དྲ་ཐོག་ནས་བསམ་ཤོག་འཕངས་པ་ལྟར་ན། ལྷ་ས་ནི་རྒྱ་ནག་གི་གྲོང་ཁྱེར་སྒྱིད་ལུག་ཨང་གཉིས་པ་དེ་རེད་ཟེར།
རྒྱ་ནག་གིས་གྲོང་ཁྱེར་བྲེལ་བ་ཆེ་ཤོས་ ༡༢ དང་སྒྱིད་ལུག་ཆེ་ཤོས་ཀྱི་གྲོང་ཁྱེར་རྣམས་ལ་དྲ་རྒྱའི་སྟེང་ནས་བསམ་ཤོག་བསྡུས་པ་ལྟར་ན། ལྷ་ས་ནི་རྒྱ་ནག་ནང་གི་གྲོང་ཁྱེར་སྒྱིད་ལུག་ཨང་གཉིས་པ་དེ་རེད་ཟེར། ཡིན་ཡང་ལྷ་སར་གནས་སྡོད་བྱེད་མཁན་དང་ཡུལ་སྐོར་བ་རྣམས་ཀྱིས་སྒྱིག་ལུག་ཅེས་པའི་ཚིག་འདི་ནི་འོས་འཚམ་མིན་པར་འདོད་ལ། ཞིང་ཆེན་གཞན་དང་བསྡུར་ན་ལྷ་ས་གྲོང་ཁྱེར་ཏུ་འགྲན་རྩོད་ཀྱི་རྣམ་པ་དེ་མི་འདུག་ཟེར་ལ། དེ་བས་སྒྱིག་ལུག་གི་ཚབ་ཏུ་ལྷོད་གཡེང་དང་སྣང་མེད་ལྟ་བུ་ཞིག་སྤྱད་ན་འོས་པར་བརྗོད།
རྒྱ་ནག་གི་གྲོང་ཁྱེར་བྲེལ་བ་ཆེ་ཤོས་ནི་ཧོང་ཀོང་ཡིན་པ་དང་། སྒྱིད་ལུག་ཆེ་ཤོས་ནི་ལི་ཅང་ཡིན་འདུག
ལྷ་ས་གྲོང་ཁྱེར་གྱི་སྐོར་ལ་བསམ་ཚུལ་འདོན་མཁན་མཐའ་མ་དེས་བཤད་དོན། བོད་ནང་དུ་འཚོ་བ་སྐྱིད་པོ་ཞིག་འཚོལ་མཁན་ཚང་མ་འདིར་ཡོང་གི་ཡོད་པ་རེད། ལྷ་སའི་བོད་མིའི་སྲོལ་རྒྱུན་དང་ཆོས་ལུགས་ཀྱི་མཁའ་དབུགས་དེས་མི་རྣམས་ལ་ལས་ཀ་ནི་ཕྱི་དངོས་པོའི་དོན་དག་ཅིག་ཡིན་པར་ཚོར་དུ་འཇུག་ལ། མི་མང་པོ་ཞིག་ལྷ་ས་ནས་ཕྱིར་སོ་སོའི་ཕ་ཡུལ་དུ་ལོག་རྗེས་ལས་ཀ་དོར་གི་ཡོད་པ་རེད་ཟེར།
ལྷ་ས་ན་ཚོང་ལས་གཉེར་མཁན་རུང་ཀྲང་ཟེར་མཁན་ཞིག་གིས་བཤད་དོན། ལྷ་ས་ལ་སྒྱིད་ལུག་ལབ་ན་འོས་འཚམ་མ་རེད། སྣང་བ་ལྷོད་པོ་རེད། གཟའ་མཇུག་ལ་ཇ་ཁང་ཚང་མའི་ནང་ཇ་འཐུང་མཁན་གྱིས་ཁེངས་བསྡད་ཡོད་པ་རེད། སྲང་ལམ་གྱི་མི་རྣམས་ཀྱང་སེམས་ཁམས་ཞི་འཇམ་ཞིག་གི་ནང་ཡོད་པ་རེད། མི་རྣམས་ཀྱིས་རང་གི་འཚོ་བར་འཛིན་པའི་རྣམ་འགྱུར་དེ་ནི་ཁོ་ཚོའི་གོམ་སྟབས་ཀྱི་ནང་ནས་ལྟ་དགོས་པ་རེད་ཅེས་བཤད་འདུག
བསམ་ཤོག་ལས་བརྙེད་པའི་གྲུབ་འབྲས་ཁག་ནི་གཤམ་གསལ་ལྟར་རེད།
༡། བརྙན་འཕྲིན་ལ་ལྟ་མཁན། གོར་ཐིག་རེད། མི་རྣམས་ཀྱིས་བར་སྐོར་གླིང་དང་མ་ནི་འཁོར་ལོའི་མདུན་ནས་འཚོ་རླུང་རྔུབས་ནས་བསྡད་ཡོད།
༢། ཨར་ཁང་། མེད། སྲང་ལམ་གཡས་གཡོན་ཚང་མ་བོད་ཇ་འཚོང་ས་ཡིན།
༣། གོམ་སྟབས་ཀྱི་བང་། མི་ཕལ་ཆེ་བ་ནི་ག་ལེར་འགྲོ་ངེས།
༤། ཨ་རག་འཐུང་མཁན། ཅུང་མང་ལ། གྲང་ངར་ལས་ཐར་ཆེད་དུ་འཐུང་གི་ཡོད།
༥། ཉིན་རེའི་ལས་དུས། ངེས་མེད་ཡིན། གཙོ་བོ་མི་སྒེར་གྱི་གཤིས་ཀ་ལ་ཐུག་ཡོད།
༦། ལས་དུས་སྐབས་སུ་སྲང་ལ་འཁྱམ་མཁན། ལས་དུས་ཤིག་མེད། མི་ཕལ་ཆེ་བ་རི་སྒང་ལ་འཛེགས་གི་རེད། ཡང་མིན་ན་ག་དུས་འདོད་པ་ཤར་ན་དེ་དུས་སྲང་ལ་འཁྱམ་འགྲོ་གི་རེད།
༨། ལས་འཚོལ་བ། བསམ་ཤོག་བསྡུ་བའི་སྐབས་དེར་མི་འདུག
༩། རྩལ་སྦྱོང་། མཁའ་དབུགས་མཐོ་བའི་སྟབས་ཀྱིས་སྐབས་རེར་མ་གཏོགས་མེད།
༡༠། ལག་ཐོག་ཁ་པར་གྱི་འབྲེལ་བ། བརྡ་རྟགས་ཞན་སྟབས་དེ་འདྲའི་གལ་ཆེན་ལ་མི་བརྩི།
༡༡། བརྩེ་བ་དང་ཆང་ས། བརྩེ་དུང་འཐོབ་མཁན་རྣམས་ནི་རྒྱབ་ཁུག་ཁུར་ནས་ཡོང་བའི་ཡུལ་སྐོར་བ་ཚོ་ཡིན།
འདིར་རྩམ་ཟན་པ་ཞིག་དང༌། མེས་པོའམ་རང་ཅག་ཁ་བ་རིས་པ་རྣམས་ཀྱི་ཡུལ་ལུང་དེ་རྒྱ་ནག་གི་ཁུངས་སུ་རྩིས་མི་འདོད་ན། ལྷ་ས་འདི་བོད་ནང་གི་གྲོང་ཁྱེར་འཁྲུགས་ཆ་དོད་ཤོས་ཤིག་ལ་རྩིས་ན་ལེགས་མོད།
ལྟ་བའི་ཆ་ནས་བཤད་པ་ལས། གསར་འགྱུར་འདིར་ལ་དགག་པ་རིགས་གང་ཡང་རྒྱབ་ཀྱིན་མེད།
ངས་བལྟས་ན་ལྷ་ས་ནི་སྒྱིད་ལུག་གི་གྲོང་ཁྱེར་ཤིག་ཏུ་ངོས་འཛིན་བྱས་ན་འགྲིག་ཐབས་མེད་པ་ཞིག་མཐོང་གི་འདུག ལྷ་སའི་མི་གཤིས་ནི་བོད་ཆོལ་གསུམ་གྱི་མི་གཤིས་གཅིག་ཏུ་བསྒྲིལ་ཏེ་བཟང་པོའི་ཞི་བཟང་གི་རྣམ་སྤྱོད་གཅིག་ཏུ་བསྒྲིལ་ཏེ་དལ་ལྷོད་བག་ཕེབས་ཀྱི་འཚོ་བ་རོལ་རྒྱུ་མ་ཟད། ད་ལྟའི་ཆར་ཆབ་སྲིད་ཐོག་ཚོར་བ་ཧ་ཅང་རྣོ་བའི་སྤྱི་ཚོགས་ཤིག་ཡིན་པ་དང་། བོད་ས་ཁྱོན་ཡོངས་ནས་ལས་འགུལ་གྱི་བྱ་ར་བྱ་ཡུལ་ལྟ་བུ་ཞིག་ཡོད། ཅི་སྟེ་བོད་ཀྱི་རྒྱལ་ས་ལྷ་ས་ནས་གནས་ཚུལ་ཞིག་ཐོན་ཚེ་བོད་ཀྱི་ས་ཁུལ་གཞན་པ་ནས་དེར་རྒྱབ་སྐྱོར་དང་མིག་དཔེར་ལེན་ཏེ་ལས་འགུལ་སྤེལ་བཞིན་པ་སོགས་ལས་གྲོང་ཁྱེར་འདི་ནི་སྒྱིད་ལུག་གི་གྲོང་ཁྱེར་ཞིག་ཏུ་ནམ་ཡིན་ཡང་འགྱུར་མ་སྲིད།།