སུད་སི་དང་ལེཀ་ཊེན་བོད་རིགས་མི་མང་གི་འཐུས་མིའི་དམིགས་བསལ་ཚོགས་འདུ་གཉིས་པའི་ནང་དགུ་བཅུ་གསུམ་གྱི་ཚོགས་མི་དྲུག་གི་ཐད་མང་མོས་གྲོས་ཆོད་ཟེར་བ་དེ་དག་བཀླགས་རྗེས་ངོ་མ་སེམས་སྐྱོ་དགོས་པ་ཞིག་བྱུང༌། བོད་པ་ནང་ཁུལ་ལ་གདུག་རྩུབ་དེ་ལྟར་བྱེད་ན་རྒྱ་གཞུང་ལ་བཤད་ག་ལ་དགོས།
སྔ་ལོའི་ནང་བོད་ཆོལ་ཁ་གསུམ་གྱི་བོད་མིས་རང་གི་མི་རིགས་ཆེད་ལུས་སྲོག་བློས་བཏང་གིས་རྒྱ་གཞུང་ལ་ངོ་རྒོལ་གྱི་ལས་འགུལ་སྤེལ་སྐབས་སྲོག་ཤོར་བ་དང༌། ལུས་གཅོང་ཆགས་པ༌། གར་སོང་ཆ་མེད། བཙོན་དུ་ཚུད་པ། དེ་བཞིན་རྫ་གསེབ་ཤིང་ནགས་སུ་ཡིབ་དགོས་བྱུང་བ་བཅས་ནི་ཀུན་གྱིས་མཁྱེན་གསལ་རེད། དེར་མ་ཟད་རྒྱ་གཞུང་ནས་གསལ་བསྒྲགས་སྤེལ་ཏེ་དོགས་ཡོད་ཉེན་ཅན་དང༌། ཉེས་ཅན་པ་མི་ཚང་སུ་ཞིག་གིས་ཉར་ན་དེ་ལ་ཁྲིམས་ཐག་ནན་པོ་གཅོད་རྒྱུ་དང༌། དེ་བཞིན་དཔལ་འབྱོར་གྱི་ཆད་པ་གཅོད་རྒྱུ་ཡིན་ལུགས་ཀྱིས་བོད་མི་ཀུན་ལ་འཇིགས་བསྐུལ་དང༌། དྲག་རྩུབ་བྱས་པ་བཞིན། ད་ལན་སུད་སི་མི་མང་གི་འཐུས་མི་ཟེར་བ་དག་གིས་རྒྱ་མིའི་བྱེད་སྟངས་དེ་ནང་བཞིན་གསར་འགྱུར་བརྒྱུད་ལམ་ཁག་དང༌། གསར་ཤོག་སོགས་ལ་གསལ་བསྒྲགས་བཏང་བར་བློ་ཕམ་ཤིན་ཏུ་ཆེ་ལ། བྱེད་སྟངས་དེ་རིགས་རྒྱ་གཞུང་ལ་དགོས་ངེས་ཀྱི་བྱེད་སྟངས་ཤིག་ཀྱང་རེད། ཁྱེད་ཚོས་བོད་མི་དྲུག་པོ་དེར་དཀའ་ངལ་བཟོ་དགོས་བསམ་ཡང་དོན་དངོས་ཐོག་བྱེད་སྟངས་དེས་གཞིས་བྱེས་བོད་མིའི་སེམས་སུ་རྨ་ཁ་ཆེན་པོ་ཞིག་བཟོས་པ་རེད། སྤྱིར་བཙན་བྱོལ་བོད་གཞུང་གིས་འགྲོ་གྲོན་བཏང་སྟེ་བོད་པ་མང་པོ་ཞིག་ཕྱི་རྒྱལ་དུ་སློབ་སྦྱོང་བྱེད་བར་བཏང་ཡོད་པའི་ནང་མི་ཉུང་བ་ཞིག་ཕྱིར་ལོག་མ་བྱས་པར་མཐའ་ན་གཞུང་གི་འགྲོ་གྲོན་ཕྱིར་སློག་གི་མེད། དེ་བཞིན་གཞུང་ཞབས་མཛད་གཙོ་རྣམ་པའི་ནང་ཕྱི་རྒྱལ་ལ་རྐང་པ་གཅིག་མ་བཙུགས་པ་ཧ་ལམ་མི་འདུག་ལ། གཞུང་ཞབས་རྣམ་པའི་ནང་ཕྱི་རྒྱལ་ལ་འགྲོ་འདོད་མེད་པ་ཧ་ལམ་མི་འདུག དེ་ག་ནང་བཞིན་ཚོགས་པ་སྐྱིད་སྡུག་སོགས་ཀྱི་མི་སྣ་འགྲོ་མཁན་ག་ཚོད་ཙམ་ཡོད་དམ། ཨ་རི་སོགས་ཡུལ་གྲུ་ཁག་ལ་ཡོད་པའི་བོད་པ་ག་ཚོད་ཀྱིས་དེབ་ལྗང་ཁུའི་དངུལ་འབུལ་གྱི་ཡོད་དམ༌། དེ་ཚོར་ཁྲིམས་ཐག་ནན་པོ་གཅོད་རྒྱུ་དང༌། དེ་དག་ལ་མཐའ་བཀར་རི་བཀར་གཏོང་མཁན་སུ་ཞིག་བྱུང་སོང་། ཁྱེད་ཚོས་བསམ་བློ་ཐོངས་དང༌། ཡང་ན་སུད་སིར་ཡོད་པའི་བོད་མི་ཚོ་བོད་ཤོར་ནས་ད་བར་སུད་གཞུང་གིས་རང་འགུལ་ཐོག་ཁྱེད་ཚོ་ཁྲིམས་ཐོག་ནས་སྐྱབས་བཅོལ་ལ་བླངས་པ་ཤ་སྟག་རེད་དམ། ཁྱེད་ཚོའི་ནང་ད་བར་སུད་སིར་སླེབས་པ་ཚོ་ཁྲིམས་འགལ་ཐོག་ནས་ཡོང་མེད་པ་གསལ་བཤད་བྱེད་ཐུབ་བམ། ད་བར་ཕྱི་རྒྱལ་ལ་འགྲོ་མཁན་བོད་མི་ཁྲིམས་མཐུན་དང༌། ཁྲིམས་འགལ་གཉིས་ནས་གང་མང་བ་ཡོད་པ་ཞིབ་འཇུག་བྱེད་མྱོང་ངམ། ང་ཚོ་བོད་པ་གཅིག་གི་གནས་སྟངས་ཡག་ཏུ་ཕྱིན་ན་ང་ཚོའི་གཟི་བརྗིད་རེད། ཁྱེད་ཚོས་དགོངས་པ་བཞེས་མྱོང་ངམ། ངོ་མ་མི་ཚོས་བཤད་པ་བདེན་པ་རེད། ཕྱི་རྒྱལ་ཡུལ་གྲུ་ཁག་ནས་བོད་མི་ནང་ཁུལ་འཆམ་པོ་མེད་པ། ནང་ཁུལ་ཞེ་སྡང་དང༌། གསར་དུ་འབྱོར་བའི་བོད་མིར་མཐོང་ཆུང་བྱེད་པ་སོགས་སྐྱུག་བྲོ་བའི་ལས་སྟངས་དེ་དག་སུད་སི་ནང་གནས་སྡོད་བོད་མི་རེད་ཟེར་བ་ཅིས་མི་བདེན། ད་ལན་དགུ་བཅུ་གསུམ་གྱི་ཚོགས་མི་དྲུག་པོ་དེ་དག་ཕྱིར་ལོག་མ་བྱས་པ་དེས་སྤྱོད་ཚུལ་ངན་པ་ཞིག་བསྟན་པ་རེད། དེས་ཁྱེད་ཚོར་དཀའ་ངལ་ཞིག་བཟོས་ཡོད་པ་རེད། ཡིན་ནའང་ཁྱེད་ཚོས་བསམ་ཤེས་ཏིལ་འབྲུ་ཙམ་མེད་པར་སྤྱོད་ཚུལ་དེ་ལས་སྡུག་པ་ཞིག་འཁྱེར་ཏེ་ཁོང་ཚོར་མཐའ་བཀར་རི་བཀར་བྱེད་པར་གཞིས་བྱེས་བོད་མིའི་སེམས་ཁམས་ལ་རྨ་ཁ་བཟོས་པ་མ་ཟད། རྒྱ་གཞུང་ལ་དགོས་ངེས་ཀྱི་བྱ་བ་ཞིག་བསྒྲུབས་པ་རེད།
ད་དུང་ཤེས་དགོས་པ་ཞིག་ལ། དགུ་བཅུ་གསུམ་གྱི་ཚོགས་མི་དྲུག་ནས་སུད་སི་མི་མང་ལ་ཆེད་མངགས་སྤྱོད་པ་སློག་པ་དང༌། གནོད་པ་བསྐྱལ་འདོད་པ་ནི་རྩ་བ་ནས་མ་རེད། དེ་བཞིན་ཁོང་ཚོས་གནས་ཚུལ་ཛ་དྲག་ཡོང་གི་རེད་བསམ་པ་སེམས་པའི་ཡུལ་ལའང་ཡོད་པ་མ་རེད། ཁོང་ཚོའི་འཚོ་བའི་གནས་སྟངས་དང༌། སེམས་ཁམས་ཀྱི་སྡུག་བསྔལ་ལ་སུས་བསམ་ཤེས་ཐུབ་བམ། དཔེར་ན་ཚོགས་མི་དྲུག་ནས་བློ་བཟང་མཁས་གྲུབ་ལགས་འུ་ཐུག་སྟེ་ཕྱིར་ལོག་བྱ་རྒྱུ་བྱས་པ་རེད། ཡིན་ནའང་ཁོང་གི་གནས་སྟངས་ཤེས་ཀྱི་ཡོད་དམ། ཁོང་རང་ལ་མཚོན་ན་སྔོན་ལྷ་སར་བསྡད་སྐབས་ཚོང་པ་ཞིག་རེད། འཚོ་བའི་ཐད་དཀའ་ངལ་ཁྱད་བསད་བྱེད་ཐུབ་མཁན་གྱི་གཞོན་སྐྱེས་ཤིག་རེད། ཡིན་ནའང་ཁོང་རང་སྒེར་གྱི་འཚོ་བ་ཁོ་ནར་མ་གཟིགས་པར་བོད་ཀྱི་བསྟན་པ་ཆབ་སྲིད་ཀྱི་ཆེད་དུ་རང་གི་བཟའ་མི་བུ་ཕྲུག་དང༌། ཐ་ན་རང་སྲོག་ཀྱང་བློས་གཏོང་གིས་རང་བཙན་ཚོགས་པ་ཆེད་འཛུགས་ཀྱིས་རྩ་དོན་ཐད་ཕྱག་ལས་མི་ཉུང་བ་ཞིག་གནང་རྗེས་རྒྱ་གཞུང་གིས་ཤེས་རྟོགས་བྱུང་ནས་ཁོང་གི་རོགས་པ་ཁག་ཅིག་འཇུ་བཟུང་འོག་ཚུད་རྗེས་ཁོང་དང༌། ཚོགས་མི་གཉིས་བཅས་ཕྱི་ལོ་ ༡༩༩༣ ལོར་བཙན་བྱོལ་དུ་བྲོས་བྱོལ་ལ་ཡོང་དགོས་བྱུང་བ་རེད། དེ་ནས་བཟུང་ནང་ཡོད་ཀྱང་ལོག་ས་མེད་པ་དང༌། ནང་མི་བུ་ཕྲུག་ཡོད་ཀྱང་འཛོམས་ས་མེད་པའི་གནས་སྟངས་འོག་རང་ཁ་རང་གསོའི་འཚོ་བ་སྐྱོ་པོ་ཞིག་སྐྱེལ་བཞིན་ཡོད་པ་རེད། སྔ་ལོའི་ལྷ་སའི་ནང་བོད་མི་ཚོས་རྒྱ་གཞུང་ལ་ངོ་རྒོལ་གྱི་ལས་འགུལ་སྤེལ་སྐབས་ཁོང་གི་བུས་རང་སྲོག་བློས་གཏོང་གིས་ལས་འགུལ་སྣེ་འཁྲིད་བྱས་རྐྱེན་རྒྱ་གཞུང་གིས་མི་ལོ་ ༡༥ ཁྲིམས་ཐག་བཅད་དེ་བཙོན་འཇུག་བྱས་པ་མ་ཟད། དཔལ་འབྱོར་གྱི་ཆད་པ་ཡང་ཚད་ལས་བརྒལ་བ་བཅད་ཡོད་པ་རེད། ཁོང་དང་འདྲ་བའི་གནས་སྟངས་སྐྱོ་པོ་ཚོར་རོགས་པ་བྱེད་རྒྱུའི་ཚབ་ལ་ཕོག་ཐུག་དེ་འདྲ་གཏོང་དོན་ཅི། ཡར་མཐོ་སར་ངོ་དགའ་སྤྲེལ་ལད་དང༌། མར་དམའ་སར་ཐུབ་ཚོད་གཏོང་གང་ཐུབ་ནི་ངོ་མ་ཡིད་སྐྱོ་དགོས་པ་རང་རེད། ལྷག་པར་སུད་སི་ས་གནས་སུ་ཡོད་པའི་ཨེ་ཤ་ཡ་རང་དབང་རླུང་འཕྲིན་ཁང་གི་གསར་འགོད་པ་རབ་སྒང་ཚེ་རིང་ཕུན་ཚོགས་མིང་ཅན་གྱིས་རང་ཉིད་ཀྱི་ཁེ་ཕན་ཁོ་ནའི་ཆེད་དུ་གསར་འགྱུར་གཏོང་དགོས་དང་མི་དགོས་ཀྱི་ཞིབ་འཇུག་རྩ་བ་ནས་མེད་ཁར་ད་དུང་གསར་འགྱུར་ཤོད་སྐབས་དགུ་བཅུ་གསུམ་གྱི་ཚོགས་མི་ཚོས་རྐང་རྗེས་ལག་གསུག་དང༌། ས་གནས་མི་མང་ལ་གནོད་པ་བསྐྱལ་བ་རེད་སོགས་ཀྱི་ཚིག་རྩུབ་མང་དག་ཅིག་ས་གནས་མི་མང་ལ་ཞེན་ཁོག་ཡོད་ཚུལ་གྱིས་བཤད་པར་བློ་ཕམ་དང༌། མི་དེ་ལྟ་བུ་གསར་འགྱུར་འགོད་མཁན་དུ་འཇོག་ན་དངོས་ནས་རང་གཞན་ཕུང་བའི་རྒྱུ་རང་རེད།
དྲ་ངོས་ཀྱི་གནས་ཚུལ་ཚང་མའི་པར་དབང་བོད་ཀྱི་དུས་བབ་ལ་ཡོད།
མཐའ་བཀར་རུ་བཀར་ངེས་པར་དུ་ཡང་གཏོང་དགོས་པ་ཞིག་རེད་ལ། བཏང་བར་དགའ་བསུ་ཡོད། སྔོན་མ་ཨ་མདོ་བླ་བྲང་སྐལ་བཟང་གིས་ཀྱང་དེ་ལྟར་བྱས་པ་རེད། དགུ་བཅུ་གསུམ་གྱིས་འགན་འཁུར་ནས་གསལ་བཤད་དགོས་པར་སྙམ།
གསར་འགོད་པ་གསར་འབྱོར་ཕྱོགས་ནས་ལངས་ན་ཡག་པོ་མ་རེད། དྲ་གྲོགས་རྣམས་ཀྱིས་ཀྱང་སྐད་ཆ་དབུ་འཚོས་པོས་བགྲོ་གླེད་གནང་ན་བསམ། ཁྲིམས་འགལ་གྱི་ཕྱིར་སྡོད་བྱེད་པ་ལ་རིགས་མང་པོ་ཡོད་པ་རེད། ད་ཐེངས་ཀྱི་བྱེད་ཐབས་འདིས་བོད་སྤྱིའི་རྩ་དོན་ལ་གནོད་སྐྱེལ་ཡོད་པ་རེད།
ད་སྔོན་ཆད་ནང་བཞིན་སྟག་སྣ་འཇིགས་མེད་བཟང་པོ་དང་། ཨ་ནེ་གཉིས་ལ་སོགས་པ་ནང་བཞིན་སུད་སི་མི་དམངས་ནས་རོགས་རམ་བྱེད་ཁག་པོ་རེད་བསམ།
ནོར་འཁྲུལ་ཚང་མར་འདུག
ཡིན་ཡང་ཕྱོགས་ལྷུང་གི་གསར་འགོད་པ་དེའི་ནོར་འཁྲུལ་ཚབས་ཆེ་ཤོས་རེད།
ངས་གཏམ་འདི་གོ་མ་ཐག་སུད་སི་བོད་རིགས་མི་དམངས་ལ་ངོ་རྒོལ་བྱས་ཡོད། སྐད་ཆ་སྡུག་ཅག་མང་པོ་ཞིག་གོ་མྱོང་མོད། གོ་ཚད་བྲིས་ན་གཏམ་འཆལ་དུ་འགྲོ་བར་དོགས་ནས་བྲིས་མེད། རྗེས་མ་གནས་སྟངས་ཇེ་སྡུག་ལ་ཕྱིན་ན་ངས་སྐད་ཆ་དེ་དག་རེ་རེ་བཞིན་གསལ་བོ་བཟོ་གི་ཡིན། བོད་མི་ཚོས་སུད་སི་བོད་རིགས་མི་དམངས་ཀྱི་མཚན་ཐོག་ལ་འབོད་སྐུལ་གྱི་ཡི་གེ་རེ་གཏོང་དགོས་པ་མིན་འགྲོ།
ད་ནི་རྒྱ་མིས་བོད་ནང་གི་ཆབ་སྲིད་བཙོན་པ་དག་ལ་སྡང་། ཕྱི་ནས་འབྱོར་བ་ཡོད་མཁན་དག་གིས་རང་གི་ཁེ་ཕན་ཁོ་ན་ལ་དམིགས་ནས་གཅིག་ཕན་གཅིག་གྲོགས་ཟེར་བ་དང་བོད་སེམས་བོད་ཟེར་བའི་མིང་ཚིགས་ཤིག་སེམས་ནང་དུ་མེད་པ་མཐོང་དུས། དངོས་ནས་བོད་པ་འདི་བ་ཚང་ལ་ག་འདྲ་བྱུང་བ་ཡིན་ནམ་སྙམ་ཞོར་དུ་༧གོང་ས་མཆོག་གིས་གསུང་ཞིག་དྲན་སོང་། ཁྱེད་ཚོ་སྔོན་ལ་འབྱོར་བ་ཚོས་གསར་དུ་འབྱོར་བའི་བོད་མི་དག་ལ་རོགས་པ་བྱེད་དགོས་ཀྱི་ཡོད་པ་རེད། དེ་སེམས་ནས་མ་བརྗེད་ཅིག་གསུང་བའི་བཀའ་སློབ་དེ་ནི་བོད་མི་ཕྱི་རྒྱལ་རང་དབང་ཁམས་ན་ཡོད་མཁན་དེ་དག་གིས་ཡེ་ཤེས་ནོར་བུ་མཁྱེན་ནོ་ཟེར་ནས་ལག་ཟུང་སྙིང་ཁར་སྤྱར་བ་ཙམ་ལས་དོན་སྟོང་ཚིག་སྟོང་ཁོ་ན་ཡིན་པ་ར་སྤྲོད་བྱེད་ཀྱི་མི་འདུག་གམ།
ཨ་ཁ་ཁཁཁཁ། དེ་འདྲའི་ཐབས་སྐྱོ་བ་ལ་དངོས་གནས་དེ་འདྲ་གོ་ན་སེམས་པ་ན་གི
ལེ་ལན་བརྡ་གི་མེད་ད། རང་རིགས་སྤུན་ཟླ་རྣམས་ཀྱིས།
རང་རིགས་སྤུན་ལ་མ་སྡང་། ད་ལྟའི་གནས་བབས་གཟིགས་རོགས།
ཚང་མ་སྐྱབས་བཅོལ་ཡིན་པས། སྐྱབས་བཅོས་སྐྱབས་བཅོལ་མ་སྡང་།
དགྲ་བོས་སྡང་ན་ལས་རེད།
དེ་ལྟར་བྱེད་མཁན་ལས་བྱེད་དབང་ཡོད་ཁྱེད་རྣམ་པས། ཁོང་ཚོ་ལ་འགལ་རྐྱེན་ངན་པ་མི་འཕྲད་པའི་འགན་ཁུར་དགོས་པ་མ་ཚད། ཚུར་ལོག་མཁན་མི་སྒེར་གྱི་གཞི་བྱེས་གཉིས་ཀྱི་དཀའ་ངལ་སེལ་བའི་ཐོབ་དང་དཔལ་འབྱོར་ཕུལ་དགོས། གུས་བཅས།
དགོངས་དག རྩོམ་འཇུག་དུས་དྲ་ཐག་ཡག་པོ་མེད་པར་བརྟེན་རྩོམ་ལུས་དྲ་ཐོག་ལ་འདོན་ཐུབ་མི་འདུག
ཡིག་འབྲུ་གཅིག་ཀྱང་རིག་རྒྱུ་མེད་ནོ་ག་རེ་རེད།
ནང་དོན་མི་འདུག ག་རེ་བྱས་སོང་།