མདུན་ངོས།
About Us
  • English
Advertisement
བོད་ཀྱི་དུས་བབ།
  • གསར་འགྱུར།
    • ༸གོང་ས་མཆོག གསར་འགྱུར།
    • བཙན་བྱོལ།
    • བོད་ནང་།
    • རྒྱལ་སྤྱི།
    • རྒྱ་ནག
    • ༧གོང་ས་མཆོག གསུང་འཕྲིན།
  • རྩོམ་ཡིག།
    • བསམ་ཚུལ།
    • སྒྱུར་རྩོམ།
  • བརྙན་མཛོད།
    • གླེང་མོལ།
    • མེ་ལོང་།
    • ང་ཡི་བཙན་བྱོལ་བ།
    • གངས་ཕྲུག
    • དྲ་བརྙན་གསར་འགྱུར།
  • ཁྱབ་བསྒྲགས།
    • གླ་ཡོད་ཁྱབ་བསྒྲགས།
    • དུས་བབ་ཀྱི་གསལ་བསྒྲགས།
    • གླ་ཡོད་རིན་གོང་།
  • པར་མཛོད།
    • ང་ཚོའི་པར།
    • གསང་འགྱུར་པར་རིས།
  • དཔེ་དེབ།
  • རྩོམ་སྒྲིག་པའི་གཏམ།
  • ང་ཚོའི་སྐོར།
    • བོད་ཀྱི་དུས་བབ་ཀྱི་བྱུང་རིམ།
    • རྩ་ཆེའི་གསུང་འཕྲིན་ཁག
    • English
    • Chinese
No Result
ཆ་ཚང་གཟིགས།
  • གསར་འགྱུར།
    • ༸གོང་ས་མཆོག གསར་འགྱུར།
    • བཙན་བྱོལ།
    • བོད་ནང་།
    • རྒྱལ་སྤྱི།
    • རྒྱ་ནག
    • ༧གོང་ས་མཆོག གསུང་འཕྲིན།
  • རྩོམ་ཡིག།
    • བསམ་ཚུལ།
    • སྒྱུར་རྩོམ།
  • བརྙན་མཛོད།
    • གླེང་མོལ།
    • མེ་ལོང་།
    • ང་ཡི་བཙན་བྱོལ་བ།
    • གངས་ཕྲུག
    • དྲ་བརྙན་གསར་འགྱུར།
  • ཁྱབ་བསྒྲགས།
    • གླ་ཡོད་ཁྱབ་བསྒྲགས།
    • དུས་བབ་ཀྱི་གསལ་བསྒྲགས།
    • གླ་ཡོད་རིན་གོང་།
  • པར་མཛོད།
    • ང་ཚོའི་པར།
    • གསང་འགྱུར་པར་རིས།
  • དཔེ་དེབ།
  • རྩོམ་སྒྲིག་པའི་གཏམ།
  • ང་ཚོའི་སྐོར།
    • བོད་ཀྱི་དུས་བབ་ཀྱི་བྱུང་རིམ།
    • རྩ་ཆེའི་གསུང་འཕྲིན་ཁག
    • English
    • Chinese
No Result
ཆ་ཚང་གཟིགས།
བོད་ཀྱི་དུས་བབ།
English
No Result
ཆ་ཚང་གཟིགས།

ང་ཚོས་རང་གི་ཁོར་ཡུག་ལ་གཙང་སྤྲ་བྱེད་དགོས། གཟུངས་ཕྱུག་སྐྱིད།

བོད་ཀྱི་དུས་བབ།
༢༠༠༩/༠༦/༢༩
Share on FacebookShare on TwitterShare on EmailShare on Whatsapp

གཟུངས་ཕྱུག་སྐྱིད།

དེང་དུས་ཀྱི་མིའི་སྤྱི་ཚོགས་འཕེལ་རྒྱས་བྱུང་བ་དང་མཉམ་དུ་གད་སྙིགས་ཀྱི་ཕུང་པོའི་རིགས་ཀྱང་བླ་ལྷག་གིས་ཇེ་མང་དུ་འགྲོ་བཞིན་འདུག སྤྱིར་གད་སྙིགས་ནི་སུས་ཀྱང་རྟོགས་སླ་ཞིང་དོ་སྣང་དེ་ཙམ་མི་བྱེད་པའི་ཐ་སྙད་སྤྱིར་བཏང་བ་ཅིག་རེད།ཡིན་ནའང་དེང་སྐབས་ང་ཚོའི་སྤྱི་ཚོགས་སུ་གད་སྙིགས་ཀྱིས་བཟོས་པའི་ནག་ཉེས་དང་ཉེན་ཁ་ནི་ཧ་ཅང་གི་ཛ་དྲག་དང་ཉེན་ཚབས་ཅན་དུ་གྱུར་ཡོད། དཔེར་ན། དངོས་རྫས་སྦག་བཙོག་གིས་བསྐྱེད་པའི་ནད་འབུའི་རིགས་སྤྱི་དང་། ལྷག་པར་དུ་མི་དང་མིས་བཟོས་པའི་འཕྲུལ་ཆས་བེད་སྤྱོད་དང་དེ་ལས་བྱུང་བའི་རྫས་དུད་ཀྱིས་རྨེག་མེད་བཟོ་བཞིན་པའི་རང་བྱུང་ཁམས་ཀྱི་ཉམས་རྒད། ཡང་ན་དེ་ལས་བྱུང་བའི་མིའི་འདོད་ཡོན་གྱིས་བསྐྱེད་པའི་འདུ་ཤེས་འཁྱེར་སྟངས་སོགས་མདོར་ན་མིའི་རིགས་ཀྱི་སྤྱི་ཚོགས་ཧྲིལ་པོ་ཇི་འདྲའི་གཏོས་ཆེ་བའི་གད་སྙིགས་ཀྱི་ཕུང་པོ་ཞིག་དང་ཁ་གཏད་དུ་གནས་ཡོད་ཨང་།

དེ་བས་དེང་སྐབས་འཛམ་གླིང་སྟེང་དཔྱོད་ཤེས་ཀྱི་ཤེས་རབ་རྣོ་བའི་དམ་པ་དག་གིས་འདིའི་སྐོར་ལ་སེམས་ཁྲལ་དང་མཉམ་འཇོག་བྱེད་ཀྱིན་ཡོད་ནའང་མང་མོས་ཀྱིས་སྔར་བཞིན་སྣང་མེད་དང་རྒྱ་ཡན་དུ་གཏོང་བཞིན་ཡོད།དེ་བཞིན་དུ་ང་ཚོའི་སྤྱི་ཚོགས་ཁྲོད་ནའང་གད་སྙིགས་དེའི་རིགས་ཁྱབ་བརྡལ་དུ་འགྲོ་བཞིན་པ་ནི་རྒྱུན་ལྡན་གྱི་སྣང་ཚུལ་ཅིག་ཡིན་ལ།དེ་ལས་ཀྱང་ཚབས་ཆེ་བ་ཞིག་ནི་མི་རྣམས་ཀྱི་འདུ་ཤེས་ཁྱེར་སྟངས་གྱི་བསམ་བློའི་གད་སྙིགས་ཀྱི་རིགས་དང་ལངས་ཕྱོགས་མེད་པའི་སྐད་ཆའི་རྫོབ་ཉོག་གི་རིགས་ཀྱི་གད་སྙིགས་དག་ཡོངས་ཁྱབ་དུ་དར་བཞིན་འདུག་ལ།དེ་མིན་ད་དུང་ཕྱིའི་སྤྱི་ཚོགས་ནང་ནས་ཐད་ཀར་འགས་ཁྱབ་འབྱུང་བཞིན་པའི་མགོ་མེད་མཇུག་རྡུམ་ལ་གོམས་པའི་གཤིས་སྤྱོད་ཡ་མ་ཟུང་གི་གད་སྙིགས་སོགས་མང་པོ་ཞིག་གིས་ང་ཚོའི་སྤྱི་ཚོགས་ཧྲིལ་བོ་རང་རྐྱ་འཕེར་བའི་ཡར་རྒྱས་ཀྱི་ཕྱོགས་སུ་འགྲོ་བར་འགོག་རྐྱེན་ཤུགས་ཆེན་བཟོ་བཞིན་ཡོད།དེ་མིན་ད་དུང་ང་ཚོའི་སྤྱི་ཚོགས་འདིར་སྔ་མོ་ཞིག་ནས་གོམས་བསྡད་ཡོད་པའི་ན་ཚ་ཆེ་ཤོས་ཤིག་ནི་ནམ་ཡང་རང་རིགས་ལས་གཞན་རིགས་ལ་ཨ་གསར་ཆེ་ཞིང་གོང་བཀུར་བྱེད་པར་དགའ་བའི་སྤྱི་མོས་ཀྱི་འདུ་ཤེས་ཁྱེར་སྟངས་ཤིག་ཡོད་པ་འདི་རེད། སྣང་ཚུལ་འདིའི་རིགས་ནི་ནམ་རྒྱུན་ང་ཚོའི་མཐོ་རིམ་མི་སྣ་དག་དང་ཤེས་ལྡན་པ་ཉུང་ཤོས་ཤིག་གི་གྲས་ནས་འབྱུང་བཞིན་པའི་བསམ་བློའི་རུལ་སུངས་ཀྱི་ནད་ཡམས་ཤིག་རེད།

བཙན་བྱོལ་སྤྱི་ཚོགས་ཆུང་ཆུང་འདིར་མཚོན་ནའང་མི་མང་ཆེ་བ་ཞིག་གིས་བོད་རང་གི་སྔ་ཕྱི་བར་གསུམ་གྱི་ལོ་རྒྱུས་ཁྲོད་བྱུང་དང་འབྱུང་བཞིན་པའི་མི་སྣ་རླབས་ཆེན་དག་གི་མཛད་རྗེས་དང་བྱུང་བ་དེ་ཙམ་གྱིས་རྒྱུས་ལོན་དང་དོ་སྣང་ཆེར་མི་བྱེད་པར། དེ་ལས་ལྡོག་སྟེ་མི་རིགས་གཞན་ནམ་ཡང་ན་རྒྱལ་ཁབ་གཞན་གྱི་ཅུང་མིང་གྲགས་ཆེ་བའི་མི་སྣ་འགའ་རེ་མིང་གིས་བོས་ཏེ་འུར་སྒྲོག་བྱེད་རྒྱུར་མོས་པ་ནི་ང་ཚོ་སྤྱི་ཡོངས་ལ་མངའ་བའི་ནོར་འཁྲུལ་ཚབས་ཆེན་ཞིག་རེད། དཔེར་ན་ང་ཚོར་ཁ་ཞེ་གཉིས་མེད་ཀྱིས་ཤ་ཞེན་དང་ཞབས་ཞུ་སྒྲུབ་མཁན་ཀུན་གཟུགས་པན་ཆེན་རིན་པོ་ཆེ་གཙོས་དཔའ་མཛངས་གཉིས་ལྡན་གྱི་དམ་པ་དག་གི་ངོ་མཚར་བའི་མཛད་རྗེས་དང་། བསྒྲུབ་ཕོད་པའི་སྙིང་སྟོབས། གནད་དུ་འཁེལ་བའི་ལས་དོན་བསྒྲུབ་སྟངས་སོགས་མདོར་ན་ཁོང་རྣམ་པའི་ཞུམ་པ་མེད་པའི་རྒྱལ་གཅེས་སྙིང་སྟོབས་དང་ཆབ་སྲིད་ལངས་ཕྱོགས་ལ་གཏིང་ཟབ་པའི་རྒྱུས་ལོན་དང་། ཚད་མཐོ་བའི་གོང་བཀུར་སྒོས་སློབ་སྦྱོང་དང་མིག་དཔེར་འཛིན་པ་ལས་དགྱ་ནག་གི་མང་གཙོ་དོན་གཉེར་ཅན་ག་གེ་མོ་དང་ཕྱིའི་སྟོབས་ལྡན་རྒྱལ་ཁབ་དག་གི་མི་སྣ་ཆེ་གྲས་འགའི་ཁ་རླངས་ལས་བྱུང་བའི་སྐད་ཆ་རེར་འུར་སྒྲོག་དང་གོང་བཀུར་བྱེད་རྒྱུར་མོས་པ་ནི་སྤྱི་ཡོངས་ལ་མངའ་བའི་བཅོས་ཐབས་དཀའ་བའི་བསམ་བློའི་ནད་རྙིང་ཞིག་ཏུ་གྱུར་ཡོད་པ་མ་ཟད། ཐ་ན་ང་ཚོའི་གྲས་ཀྱི་མི་རེ་ཟུང་གིས་ཅུང་གྲགས་ཆེ་བའི་ཕྱིའི་རྩོམ་པ་པོ་དང་མང་གཙོ་དོན་གཉེར་ཅན་འགའ་རེར་བུ་སྤུན་དང་གྲོགས་པོ་སྒྲིག་ཐབས་སུ་ཡང་འཚང་ཀ་རྒྱག་བཞིན་པའི་དངོས་ཡོད་གནས་ཚུལ་ང་ཚོའི་སྤྱི་ཚོགས་ཁྲོད་མང་དུ་འབྱུང་བཞིན་ཡོད།

འདི་ལས་ང་ཚོས་གསལ་བོར་རྟོགས་ཐུབ་པ་ཞིག་ནི་རང་ཉིད་ནམ་ཡང་རང་ཉིད་ཀྱིས་སྐྱོབས་དགོས་ཟེར་བའི་མན་ངག་དེའི་གནས་ལུགས་ཡང་བོར་སོང་བ་དེ་རེད། དེ་མིན་ད་དུང་བྱུང་རྒྱལ་དུ་སྐད་ཅོར་རྒྱག་པའི་གོམས་སྲོལ་ངན་པ་ཞིག་གིས་ཀྱང་གཉོམ་དྲག་པའི་ང་ཚོའི་ཕྱི་ནང་གཉིས་ཀྱི་སྤྱི་ཚོགས་ཡོམ་ཡོམ་དུ་སྒུལ་བཞིན་འདུག ཚང་མས་ཤེས་གསལ་ལྟར་དེང་གི་སྤྱི་ཚོགས་ནི་འགྲན་རྩོད་དང་། ཧམ་སེམས། ཡང་ན་རང་ཉིད་ཇི་ལྟར་བྱས་ཏེ་གཞན་ལས་རྒྱལ་ཐབས་བྱེད་པ་བཅས་ཀྱི་འཁྲུག་ཟིང་གི་ཁོར་ཡུག་ཅིག་ཡིན་པས། མི་མང་པོ་ཞིག་གིས་གོ་སྐབས་འདི་དམ་འཛིན་བྱས་ཏེ་རང་ཉིད་ཀྱི་འཇོན་ཐང་ཟེར་བའི་ཐམ་ཀ་གོར་གོར་དེའི་ཆེད་དུ་འུར་སྒྲོག་དང་གསོབ་སྟོང་གི་སྐད་ཆ་རྫིག་པོ་རེ་བསྐྱར་ཟློས་དང་ཡང་ཟློས་བྱེད་ཀྱིན་ཡོད་པ་ནི་ང་ཚོའི་སྤྱི་ཚོགས་ཧྲིལ་པོའི་སྤྱི་འགྲོས་ཀྱི་ཁ་ཕྱོགས་ལྟ་བུ་ཞིག་ཏུ་གྲུབ་འདུག སྤྱིར་བཤད་ན་སྣང་ཚུལ་འདིའི་རིགས་ནི་མི་རེ་རེར་མངའ་བའི་ཁེ་དབང་དང་རང་མོས་ཀྱི་ཚད་གཞི་སོགས་གང་ཐད་ནས་བཤད་ནའང་མི་འགྲིག་པ་མེད་མོད། ཡར་རྒྱས་ཀྱི་གོམས་འགྲོས་དལ་ཞིང་མི་རིགས་ཤིག་གི་བདག་དབང་ཡོངས་སུ་ཤོར་ཚར་བའི་ད་ལྟའི་ང་ཚོའི་ཁོར་ཡུག་ཆུང་ཆུང་འདིའི་ཤེས་ཡོན་པར་ཁས་འཆེས་མཁན་གྱི་གཞོན་སྐྱེས་ཚོར་མཚོན་ན། རང་རང་གི་ཁེ་གྲགས་ཁོ་ནར་འབད་པ་ལྟ་བུའི་ད་ལྟའི་ཁ་ཕྱོགས་འདི་ཙམ་པོས་ཡིད་ཚིམས་ནས་མི་འདུག་པར་སྤྱི་མོས་ཀྱི་འགན་ཁུར་ཞིག་དང་། ཆིག་སྒྲིལ་གྱི་སྟོབས་ཤུགས་ཅིག ཡང་ན་གནས་ལུགས་ལ་གཞིགས་པའི་རིགས་པའི་གཞུང་ལུགས་ཀྱི་རྒྱབ་བརྟེན་དང་། དོན་དངོས་དང་དངོས་ཡོད་ལ་ཁ་གཏོད་ཕོད་པའི་མི་རབས་ཤིག་གི་དཔུང་སྡེ་ཆགས་རྒྱུ་ནི་མ་མཐར་ཡང་ང་ཚོར་དགོས་པའི་ཆ་རྐྱེན་དང་པོར་འདོད། དེ་ལྟར་མིན་པར་གང་བྱུང་གིས་འུར་ཟིང་དང་སྐད་ཅོར་རྒྱག་པ་ཙམ་གྱིས་ང་ཚོའི་ལས་དབང་ལ་བཀོད་འདོམས་བྱེད་མི་ཐུབ་པར་མ་ཟད། དེ་ལས་ལྡོག་དེ་འཚོ་སྡོད་ཀྱི་ཉེན་ཁར་འཕྲད་ཀྱིན་པའི་ང་ཚོའི་སེམས་ཁམས་འཁྲུག་ཟིང་ཅན་དང་། ལས་ཀར་སྒྱིད་ལུགས་དང་སུན་སྣང་འཕེལ་བ། སོ་སོའི་འགན་བབ་ལ་དོ་སྣང་མི་བྱེད་པར་འོལ་ཚོད་ཀྱིས་མཆོངས་རྒྱུག་བྱེད་པ་སོགས་རང་གི་སྤྱི་ཚོགས་ལ་འགན་མི་འཁུར་བའི་ཉེར་ལེན་ལས་ད་ལྟའི་མི་མང་པོ་ཞིག་རང་གི་སྤྱི་ཚོགས་ལ་སུན་སྣང་སྐྱེས་པ་དང་ཡང་ན་མི་དང་མིའི་བར་ལ་ཡིད་རྟོན་དཀའ་བ་སོགས་མདོར་ན་ནང་སེམས་ཀྱི་ནད་གཞི་ཆེན་པོ་ཞིག་ཏུ་གྱུར་ཏེ་རིག་གནས་ཀྱི་འདུ་ཤེས་དབུལ་ཞིང་གནས་ལུགས་མི་བརྩི་བའི་བསམ་བློའི་རུལ་སུངས་བ་མང་དུ་བྱུང་བཞིན་ཡོད་ལ། འདི་ལྟར་ཁེ་དབང་གི་ཕྱོགས་སུ་ཧམ་སེམས་འཕེལ་བས་ཤུགས་རྐྱེན་ལས་བོད་ཀྱི་སྤྱི་ཚོགས་ཡོངས་ལ་འགལ་འདུ་སྣ་མང་གིས་བསྐྱེད་པའི་གནོད་སྐྱོན་རབ་དང་རིམ་པར་ཐེབས་ཀྱིན་ཡོད།

དེང་སྐབས་ཚན་རིག་དར་ཁྱབ་དང་བརྡ་འཕྲིན་གྱི་ནུས་པ་ཁྱབ་བརྡལ་བྱུང་བ་དང་མཉམ་དུ་འཛམ་གླིང་ཤར་ནུབ་མང་པོའི་རིགས་གནས་མང་པོ་འདྲེས་སྦྱོར་ཅན་དང་གཅིག་སྡུད་ཀྱི་ཕྱོགས་སུ་གོམ་པ་སྤོ་བཞིན་ཡོད་པས། སའི་གོ་ལ་ཧྲིལ་པོ་ཇེ་ཆུང་དུ་འགྲོ་བཞིན་ཡོད་པའི་སྣང་ཚུལ་ལས་ང་ཚོས་ཀྱང་ཕྱི་ཕྱོགས་སམ་ཡང་ན་ཡར་རྒྱས་རྒྱལ་ཁབ་འགའ་རེ་ནས་མཐོང་ཐོས་བྱུང་བའི་སྤྱི་ཚོགས་ཀྱི་སྣང་ཚུལ་འགའ་རེ་གཞི་བརྟེན་དུ་བྱས་ཏེ། རང་དབང་དང་ཐོབ་ཐང་། ཡང་ན་མང་གཙོའི་ལྟ་བ་ཟེར་བ་ལྟ་བུའི་ཐ་སྙད་རྫིག་པོ་རེ་ལག་ཆར་འཕྱར་ནས་ས་ལྡིང་གནམ་ལྡིང་བྱེད་མཁན་ཇེ་མང་དུ་འགྲོ་བཞིན་ཡོད་པ་དག་ཀྱང་བཟང་ཕྱོགས་ཀྱི་འགྱུར་བ་ལྟ་བུ་ཞིག་ཏུ་སྣང་ཡང་། ཞིབ་ཏུ་བསམས་ན་ང་ཚོའི་སྤྱི་ཚོགས་ཁྲོད་ཡིག་ངོ་ཤེས་མཁན་ཙམ་བྱུང་ན་གདེང་འཇོག་བྱེད་ཚུལ་དང་། སློབ་ཆེན་སློབ་མ་རེ་བྱུང་ན་ངོམ་སོ་བྱེད་པ། རྩོམ་ཡིག་ཡག་པོ་རེ་འབྲི་ཤེས་ཚེ་ང་རྒྱལ་སྐྱེས་པ་ལྟ་བུའི་ད་ལྟའི་སྣང་ཚུལ་མི་ལེགས་པ་མང་པོ་ཞིག་ལ་གཞིགས་ན་ང་ཚོས་ད་དུང་རང་ཉིད་འཚོ་སྡོད་བྱེད་སའི་ཁོར་ཡུག་འདིའི་བག་ལ་ཞ་བའི་སེམས་ཁམས་ཀྱི་ནད་གཞི་དག་ལ་སྨན་གསོ་གང་ལེགས་བྱས་ཏེ་གཟུགས་གཞི་བདེ་ཐང་ཅན་ཞིག་ཏུ་གཏོང་རྒྱུ་ནི་གལ་ཆེན་ནང་གི་དོན་ཆེན་རེད། དེ་བས་ད་ལྟའི་འུ་ཅག་གི་འཕག་འཚག་བྱེད་སྟངས་འདིས་ང་དང་ང་ལྟ་བུ་མང་པོ་ཞིག་གི་འདོད་བློ་ཡོངས་སུ་ཁེངས་ཐུབ་ཀྱིན་མེད། རྒྱུ་མཚན་ད་ལྟ་ང་ཚོའི་སྤྱི་ཚོགས་ཧྲིལ་བོར་རང་ཚུགས་མི་ཐུབ་པའི་རིག་གནས་ཀྱི་འདུ་ཤེས་འཁྱེར་སྟངས་ཞིག་འབྱུང་བཞིན་ཡོད་ལ། རྩོམ་པ་པོ་དང་སྒྱུ་རྩལ་གྱི་ལམ་ཁར་བསྐྱོད་མཁན་དག་ལ་མཚོན་ནའང་ཚད་མཐོ་བའི་སྒྱུ་རྩལ་འཚོལ་སྙེག་གི་ཁེར་རྐྱང་གི་འགན་འཁྲི་དོར་ཏེ་སྤྱི་ཡོངས་རང་བཞིན་ནས་རིག་གནས་དགག་བཞག་གི་གླེང་བྱ་ཙམ་ལ་བློ་ཕྱོགས་ཀྱིན་འདུག་ལ་འདིའི་རིགས་ཀྱི་དགག་བཞག་གི་ཁ་གཏད་ས་གཙོ་བོ་ཡང་གཞན་ལ་སྡིགས་དམོད་དང་འཚང་འདྲུ། འུར་སྒྲོག་དང་ཟོལ་བཅོས། ཡང་ན་ཁོམ་དྲག་པའི་ཉིན་རེའི་ནང་གི་ལྐོག་ཉན་དང་གཞན་ལ་སྐུར་འདེབས་བྱེད་པར་གོམས་པའི་སྤྱོད་ངན་གྱི་རིགས་ཏེ། མདོར་ན་ཡོད་ཚད་གཡོན་ལྷུང་དང་ནོར་འཁྲུལ་གྱི་ལམ་ཁར་ཕྱོགས་ཀྱིན་འདུག་པས་ང་ཚོའི་སྤྱི་ཚོགས་ཧྲིལ་བོ་ཡར་རྒྱས་དང་བརྟན་བརླིང་གི་ཕྱོགས་སུ་སྙེག་པར་འགོག་རྐྱེན་ཆེན་པོ་བཟོ་བཞིན་འདུག་སྙམ་པའི་བློ་འཚམ་ཞིག་ང་དང་ང་ལྟ་བུ་མང་པོ་ཞིག་ལ་སྐྱེས་བཞིན་ཡོད། འདི་ལས་བྱུང་བའི་ནག་ཉེས་གཙོ་བོ་ཡང་འུ་ཅག་གི་མིག་འབྲས་བཞིན་གཅེས་པར་འོས་པའི་མི་རབས་རྗེས་མའི་ལོ་ཆུང་དག་གི་དྭངས་གཙང་གི་བསམ་བློའི་ཁ་ཕྱོགས་རྙོག་བཞིན་པ་འདི་རེད། ཁོང་ཚོས་གསེར་ལས་དཀོན་པའི་སློབ་སྦྱོང་གི་དུས་ཚོད་མང་པོ་ཆུད་ཟོས་སུ་གཏོང་བཞིན་ཉིན་མཚན་གོ་ལྡོག་གིས་དེང་གི་དྲ་ཚིགས་དང་ཟིན་བྲིས་དག་གི་སྣེ་མོ་ན་འདིའི་སྐོར་གྱི་སྐད་ཅོར་ལ་རྣ་བ་གཏད་ཅིང་མིག་ཟུང་ཅེར་གྱིན་ཡོད་པ་ཚང་མས་ཤེས་གསལ་རེད། དེ་བས་ཚང་མས་སོམས་དང་ཁོ་ཚོའི་སླད་མེད་དྭངས་གཙང་གི་སེམས་ཁམས་ཀྱི་མཁའ་དབུགས་འདི་ལྟར་འབག་བཙོག་དང་དྲི་ངན་གྱིས་རུལ་དུ་བཅུག་ན། ང་ཚོའི་ཁོར་ཡུག་ཧྲིལ་པོར་འབག་བཙོག་གིས་ཟ་བའི་འཇིགས་རུང་གི་ཉེན་ཁ་ཚབས་ཆེན་འབྱུང་བར་གདོན་མི་ཟའོ།

འབྲེལ་ཡོད་གསར་འགྱུར།

༸གོང་ས་མཆོག གསར་འགྱུར།

བོད་ལྗོངས་མདོ་སྨད་ཆོལ་ཁས་༧གོང་ས་རྒྱལ་བ་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་ཞུས།

ཆུ་ཚོད་ ༡༨ སྔོན་ལ།
 འབུམ་རམས་པ་ལྷ་མོ་འཚོའི་དཔེ་དེབ་དབུ་འབྱེད་གནང་། བོད་ཀྱི་དུས་བབ་གསར་ཁང་གི་པར། ༢༠༢༥།༦།༢༧
Mobile App

འབུམ་རམས་པ་ལྷ་མོ་འཚོའི་དཔེ་དེབ་དབུ་འབྱེད་གནང་། 

༢༠༢༥/༠༦/༢༧
Mobile App

དབུས་གཙང་གཞོན་སྐྱེས་ཚོགས་ཆེན་ཐེངས་དང་པོ་འཚོག་བཞིན་འདུག

༢༠༢༥/༠༦/༢༧
In this handout image released by the Chinese Embassy on June 26, 2025, the first batch of Indian pilgrims at the Manasarovar Lake, in Tibet.
Mobile App

རྒྱ་གར་གྱི་གནས་མཇལ་བ་ཚོ་དངོས་སུ་བོད་ནང་གནས་མཇལ་དུ་ཕྱིན།

༢༠༢༥/༠༦/༢༧
Close view of Chinese PLA combat helicopter in Tibet_January 05 2021
Mobile App

བོད་ནང་གི་ཛ་དྲག་གི་གནས་སྟངས་ལ་གཟིགས་ཞིབ་དགོས་པའི་རེ་སྐུལ་ཞུས། 

༢༠༢༥/༠༦/༢༦
Mobile App

མི་འགྱངས་བར་སྟོབས་ཆེན་རྒྱལ་ཁབ་ལྔ་ཡིས་ཚོགས་ཆེན་འཚོག་རྒྱུ་ཡིན་འདུག 

༢༠༢༥/༠༦/༢༦

མཆན། 11

  1. རྒྱ་གྲོ་བ། says:
    ལོ་ 16 སྔོན།

    རང་གི་འཁོར་ཡུག་ལ་གཙང་སྦྲ་དགོས་པ་དེ་ནི་ཕྱིའི་དངོས་པོ་གཅིག་པོར་མ་གོ་བར་ནང་དུ་སེམས་སུ་ཡང་དེ་ལྟར་གོ་དགོས་པ་ཡིན་ལུགས་བརྗོད་འདུག་ཀྱང། ཡིན་ཡང་རང་གི་ཁོར་ཡུག་དུ་ཁོར་བའི་མི་དེ་ཚོར་ཡང་དེ་ལྟར་མཛའ་མཐུན་དང་རྣམ་འགྱུར་བཟང་པོ་སྟོན་དགོས་པ་ནི་སྨྲ་མི་དགོས། ཡིན་ཡང་རང་ཕྱོགས་ལས་གཞན་ཕྱོགས་ལ་དགའ་བ་དང་དབྱིངས་ཤོར་འདུག་ཟེར་ལུགས་ལ་གདངས་ཅིག་བྱས་ན། གཟུངས་ཕྱུགས་སྐྱིད་ཁྱོད་ཉིད་ཀྱང་ཝང་ལི་ཞུང་ལ་མི་དགའ་བའི་རྣམ་འགྱུར་དངོས་ཤུགས་རྒྱུད་གསུམ་ནས་མངོན་པ་ལགས་ན་དང་པོ་ཁྱེད་ཉིད་ཀྱི་རང་གི་ཁོར་ཡུག་ལ་ལེགས་བཅོས་ཞིག་མ་བྱས་ཚེ་ང་ནམ་ཡང་ཁྱོས་ཉིད་ཀྱི་གསུངས་པའི་ཁཽར་ཡུག་གི་དོ་འཁུར་ལ་ཡིད་ཆེད་བྱེད་པར་དཀའ་མོ་འདུག།།

    Reply
  2. ནད་པ says:
    ལོ་ 16 སྔོན།

    དྲ་གྲོགས་ཀརྨ་རྒྱལ་མཚན་ལགས་སུ། ཕ་སྤྲེལ་དང་མ་བྲག་སྲིན་གཉིས་འདུས་པ་ལས་བྱུང་བའི་བོད་མི་རིགས་ཞེས་པའི་ལོ་རྒྱུས་འདིར་ཁྱེད་ཉིད་ཡིད་ཆེས་བྱེད་པ་འདི་ནོར་འཁྲུལ་ཞིག་རེད། མི་ལོ་དུང་ཕྱུར་མང་པོའི་ཡར་སྔོན་ནས་འཛམ་གླིང་འདིར་སྐྱེས་ལྡན་ཚང་མའི་མེས་པོ་ནི།
    རིགས་རྫས་རྐྱང་པ་གཅིག་ལས་གྲུབ་པའི་སྲོག་ལྡན་ཨ་མི་བ་ནས་རིམ་བཞིན་འཕེལ་སྐྱེས་བྱུང་སྟེ།
    མཐར་ད་ལྟའི་འགྲོ་བ་མིའི་རིགས་ཀྱི་ཆེས་རྙོག་འཛིན་ཆེ་བའི་མིའི་ལུས་ཕུང་དང་། སྐྱེས་དངོས་དབང་རྩའི་ཕྲ་ཕུང་གི་དྲ་བ་ཕྲ་མོ་མིའི་ཀླད་ཁམས་ཀྱི་མ་ལག་ཡོངས་རྫོགས་རང་བྱུང་གདམས་གསེས་ཁྲོད་དུ་བྱུང་བ་ཞིག་རེད།

    Reply
  3. ཨ་ལལ says:
    ལོ་ 16 སྔོན།

    སྐུ་ཞབས་དགའ་བ་ལགས།ཐུགས་མ་ཁྲོས།དེ་འདྲ་གནང་ན་ཁྲག་ཤེད་ན་ཡོང་།ཀུ་རེ་ཡིན།དངོས་གནས་བཤད་པ་དོན་གནས་རེད་ཡ།ཕུགས་བསམ་ཡོད་ཀི།དབྱེ་ཞིབ་མང་ཙམ་གནང་རོགས་མཛོད།སྤྱིར་སྐད་ཆ་མ་བཤད་གོང་ལ་གྲ་སྒྲིག་འདེང་བ་ཞིག་ལོས་དགོས།ཁ་ནས་རི་འདྲ་བཤད།དཔང་རྟགས་ཤིག་ཙམ་ཡང་སྟོན་རྒྱུ་མེད་པ་དེ་ཚོ་བྱེད་སྟངས་ལ་ཅིག་སུན་གི་རཱ།

    Reply
  4. ཀརྨ་རྒྱལ་མཚན། says:
    ལོ་ 16 སྔོན།

    ལྷག་བསམ་དུང་ལྟར་དཀར་
    ལྷག་བསམ་དུང་ལྟར་དཀར་ཞིང་རང་གི་མི་རིགས་ལ་ལ་རྒྱ་དང་བཅས་བསམ་ཚུལ་དགའ་ཞིག་ཞུ་ཆོག་པ་ཞིག་ང་ཚོ་བོད་མི་རིགས་འདི་ནི་མི་རིགས་གཞན་དང་མི་འདྲ་བའི་ཕ་སྤྲེའུ་བྱང་ཆུབ་སེམས་དཔའ་དང་མ་བྲག་སྲིན་མོ་གཉིས་འདུས་པ་ལས་བྱུང་བའི་མི་རིགས་ཁྱད་པར་ཅན་ཞིག་ཡིན་པ་ང་ཚོ་བོད་པ་ཚང་མས་ངོས་འཛིན་བྱེད་ཀྱི་ཡོད་ལ་དེ་བཞིན་ལྷན་སྐྱེས་སུ་ཡོད་པའི་བྱམས་པ་དང་སྙིང་རྗེ་ཆེ་བ་དམ་པའི་ཆོས་ལ་རང་བཞིན་གྱི་བློ་ཁ་ཕྱོགས་པ་ཞིག་རེད་དེ་ནི་འཛམ་གླིང་འདིའི་ནང་གཟི་བརྗིད་ཞིག་ཡིན།
    སྤྱིར་དེང་དུས་ཡར་ཐོན་ཅན་གྱི་མི་ཡི་སྤྱི་ཚོགས་འདིར་ང་ཚོས་མིག་དཔེ་ཡར་བལྟ་ཞིག་བྱེད་པ་ཡིན་ན་ཁོང་ཚོས་ཡར་ཐོན་ཅན་གྱི་སྤྱི་ཚོགས་དེ་གཙོ་བོ་ཤེས་ཡོན་དཔལ་འབྱོར་དེ་བཞིན་མཚན་རིགས་སོགས་ཚད་མཐོ་པོ་ཞིག་ཏུ་སླེབ་པ་ལ་བརྟེན་ནས་ཡར་རྒྱས་ཕྱིན་པ་ཞིག་ཡིན་ལ་དེ་ལྟ་བུའི་སྤྱི་ཚོགས་དེ་ནི་དེང་དུས་འཛམ་གླིང་ནང་ཡར་ཐོན་དང་བསྔགས་འོས་སུ་འཛིན་གྱི་ཡོད།
    ང་ཚོ་བོད་པ་ལོ་རྒྱུས་ལྡན་པའི་མི་རིགས་ཞིག་ཡིན་པའི་ཆ་ནས་ཁོང་ཚོ་ལས་ལྷག་པ་ཞིག་བྱེད་མ་ཐུབ་ཀྱང་ཇི་མ་ཇི་བཞིན་ཞིག་ངེས་པར་བྱེད་ཐུབ་དགོས་པར་སེམས་
    འགྲོ་བ་མི་ནི་དུད་འགྲོ་དང་རྣམ་པ་ཀུན་ནས་མི་མཚུངས་ཤིང་མི་ཞེས་པ་ཀླད་ཚད་དང་ཤེས་ཡོན་ཅན་ཞིག་ལ་སོང་དུད་འགྲོ་ལྟ་བུའི་སྤྱོད་པ་རྣམ་པ་ཀུན་ནས་བྱེད་རྒྱུ་མེད་དེར་བརྟེན་ང་ཚོས་ཤེས་དགོས་པ་ཞིག་ལ་གཙང་སྦྲ་འཕྲོད་བསྟེན་དང་ཁོར་ཡུག་སྲུང་སྐྱོབས་ཟེར་ནས་རྒྱ་ཆེན་པོ་ཞིག་བཤད་རུང་མ་བཤད་རུང་སོ་སོའི་ཉིན་རེའི་འཚོ་བའི་ནང་ག་རི་ཆག་གི་ཡོད་མེད་དེ་མ་ཤེས་པར་ང་ཚོའི་སྤྱི་ཚོགས་ནང་མི་མང་པོ་ལ་ཡོད་པའི་ནད་རིགས་ཕོ་བའི་ནད་དེ་བཞིན་སྙིང་གི་ནད་ཁྲག་གི་ནད་ལུས་ཀྱི་མདངས་བཅུད་ཉམས་པའི་ནད་དེ་འདྲ་ཤིན་ཏུ་མང་པོ་ཡོད་
    གཙང་སྦྲ་འཕྲོད་བསྟེན་དང་ཁོར་ཡུག་སྲུང་སྐྱོབས་ཟེར་བའི་སྦིར་གཏམ་ཆེན་པོ་དེ་འདྲ་མང་པོ་བཤད་པ་ལས་དང་པོ་སོ་སོའི་ཉིན་རེའི་འཚོ་བ་ཟེར་བ་དེ་དངོས་ཡོད་གནསཚུལ་དང་ཁ་ཡོད་ལག་ཡོད་ཡིན་དཔེར་ན་ང་ཚོ་བོད་པའི་སྤྱི་ཚོགས་ནང་དོ་སྣང་ཤིན་ཏུ་ཉུང་བའི་ཟས་རིགས་གང་དང་གང་གི་ལུས་ལ་གནོད་ཀྱི་ཡོད་མེད་ཟས་རིགས་ནང་ནས་འབྲུ་དང་བྲོ་ཡི་རིགས། སྔོ་ཚལ་དང་ཤིང་ཏོག་གི་རིགས། ཤ་དང་འོ་མའི་རིགས།་སྣུམ་དང་ཚིལ་གྱི་རིགས།
    དེ་ཚོ་བེད་སྤྱོད་གཏོང་སྟངས་ག་འདྲ་ཡིན་མིན།དེ་བཞིན་ཉིན་རེ་ཆུ་ག་ཚོད་འཐུང་དགོས་ཀྱི་ཡོད་མེད་
    སྙིང་གི་ནད་ག་འདྲ་བྱེད་ནས་ཡོང་གི་ཡོད་མེད། དེ་ལ་གང་དང་གང་གི་ཕན་གྱི་ཡོད་པ་ཕོ་བའི་ནད་སོགས་ཟས་མ་ཞུ་བའི་ནད་རིགས་ག་འདྲ་བྱེད་ནས་ཡོང་གི་ཡོད་མེད་སྐོར་ཤེས་པ་གནང་རྒྱུ་ནི་ཤིན་ཏུ་གལ་ཆེན་ཡིན་པ་སོང་།ཉེ་ལམ་བོད་སེར་རྟ་དགོན་པའི་མཁས་དབང་ཚུལ་ཁྲིམས་བློ་གྲོས་ནས་བརྩམས་གནང་བའི་ཕྱག་དེབ་ཤེན་ཏུ་ལེགས་པ་ཞིག་འདུག་པ་དེར་གཟིགས་རྒྱུ་དང་དེ་བཞིན་ཕྱིས་ནས་དེ་སྐོར་ཕྱི་རྒྱལ་གྱི་སྐད་དུ་ཡོད་པའི་གློག་བརྙན་ཤིན་ཏུ་ལེགས་པ་དེ་འདྲ་ཡོད་པས་དེ་དག་རང་སྐད་དུ་བསྒྱུར་ཐུབ་ན་ཅི་མ་རུང་སྙམ་

    Reply
  5. གཡུ་དྲུག་དཀར། says:
    ལོ་ 16 སྔོན།

    བཀླགས་ཟིན། དངོས་ཡོད་རེད་ང་ཚོའི་སྤྱི་ཚོགས་འདིར་བཤད་ཕོད་མཁན་མྰ་ཁེ་སུ་ཡི་སྨྲ་ར་ལས་མང་ཡང་བསྒྲུབ་ཕོད་མཁན་ལེ་ཉིན་གྱི་སྐྲ་ལོ་ལས་ཉུང་པས་ཁ་བཤད་ལག་ལེན་བྱེད་ཐུབ་པའི་ཨ་ཅེ་ཁྱེད་ལ་མ་ཤི་བར་རྒྱབ་སྐྱོར་ཡོད་ལ་མུ་མཐུད་ནས་ཕྲིས་ཤིག

    Reply
  6. དགའ་བ། says:
    ལོ་ 16 སྔོན།

    ཁྱོད་ཀྱིས་བཤད་འདོད་པའི་ནང་དོན་གཙོ་བོ་ཉེ་ཆར་ཁྱེད་ཚོ་འགའ་ཤས་ཀྱིས་རྒྱ་རིགས་རྩོམ་པ་པོ་ཝང་ལི་ཞོན་ལ་ངོ་རྒོལ་བྱས་པ་དེ་ནོར་འཁྲུལ་མིན་པའི་ཞེ་འདོད་ཡིན་ཚོད་རེད། ངས་ཀྱང་ཁྱེད་ཚོས་རང་གི་བསམ་ཚུལ་དང་འདོད་ཚུལ་ཞིག་འཁྱེར་ནས་ཝང་ལི་ཞོན་ལ་ངོ་རྒོལ་བྱས་པར་དགག་བྱ་གཏན་ནས་བྱེད་ཀྱི་མེད། འོན་ཀྱང་གནད་དུ་འཁེལ་བའི་ངོ་རྒོལ་ནི་རྒྱུ་མཚན་དང་བདེན་དཔང་གིས་བྱེད་དགོས་ཀྱི་ཡོད་པ་ཁྱེད་ཚོས་ལོས་མཁྱེན་ཀྱང་། ཁྱེད་དག་གིས་དེ་ལས་ལྡོག་སྟེ་གདོང་རིས་དམར་པོ་དང་གནོད་བྱེད་མེད་པའི་ཚིག་རིས་རྩུབ་པོས་ངོ་རྒོལ་བྱས་ཚོད་འདུག དེ་ནི་ནོར་འཁྲུལ་རེད་ལ། ནང་མཚང་ངན་པ་ཕྱིར་བསྟན་པའི་ངན་རྟགས་ཤིག་ཀྱང་རེད། ཁོང་བོད་ཀྱི་བསམ་བློའི་གསང་མྱུལ་བ་ཞིག་ཡིན་པའི་དབང་དུ་བཏང་ན་གསང་བ་ཡོད་ཚད་ཁྱེད་ཚོས་སྤྲད་ཟིན་འདུག

    Reply
  7. གནས་ཚང་། says:
    ལོ་ 16 སྔོན།

    ད་ཡིན་ན་པེ་ཡག་པོ་བྱུང་ཤག བོད་པའི་ཨ་གསར་ཚ་བོ་དང་རང་ཚུགས་མི་ཟིན་པར་དགག་པ་ཚ་ཐག་ཆོད་ཐེབས་ཤག

    Reply
  8. ཐུབ་བསྟན་ says:
    ལོ་ 16 སྔོན།

    བདེན་གི་མོ།

    Reply
  9. ཨ་རིག་གླེན་རྒན། says:
    ལོ་ 16 སྔོན།

    བསམ་བློའི་གད་སྙིག་གཙང་བཀྲུ་བྱེད་རྒྱུར་དུས་ཚོད་རིང་ཙམ་དང་རྩོད་པ་མང་ཙམ་དགོས་པས་མུ་མཐུད་རོགས།

    Reply
  10. བོད། ཤ་ཁྲག་རུས་གསུམ། says:
    ལོ་ 16 སྔོན།

    དངོས་ནས་རེད། འོན་ཀྱང་། ངེད་ཅག་བཤད་ཤེས་པ་ནས་འགུལ་ཤེས་པར་འགྱུར་མཁན་གྱི་མི་ཡི་གྲངས་ཀ་ནི་དངོས་ནས་ཉུང་ངུ་ཞིག་ཡོད་པ་དེ་ཡང་བདག་མེད་དུ་ལུས་པའི་སྤྱི་ཚོགས་འདི་ལ་དངོས་ནས་ང་དང་ང་ལྟ་བུ་གད་སྙིགས་ཆེས་མང་བོ་ཞིག་ཡོད་པ་རེད། དེ་དག་གིས་རང་རང་གི་གད་སྙིགས་འདི་དག་གཙང་བཟོ་བྱེད་པར་ཉིད་ཀྱིས་རྩོམ་ཡིག་འདིས་ནུས་པ་ཞིག་ཐོན་ཐུབ་པར་ཤོག

    Reply
  11. སོག་ཤོད་ལྷག་བསམ། says:
    ལོ་ 16 སྔོན།

    བཀླགས་གཞིན་ཡོད

    Reply

དཔྱད་མཆན་སྤེལ། Cancel reply

Your email address will not be published. Required fields are marked *

སྤྱི་ཚོགས་དྲ་གནས།

ཁྱབ་བསྒྲགས།

དྲ་ངོས་ཀྱི་གནས་ཚུལ་ཚང་མའི་པར་དབང་བོད་ཀྱི་དུས་བབ་ལ་ཡོད།

གློག་འཕྲིན།

editor@tibettimes.net | office@tibettimes.net

ཁ་པར།

+91-98823-47075 | +91-92189-38041 | +91-81972-44372

Welcome Back!

OR

Login to your account below

Forgotten Password?

Retrieve your password

Please enter your username or email address to reset your password.

Log In

Add New Playlist

No Result
ཆ་ཚང་གཟིགས།
  • གསར་འགྱུར།
    • ༸གོང་ས་མཆོག གསར་འགྱུར།
    • བཙན་བྱོལ།
    • བོད་ནང་།
    • རྒྱལ་སྤྱི།
    • རྒྱ་ནག
    • ༧གོང་ས་མཆོག གསུང་འཕྲིན།
  • རྩོམ་ཡིག།
    • བསམ་ཚུལ།
    • སྒྱུར་རྩོམ།
  • བརྙན་མཛོད།
    • གླེང་མོལ།
    • མེ་ལོང་།
    • ང་ཡི་བཙན་བྱོལ་བ།
    • གངས་ཕྲུག
    • དྲ་བརྙན་གསར་འགྱུར།
  • ཁྱབ་བསྒྲགས།
    • གླ་ཡོད་ཁྱབ་བསྒྲགས།
    • དུས་བབ་ཀྱི་གསལ་བསྒྲགས།
    • གླ་ཡོད་རིན་གོང་།
  • པར་མཛོད།
    • ང་ཚོའི་པར།
    • གསང་འགྱུར་པར་རིས།
  • དཔེ་དེབ།
  • རྩོམ་སྒྲིག་པའི་གཏམ།
  • ང་ཚོའི་སྐོར།
    • བོད་ཀྱི་དུས་བབ་ཀྱི་བྱུང་རིམ།
    • རྩ་ཆེའི་གསུང་འཕྲིན་ཁག
    • English
    • Chinese