙན་དབང་གི་འོག་ཏུ་ནམ་ཡང་སྡོད་འདོད་མེད་པའི་རྣམ་འགྱུར་དཔའ་གདེངས་སྤོབས་པ་ཆེན་པོའི་ངང་ནས་བསྟན་ཡོད། དེ་ལྟ་བུའི་རང་དབང་གྱེན་ལངས་ལན་གྲངས་སྟོང་ཕྲག་བྱེད་སྲིད་ལ། དེ་འདྲའི་དྲག་གནོན་ཡང་སྟོང་ཕྲག་བྱེད་སྲིད་ནའང༌། སྐྱེ་བོ་སོ་སོ་རང་ཉིད་ཀྱི་ནང་གི་སྙིང་སྟོབས་དང་རང་དབང་གི་འདོད་པ་ནི་དུས་ནམ་ཡང་གཏོར་བརླག་གཏོང་མི་ཐུབ་པས། བོད་ལ་ཐོབ་ཐང་ཡོད་ངེས་རང་བཙན་རྒྱལ་ཁབ་ཀྱི་གྲས་སུ་མ་ཚུད་བར་ངའི་མི་མང་གིས་འཐབ་རྩོད་མུ་མཐུད་ནས་བྱེད་ངེས་ཡིན།

    གོང་གསལ་བརྗོད་དོན་རྣམས་ར་སྤྲོད་བདེན་རྟགས་སུ་ཉེ་ཆར་བོད་ནས་ཐོན་པའི་གནས་ཚུལ་གཤམ་གསལ་ལས་ལྷག་པ་ཅི་ཞིག་དགོས། ༡༩༧༠ ཟླ་བ་གཉིས་པའི་ནང་བོད་མི་སྙིང་སྟོབས་ཅན་ཚོས་རྒྱ་མི་གུང་བྲན་ལ་ངོ་རྒོལ་བྱས་པའི་དབང་གིས་བོད་མི་ལྔ་བཅུ་ང་བརྒྱད་མང་ཚོགས་ཀྱི་མདུན་སར་སྡེབ་གསོད་བྱས་འདུག་ཅིང༌། ཁང་པའི་ནང་དང༌། བཙོན་ཁངནང་ཤི་བསད་ཅི་བྱས་གོ་རྟོགས་ཐུབ་མེད། ད་ལོའི་ཕྱི་ཟླ་བདུན་པའི་ནང་ལྷ་སའི་རླུང་འཕྲིན་ནས་གོ་མཚོན་ལྡན་པའི་ངོ་རྒོལ་བ་ཆེ་ཁག་གཅིག་མགོ་གནོན་ཐུབ་ལུགས་ཁྱབ་བསྒྲགས་བྱས་པ་ལས། ཞིབ་གསལ་འགྲེལ་བརྗོད་མ་བྱས་ཀྱང༌། དེ་རྗེས་གོ་ཐོས་ལ། བོད་ལྷོ་ནུབ་ས་ཁུལ་དུ་ངོ་རྒོལ་ཆེན་པོ་ཞིག་ལངས་ཏེ་རྒྱ་མི་སྟོང་ཕྲག་སྐོར་ལ་ཤི་རྨས་བྱུང་བ་དང༌། སྐབས་དེར་བོད་མི་བརྒྱ་ཕྲག་དང་ཉི་ཤུ་རྩ་བཞི་སླར་ཡང་སྡེབ་གསོད་བྱས་འདུག ཡང་ཟླ་བ་གསུམ་གྱི་རྗེས་ལ་ལྷ་སའི་ནང་གསང་བའི་ཚོགས་པ་ཞིག་རྒྱ་དམར་ལ་རྙེད་ཐོན་བྱུང་བ་དང༌། ཚོགས་པ་དེའི་མིང་ལ་ བོད་རང་བཙན་ལས་འགུལ་ཚོགས་པ་ ཞེས་ཟེར་གྱི་ཡོད་འདུག དེའི་ཚོགས་མི་དགུ་མང་ཚོགས་ཀྱི་མདུན་སར་སྡེབ་གསོད་བྱས་པ་དང༌། དེ་བྱིངས་རྣམས་ལོ་ཉི་ཤུ་ནས་སུམ་ཅུའི་བར་བཙོན་འཇུག་བྱས་འདུག དེང་སང་རྒྱ་མིས་བོད་ཀྱི་ནང་གདུག་རྩུབ་བཙན་གནོན་དྲག་པོ་ཚད་མེད་ཅིག་བྱེད་པའི་སྤྱོད་ཚུལ་འདི་དག་ལོ་ཤས་སྔོན་གྱི་བྱ་སྤྱོད་ཀྱི་ཆ་ཙམ་མཚོན་པར་དཀའ་བ་ཞིག་ཡིན་ནའང༌། གོང་དུ་བརྗོད་པའི་གནས་ཚུལ་དེ་དག་ནི་འགོག་མེད་དུ་འབྱུང་བཞིན་པ་དང༌། བོད་ཀྱི་ནང་བཀྲེས་སྐོམ་ངལ་སྡུག་གིས་ཇི་ལྟར་མནར་ཚུལ་ངོ་མ་རྣམས་ངའི་ངག་རིག་གི་ལམ་ནས་ཆ་ཤས་ཙམ་ཡང་གསལ་བརྗོད་མི་ཐུབ།

    དངོས་དོན་དུ་བོད་མི་ཚོས་རྒྱ་མི་གུང་བྲན་ལ་ངོ་རྒོལ་བྱེད་དགོས་པ་ཡིན་ནའང༌། ངས་ནི་རྒྱ་མི་རིགས་ལ་ཞེ་སྡང་ནམ་ཡང་བྱེད་མི་ཐུབ། ངའི་ཡིད་ཆེས་ལ་བོད་ཀྱི་རང་དབང་ནི་བོད་མི་རྣམས་སྟོབས་ཤུགས་ཆེན་པོར་གྱུར་པའི་མཚམས་ཡོང་ངེས་ཤིང༌། ཞེ་སྡང་ནི་ནུས་ཤུགས་མིན་ལ། ནུས་ཤུགས་ཀྱི་ལྡོག་ཕྱོགས་སུ་གནས་པའི་སྐྱོན་ཆ་ཞིག་རེད། སངས་རྒྱས་བཅོམ་ལྡན་འདས་ཀྱིས་ཞེ་སྡང་གིས་ཞེ་སྡང་འགོག་མི་ཐུབ་པར་གསུངས་པ་དེ་ཡང་སྤྱིར་བཏང་ཆོས་བཤད་ཙམ་དུ་གསུངས་པ་མ་ཡིན་པར་དངོས་ཡོད་ཀྱི་གནས་ཚུལ་དང་བསྟུན་ནས་གསུངས་པ་ཡིན། ཞེ་སྡང་གི་ལམ་ནས་གྲུབ་འབྲས་ཇི་འདྲ་ཞིག་བྱུང་ཡང་དེ་ནི་སོར་གནས་མི་ཐུབ་ལ་ཡུན་རིང་འཚོ་གནས་མི་ཐུབ། དེར་མ་ཟད། དེ་ནི་སྔ་ཕྱི་ཙམ་མ་གཏོགས་སླར་ཡང་དཀའ་རྙོག་འབོད་པའི་གཡབ་མོ་ཡིན།

    ད་ལྟའི་ཆར་ངའི་མི་མང་གི་གནས་སྟངས་ཧ་ཅང་ཛ་དྲག་འདི་འདྲའི་སྐབས་སུ་ཞེ་སྡང་བྱས་ན་ཡིད་ལ་སྡུག་བསྔལ་སྣོན་མ་ཞིག་མ་གཏོགས་གང་ཡང་ཡོང་མི་ཐུབ། ལར་ནས་ང་ཚོས་རང་ཉིད་ཅི་བྱེད་ནམ་ཡང་མི་ཤེས་པའི་མི་རིགས་ཤིག་ལ་ཞེ་སྡང་ཅི་ཕྱིར་བྱེད། འགོ་འཁྲིད་པས་དབང་མེད་དུ་གཅུན་འཁྲིད་བྱས་པའི་རྒྱ་མི་ས་ཡ་མང་པོ་ལ་ཞེ་སྡང་ཅི་ཕྱིར་བྱེད། ང་ཚོས་དེ་འདྲའི་འགོ་འཁྲིད་པ་རྣམས་ལའང་ཞེ་སྡང་ཅི་ཕྱིར་བྱེད། གང་ལགས་ཟེར་ན། ཁོང་ཚོས་ཀྱང་རང་གི་བདེན་དོན་དང་རྒྱལ་ཁབ་ཀྱི་ཆེད་དུ་དཀའ་སྡུག་མང་པོ་མྱོང་ཡོད། ངེད་རང་ལ་ཞེ་སྡང་གི་དོན་འགྲུབ་པར་ཡིད་ཆེས་མེད་ཀྱང༌། དུས་རྟག་ཏུ་ཡིད་ཆེས་གཅིག་ཡོད་པ་ནི་ཉིན་གཅིག་དྲང་བདེན་ལ་རྒྱལ་ཁ་ཐོབ་རྒྱུ་དེ་ཡིན།

    རྒྱ་དམག་ས་ཡ་མང་པོ་ཡོད་ནའང༌། ངའི་ཡིད་ཆེས་དེ་འགྱུར་མེད་དེ་རང་ཡིན་ཅིང༌། དེང་དུས་རྒྱ་ནག་ལ་ཧ་ཅང་ནུས་ཤུགས་ཆེན་པོའི་རྡུལ་ཕྲན་མཚོན་ཆ་ཡོད་པའི་འཛམ་གླིང་འདིའི་རྒྱལ་ཁབ་སྟོབས་ཤུགས་ཆེ་ཤོས་ཚོས་ཀྱང་འཇིགས་སྣང་བྱེད་བཞིན་པ་ཡིན་ནའང༌། རྒྱལ་རབས་ལ་ངེས་གཏན་གང་ཡང་མེད། གཟི་བརྗིད་ཚད་མེད་པའི་རྒྱལ་ཁབ་མང་པོ་ཉམས་བརླག་ཏུ་གྱུར་ཡོད། དེང་སང་རྒྱ་ནག་རྒྱལ་རབས་ནང་བྱུང་མ་མྱོང་བའི་སྟོབས་ཤུགས་ཆེན་པོ་ཞིག་ཆགས་ཡོད། འོན་ཀྱང་དེ་འདྲའི་སྟོབས་ཤུགས་དེ་ལ་ནད་སྐྱོན་ཞིག་ཡོད་པ་ནི། གཞི་རྩ་འཇིགས་སྣང་འབའ་ཞིག་ལ་བརྟེན་ནས་ཚུགས་པ་དེ་ཡིན། དཔེར་ན། གནའ་དུས་ཀྱི་མི་ལྟར་དེང་སང་རྒྱ་ནག་ནང་གི་མི་ཚང་མས་རང་ཉིད་ཀྱི་ནོར་འཁྲུལ་ཅུང་ཟད་ཙམ་ཞིག་ཐོན་ན་དཀོན་མཆོག་གསར་པའི་བཀའ་ཆད་དྲག་པོ་ཕོག་གིས་དོགས་པའི་འཇིགས་སྣང་འོག་དུས་རྟག་ཏུ་གནས་དགོས་ཀྱི་ཡོད་པ་རེད།

    དེ་ལྟ་བུའི་སྒྲིག་འཛུགས་དེ་གནས་ཨེ་ཐུབ་ཟེར་ན། མི་ཐུབ། རྒྱལ་རབས་དང་དབང་ཆ་ཡོངས་རྫོགས་ཁག་གཅིག་གིས་འཛིན་པ་དེ་གྲས་ལ་འདྲ་བ་གཅིག་ཡོང་གི་ཡོད་པ་ནི་ཡུན་རིང་གནས་མི་ཐུབ་པ་དེ་ཡིན་ལ། རྒྱ་ནག་ཀྱང་མཐར་གྱེར་ཞིག་ཏུ་འགྲོ་རྒྱུ་རེད། ད་དུང་འཛམ་གླིང་ནང་གདུག་རྩུབ་ཅན་གྱི་མི་རེ་ཟུང་མུ་མཐུད་ནས་བྱུང་དབང་དུ་སོང་རུང༌། མཐར་ཐུག་གི་རྒྱལ་ཁ་ནི་དྲང་བདེན་ལ་ཐོབ་རྒྱུ་ཡིན་པ་དང༌། ང་ཚོའི་དོན་གནད་ཀྱང་དྲང་བདེན་ཞིག་ཡིན་སྟབས་བོད་མི་ཚོས་རྒྱ་མི་གུང་བྲན་གྱི་བཙན་གནོན་དྲག་པོའི་གཉའ་ཤིང་དེ་ཡོངས་སུ་བོར་ནས་བདེ་སྐྱིད་ལྡན་པའི་བོད་གསར་པ་འཛུགས་བསྐྲུན་བྱེད་ཆེད་ཡར་ལངས་རྒྱུར་ཡིད་ཆེས་གཙང་མ་ཡོད།

    མཇུག་ཏུ། ང་ཚོ་བོད་མི་ཚོར་དགོས་མཁོ་ཆེ་བའི་དུས་སུ་སེམས་གསོ་སློབ་སྟོན་དང༌། ལག་འདོན་རོགས་རམ་གནང་མཁན་གཞུང་སྒེར་ཁག་ལ་ད་རིང་གི་གོ་སྐབས་འདི་བརྒྱུད་ནས་ཐུགས་རྗེ་ཆེ་ཞུ་རྒྱུ་ཡིན།།    །།