ཡུ་གུར་བས་གྱེན་ལང་བྱས།

ཁ་སང་ཕྱི་དྲོ་ཡུ་གུར་ནང་ཞི་བའི་གྱེན་ལང་ཆེན་པོ་ཞིག་བྱུང་སྟེ། མི་ ༡༤༠ ལྷག་རྐྱེན་ལམ་དུ་ཕྱིན་ཡོད་པ་དང་། མི་ ༨༠༠ ལྷག་ལ་རྨས་སྐྱོན་ཕོག་ཡོད་འདུག དེ་བཞིན་གཞུང་གི་ལས་ཁུངས་དང་ཚོང་ཁང་། རླངས་འཁོར་དང་སྤྱི་དམངས་ཀྱི་སྡོད་ཤག་གང་མང་ཞིག་ལ་གཏོར་རྐྱོན་ཚབས་ཆེན་བཏང་ཡོད་འདུག

ཁ་སང་ཕྱི་ཚེས་ ༥ ཉིན་གཟའ་ཉི་མའི་ཕྱི་དྲོའི་པེ་ཅིན་གྱི་ཆུ་ཚོད་ ༥ ཙམ་ལ། ཡུ་གུར་ས་ཁུལ་གྱི་ཨོ་ལོ་མོའུ་ཆུ་ཟེར་བའི་གྲོང་ཁྱེར་ནང་། ཡུ་གུར་བ་ ༡༠༠ ལྷག་གིས་རྒྱ་ནག་གཞུང་ལ་ཞི་བའི་རྔམ་སྟོན་ཁྲོམ་སྐོར་གཞི་བརྒྱ་ཆེན་པོ་ཞིག་བྱས་ཡོད་པ་དང་། ཆུ་ཚོད་སྐར་མ་བཅུ་ཙམ་གྱི་རྗེས་ནས་ས་གནས་ཉེན་རྟོག་སྐོར་སྲུང་དམག་མི་ཕོན་ཆེན་སླེབས་ཏེ། ཞི་བའི་ངོ་རྒོལ་བ་དག་གི་ཁྲོད་གང་བྱུང་དུ་དུག་རླངས་གཏོར་བ་དང་མེ་མདའ་བརྒྱབས་སོགས་དྲག་ཆས་བེད་སྤྱོད་བཏང་སྟབས། ཕྱོགས་སོ་སོ་ནས་ཡུ་གུར་བ་ངོ་རྒོལ་བ་སྟོང་ཕྲག་མང་བོ་འདུས་ཏེ་གཞུང་གི་ལས་ཁུང་དང་འགྲིམ་འགྲུལ་རླངས་འཁོར། ཉེན་རྟོག་པའི་རླངས་འཁོར་སོགས་ལ་མེ་སྐྱོན་དང་གཏོར་བཅོམ་ཚབས་ཆེན་བཏང་ཡོད་པ་མ་ཟད། ཟིང་འཁྲུག་དེའི་ཁྲོད་ཉུང་མཐར་ཕྱོགས་གཉིས་ཀའི་མི་བརྒྱ་དང་བཞི་བཅུ་ ༡༤༠ ལྷག་རྐྱེན་ལམ་དུ་བཏང་ཡོད་པ་དང་། མི་བརྒྱད་བརྒྱ་ ༨༠༠ ལྷག་ལ་རྨས་སྐྱོན་ཕོག་ཡོད་འདུག ཡུ་གུར་རིང་སྐྱོང་ལྗོངས་ཀྱི་གཞུང་འབྲེལ་གསར་ཁང་གི་སྤྱི་ཁྱབ་པ་ཝོའུ་ནོན་གྱིས་བརྗོད་པ་ལྟར་ན། ཟིང་འཁྲུག་འདིའི་ཁྲོད་རླངས་འཁོར་ཉིས་བརྒྱ་དྲུག་བཅུ་ ༢༦༠ ལྷག་དང་། ཚོང་ཁང་ཉིས་བརྒྱ་ ༢༠༠ ལྷག་ལ་གཏོར་སྐྱོན་ཐེབས་ཡོད་འདུག

རྒྱ་ནག་གཞུང་གིས་ཐེངས་འདིའི་ངོ་རྒོལ་ཟིང་འཁྲུག་སློང་མཁན་གྱི་གཏེ་བོ་ནི། ཨ་རིར་གནས་བསྡོད་རྒྱལ་སྤྱིའི་ཡུ་གུར་བཙན་བྱོལ་བའི་དབུ་ཁྲིད་ལྕམ་རིས་བྷིས་ཡ་ཁཱ་ཌར་མཆོག་ཡིན་ཚུལ་སྐྱོན་འཛུགས་བྱེད་བཞིན་ཡོད་པ་དང་།  བྷིས་བྷིས་སུའི་གསར་འགོད་པ་ཁི་རུ་སི་ཧོགྷི་ཡིས་ཧྲང་ཧེ་ནས་བརྗོད་པ་ལྟར་ན། དྲག་ཟིང་ཆེ་བའི་ངོ་རྒོལ་འདི་ནི་ལོ་ངོ་ཉི་ཤུའི་སྔོན་ལ་གནམ་བདེ་སྒོ་མོ་ཆེའི་དོན་རྐྱེན་གྱི་རྗེས་ནས་བྱུང་བ་ཐེངས་དང་པོ་ཡིན་འདུག རྒྱ་ནག་གི་གཞུང་འབྲེལ་གསར་ལམ་ཁག་ཏུ་ཡུ་གུར་བ་བརྒྱ་ཕྲག་འགའ་འཛིན་བཞུང་བྱས་ཟིན་པའི་གནས་ཚུལ་བཀོད་འདུག་ཀྱང་། ད་ལྟ་ཡུ་གུར་ཁུལ་དུ་ཁ་པར་དང་དྲ་རྒྱ་ཁག་ཚང་མ་དམ་དྲག་བྱས་ཟིན་སྟབས། སྐབས་ཐོག་གི་གནས་ཚུལ་གང་ཡང་ཤེས་རྟོགས་བྱུང་ཡོད་མི་འདུག དེ་རིང་སྔ་དྲོ་ཡུ་གུར་ས་ཁུལ་གྱི་མི་ཞིག་གི་ཕྱི་ཕྱོགས་སུ་བརྗོད་པ་ལྟར་ན། དམག་མའི་རླངས་འཁོར་ནང་ཡུ་གུར་བ་བསད་པའི་ཕུང་པོ་མང་པོ་དབོར་འདྲེན་བྱེད་བཞིན་འདུག་ཟེར། ༼གོང་གི་གནས་ཚུལ་དེ་གནམ་མཁའ་བསྟན་འཛིན་ལགས་ཀྱི་ཟིན་བྲིས་ལས་འདྲེན་བཀོད་བྱས༽

དེ་རིང་སྔ་དྲོ་གོང་གི་གནད་དོན་དེའི་སྐོར་ལ་ཀྲུང་གོའི་དྲིལ་བསྒྲགས་གསར་ལམ་སོགས་སུ་གནས་ཚུལ་བཀོད་པ་ལྟར་ན།  ཁ་སང་ཕྱི་ཚེས་ ༥ ཉིན་གྱི་དགོང་མོའི་ཆུ་ཚོད་ ༨ ནས་ ༡༡ བར་ཞིན་ཅང་བུ་ལུ་མུ་ཆུའི་གྲོང་ཁྱེར་དུ་མི་དམངས་གྱེན་ལོག་གི་དོན་རྐྱེན་བྱུང་སྟེ། སྤྱི་དམངས་དང་ཉེན་རྟོག་པ་མང་པོ་ཞིག་ལ་ཤི་རྨས་ཚབས་ཆེན་བྱུང་། རྒྱུས་ལོན་བྱུང་བ་ལྟར་ན། དེ་ནི་མི་རིགས་ཁ་བྲལ་རིང་ལུགས་པ་རིག་པུས་ཡ་ཟེར་བ་ཞིག་གིས་མགོ་འཛིན་བྱས་པའི ” འཛམ་གླིང་ཡུ་གུར་མི་རིགས་འཐུས་མི་ཚོགས་ཆེན ” ཟེར་བས། དེ་རིང་དྲ་རྒྱ་སོགས་བརྒྱུད་ལམ་གང་མང་བེད་སྤྱད་དེ། ” སྙིང་སྟོབས་བསྐྱེད་རོགས ” དང་།  ” བྱ་བ་ཆེན་པོ་བསྒྲུབ་དགོས ” ཟེར་བའི་སོགས་ཀྱི་འུ་སྒྲོག་བྱས་ཏེ། མི་དམངས་འོས་ལངས་ཀྱི་ཟིང་འཁྲུག་དོན་རྐྱེན་དེ་བྱུང་བ་རེད།

ཞིན་ཅང་ཏང་ཨུ་ཧྲུའུ་ཅི་དང་། དམངས་ཆེན་སྤྱི་དཔོན་གཞོན་པའི་འགན་གཅིག་ལྕོགས་སུ་བཞེས་པ་དེས་གསར་ལྷན་ཚོགས་སྟེང་བསྒྲགས་པའི་གནས་ཚུལ་ལྟར་ན། ཐེངས་འདིའི་མི་དམངས་གྱེན་ལོགས་ཁྲོད། མི ༡༤༠ ཤི་རྐྱེན་ལམ་དུ་ཕྱིན་པ་དང་། གཞན་མི་ ༨༢༨ ཙམ་ལ་རྨས་སྐྱོན་ཕོག རླངས་འཁོར་ ༢༦༡ ཙམ་མེར་བསྒྲོན་པ་དང་། ཚོང་ཁང་ ༢༠༣ དང་། སྤྱི་དམངས་ཀྱི་སྡོད་ཤག་ ༡༤  ཙམ་ལ་གཏོར་བཅོམ་བཏང་། ཞེས་བརྗོད་འདུག

གོང་གི་གནས་ཚུལ་དེར་རྒྱ་ནག་གཞུང་འབྲེལ་གྱི་གསར་འགྱུར་བརྒྱུད་ལམ་ཁག་ཏུ། ༼ ཡུ་གུར་གྱི་ ༧. ༥ དོན་རྐྱེན་ ༽ ཞེས་སྐྱོན་བརྗོད་དང་འཁྱོག་བརྗོད་འདྲ་མིན་བྱེད་ཀྱིན་ཡོད་འདུག་ལ། མི་ཤི་རྨས་ཀྱི་གནས་ཚུལ་ཁ་གསལ་གང་ཡང་བཀོད་མི་འདུག