ད་ལོའི་ཟླ་ལྔ་བའི་ནང་ཀན་སུའུ་ཞིང་ཆེན་ཀན་ལྷོ་ཁུལ་བསང་ཆུ་རྫོང༌། བླ་བྲང་དགོན་པའི་དགེ་འདུན་པ་ཙ་ཡེ་སྐལ་བཟང་རྒྱ་མཚོ་ཆབ་སྲིད་ཀྱི་དོགས་གཞིའི་འོག བསང་ཆུ་རྫོང་གི་ཉེན་རྟོག་པས་དགོན་པ་ནས་འཇུ་བཟུང་བྱས་ཡོད་འདུག
དེ་ཡང་ ༢༠༠༩ ལོའི་ཟླ་ ༥ ཚེས་ ༢༢ ཉིན་དགོང་མོ་བླ་བྲང་དགོན་པའི་དགེ་འདུན་པ་ཙ་ཡེ་སྐལ་བཟང་རྒྱ་མཚོ་རང་གི་སྡོད་ཤག་ནས་བསང་ཆུ་རྫོང་གི་ཉེན་རྟོག་པས་འཇུ་བཟུང་གིས་མགོ་ལ་རས་ནག་པོ་གཡོགས་ཏེ་བཙན་འཁྲིད་བྱས་ཡོད་པ་དང༌། ཁོང་འཇུ་བཟུང་མ་བྱས་པའི་ཉིན་ཤས་སྔོན་ནས་བསང་ཆུ་རྫོང་གི་ཉེན་རྟོག་པའི་ལྟ་ཞིབ་ནན་པོའི་འོག་གནས་ཤིང༌། རང་ལོ་ ༣༥ ཙམ་སོན་པའི་སྐལ་བཟང་རྒྱ་མཚོ་ནི་སྐྱེས་ཡུལ་བསང་ཆུ་རྫོང་ཙ་ཡུལ་སྡེ་པ་ནས་ཡིན་པ་དང༌། བླ་བྲང་དགོན་དུ་གྲྭ་པ་བྱས་ཏེ་ལོ་མང་འགྲོ་གི་ཡོད་ཅིང༌། བླ་བྲང་དགོན་པའི་མཚན་ཉིད་གྲྭ་ཚང་གི་མཛོད་འཛིན་གྲྭའི་སློབ་གཉེར་བ་ཡིན་པ་རེད།
རྒྱ་གཞུང་གིས་བོད་ནང་མུ་མཐུད་བོད་མིའི་ཐོག་རྡུང་རྡེག་ཚ་ནན་གཏོང་བའི་ལས་འགུལ་སྤེལ་ཏེ་ ༢༠༠༨ ལོའི་ཞི་རྒོལ་ནང་འཛུལ་ཞུགས་བྱེད་མཁན་བོད་མིའི་ཐོག་ཞིབ་བཤེར་བྱེད་ཤུགས་ཆེ་རུ་བཏང་སྟེ། འཇུ་བཟུང་བྱེད་པ་དང༌། ལྷག་པར་དུ་བོད་ཀྱི་དགོན་སྡེ་ཁག་ལ་དྲག་རྡུང་ལས་འགུལ་སྤེལ་བའི་གཙོ་གནད་དུ་བཟུང་སྟེ་ཆོས་བྱེད་མི་སྣ་གང་བྱུང་འཇུ་བཟུང་དང༌། གར་སོང་ཆ་མེད་དུ་གྱུར་བ། མནར་གཅོད་དབང་གིས་རྐྱེན་འདས་སུ་འགྱུར་བ་དང་དབང་པོ་སྐྱོན་ཅན་དུ་འགྱུར་བ། དྲང་བདེན་ཁྲིམས་བཤེར་མེད་པར་ཁྲིམས་ཆད་ལྗིད་པོ་གཅོད་པ། དགོན་པ་ནས་ཕྱིར་འབུད་བྱེད་པ་སོགས་བོད་མིའི་གཞི་རྩའི་འགྲོ་བ་མིའི་ཐོབ་ཐང་ལ་རྡོག་རོལ་ཚབས་ཆེན་འཕོག་གིན་ཡོད་པ་རེད།
༢༠༠༩ ལོའི་རྒྱལ་ཡོངས་ཕྱོགས་བསྡུས་བཅོས་སྐྱོང་ལས་ཀའི་གཙོ་གནད། རྡུང་རྡེག་ཚ་ནན་གྱི་ལས་འགུལ་གཏིང་ཟབ་སྤེལ་རྒྱུ། ཞེས་པའི་ལས་དོན་གཙོ་གནད་བཀོད་སྒྲིག་ཡིག་ཆའི་དོན་ཚན་བཅོ་ལྔ་པར། བོད་ལྗོངས་དང་དེ་མིན་བོད་ཁུལ་གཞན་དག་ནང་རྡུང་གཅོག་འཕྲོག་བསྲེག་གི་ལས་འགུལ་ནང་འཛུལ་ཞུགས་བྱས་ཀྱང་ཉེས་ཆད་ཕོག་མེད་པ། ཁྲིམས་འགལ་གྱི་རྒྱལ་མཚམས་བརྒལ་ནས་ཕྱིར་ལོག་བྱས་པ། དགོན་སྡེ་ནས་ཕྱིར་འཕུད་བྱས་པའི་མི་སྣ་བཅས་ལ་དོ་དམ་ལས་དོན་ཡག་པོ་སྤེལ་ཏེ། བྱ་ཐབས་གནས་འཁེལ་ལག་བསྟར་བྱ་རྒྱུར་འགན་ལེན་ཐུབ་པ་བྱེད་དགོས་ཞེས་འཁོད་འདུག ཅེས་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་གནས་ཚུལ་སྤེལ་འདུག
ཁོང་དང་ཁོང་་འདྲ་བའི་ང་ཚོ་ཆོལ་གསུམ་བོད་མིའི་དཔའ་བོ་དཔའ་མོའི་ཁྱུ་ཚོགས་རྣམས་གང་མགྱོགས་དམར་པོའི་གཞུང་གི་བཙན་འོག་ནས་གློད་་བཀྲོལ་་ཐོབ་པ་དང། རྒྱལ་སྤྱིའི་སྤྱི་ཚོགས་དང་འདྲ་བར་ང་ཚོ་ཡང་ནམ་ཞིག་བདེན་པའི་མཐའ་གསལ་ཏེ་ཁྲིམས་གཏུགས་བྱ་རྒྱུའི་གོ་སྐབསཤིག་ཐོབ་པར་རེ་བ་དང་ཡིད་ཆེས་བྱ་བཞིན་ཡོད། ང་ཚོས་གནས་ཚུལ་དེ་ལྟར་བཀོད་སྐབས་ངེས་པར་གོང་ལྟར་ལོ་་རྒྱུས་གང་ཁ་གསལ་བ་དང་ཕ་མིང་དང་སྐྱེས་ཡུལ་བཀོད་རྒྱུ་འདི་གལ་ཆེན་པོ་འདུག དེ་མིན་མིང་འདྲ་པོ་དེ་འདྲ་མང་པོ་འདུག་པས་གློད་བཀྲོལ་བཏང་བ་དང་འཛིན་བཟུང་བྱ་སྐབས་མི་ནོར་ཉེན་འདུག དེ་ང་རང་མི་ཆུང་གི་བསམ་ཤེས་ཡིན། གནས་ཚུལ་དེ་རིགས་དཔང་པོ་འཕེར་ཚེ་དྲ་གནས་ཐོག་སྔར་བཞིན་སྤེལ་ཐུབ་ན་ང་ཚོ་དོ་སྣང་ཅན་ ཚོར་ཧ་ཅང་ཕན་ཐོགས་འདུག
བོད་མི་ག་ཚོད་ཅིག་འདི་བ་ཚང་གིས་གསོད་བརྡུང་གཅར་གསུམ་བྱེད་རྩིས་ཡོད་ན། དཀོན་མཆོག་མཁྱེན། བོད་པ་ཚང་གི་གཙོ་བའི་ཉེས་མེད་ཀྱི་དྲང་བདེན་རྩོད་མཁན་གང་ན་སུ་ཡོད་པ་དེ་དག་འདི་བ་ཚང་གིས་འདྲ་རུ་བཟུང་འདུག་པ་འདི་ནི་ལོ་རྒྱུས་སྟེང་གི་ནག་ཉེས་དང་ནོར་འཁྲུལ་ཚབ་ཆེན་ཞིག་གི་སྔོན་འགྲོ་མ་ཡིན་ནམ།