བཅོས་མའི་འོག་གི་འབག་གི་གཟུགས་བརྙན།

བཅོས་ མའི་འབག་གི་འོག་ན་ང་ཡི་གཟུགས་བརྙན་ཡོད་པ་ཁྱེད་ཉིད་གཅིག་བུས་མ་གཏོགས་སུས་ ཀྱང་མ་མཐོང་། དེ་ནི་ནམ་ཕྱེད་ཡོལ་ནས་མི་ཚང་མ་ཉལ་ཟིན་པའི་མཚན་མོ་འདི་རེད། ངས་གློ་བར་ཏུ་རང་གིས་སྔར་བྱས་ཀྱི་བསམ་བློའི་རྨང་གཞི་དེ་ཉིད་གློ་བར་བའི་ཆོ་ འཕྲུལ་ཞིག་གིས་ཁ་ཟས་སུ་བཏང་དེ། སྐར་ཆ་ཁ་ཤས་ཀྱི་རང་ཉིད་དེ་ནི་བཅོས་མའི་གཟུགས་བརྙན་འོག་གི་རང་ཉིད་ལ་ཞིབ་ རྩིས་བརྒྱབ། ནམ་རྒྱུན་ཏུ་རང་ཉིད་ནི་ཁྱེད་ཉིད་ལ་ཡིད་ཆེས་ཡོད་མཁན་ཞིག་ཡིན་ལ། ཁྱེད་ཉིད་ལ་དུངས་པའི་སེམས་པ་དེ་ནི་ཆེས་དག་གཙང་ལྷད་མེད་ཀྱི་སེམས་གཤིས་ཤིག་ལ་ ངོས་འཛིན་བྱེད་ཀྱི་ཡོད། འོན་ཀྱང་། དོ་ནུབ་མཚན་ཡོལ་རྗེས་སུ་ངས་ཉིད་ཀྱི་འདྲ་དཔར་མདུན་ནས་རང་གིས་བཞག་པའི་སེམས་ གཏིང་གི་དམ་བཅའ་དེ་ཉིད་ཆུ་བུར་བློ་ཡི་སྲེད་ཤུགས་དེའི་དབང་ལ་མགོ་བོ་སྒུར་ནས་ སྐར་ཆ་ཁ་ཤས་ཀྱི་བདེ་སྣང་དེའི་ངས་ང་རང་ཉིད་ཀྱིས་འདྲ་དཔར་མདུན་ཏུ་གཅིག་བུར་ བསྡད་ཡོད་པ་གཏིང་ནས་བརྗེད། དེ་ནི་ཆོ་འཕྲུལ་ཐུན་གཅིག་གི་ཚོར་བ་དེའི་དབང་ལ་ཤོར་བས་ལོས་ཡིན། ཚོར་བ་དེ་ལས་རང་ཉིད་ཕྱིར་སད་དུས། ད་གཟོད་རང་ཉིད་ནི་སྐར་ཆ་ཁ་ཤས་ཀྱི་སྔོན་གྱི་མི་དེ་ནི་འབད་དེ་མིན་པ་རྟོགས་ སོང་། དེ་དུས་ང་རང་མཐོང་མཁན་ནི་ཁྱེད་རང་ཡིན་ལ། ང་རང་གིས་ནག་ཉེས་དེའི་རྩ་བ་རིག་མཁན་ཡང་ཁྱེད་ཉིད་ཡིན་པ་གཞིར་བཅས་ངས་ཉིད་ཀྱི་ འདྲ་དཔར་ཕྱོགས་སུ་བལྟ་མ་འཕོད་པར། རང་གི་མལ་ཁྲིའི་ཕྱོགས་སུ་ཤོར་ཟིན་དམ་བཅའ་དེ་ལ་ཕྱིར་འདང་མི་ཉུང་བ་ཞིག་རྒྱག་ ཞོར་ཏུ། མི་ཡུལ་འདི་ན་ང་དང་འདྲ་བའི་མི་འབག་གྱི་གཟུགས་བརྙན་འོག་ཏུ་འཚོ་མཁན་ག་ཚོད་ ཅིག་ཁྱེད་ཀྱི་སྔ་གཞུག་དང་ཁྱེད་ཀྱི་མདུན་ནས་རང་གིས་ཁས་བླངས་པའི་དམ་བཅའ་ཆེས་ མང་བོ་ཞིག་འདི་ལྟར་དོར་བཞིན་ཡོད་པ་རེད་ཨང་སྙམ་ཞོར་ཏུ། འཁྱག་སྒམ་ནང་ནས་ཆུ་འཁྱག་འགྱིག་དམ་བཀང་ཕྱི་རུ་བླངས་དེ་འཐུང་ཞོར་ཏུ། སང་ཉིན་གྱི་ང་རང་ནི་ཁྱེད་ཀྱི་འདྲ་དཔར་མདུན་གྱི་དམ་བཅའ་འཇོག་མཁན་གྱི་མི་སྣ་ དེ་རུ་འགྱུར་ཐུབ་མིན་ལ་བསམ་བློ་གཏོང་མ་འཕོད་པར། བཅོས་མའི་འབག་ལ་འཐིམ་པས་རང་ཉིད་ལ་འཁང་དགོད་ཅིག་བྱེད་ཞོར་ཏུ། མི་ཟེར་བ་ནི་གདོན་འདྲེ་རེད་ལ། མི་ལས་ལྷག་པའི་འཇིགས་སུ་རུང་བ་ཞིག་གང་དུ་ཡང་མི་འདུག ངོ་གཉིས་ཡོད་པའི་མི་ནི་འཇིག་རྟེན་གྱི་འཕོང་འདྲེ་ལས་འཇིག་རྟེན་ལ་སྲུ་ཞུ་ སྒྲུབ་མཁན་གྱི་ཁྱེད་ཀྱི་རྗེས་འགྲེང་བ་ཞིག་མི་རུང་བ་ཞོར་ཏུ་དང་ལེན་བྱས་པ་ ཡིན། འོན་ཀྱང་། ཁྱེད་ཀྱི་རྗེས་འགྲེང་བ་ཞིག་མི་ཉན་རུང་། ཁྱེད་ཀྱི་མཚན་ཉེས་བཟོ་མཁན་གྱི་བཅོས་མའི་མི་འབག་གྱོན་མཁན་མ་བྱས་ན་དེ་བས་ འགྲིག་འདུག་ཨང་བསམ་སོང་། འདི་ལྟར་ངས་རང་ཉིད་ལ་མུ་མཐུད་དུ་བལྟ་མ་འཕོད་པར་ཁ་རོག་གེར་མལ་ཁྲིའི་སྟེང་དུ་ རོ་དང་ཁྱད་པར་མེད་པས་རང་གི་ལུས་པོ་འདོམ་བཀང་དེ་ལ་ངལ་གསོ་བྱེད་ཀྱིས་གྲ་ སྒྲིག་བྱས་པ་ཡིན། ཁྱེད་ཀྱི་འདྲ་དཔར་ནི་སྐབས་རེ་ང་རང་ལ་སྐྲག་སྣང་སྐུར་བྱེད་ཅིག་དང་སྐབས་རེར་ང་ རང་ལ་གཞལ་ཏུ་མེད་པས་ཚོར་བ་ལྷད་མེད་ཅིག་འཁུར་ནས་ཡོང་མཁན་དེ་ཡིན་དུས། ང་རང་ཁྱེད་ལ་དུངས་པ་དེ་ནི་ལྷད་མེད་པ་ཞིག་ཡིན་ནམ་ཅི། གླལ་རྒྱངས་བྱེད་ཞོར་ཏུ་མེལ་མགོ་ཚུར་ལ་བླངས། གློག་སྒྲོམ་མ་གཟིམ་པའི་སྔོན་དེར་སླར་ཡང་རང་གི་བཅོས་མའི་འབག་ལ་ཞིབ་དུ་ཐེངས་ ཤིག་བལྟས་དེ་དགོད་ཁ་ཤོར། འདི་སྲུང་དེ་ཚེ་གཅིག་བསྐྱེལ་དགོས་དུས་ལས་སླ་བོ་ཞིག་མ་རེད་ཨང་ཟེར་བཞིན་རང་ གིས་རང་ལ་ཆིག་ལབ་རྒྱབ། སྒེའུ་ཁུངས་ལས་སྐར་ཚོགས་དང་གློག་འོད་ཆེམ་ཆེམ་འཕྲོ་བས་འོད་དག་མཐོང་།