ཁྱེད་ཚོས་ཤེས་གསལ་བཞིན་རྒྱ་ནག་གི་ཁྲིམས་ནི་ལྕགས་རེད། ལྕགས་རྐྱང་རྐྱང་གིས་མིའི་ཤ་ལ་བཟོ་ལྟ་བཟོ་གིན་རེད། དེ་ཡིན་དུས་གསར་འགོད་པ་ཚོས་རྟོགས་ཞིབ་ངོ་མ་བྱས་ཏེ་བོད་རིགས་མང་ཚོགས་ཀྱི་སེམས་ནང་གི་སྐད་ཆ་དང་གནས་སྟངས་ལ་ཞིབ་མཇུག་གནང་རོགས་ཞུ་རྒྱུ་ཡིན་ཟེར།
༢༠༠༨ ལོའི་ཟླ་ ༣ པའི་ཚེས་ ༡༨ ཉིན་དཀར་མཛེས་དུ་སེར་སྐྱ་བོད་མི་སྟོང་ཕྲག་ལྷག་གིས་རྒྱ་གཞུང་ལ་ཞི་བའི་ངོ་རྒོལ་བྱས་པའི་སྐབས། ཞི་རྒོལ་དེའི་སྣེ་ཁྲིད་མཁན་རང་ལོ་ ༤༡ ཡིན་པ་མ་འདས་མགོན་པོ་དང་ལས་འགུལ་དེའི་ནང་མཉམ་ཞུགས་བྱེད་མཁན་རང་ལོ་ ༢༤ ཡིན་པ་བརྩི་སྲུང་དགོན་པའི་གྲྭ་ཚེ་རིང་འགྱུར་མེད། སྔར་ལོ་ཟླ་ ༣ ཚེས་ ༢༤ ཉིན་ཏྲེ་ཧོར་ལྕོག་རི་ཁུལ་གྱི་ངང་སྒོང་བཙུན་དགོན་གྱི་བཙུན་མ་ ༡༢༠ ལྷག་གིས་མགོ་ཁྲིད་དེ་སེར་སྐྱ་མི་མང་གིས་ངོ་རྒོལ་སྐབས་སུ་མཉམ་ཞུགས་གནང་མཁན། ཏྲེ་ཧོར་ལྕོག་རི་ནས་ཡིན་པ་བློ་བཟང་ཐུབ་བསྟན་དང་ཚེ་དབང་དོན་གྲུབ་བཅས་ཞི་རྒོལ་བ་བཞི་བཞུགས་སྒར་རྡ་སར་འབྱོར་ཡོད་པ་དང་། ཚེས་ ༢༨ ཉིན་བོད་གཞུང་ཕྱི་དྲིལ་ལྷག་པ་ཚེ་རིང་ཚོགས་ཁང་དུ་དྲིལ་བསྒྲགས་ལས་ཁུངས་ཀྱི་གོ་སྒྲིག་འོག་གསར་འགོད་གསར་བསྒྲགས་ཤིག་བསྐྱངས་ཡོད།
སྐབས་དེར་ཟླ་ ༣ པའི་ཚེས་ ༡༨ ཉིན་དཀར་མཛེས་སུ་སེར་སྐྱ་བོད་མི་སྟོང་ཕྲག་ལྷག་གི་ཞི་རྒོལ་གྱི་སྣེ་ཁྲིད་མཁན་མ་འདས་མགོན་པོ་ལགས་ཀྱིས་ངོ་སྤྲོད་གནང་དོན། སྤྱིར་ང་ཚོས་ཞི་རྒོལ་བྱེད་དོན་ནི་བོད་མི་ཞིག་ཡིན་ཕྱིན་ཧ་གོ་རྒྱུ་རེད། རྒྱ་ནག་གིས་བོད་མི་ཚོར་སྡུག་པོ་ག་ཚོད་གཏོང་བཞིན་པ་དེ་བཤད་ན་ཚར་བ་དེ་འདྲ་མ་རེད། བོད་གངས་ཅན་གྱི་སྲོག་སྙིང་ལྟ་བུའི་༧རྒྱལ་བ་པཎ་ཆེན་གཉིས་བོད་མི་མང་གི་མཐོང་ལམ་དུ་ཡོད་པ་མ་རེད། ༧རྒྱལ་བ་རིན་པོ་ཆེ་ཡུལ་གཞན་དུ་སྐྱབས་བཅོལ་ལ་བརྫངས་པ་དང་༧པཎ་ཆེན་རིན་པོ་ཆེ་ནི་དགུང་ལོ་ཆུང་དུས་ནས་རྒྱ་ནག་གིས་བཙན་ཁྲིད་བྱས་ཏེ་ད་སྐབས་ཤི་གསོན་གང་ཡིན་ང་ཚོས་གང་ཡང་ཤེས་ཀྱིན་མེད། དེ་བཞིན་བོད་མི་དང་བོད་ཀྱི་རིག་གཞུང་ལ་ཞབས་འདེགས་དང་རོགས་སྐྱོར་གནང་མཁན་གྱི་སྐྱེས་བུ་གང་མང་མ་ཉེས་ཁ་གཡོག་གིས་བཙོན་དུ་འཇུག་པའམ་ཡང་ན་གསོད་ཀྱིན་ཡོད་པ་རེད། གང་ལྟར་བོད་ས་ཁུལ་གང་སར་བོད་ལ་ཕན་ཐོགས་མཁན་ཞིག་ཡོད་ན་དེ་མེད་པར་བཟོ་གིན་ཡོད། དེ་ཡིན་དུས་བོད་མི་ཚོས་ང་ཚོ་ལ་རང་དབང་དང་འདྲ་མཉམ་དགོས་ཟེར་ནས་ཞི་རྒོལ་གནང་བ་རེད་ལ། སྐབས་དེར་དངོས་དགའ་དང་གུས་པ་གཙོས་པའི་མི་བཅུ་ལྷག་གིས་མགོ་ཁྲིད་དེ་དཀར་མཛེས་རྫོང་ཐོག་ཏུ་མི་མང་སྟོང་ཕྲག་གསུམ་ལྷག་གིས་མ་བསྐུལ་དང་བླངས་ཀྱིས་ཞི་རྒོལ་བྱས་སྐབས། རྒྱ་དམག་གིས་མེ་མདའི་འོག་རྨས་སྐྱོན་ཕོག་པ་དང་ལྕགས་མདའ་དང་གློག་རྒྱུག་སོགས་བཀོལ་སྤྱོད་འོག་མི་མང་ལ་རྡུང་རྡེག་ཚད་མེད་ཀྱིས། དཀར་མཛེས་རྫོང་ཐོག་ཏུ་ཟུངས་ཁྲག་འཁྱིལ་ཏེ་ཁྲག་གི་གྲོང་ཁྱེར་ལྟ་བུར་གྱུར་བ་རེད་ལ། མི་མང་པོར་ཤི་རྨས་བྱུང་ཡོད་ལ། ད་སྐབས་བཙོན་འཇུག་ཁྲིམས་ཐག་བཅད་ཡོད་པ་དང་ཡང་ན་གར་སོང་ཆ་མེད་གྱུར་བ། བྲོས་བྱོལ་དུ་སོང་བ་སོགས་བྱུང་ཡོད། སྐད་འབོད་ཀྱི་མགོ་ཁྲིད་ཆུ་ཁ་ཚང་གི་དངོས་དགའ་ལ་ལོ་ངོ་བརྒྱད་ཀྱི་ཁྲིམས་ཐག་བཅད་ཡོད། རྒྱ་ནག་གིས་གུས་པ་འཛིན་བཟུང་གི་བཀའ་རྒྱའི་ཡིག་ཆ་རླུང་འཕྲིན་སོགས་སུ་ཡང་ཡང་བཀྲམས་པ་དང་གསལ་བསྒྲགས་བྱས་པ་སོགས་ཀྱིས་རང་ཡུལ་དུ་སྡོད་མ་ཐུབ་པར་་བྲོས་བྱོལ་གྱིས་འབྲོག་སྡེ་ཁག་ལ་གནས་ཚང་གཡར་ནས་བསྡད་པ་དང་། ད་ལོའི་ཟླ་ ༣ པ་ནས་རང་ཡུལ་དང་ཁ་བྲལ་ཏེ་བཙན་བྱོལ་དུ་ཡོང་བ་ཡིན། ཞེས་གསུངས་བྱུང་།
དེའི་རྗེས་སྔར་ལོ་ཟླ་ ༣ ཚེས་ ༢༤ ཉིན་ཏྲེ་ཧོར་ལྕོག་རི་ཁུལ་གྱི་ངང་སྒོང་བཙུན་དགོན་གྱི་བཙུན་མ་ ༡༢༠ ལྷག་གིས་མགོ་ཁྲིད་དེ་སེར་སྐྱ་མི་མང་གི་ངོ་རྒོལ་སྐབས་སུ་མཉམ་ཞུགས་གནང་མཁན་རང་ལོ་ ༣༩ ལ་སོན་པའི་ཚེ་དབང་དོན་གྲུབ་ལགས་ཀྱིས་རང་ཉིད་ཞི་རྒོལ་ལ་ཞུགས་སྐབས་ཀྱི་མཐོང་ཐོས་སྐོར་ངོ་སྤྲོད་གནང་དོན། བོད་ཆོལ་ཁ་གསུམ་གྱིས་ཞི་བའི་ངོ་རྒོལ་བྱེད་དོན་ནི་སྐྱིད་དྲག་ནས་སྡོད་མ་ཚུགས་པ་དེ་འདྲའི་འོག་ནས་བྱུང་བ་གཏན་ནས་མ་ཡིན་པར། ང་རང་སྒེར་ཡིན་ཡང་སྐྱིད་དྲག་པ་དང་བཟའ་རྒྱུ་མང་དྲག་ནས་ངོ་རྒོལ་ལ་ཞུགས་པ་མིན། རང་ཉིད་འུ་ཐུག་སྟེ་ངོ་རྒོལ་ལ་ཞུགས་པ་ཡིན། སྔར་ལོའི་ཟླ་ ༣ ཚེས་ ༢༤ ཉིན་གུས་པ་གྲོང་སྡེ་ནས་དགོན་པར་ཆུའི་ཡུར་བ་བསྐོ་རུ་སླེབས་ཡོད་ལ། དགོན་པ་ནི་རིའི་ངོས་སུ་ཡོད་པ་དང་མི་མང་གིས་ཞི་རྒོལ་གནང་ས་དེ་རི་ངོས་ཀྱི་ཐང་དུ་ཡོད། ཏྲེ་ཧོར་ལྕོག་རི་ངང་སྒོང་བཙུན་དགོན་གྱི་བཙུན་མ་ཚོས་སྐད་འབོད་བྱེད་སྐབས་རྒྱ་དམག་གིས་མེ་མདའ་བརྒྱབས་པ་ཐོས་ཐུབ་པ་དང་། བོད་མི་ཚོར་རྒྱ་ནག་གིས་ཕྱོགས་གང་ས་ནས་སྡུག་པོ་མང་པོ་བཏང་བས་མ་གཞི་ནས་སེམས་སུ་ན་ཚ་ཡོད་པར་བརྟེན། མེ་མདའི་སྒྲ་གོ་བ་དང་ལས་ཀ་ལས་མཚམས་བཞག་ནས་གྲོང་མི་ཚོ་གཅིག་ཤོར་གཉིས་ཤོར་གྱིས་ཞི་རྒོལ་གནང་སར་འབྱོར་བ་དང་། སྐབས་དེར་ཞི་རྒོལ་ཐེངས་དང་པོ་ལངས་ཚར་ཙམ་རེད་མོད། ང་ཚོ་འབྱོར་བ་དང་སླར་ཡང་མི་མང་ ༣༠༠ ལྷག་གིས་ཞི་བའི་སྐད་འབོད་བྱས་པ་ཡིན། སྐབས་དེར་སླར་ཡང་རྒྱ་དམག་གིས་མེ་མདའ་བརྒྱབས་ཏེ་རང་ལོ་ ༡༨ དང་ ༢༠ བར་གྱི་གྲྭ་བ་ཞིག་ལ་མེ་མདའ་ཕོག་སྟེ་འགྱེལ་སོང་ལ། སྐབས་དེར་ང་རང་གི་སེམས་ཀྱིས་མ་བཟོད་པར་གྲྭ་བ་དེ་ཡར་སྐྱོར་བ་ཡིན། དེ་མ་ཐག་གུས་པའི་མཁལ་མའི་རྒྱབ་ཕྱོགས་སུ་མདེའུ་གཅིག་ཕོག་ནས་མདུན་ལ་ཕུག་པ་དང་། དེ་ནས་སླར་ཡང་ལག་པ་གཡོན་པའི་གྲུ་མོར་མདེའུ་གཅིག་ཕོག་སྟེ་གྲྭ་བ་དེ་ལག་ནས་ཤོར་སོང་། དྲན་པ་སོས་སྐབས་གྲོང་མི་ཅིག་གི་ནང་དུ་ཁྲིད་འདུག དྲན་པ་གསལ་མི་གསལ་ལ་ཆགས་ཏེ་ཏོམ་ཙམ་བསྡད་སྐབས། གྲོང་སྡེ་དེར་ཡང་བསྐྱར་དམག་མི་ཡོང་གི་འདུག་ཟེར་བས་རི་ལ་བྲོས་བྱོལ་དུ་འགྲོ་དགོས་བྱུང་། ཟླ་བ་དྲུག་ཙམ་ལ་ཉལ་ནས་སྡོད་དགོས་བྱུང་ལ། རྨ་ཁར་གཟེར་རྒྱག་སྐབས་དྲན་པ་འཐོར་བ་སོགས་བྱེད་ཀྱང་རྒྱ་གཞུང་གིས་འཇུ་བཟུང་བཀའ་རྒྱའི་ཡིག་ཆ་ས་གནས་གང་སར་བཀྲམས་པར་བརྟེན་སྨན་ཁང་ལ་འགྲོ་མ་ཐུབ་པ་སོགས་ཀྱིས་རྨ་ཁར་འབུ་དང་རྣག་བརྒྱབས་ཏེ་ཤ་རྣམས་རུལ་བ་དང་རྨ་ཁ་ནས་རུས་པ་ཆུང་ངུ་རྣམས་ཕྱིར་ཐོན་པས། རྨ་ཁ་གྲིས་བཏུབ་ནས་རྨ་ལས་བྱས་ཏེ་རྣག་ཕྱིར་བཏོན་པའི་ཐབས་ཤེས་སྣ་ཚོགས་བྱས་ཀྱང་དྲག་སྐྱེད་མ་བྱུང་། དེ་བཞིན་བོད་མི་མང་པོར་ཁ་བྲལ་རིང་ལུགས་པ་སོགས་ཀྱི་མིང་ངན་འདྲ་མིན་གྱི་ཉེས་འཛུགས་འོག ཆོལ་ཁ་གསུམ་གྱི་དཔའ་བོ་དཔའ་མོ་མང་པོ་ཞིག་ལ་ཉེས་མེད་སྙོན་འཛུགས་ཀྱིས་ཚེ་བཙོན་དང་ཁ་ཤས་ལ་ལོ་ངོ་ ༡༠ ནས་ ༢༠ སོགས་ཀྱི་ཁྲིམས་ཐག་བཅད་པ། ལག་ཏུ་མ་སོན་པའི་བྲོས་བྱོལ་བ་རྣམས་རི་ལུང་དང་། ཤིང་ནགས། རྫ་གསེབ་སོགས་སུ་རི་དྭགས་བཞིན་མཚན་མོ་གཉིད་ཀྱང་མི་ཁུག་པར་སྡུག་བསྔལ་མྱོང་བཞིན་པའི་དངོས་ཡོད་གནས་ཚུལ་འདིའི་དོན་དུ། མ་ཤི་སྔོན་དུ་འདི་ཕྱི་གཉིས་ཀྱི་སྐྱབས་གནས་༧གོང་ས་མཆོག་ལ་མཇལ་བཅར་གྱི་སྐལ་བ་དང་གཞིས་ལུས་བོད་མི་རྣམས་ཀྱིས་རྒྱ་ནག་གི་འོག་ཏུ་མྱོང་བཞིན་པ་རྣམས་ཁྱབ་བསྒྲགས་ཀྱི་དཔང་རྟགས་ཤིག་བྱ་ཐུབ་ན་སྙམ་སྟེ་ཐབས་ཤེས་སྣ་ཚོགས་ཀྱིས་སྐྱབས་བཅོལ་ལ་ཡོང་བ་ཡིན། ཞེས་གསུངས་བྱུང་ལ། ཡང་ཁོང་གིས། རྒྱ་ནག་གིས་ང་ཚོ་བོད་ཟེར་བ་འདི་རྩ་མེད་བཟོ་བར་ཐབས་ཤེས་འཐེན་གྱིན་ཡོད། དཔེར་ན་ཞིང་པ་ཚོར་རྒྱ་སྒོར་ཁ་ཤས་སྤྲད་དེ་ས་ཞིང་ནང་དུ་རྩྭ་དང་ཤིང་འདེབས་འཇུག་གི་ཡོད། དངུལ་ནི་དུས་ཡུན་ཐུང་ཐུང་ནང་རྫོགས་འགྲོ་གིན་རེད་ལ་མང་ཚོགས་ལ་ཕུགས་ཀྱི་འཚོ་རྟེན་
བརྟན་པོ་མེད་པ་བཟོ་གིན་ཡོད། འབྲོག་པ་ཚོར་མཚོན་ན་འབྲོག་པ་རི་ནས་སྡོད་དུ་མ་བཅུག་པར་རོང་ལ་ཁྲིད་ནས་རོང་པའི་ས་ཆར་ཁང་པ་བརྒྱག་ཏུ་བཅུག་པ་དང་དེར་རྒྱ་སྒོར་རེ་སྤྲད་དེ་ལོ་ཤས་ལ་སྡོད་ཐུབ་པའི་འཚོ་རྟེན་སྤྲད་རྗེས། རི་གང་སར་ལྕགས་ར་འཐེན་ནས་ཁོར་ཡུག་སྲུང་སྐྱོབ་བྱེད་ཀྱིན་ཡོད་ཟེར་གྱིན་ཡོད་པ་རེད། འདི་ཚང་མ་དངོས་ཡོད་བོད་མི་ལ་ཕན་དང་མ་ཕན་ཟེར་བ་ལ་བསམ་བློ་གཏོང་དགོས། རེ་བ་གཅིག་ཞུ་རྒྱུ་ནི་ཁྱེད་ཚོ་གསར་འགོད་པ་སུ་ཡིན་ཡང་བོད་མི་རིགས་ཀྱི་བདེ་སྡུག་ལ་སེམས་གཏིང་ནས་དོ་སྣང་གནང་གི་ཡོད་ན། བོད་ནང་དུ་བསྐྱོད་དེ་བོད་མི་མང་གི་སེམས་གཏིང་ན་ཡོད་པའི་རེ་སྨོན་དང་སྐད་ཆར་ཉན་རོགས། གནས་སྟངས་ལ་ཞིབ་མཇུག་གནང་རོགས། དེ་མ་ཡིན་པར་རྒྱ་ནག་གཞུང་ལ་སྙན་ཞུ་བརྒྱབ་ནས་དེའི་རྗེས་འབྲེལ་ཡོད་སྲིད་གཞུང་གི་ལས་ཁུངས་ཁག་གིས་མི་མང་ལ་གསར་འགོད་པའི་མདུན་ནས་སྐད་ཆ་ཡག་པོ་མ་བཤད་ན་ནང་མི་ཚང་མ་ཁྲིམས་ལ་སྦྱར་རྒྱུ་ཡིན་པར་བཙན་བཀའ་གཏོང་གི་རེད་ལ། ལྷག་པར་དུ་མི་ཚང་སྐྱོ་བོ་དེ་ཚོར་རྒྱ་ལམ་འགྲམ་དུ་ཁང་པ་ཡག་པོ་བརྒྱབས་ཏེ་དངུལ་སྤྲད་པ་དང་དེ་ནས་གསར་འགོད་པ་ཚོའི་མདུན་ལ་སྐད་ཆ་སྙན་པོ་བཤད་དུ་བཅུག་པ། དེ་ཚོ་བརྙན་ཕབ་བྱས་ཏེ་་དྲིལ་བསྒྲགས་བྱས་པ་དང་མི་རྣམས་ཀྱིས་རྒྱ་མི་དེ་འདྲའི་སྡུག་ཅག་མི་འདུག་ཨང་བསམ་པའི་ཚོར་བ་སྟེར་གི་རེད། ཁྱེད་ཚོས་ཤེས་གསལ་བཞིན་རྒྱ་ནག་གི་ཁྲིམས་ནི་ལྕགས་རེད། ལྕགས་རྐྱང་རྐྱང་གིས་མིའི་ཤ་ལ་བཟོ་ལྟ་བཟོ་གིན་རེད། དེ་ཡིན་དུས་གསར་འགོད་པ་ཚོས་རྟོགས་ཞིབ་ངོ་མ་བྱས་ཏེ་བོད་མི་མང་ཚོགས་ཀྱི་སེམས་ནང་གི་སྐད་ཆ་དང་གནས་སྟངས་ལ་ཞིབ་འཇུག་གནང་རོགས་ཞུ་རྒྱུ་ཡིན། ཞེས་གསུངས་བྱུང་།
དེའི་རྗེས་ཞི་རྒོལ་བ་འདི་དག་གི་སྙིང་སྟོབས་ལ་བསྔགས་བརྗོད་དང་ཡི་རངས་ཕྱིར་བོད་ཀྱི་གཞོན་ནུ་ཚོགས་གཙོ་གཙོས་པའི་གཞུང་འབྲེལ་མ་ཡིན་པའི་ཚོགས་པ་ཚོས་རྒྱལ་གཅེས་པ་འདི་དག་ལ་མཇལ་དར་སྒྲོན་ཏེ་གསར་འགོད་གསལ་བསྒྲགས་འདི་མཇུག་བསྡུས་ཡོད།
རླབས་ཆེནགྱི་མི་སྣ་འདི་དག་ལ་ད་ནི་དུས་དང་ནམ་པ་ཀུན་དུ་དཀའ་སྡུག་གི་དུས་ཤིག་མི་སླེབས་པར་སྨོན།
ཁྱེད་ཅག་འདིར་འབྱོར་བ་ཡག་པོ་རེད་བཀྲ་ཤིས་བདེ་ལེགས་ཡོད་དང་ཡོད། འོན་ཀྱང་ས་སྡུག་འདི་ནས་སྙིང་སྟོབས་ལྕག་གི་གོང་བུ་དེ་བྱེ་མའི་འཆང་བུ་ལྟ་བུར་མི་འགྱུར་རྒྱུ་ཧ་ཅང་གལ་ཆེ། ས་འདི་ནས་དཔའ་བོ་མང་བོ་བརླགས་སོང་ལ་ད་དུང་གཟབ་གཟབ་མ་བྱས་ན་མང་བོ་བརླག་ངེས་རེད། ངས་ཁ་ཡག་དང་ངོ་དགའ་མང་བོ་བཤད་མི་ཤེས་པས་དགོངས་འགལ་ཡེ་མེད་ཞུ།
བོད་མི་རིགས་ཀྱི་ཆེད་དུ་ཚེ་སྲོག་ཕངས་མེད་དུ་བཏང་བའི་མི་རིགས་ཀྱི་དཔལ་རྒོད་བཞི་རྒྱ་ནག་མེ་འདའི་ཁ་ནས་ཐར་སྟེ་རྡ་སར་བདེ་འབྱོར་ཐུུབ་བ་ལ་སྙིང་ནས་དགའ་ཚོརཆེན་པོས་་འཚམ་འདྲི་དང་་བསྔགས་རྗོད་ཡོད།
ར་ལོ། གཞན་ལ་བཤད་པའི་ཁ་ཡོད་ན། རང་ལ་ལྟ་བའི་མེ་ལུང་དགོས།
ཁམས་པ་དཔའ་བོ་ཚོ་ཟེར་དུས་ང་(སངས་རྒྱས་ཀྱི་དཔའ་རྟུལ་ཚོ)ཡི་ནང་གི་ཁམས་པ་དཔའ་བོ་དེ་ཚོ་དྲན་འོང་གི་ དངོས་གནས་བོད་ཀྱི་དཔའ་བོ་རེད། འོན་ཀྱང་རྗེས་ཕྱོགས་ཕྱི་རྒྱལ་དུ་འགྲོ་རྒྱུའི་ཆད་དུ་ཁ་དགུ་བཅུ་གསུམ་གྱི་ཚོགས་མི་དྲུག་པོ་ནང་བཞིན་གཏན་ནས་བྱེད་མི་ཉན་ཡཱ།
བོད་ཀྱི་རྩོམ་སྒྲིག་པ་ལགས། ཁྱེད་ཀྱིས་གསལ་བཤད་གནང་བ་ཐུགས་རྗེ་ཆེ། གལ་སྲིད་ཁྱེད་ཀྱིས་དེ་མཐོང་གི་ཡོད་ནས་རྗེས་སུ་ཐ་སྙད་འདི་རིགས་བེད་སྤྱོད་བྱེད་ཕྱོགས་ལ་ཟབ་ནན་དང་སྟངས་འཛིན་དགོས་པ་མ་ཟད། རྩོམ་སྒྲིག་ཅིག་གི་འགན་ཁྲི་ཡང་རེད། རྗེས་ཕྱོགས་བོད་ནང་ཆབ་སྲིད་ལས་དོན་བྱས་པ་རིགས་ལ་རྒྱལ་གཅེས་པ་ཞེས་འགོད་འོས་པོ་འདུག གཞན་དཔའ་བོ་ཞེས་པའི་མཚན་སྙན་ཚང་མ་ལ་ཐོབ་རྒྱུ་ཁག་པོ་རེད། ཚང་མ་ལ་དཔའ་བོ་ཞེས་པ་འབོད་ན་རྗེས་སུ་དཔའ་བོ་ཞེས་པའི་བསྟོད་ཚིག་འདི་ལ་རིན་ཐང་མེད་པ་འགྱུར་ངེས་རེད།
དཔའ་པོ་འདི་བཞི་ལ་རྟེན་འབྲེལ་ཞུ། ཨ་་་་ད་དངོས་གནས་རྨ་ཁ་འདི་མཐོང་ན་སྙིང་རླུང་ལྡིང་ཞིག་དང་རྒྱ་གཏེ་དེ་ཚོས་བྱེད་སྟངས་ལ་བསམ་ན་བསྡོད་མི་བཟོད་པ་ཞིག་རེད།
ཨེ་་་ གསང་གཏོར་ཞེས་པ་དེས་ཡང་ཞབས་འདྲེན་གྱི་སྐད་ཆ་དེ་འདྲ་ཐོན་ཡོང་གིན་འདུག་ག ཁོང་ཚོའི་བདུན་དུ་ངོ་མི་ཚའམ་ ད་དུང་ཡང་ཕྱོགས་རུས་ཀྱི་དུག་རྙིང་དེ་སེམས་ན་ཞུ་མི་འདུག་ག
ངས་བལྟས་ན་མིང་ཚིག་གང་དང་ཇི་བེད་སྤྱོད་བཏང་ན་མ་འགྲིག་པ་གང་ཡང་མེད་པ་འདྲ་ སྨྲ་བརྗོད་རང་དབང་རེད་ དམངས་གཙོ་རེད བསམ་ཚུལ་སོ་སོ་རེད། དེར་ཕྱི་རྒྱལ་ཁག་ན་སོ་སོའི་བསམ་ཚུལ་ལྟར་རང་དབང་རེད།
དཔའ་རྒོད་ཅེས་པའི་ཚིག་འདི་དེ་ཙམ་འཚམས་པོ་མི་འདུག དེ་ལས་རང་དབང་རྩོད་ལེན་པ་ཞེས་བསྔགས་ན་ཡག་པོ་འདུག
རང་དབང་རྩོད་ལེན་པ་ཁོང་ཚོ་བཞི་ལ་འཚམས་འདྲི་ཡོད།
གཞིས་བཞུགས་བོད་མི་རྣམས་ཀྱིས་བོད་མིའི་རང་དབང་ཟེར་ན་འདྲ། རང་གི་བདེ་དོན་ཟེར་ན་ཆོག རང་དབང་ཆེད་དུ་ངོ་རྒོལ་བྱས། འདི་ནས་མིང་ཚིག་བཀོལ་སྤྱོད་བྱེད་སྟངས་ཙམ་དང་ཕྱོགས་ཞེན་གྱིས་སྐད་ཆ་རེ་གླེང་ནས་ཉི་མ་འཕུད། དངོས་ནས་ཐབས་སྐྱོ་བ་ལ།
བོད་ནས་ཕེབས་པའི་རྒྱལ་གཅེས་དབའ་བོ་བཞི་ལ་འཚམ་འདྲི་ཡོད།
ང་ཚོའི་བོད་པའི་དཔའ་རྒོད་བཞི་ལ་མཚམ་འདྲི་བཀྲ་ཤིས་བདེ་ལེགས་
སྟུག་དྲི་ལྟ་བུའི་གཏམ་འདི་དག
ཡང་མིན་ན་སྨད་པ་རེད། དེ་མིན་ན་བསྟོད་པ་རེད། མཆན་འདེབས་མཁན་ཚང་མ་འདི་འདྲ་ཞིག་རེད། རྒྱུ་མཚན་རེ་དང་གནས་ལུགས་རེ་བཤད་རྒྱུ་མི་འདུག་གམ། ཡང་མིན་ན་ཁ་རོག་གེར་བསྡད་ན་མི་ཆོག་གམ།
སྤྱིར་བཏང་གང་ཟག་སུ་རུང་ལ་དགའ་མི་དགའི་ཚོར་བ་ཙམ་ཡིན་ན་སོ་སོའི་སྟུག་དྲི་བཞིན་མི་མང་གི་དཀྱིལ་ནས་མ་གཏོང་ཡ། ད་སྐབས་ངས་མཆན་འདེབས་མཁན་དག་གི་སྐད་ཆ་ནི་འདི་འདྲ་ཞིག་རེད་འདོད། ཁྲེལ་དང་ངོ་ཚ། བཟང་སྤྱོད། ཡ་རབས་སོགས་བོར་ཏེ་མང་ཚོགས་ཀྱི་དཀྱིལ་ནས་སྟུག་དྲི་གཏོང་གི་ཡོད་པ་འདྲ་ཞིག་རེད། རང་དབང་ཡོད་ས་ནས་ཀྱང་རིག་གཞུང་བརླག་མི་ཉན།
རྒྱལ་གཅེས་དཔའ་བོ་བཞི་བོ་རང་དབང་གི་ལུང་པར་བདེ་འབྱོར་བྱུང་བར་འཚམས་འདྲི་དང༌། ཁྱེད་རྣམ་པའི་རྒྱལ་ཞེན་དཔའ་བོའི་མཛད་རྗེས་ལ་གུས་བཀུར་བསྔགས་བརྗོད་ཞུ་རྒྱུ་མ་ཟད། སེམས་དང་ལུས་ཀྱི་རྨ་ཁ་འདིས་ཡ་ཁོག་ལ་བརྗོད་མི་ཤེས་ཚོར་བ་ཞིག་བྱིན་སོང༌།
ཁྱེད་ཚོས་ཤེས་གསལ་བཞིན་རྒྱ་ནག་གི་ཁྲིམས་ནི་ལྕགས་རེད། ལྕགས་རྐྱང་རྐྱང་གིས་མིའི་ཤ་ལ་བཟོ་ལྟ་བཟོ་གིན་རེད། དེ་ཡིན་དུས་གསར་འགོད་པ་ཚོས་རྟོགས་ཞིབ་ངོ་མ་བྱས་ཏེ་བོད་རིགས་མང་ཚོགས་ཀྱི་སེམས་ནང་གི་སྐད་ཆ་དང་གནས་སྟངས་ལ་ཞིབ་མཇུག་གནང་རོགས་ཞུ་རྒྱུ་ཡིན། དོན་དངོས་དང་བདེན་ཚིག་འདི་འདི་དག་ཐོས་དུས་མི་སེམས་ནི་ལྕགས་ལས་མཁྲེགས་པའི་གནས་སྟངས་ངོ་མ་མཐོང་བྱུང་ཐུགས་རྗེ་ཆེ། ངོ་མ་ཐུགས་རྗེ་ཆེ། ཁྱེད་རྣམ་པའི་བསམ་དོན་ལྷུན་འགྲུབ་ཡོང་བའི་སྨོན་འདུན་ཡོད།
གང་ལྟར་ན་ནིང་ད་ལོའི་བོད་ནང་གི་ཞི་རྒོལ་ཁྲོད་རྒྱལ་གཅེས་བ་མང་བོ་ཞིག་གི་ཚེ་སྲོག་བཞུད་ཚར་སོང་། དེའི་ཁྲོད་ནས་རྒྱལ་ཞེན་ཅན་ཁ་ཤས་ཚེ་སྲོག་ལས་ཐར་བར་མ་ཟད་དེང་སྐབས་གཅིག་རྗེས་གཉིས་མཐུད་དུ་ཆབ་སྲིད་དང་ཚེ་སྲོག་གི་སྐྱབས་བཅོལ་དུ་སླེབས་བཞིན་པར་དགའ་བསུ་དང་རྗེས་སུ་ཡི་རང་ཡོད ། ང་ཚོ་སུ་ཡིན་ཡང་རྒྱའི་ལག་ཏུ་ཤི་ན་མི་འདོད་མོད །
བོད་མི་རིགས་འདིའི་ལས་དབང་ངན་དྲགས་པས་ཡོད་ཚད་རྒྱའི་ལག་ཏུ་ཤོར་ནས་བཟུང་རང་གི་གཅེས་བའི་སྲོག་ལ་ཡང་རང་དབང་སྤུ་ཙམ་ཡང་མེད ། བོད་མི་རིགས་འདི་སྙིང་རྗེ །
གསང་གཏོར་ལགས། འདི་ན་དབྱེ་བ་ཆེན་པོ་ཞིག་ཡོད་པ་མ་རེད། ལར་ནས། ཁ་ཉིན་དཔའ་བོ་ལྔ་ཞེས་བྲིས་པ་དེ་གསར་འགོད་བརྒྱུད་ལམ་པ་ཞིག་གི་ཐད་ནས་བཤད་ན་དྲང་པོ་དང་འོས་འཚམ་གྱི་ཚིག་མ་རེད་སྙམ་ཡོད། ཐེངས་འདིར་རྒྱལ་གཅེས་པ་ཞེས་བྲིས་པ་དེའང་རང་བཞིན་གཅིག་པ་རེད། མཚམས་རེར་ཐ་སྙད་བེད་སྤྱོད་བྱ་ཕྱོགས་ལ་ཚད་གཞི་ངེས་ཅན་མེད་སྟབས། སྐུ་ཉིད་ལྟ་བུ་དགོངས་ཚུལ་ཡོད་མཁན་ཡོང་གི་ཡོད་པ་རེད། དེ་དང་མཉམ་དུ་ཕྱོགས་རིས་ཀྱི་ཚོར་སྣང་ཡང་ཡོང་གི་ཡོད་པ་རེད། དོན་དངོས་ཐོག དཔའ་བོ་ཞེས་པ་དང་། སྙིང་སྟོབས་ཅན། རྒྱལ་གཅེས་པ། ལ་རྒྱ་ཅན་སོགས་ནི་ཁྱད་ཚིག་ཡིན་སྟབས། གསར་འགོད་བརྒྱུད་ལམ་གྱི་རྒྱུན་འཇགས་ཐ་སྙད་ཀྱི་གྲས་སུ་གཏོགས་གི་མ་རེད། ང་ཚོས་བོད་ཀྱི་ཆབ་སྲིད་བཙོན་པ་དང་བཙོན་ཟུར། ད་དུང་མནར་སྡུག་གི་འོག་ན་མུ་མཐུད་ཞི་རྒོལ་བྱེད་མཁན་བཅས་ལ། རང་དབང་འཐབ་རྩོད་པ་སོགས་ཀྱི་ཐ་སྙད་སྤྱད་ན་ལེགས་པར་འདོད་པས། ནུབ་ཕྱོགས་ཀྱི་གསར་འགྱུར་བརྒྱུད་ལམ་ལ་ཚད་ལྡན་གྱི་ཐ་སྙད་བེད་སྤྱོད་བྱ་ཕྱོགས་ཡོད་པ་བཞིན། ང་ཚོས་ཀྱང་རྗེས་ཕྱོགས་གཟབ་ནན་ངང་ཡུན་གྱིས་ཚད་ལྡན་གྱི་ཐ་སྙད་བེད་སྤྱོད་བྱ་ཕྱོགས་ལ་འབད་ངེས་ཡིན།
བོད་ཀྱི་རྩོམ་སྒྲིག་པ་ལགས། སྔོན་ཆད་རྒྱལ་གཅེས་ཞི་རྒོལ་ལྔ་རྡ་སར་འབྱོར་དུས། བོད་ཀྱི་དུས་བབ་ནང་དཔའ་བོ་ལྔ་ཞེས་ཚགས་ཤོག་དང་དྲ་གནས་གཉིས་ཀའི་མགོ་བརྗོད་ཏུ་དེ་ལྟར་འགོད་པ་ཡོད་པ་རེད། རྗེས་སུ་རྒྱལ་གཅེས་ཞི་རྒོལ་བ་འདི་བཞི་པོ་འབྱོར་དུས་དཔའ་བོ་ཞེས་པ་དེ་འགོད་མི་འདུག་པས། དེ་ལྟར་རྒྱུ་མཚན་ཅི་ཡིན་ནམ། དོན་དངོས་མེ་མདའ་མདུན་ལ་ལངས་ཏེ་མེ་མདའ་ཕོགས་མཁན་ལ་དཔའ་བོ་ཞེས་པའི་མཚན་སྙན་མེད་པ་གང་ཡིན་ནམ། ང་ལ་ལན་གསལ་པོ་ཞིག་གནང་བའི་རེ་བ་ཆེ། གཞན་མ་གཏོགས་བོད་དུས་བབ་དེ་དྲང་བདེན་ལ་གཞིར་གཞག་མི་བྱེད་པའི་གསར་འགོད་བྱེད་ཀྱི་ཡོད་པ་ངོས་འཛིན་བྱེད་ཀྱིན་ཡིན།
དཔའ་རྒོད་བཞི་ལ་རང་དབང་གི་གོ་སྐབས་ཐོབ་པར་དགའ་བ་སྒོམ་པ་ཆབས་ཅིག་བོད་ནང་དཀའ་སྡུག་མྱང་དང་མྱོང་བཞིན་བོད་རིགས་དཔའ་བོ་དཔའ་མོ་རྣམས་ཀྱི་བཀའ་དྲིན་ལ་རྗེས་དྲན་ཞུ་རྒྱུ་ཡིན། རྒྱ་གཞུང་གིས་ང་ཚོ་བོད་རིགས་རྣམས་ལ་སེམས་ཅན་སྲོག་ཆགས་ཀྱི་འདུ་ཤེས་ཡང་མེད་པར་ད་དུང་ཁ་ནས་མི་རིགས་མཐུན་སྒྲིལ་དང་འཆམ་མཐུན་སོགས་སྙན་པོ་འཛམ་གླིང་གང་སར་སྒྲོག་གི་འདུག
ད་དུང་དཔའ་འབྱོར་གྱི་དཔུང་ཤུགས་ཚད་ནས་རྒྱལ་ཁབ་མང་པོའི་ནང་བོད་ནང་བདེ་སྐྱིད་ཡོད་སྐོར་ཁྱབ་བསྒྲགས་བྱེད་ཀྱི་འདུག་་་དཔའ་རྒོད་ཚོས་འཛམ་གླིང་མི་མང་ཁྲོད་སོ་སོའི་ལོ་རྒྱུས་ཤོད་དགོས་པ་མ་ཟད། མི་ཡུལ་གྱི་དམྱལ་བར་ཡོད་པའི་བོད་མི་ཚོས་མགྲིན་ཚབ་གནང་ནས་མུ་མཐུད་གསར་འགྱུར་བརྒྱུད་ལམ་གཙིགས་སུ་འཛིན་རྒྱུ་གལ་ཆེ་བར་མཐོང།
རྒྱལ་གཅེས་དཔའ་རྒོལ་འདི་དག་ལ་རྟེན་འབྲེལ་ཞུ། འདི་དག་དང་རྨ་ཁ་སོགས་མཐོང་ན་དངོས་གནས་ངུ་བྲོ་བ་ཞིག་རེད། འདི་ནི་ཐར་འོང་བ་དག་རེད། ཐར་མ་ཐུབ་པར་རྒྱ་ལག་ཏུ་ཤོར་སོང་བ་ག་ཚོད་ཅིག་ཡོད་ཨང༌། ཨ་གནམ་རྒན་མ། དུས་རབས་ཉེར་གཅིག་པའི་ནང་འདིར་ད་དུང་རྒྱལ་ཁབ་ཆེན་པོ་འདི་ལ་འདི་འདྲའི་སྡུག་བསྔལ་ཞིག་ཡོད་དོན་ཅི་ཡིན། ང་ཚོ་ད་དུང་མི་འགྲོ་སར་འགྲོ་དབང་མེད་པ་དང༌། མིའི་བྱེད་སྟངས་བྱེད་དབང་མེད་པ་མ་རེད་དམ། འདི་འདྲ་མཐོང་ན་ད་གཟོད་རིག་པ་སྒྲིམ་དགོས་པའི་ཚོར་བ་ཞིག་ཡོང་གི་འདུག འདི་ལྟར་དཔའ་རྒོལ་ཚོས་རང་སྲོག་བློས་བཏང་ནས་སླེབས་ན་ང་ཚོས་ཕྱོགས་རིས་འཐེན་འཁྱེར་དང་དགའ་སྡུག་གི་འཁོར་ལོ་བསྐོར་ནས་སྡོད་པ་ངོ་ཚ་བ་ཞིག་རེད་ལ། ཁོང་ཁྲོ་ལངས་པ་ཞིག་ཀྱང་རེད། དཔའ་བོ་རྣམ་པ་བཞི་རྒྱལ་ལོ། བསམ་དོན་ལྷུན་གྱིས་འགྲུབ་པར་ཤོག
ཁམས་པའི་དཔའ་བོ་ཚོ གཞིས་ལུས་བོད་མིའི་སྙིང་སྟོབས་ཁྱེར་ནས་ཡོང་བར་བཀའ་དྲིན་ཆེ་ཞུ་རྒྱུ་ཡིན།