༡༩༨༥ ལོའི་གསུམ་བཅུའི་དུས་དྲན་གྱི་གསུང་འཕྲིན།

    ད་རིང་གསུམ་བཅུའི་དུས་དྲན་འདི་ལོ་ཉི་ཤུ་རྩ་དྲུག་ཕྱིན་པའི་དུས་ཚོད་ཡིན། ལོ་རྒྱུས་རིང་པོ་ཡོད་པ་དང༌། སྙིང་སྟོབས་ལྡན་པ། ཤེས་རིག་གི་བསམ་བློ་ཕྱུག་པོ་ཡོད་པའི་ང་རང་ཚོ་བོད་མི་རིགས་ཀྱི་དུས་ཚིགས་གལ་ཆེ་འདིར་དྲན་གསོ་བྱེད་པ་དང་ཆབས་ཅིག བོད་མི་སྤྱི་བོ་གནམ་བསྟན་ཡོངས་རྫོགས་ཀྱི་ཁུར་དུ་འཁྲི་བ་མ་འོངས་པའི་སྤྱི་དོན་ཐོག་རང་རང་སོ་སོས་ནུས་པ་འདོན་རྒྱུ་གང་ཡོད་བསམ་པ་རྣམ་དག་གིས་འདོན་རྒྱུའི་སྙིང་སྟོབས་བསྐྱེད། དམ་བཅའ་འཇོག་རྒྱུ་ཤིན་ཏུ་གལ་ཆེ།

    འདས་པའི་ལོ་དེ་དག་གི་རིང་ལ་བོད་རྒྱ་ཆེའི་མང་ཚོགས་རྣམས་ཡོད་ས་སོ་སོ་རང་གི་ལུང་པར་ཡོད་ན་ཡང༌། རང་དབང་གི་གོ་སྐབས་རྩ་བ་ནས་བརླགས་ཏེ་ཧ་ཅང་གི་སྡུག་བསྔལ་ཆེན་པོ་མྱོང་དགོས་བྱུང་བ་དང༌། རང་རེ་མི་གཞན་དག་གི་ལུང་པར་ཡོད་མཁན་ཚོ་རང་གི་ལུང་པ་བྲལ་ཏེ་མི་ཡུལ་ལ་གྱར་བསྡད་ཡོད་ན་ཡང་སོ་སོའི་ལུང་པའི་ནང་གི་མི་བཞིན་སྲོག་ལ་ཉེན་ཁ་ཡོད་པའི་དངངས་སྐྲག་དེ་འདྲ་བྱེད་དགོས་བྱུང་མེད་ཀྱང༌། འགལ་རྐྱེན་དཀའ་ངལ་མང་པོར་གདོང་ལེན་མི་བྱེད་མཐུ་མེད་བྱུང༌། རྡོ་དོན་ཡང་སྙིང་དུས་རབས་འདིའི་སྐབས་ཀྱི་བོད་མི་གཞིས་བྱེས་ཚང་མ་བོད་ཀྱི་རྒྱལ་རབས་ལོ་རྒྱུས་ནང་ལ་སྡུག་བསྔལ་ཆེ་ཤོས་ཤིག་དང༌། ཛ་དྲག་ཆེ་ཤོསཤིག་མྱོང་དགོས་པའི་མི་ཐོག་གཅིག་ཆགས་པ་རེད། ཡིན་ན་ཡང་ང་རང་ཚོ་བོད་མིའི་དཔེ་ལ་ཡོད་པ་བཞིན། རྩ་བ་མ་བསྐམས། སྡོང་པོ་འགྱེལ་མེད་པ་ཡིན་ཙང་རེ་བ་ཡོད་པ་དང༌། རེ་བ་བྱེད་ཐུབ་པའི་ཆ་རྐྱེན་མང་པོ་འཛོམས་པའི་དུས་ཚོད་ཅིག་ཡིན་གཤིས། ཚང་མས་ཞུམ་པ་མེད་པའི་སྙིང་སྟོབས་བསྐྱེད། རང་གིས་རང་ལ་གཞེན་བསྐུལ་བྱས་ཏེ་སྙིང་ལ་དམ་བཅའི་རི་མོ་སླར་ཡང་བརྟན་པོ་འགོད་རྒྱུ་ཤིན་ཏུ་གལ་ཆེན་པོ་རེད།

    བཙན་བྱོལ་ལ་གྱར་མཁན་བོད་མི་ཚོས་འདས་པའི་ལོ་ ༢༦ དེའི་རིང་ལ་གཞི་རྩ་མེད་པ་ཞིག་ལ་གཞི་རྩ་གསར་དུ་བཙུགས་ཏེ་འཕྲལ་སེལ་ལྟོ་གོས་འཚོ་ཐབས་ཀྱི་དཀའ་ངལ་སེལ་བ་ཙམ་དུ་མ་ཟད། རྩ་བའི་བོད་མི་རིགས་ཀྱི་ལ་རྒྱ་ཤ་ཞེན་མ་བོར་བའི་ཐོག་ནས་སོ་སོའི་མི་རིགས་ཀྱི་རྣམ་པ་གསལ་པོར་བཟུང་སྟེ་བསྡད་ཡོད། གཙོ་ཆེ་ཤོས་རང་གི་རིག་གཞུང་སྤྱི་དང༌། ལྷག་པར་ནང་པ་སངས་རྒྱས་པའི་ལྟ་སྤྱོད་ཀྱི་སྐོར་རྒྱུན་འཛིན་ཐུབ་ཐབས་ཐོག་ལ་དམིགས་བསལ་གྱི་འབད་བརྩོན་དང་ཐབས་ཤེས་བྱས་ཏེ་ད་ལྟའི་ཆར་གྲུབ་འབྲས་གང་ལ་གང་འཚམས་ཡག་པོ་ཐོན་ཡོད། ཚུལ་འདིས་བོད་མིར་གོ་སྐབས་བྱུང་ན་རང་འགུལ་གྱི་ཐོག་ནས་ཐབས་ཤེས་གང་འདྲ་ཞིག་བྱེད་ཐུབ་ཀྱི་ཡོད་མེད་དང༌། འབད་བརྩོན་ཇི་ཙམ་བྱེད་ཐུབ་ཀྱི་ཡོད་མེད། རྩ་བའི་བོད་མིའི་གཤིས་སྤྱོད་བཟང་ཞན་གང་འདྲ་ཞིག་ཡོད་མེད་བཅས་འཛམ་བུ་གླིང་འདིའི་སྒང་ལ་དཔེ་མཚོན་སྟོན་ཐུབ་པའི་བྱས་རྗེས་བཞག་ཡོད།

    གང་ལྟར་བོད་པ་ཡོད་སའི་ལུང་པ་འདྲ་མིན་མང་པོའི་ནང་ལ་བོད་པ་རྒྱུས་ཡོད་མཁན་གྱི་མི་མཆོག་དམན་མང་པོས་བོད་པ་ཟེར་དུས་རང་བཞིན་གྱི་མིའི་སྤྱི་ཚོགས་ནང་ལ་སྙིང་ཉེ་པོ་དང༌། ཡ་རབས་སྤྱོད་བཟང་ལྡན་པའི་ཚད་གཞིར་ངོས་འཛིན་བྱེད་པའི་གནས་ཚུལ་ཞིག་ཆགས་ཡོད། དེ་བཞིན་དུ་བོད་ཀྱི་རིག་གཞུང་སྤྱི་དང༌། ལྷག་པར་ནང་པའི་ཆོས་ཀྱི་ཐོག་ལ་འཛམ་གླིང་འདིའི་སྒང་ལ་མཐོང་ཚུལ་དང༌། ངོས་འཛིན་བྱེད་སྟངས་གསར་པ་ཞིག་ཆགས་ཐུབ་པ་བྱུང་བ་བཅས་གནས་ཚུལ་དེ་རྣམས་ང་རང་ཚོ་མིའི་ལུང་པར་བསྡད་པའི་དུས་ཚོད་དེའི་རིང་ལ་བཞག་པའི་བྱས་རྗེས་སུ་བརྩིས་ཆོག་པ་ཞིག་རེད། མིའི་ལུང་པར་བོད་མི་མང་པོ་མེད་ན་ཡང༌། ཡོད་པ་རྣམས་ནས་སོ་སོའི་མི་རིགས་ཀྱི་རྣམ་པ་མ་བརླག་པར་རྒྱུན་འཛིན་བྱས་པ་ལ་བརྟེན་ནས་འཛམ་བུ་གླིང་འདིའི་སྒང་ལ་བོད་དང༌། བོད་མི་ཟེར་བར་གཞི་ནས་དོ་སྣང་གསར་པ་སླེབས་པ་དང༌། བརྟག་དཔྱད་བྱེད་པ། ཤ་ཚ་གསར་པ་ཞིག་སླེབས་ཐུབ་པ་བཅས་ཀྱི་ཕན་ཐོགས་ཆེན་པོ་བྱུང་ཡོད། དེས་རྐྱེན་པས་བོད་ནང་ལ་ཡང་གནས་ཚུལ་མང་པོ་ཞིག་ལ་ཤུགས་རྐྱེན་ཕན་ཐོགས་བྱུང་ཡོད། འདི་དག་ནི་ང་ཚོའི་གྲུབ་འབྲས་མི་དམན་པ་ཞིག་ཡིན་ལ། ད་དུང་འདས་པའི་ཉམས་མྱོང་འདི་དག་ལ་བརྟེན་ནས་མ་འོངས་པར་སྔར་ལས་ཀྱང་གྲུབ་འབྲས་བཟང་བ་ཐོན་ཐུབ་པའི་དོན་དུ་ཚང་མས་ཞུམ་མེད་འབད་བརྩོན་ཆེ་བསྐྱེད་བྱེད་དགོས།

    དུས་ཡུན་དེའི་རིང་ལ་ང་ཚོར་གྲུབ་འབྲས་དེ་ལྟར་ཐོན་པའི་ཆ་རྐྱེན་གཅིག་ནི་འཛམ་བུ་གླིང་འདིའི་སྒང་ལ་རིགས་རུས་ལྟ་སྤྱོད་སྐད་ཡིག་ཆ་ལུགས་སོགས་ཕྱོགས་མང་པོ་ཞིག་ནས་མི་འདྲ་བ་སྣ་ཚོགས་ཡོད་ན་ཡང༌། གཞི་རྩའི་མིའི་རིགས་གཅིག་གྱུར་ཡིན་པའི་གནས་ཚུལ་འདིའི་ཐོག་ནས་མིས་མི་ལ་བརྩེ་ཞེན་བྱེད་པ་དང༌། གཅིག་ལ་དཀའ་ངལ་འཕྲད་དུས་གཅིག་གིས་མི་གཅིག་གྱུར་ཡིན་པའི་འདུ་ཤེས་ཐོག་ནས་རོགས་བྱེད་པའི་མིག་ལྟོས་བཟང་པོ་ཞིག་དར་ཡོད་པའི་གནས་ཚུལ་འདིའི་ཐོག་ནས། རྒྱ་གར་གཞུང་དམངས་དང༌། རྒྱལ་སྤྱིའི་ཚོགས་པ་ཁག དེ་བཞིན་ཚོགས་པ་དང༌། ཆོས་ལུགས། མི་རིགས་འདྲ་མིན། སྒེར་པ་ཆེ་ཆུང་མང་པོ་ཞིག་གིས་ང་ཚོ་བོད་པའི་ཐོག་ལ་དམིགས་བསལ་དོ་སྣང་དང༌། ཤ་ཚའི་སྒོ་ནས་རོགས་རམ་མང་པོ་བྱུང་ཡོད། དེར་བརྟེན་ད་རེས་ཀྱི་གོ་སྐབས་འདི་བརྒྱུད་ནས་ངས་སླར་ཡང་རོགས་རམ་གནང་མཁན་ཚོར་ཐུགས་རྗེ་ཆེ། ཁྱེད་ཚོའི་བཀྲིན་ནམ་ཡང་བརྗེད་མེད་ཅེས་ཞུ་རྒྱུ་ཡིན།

    བར་ལམ་ཕྱི་ལོ་ ༡༩༧༨།༧༩ ཕན་གྱི་གནས་ཚུལ་སྐྱར་ཟློས་བྱེད་རྒྱུ་སེམས་སྐྱོ་བའི་རང་བཞིན་ལས་མེད། ༡༩༧༨།༧༩ ནས་བཟུང་ཕྲན་བུའི་གནས་ཚུལ་བཟང་དུ་ཕྱིན་ནས་དེང་སང་བོད་ནང་ལ་མུ་གེས་ཤི་བའི་ཉེན་ཁ་མེད་པ་དང༌། བོད་ཀྱི་རིག་གཞུང་ཐོག་ལ་མཚོན་ན་ཡང་གཞི་རྩའི་བོད་ཀྱི་སྐད་ཡིག་སློབ་སྦྱོང་བྱེད་རྒྱུའི་གོ་སྐབས་ཕྲན་བུའི་བཟང་དུ་ཕྱིན་པ་རེད། དེ་བཞིན་དུ་བོད་ཕྱི་ནང་དབར་ཕར་ཚུར་གཉེན་འབྲེལ་ཐུག་འཕྲད་བྱེད་པ་ལ་དཀའ་ངལ་མང་པོ་ཡོད་ན་ཡང་ཕན་ཚུན་ཐུག་འཕྲད་བྱེད་པའི་གོ་སྐབས་གསར་པ་བྱུང་བ་དེ་ཚོ་ལ་དགའ་བསུ་ཡོད།

    རྩ་བའི་བོད་ཀྱི་དོན་དག་འདི་རྒྱལ་རབས་ལོ་རྒྱུས་དང་འབྲེལ་བའི་གནས་ཚུལ་རྙོག་དྲ་ཆེན་པོ་ཞིག་ཡིན་དུས་ལམ་སེང་དཀའ་ངལ་སེལ་ཐུབ་པ་ཡོང་མིན་ཇི་ལྟར་ཡང༌། བདེན་པ་དང༌། མིའི་སེམས་ཤུགས་ལ་ནུས་པ་ངེས་ཅན་ཞིག་ཡོད་པ་དང༌། དེ་བཞིན་འཛམ་གླིང་སྤྱིའི་གནས་སྟངས་ཀྱང་དེ་སྔོན་དང་མི་འདྲ། སྔ་དུས་ཡིན་ན་ལུང་པ་གཅིག་ནང་གི་དཀའ་རྙོག་དེ་ས་ཁུལ་གཞན་དག་ལ་འབྲེལ་བ་མེད་པ་ལྟ་བུ་དང༌། སྐབས་རེ་གནས་ཚུལ་མ་ཤེས་པར་ལུས་བསྡད་ཀྱི་ཡོད་པ་རེད། དེང་སང་འཛམ་བུ་གླིང་ཇེ་ཆུང་དུ་སོང་བ་ལྟ་བུས་ས་ཆ་ཁུག་ཀྱོག་གཅིག་ཏུ་བྱུང་བའི་གནས་ཚུལ་དེར་ས་ཁུལ་གང་ས་ནས་དོ་སྣང་བྱེད་དགོས་པ་དང༌། འབྲེལ་བ་ཡོད་པ་ཞིག་ཏུ་གྱུར་ཡོད་པས་ན་འགྱུར་བ་འགྲོ་བའི་མཐུན་རྐྱེན་མང་པོ་འཛོམས་ཡོད།

    དེ་བཞིན་དུ་རྒྱ་ནག་རང་གི་ནང་ལ་མཚོན་ན་ཡང་སོ་སོའི་དངོས་ཡོད་ཉམས་མྱོང་གི་ཐོག་ནས་བྱེད་ཐབས་གསར་པ་ཞིག་དང༌། ལྟ་ཚུལ་གསར་པ་ཞིག་གི་ལམ་དུ་མི་འགྲོ་ཐབས་མེད་ཆགས་ཏེ། ལོ་འགའ་ཤས་གོང་གི་གནས་ཚུལ་དང་བསྡུར་ན་གཞི་རྩའི་སྲིད་བྱུས་ཡར་རྒྱས་ཆེན་པོ་ཕྱིན་ཡོད། ཡིན་ན་ཡང་མིའི་སྤྱིའི་ཚོགས་ནང་བདེ་སྐྱིད་དངོས་གནས་ཤིག་ཡོང་བ་ལ་བསམ་བློའི་རང་དབང་དེ་ཤིན་ཏུ་གལ་ཆེན་པོ་ཡིན། བསམ་བློའི་རང་དབང་ཡོང་བ་ལ་ཞེད་སྣང་མེད་པའི་ཐོག་ནས་དངོས་གནས་དྲང་གནས་ཀྱི་མཐུན་སྒྲིལ་དམ་གཙང་ཞིག་ཡོད་དགོས། བཅོས་མའི་རྣམ་འགྱུར་འདྲ་ཆགས་པོ་ཙམ་ལས་བསམ་བློའི་གཏིང་དུ་ནད་རོ་ལྷག་བསྡད་ན་སྔ་ཕྱི་མ་གཏོགས་འགལ་རྐྱེན་འཕྲད་རྒྱུ་རེད། བོད་རྒྱ་གཉིས་ཀྱི་དབར་ལ་ཆ་མཚོན་ན་ཡང་གཅིག་གིས་གཅིག་ལ་ཞེད་སྣང་བྱེད་མ་དགོས་པ་ཞིག་དང༌། བསམ་བློའི་ནང་ནས་ཕན་ཚུན་བརྩེ་ཞེན་སླེབས་པ་ཞིག་མ་བྱུང་བར་དུ་དཀའ་ངལ་མུ་མཐུད་ཡོང་ངེས་ཡིན། ཕན་ཚུན་གནས་ཚུལ་གསལ་པོ་ཤེས་རྟོགས་ཐུབ་ཐབས་བྱེད་རྒྱུ་འདི་ཧ་ཅང་གལ་ཆེནཔོ་ཡིན།
 
    ད་ཕན་བོད་ཀྱི་གནད་དོན་ཐོག་རྒྱ་མིའི་འདོད་ཚུལ་རྣམས་བོད་མིར་བཙན་ཤེད་ཀྱིས་སློབ་སྤེལ་བྱས་ཏེ་བོད་ཀྱི་དངོས་ཡོད་གནས་ཚུལ་རྣམས་བདག་མེད་དུ་བཞག་པ་རེད། ད་ཆ་རྒྱ་མིའི་ངོས་ནས་བོད་པའི་ཕྱོགས་ཀྱི་འདོད་ཚུལ་རྣམས་ལ་བསམ་བློ་གུ་ཡངས་པོ་དང༌། ངང་རྒྱུད་རིང་པོའི་སྒོ་ནས་བརྟག་དཔྱད་སློབ་སྦྱོང་བྱས་ཏེ་དངོས་ཡོད་གནས་ཚུལ་རྣམས་ཤེས་ཐབས་བྱེད་རྒྱུ་དང༌། ད་ལྟའི་དུས་རབས་དང་མཐུན་པའི་བསམ་བློ་གཏོང་རྒྱུ་གལ་ཆེན་པོ་རེད་བསམ་གྱི་འདུག རང་གི་བསམ་ཚུལ་དང་མི་མཐུན་པ་ཞིག་བྱུང་མ་ཐག་ལམ་སེང་དོགས་འདྲོག་དང་མཐོང་ཕྱོགས་བྱེད་མི་རུང༌། བསམ་ཚུལ་མི་མཐུན་པ་ཡོད་ན་ངེས་པར་དུ་གསལ་བརྗོད་བྱེད་དགོས་པ་དང༌། དེ་རྒྱུ་མཚན་ལྡན་པ་ཡིན་མིན་བརྟག་དཔྱད་དང་འབྲེལ་བའི་སྒོ་ནས་གྲོས་བསྡུར་བྱེད་རྒྱུ་ཧ་ཅང་གལ་ཆེན་པོ་ཡིན།

      བསམ་ཚུལ་མི་མཐུན་པ་རྣམས་གསལ་པོར་བརྗོད་རེས་བྱེད་པ་དང༌། རྒྱུ་མཚན་སྦྱང་བཤད་བྱེད་པ། འདྲ་མཉམ་གཉིསཕན་གྱི་སྒོ་ནས་གྲོས་བསྡུར་བྱེད་པ་བཅས་ཀྱི་ཐོག་ནས་ཐག་གཅོད་བྱུང་བ་ཡིན་ན་ཐག་གཅོད་དེ་མིང་དོན་མཚུངས་པའི་ཐག་གཅོད་ཡིན། སེམས་ཀྱི་ནང་ལ་གཞན་ཞིག་དྲན། ཁ་ནས་གཞན་ཞིག་བཤད་པའི་ཐག་གཅོད་དེ་ནི་དངོས་འབྲེལ་གྱི་ཐག་གཅོད་མིན། རྒྱུ་མཚན་དེ་འདྲ་ལ་བརྟེན་ནས་ད་ལྟའི་དུས་ཚོད་འདིར་ཕྱོགས་ཕན་ཚུན་གཉིས་ཀ་ནས་ཡང་ཡང་བསམ་ཚུལ་བརྗོད་རེས་བྱས་ཏེ་གནས་ཚུལ་གོ་རྟོགས་གསལ་པོ་ཡོང་ཆེད་འབྲེལ་བ་དམ་ཟབ་བྱེད་རྒྱུ་འདི་གལ་ཆེ་ཤོས་མཐོང་གི་འདུག རིམ་བཞིན་མི་དང་མིའི་དབར་འབྲེལ་བ་ཇེ་བཟང་དུ་ཕྱིན་པ་བརྒྱུད། དཀའ་རྙོག་ཇི་འདྲ་ཞིག་ཡིན་ཡང་འདྲ་མཉམ་གཉིས་མོས་ཀྱི་ཐོག་ནས་སེལ་ཐུབ་པའི་ཡིད་ཆེས་བརྟན་པོ་ཡོད། འགྲོ་ཀུན་བདེ་དགེས་འཚོ་བའི་སྨོན་ལམ་བཅས།།     །།