བལ་ཡུལ་བོད་མི་ཚོས་བོད་དོན་ཐོག་དྲང་བདེན་གྱི་རྒྱབ་སྐྱོར་གནང་རོགས་ཞེས་མཉམ་འབྲེལ་རྒྱལ་ཚོགས་ཀྱི་ལས་ཁུངས་མདུན་དུ་ལས་འགུལ་སྤེལ་བར་ཉེན་རྟོག་པས་བོད་མི་ཁག་ཅིག་འཛིན་བཟུང་བྱས་ཡོད་འདུག
གསར་འགྱུར་བརྒྱུད་ལམ་ཁག་ཏུ་གནས་ཚུལ་སྤེལ་བ་ལྟར་ན། ཕྱི་ཚེས་ ༡༤ ཉིན་བལ་ཡུལ་དུ་གནས་སྡོད་བཙན་བྱོལ་བོད་མི་ཚོས་ཀ་ཐུ་མན་གྲུ་རུ་ཡོད་པའི་མཉམ་འབྲེལ་རྒྱལ་ཚོགས་ཀྱི་ལས་ཁུངས་མདུན་རྒྱལ་ཚོགས་ཀྱིས་བོད་དོན་ཐོག་དྲང་བདེན་གྱི་རྒྱབ་སྐྱོར་གནང་རོགས་ཞེས་སྐོད་འབོད་བྱས་ཏེ་སྐར་མ་ ༡༥ ཙམ་ཕྱིན་རྗེས་བལ་ཡུལ་ཉེན་རྟོག་པས་བོད་མི་ཚོ་འཛིན་བཟུང་བྱས་འདུག བལ་ཡུལ་དུ་གནས་སྡོད་བཙན་བྱོལ་བོད་མི་ཚོས་ལོ་གཅིག་ལྷག་གི་རིང་བལ་ཡུལ་ནང་ཡོད་པའི་རྒྱ་ནག་གཞུང་ཚབ་ཁང་དང་། མཉམ་འབྲེལ་རྒྱལ་ཚོགས་ཀྱི་ལས་ཁུངས་སོགས་ཀྱི་མདུན་དུ་རྒྱ་གཞུང་གིས་བོད་ནང་དྲག་གནོན་དང་བོད་མི་དམར་གསོད་མཚམས་འཇོག་བྱ་དགོས་པའི་ཐད་ངོ་རྒོལ་ལས་འགུལ་རིམ་པར་སྤེལ་བར་བརྟེན། བདུན་ཕྲག་སྔོན་མ་ནས་བཟུང་བལ་ཡུལ་སྲིད་གཞུང་གིས། གསལ་བསྒྲགས་གསར་པ་ཞིག་སྤེལ་ཏེ་བལ་ཡུལ་ནང་རྒྱ་ནག་གཞུང་ལ་ངོ་རྒོལ་གྱི་ལས་འགུལ་རིགས་སྤེལ་མི་ཆོག་པ་དང་། གལ་ཏེ་ངོ་རྒོལ་གྱི་ལས་འགུལ་སྤེལ་ཚེ་བཙོན་འཇུག་བྱ་རྒྱུ་ཡིན་ཞེས་པའི་ཉེན་བརྡ་བཏང་ཡོད་འདུག དེ་ལྟ་ནའང། བལ་ཡུལ་བོད་མི་ཚོས་བལ་ཡུལ་གཞུང་གིས་ཉེན་བརྡ་དང་འཇིགས་སྐུལ་ཅི་ཙམ་བྱས་ཀྱང་། བོད་ནང་གི་སྤུན་ཟླ་མང་པོས་རྒྱ་གཞུང་གི་དྲག་གནོན་དང་མནར་གཅོད། དམར་གསོད་སོགས་མི་ཆོས་ལས་འདས་པའི་སྡུག་བསྔལ་མྱངས་དང་མྱོང་བཞིན་པ་མཚམས་འཇོག་ཡོང་ཆེད། ཀ་ཐུ་མན་གྲུ་རུ་ཡོད་པའི་མཉམ་འབྲེལ་རྒྱལ་ཚོགས་ཀྱི་ལས་ཁུངས་མདུན་འདུ་འཛོམས་ཀྱིས། བོད་རང་བཙན་ཡིན། བོད་ནང་དམར་གསོད་མཚམས་འཇོག་བྱ་དགོས། མཉམ་འབྲེལ་རྒྱལ་ཚོགས་ཀྱིས་བོད་ནང་གི་གནས་སྟངས་ཐད་གོ་མེད་ཚོར་མེད་དུ་མི་འདུག་པར་རྨོངས་གཉིད་ལས་སད་དགོས་སོགས་ཀྱི་སྐད་འབོད་བྱས་སྐབས། བལ་ཡུལ་ཉེན་རྟོག་པས་ངོ་རྒོལ་ལས་འགུལ་དེ་འཕྲལ་དུ་མཚམས་འཇོག་བྱེད་དུ་བཅུག་ནའང་། བོད་མི་ཉི་ཤུ་ལྷག་གིས་ས་གནས་དེ་དང་ཁ་མ་བྲལ་བར་མུ་མཐུད་སྐད་འབོད་བྱས་སྟབས། དེའི་ཁྲོད་ཀྱི་བོད་མི་བཅུ་ལྷག་ཉེན་རྟོག་མི་སྣས་འཛིན་བཟུང་བྱས་ཡོད་པ་རེད།
ཉེས་ཅན་བཞིན་དུ་རང་དབང་མེད་པ་ཡི།།
ཡུལ་གྱར་བོད་མིའི་ལས་དབང་སྐྱོ་བ་དང་།།
གངས་ཅན་ལྗོངས་ཀྱི་རྩམ་གཟན་གདོང་དམར་རྣམས།
གཞིས་བྱེས་ཁ་བྲལ་གཏོང་མཁན་སུ་ཞིག་ཡིན།།
ཁ་བྲལ་རིང་ལུགས་པ་ཞེས་སྨོད་པར་བྱེད།།
གསར་བརྗེར་ངོ་ལོག་པ་ཞེས་བརྡུངས་པར་བྱེད།།
ཏཱ་ལའི་རྒྱག་ཁྱི་རེད་ཅེས་བཙོན་དུ་བཅུག།
རྒྱ་ནག་དམར་པོ་ཁ་བྲལ་རིང་ལུགས་རེད།།
སེམས་དང་སེམས་པའི་བར་ལ་རྨ་ཁ་བཟོས།།
ཕ་མ་སྤུན་མཆེད་ཕན་ཚུན་ཁ་ཡང་ཕྲལ།།
རྒྱ་བོད་མི་རིགས་བར་དུ་འགལ་ཟླ་བསླངས།།
འཛམ་གླིང་མི་མང་མདུན་དུ་རྫུན་ཆེན་སྨྲ།།
ཉེས་མེད་ཉེས་ཅན་ཆགས་པའི་བོད་མི་ཚོར༎
ཟློག་མེད་རྒྱ་ཡིས་བཏང་བའི་མནར་གཅོད་འདིས༎
བར་མེད་མི་ལོ་ལྔ་བཅུ་ཧྲིལ་གྱིས་ཟོས༎
མགོན་མེད་གངས་ཅན་བོད་ཀྱི་ལས་དབང་སོམས༎
ཉེས་མེད་བོད་མིས་རང་དབང་རྩོད་ས་རུ།།
ཉེས་ཆེན་ལྟ་བུས་མནར་གཅོད་གཏོང་ལུགས་འདི།།
རྒྱང་རིང་ཡུལ་ནས་ཡང་ཡང་ཐོས་དུས་སུ།།
སེམས་ཀྱི་སྐྱོ་བ་རང་དབང་མེད་པར་བྱུང་།།
བལ་ཡུལ་གྱི་བོད་མི་འདི་ཚོ་ངོ་མ་སྙིང་སྟོབས་དང་རྒྱལ་ཞེན་ཆེ་བ་འདུག གང་ཡིན་ཞུས་ན་བལ་ཡུལ་ཉེན་རྟོག་པ་ནི་བོད་མིའི་སྟེང་ལ་རྒྱ་གཞུང་གི་ཉེན་རྟོག་པ་དང་གཅིག་མཚུངས་ཀྱིས་རྡུང་རྡིག་ཚ་ནན་གྱིས་བོད་མི་རྣམས་འཇུ་བཟུང་སྐབས་མང་ཆེ་བ་དབང་པོ་སྐྱོན་ཅན་དུ་བཟོ་བཞིན་འདུགད་ནི་བོད་པ་འདི་ཚོ་འཛམ་བུ་གླིང་དུ་སྡོད་དབང་མེད་པ་འདྲ། དཀོན་མཆོག་མཁྱེན།