ཧྥི་ལིབ་བྷོ་རིན། འཕྲིན་ལས་རྒྱ་མཚོས་བསྒྱུར།
རྒྱ་ནག་ལ་མཚོན་ན་ཞིན་ཅང་གི་རྙོག་དྲ་ནི་རྒྱལ་སྤྱིའི་སྟེང་དུ་བོད་ལས་ལྷག་པའི་མགོ་ནད་ཆེན་པོ་ཞིག་ཏུ་འགྱུར་སྲིད། ཕྱོགས་གཅིག་ནས་བཙན་བྱོལ་དུ་བཞུགས་པའི་ཏཱ་ལའེ་བླ་མའི་ཞུ་སྐུལ་གྱི་བཀའ་དྲིན་ལ་བརྟེན་ནས་བོད་ལ་ནུབ་ཕྱོགས་ཀྱི་དོ་སྣང་ཐོབ་ཡོད། ཡིན་ན་ཡང་ཞིན་ཅང་ལ་ཕྱི་རྒྱལ་ཁག་ཏུ་ཊར་ཀི་མི་རིགས་དང་ཁ་ཆེའི་ངོ་རྟགས་ཀྱི་འབྲེལ་བ་ཡོད་པ་ལྟ་བུ་ཞིག་བོད་ལ་མེད།
ཨེ་ཤ་ཡའི་རྒྱལ་ཁབ་མང་པོ་ཞིག་གིས་ཡུ་གར་བའི་མངོན་འདོད་ཀྱི་ཕྱོགས་སུ་བཟུང་བའི་སེམས་ཚོར་དེ་སྣང་མེད་དུ་གཏོང་རྒྱུ་དཀའ་ལས་ཁག་པོ་ཞིག་ཏུ་འགྱུར་སྲིད།
ཊར་ཀའི་སྲིད་བློན་ Recep Tayyip Erdogan རེ་སེབ་ ཊེ་ཡིབ་ ཨེར་ཌོ་གྷན་ གྱིས། ཞིན་ཅང་ལ་བཟུང་བའི་རྒྱའི་སྲིད་བྱུས་ནི་མི་རིགས་རྩ་གཏོར་འདྲ་བོ་ཞིག་རེད། རྒྱ་ནག་གིས་གཞན་རིགས་རང་རིགས་སུ་འཐིམ་པར་བྱེད་པའི་སྲིད་བྱུས་དེ་འདོར་དགོས་ཞེས་བཤད་པ་དེ་པེ་ཅིན་གྱི་རྣ་ལམ་དུ་ཡུན་རིང་ཞིག་ལ་གྲགས་ནས་འདུག་གི་རེད། སྐུ་ཞབས་ཨེར་ཌོ་གྷན་གྱི་ཐ་སྙད་ཀྱི་འདེམས་ཀ་ཚད་ལས་བརྒལ་ཡོད་ཀྱང་། ཁོང་གིས་ནུས་ཤུགས་ཆེན་པོས་ཊར་ཀིའི་མི་རིགས་ཚང་མའི་ཆེད་དུ་ཡུ་རོབ་ནས་རྒྱ་ནག་དབུས་ལ་སྐད་ཆ་བཤད་པ་རེད།
རྒྱ་ནག་གི་ཊར་ཀིའི་ཁྱིམ་མཚེས་རྒྱལ་ཁབ་ཁ་ཛ་ཀི་སི་ཐན་གྱིས་རྒྱ་ནག་དང་ར་ཤི་ཡ་ལ་འབྲེལ་བ་དོ་མཉམ་དུ་འཛིན་ཕྱིར་དོགས་གཟབ་བྱེད་སྲིད།
ཡིན་ན་ཡང་ར་ཤི་ཡས་དུས་རབས་གཉིས་ཀྱི་རིང་གཞི་ཆགས་ཀྱི་ཐབས་ལམ་བཀོལ་ཏེ་ཁོང་ཚོ་ར་ཤི་ཡའི་བཙན་རྒྱལ་མངའ་ཁོངས་སུ་བསྡུ་བར་འབད་པ་བྱས་པར་བརྟེན། རྒྱ་ནག་གི་སྲིད་འཛིན་ཧུའུ་ཅིན་ཐའོ་ལ་ཁ་ཛ་ཀི་སི་ཐན་མི་མང་གི་སེམས་པ་གང་དུ་ཡོད་མེད་དྲན་གསོ་བྱེད་དགོས་མི་སྲིད།
སྐབས་ཐོག་དེར་རྒྱ་ནག་ཧན་མི་རིགས་ཀྱི་མངའ་དབང་མན་ཇི་དང་སོག་པོ། ཐའེ་ཝན་བཅས་ལ་རྒྱ་བསྐྱེད་པ་ནི་གཙོ་བོ་མི་འབོར་གནས་སྤོར་གྱི་ལམ་ནས་ལེགས་འགྲུབ་བྱུང་ཡོད། དེར་བརྟེན་ཞིན་ཅང་དུ་འཐབ་འཁྲུག་གི་དུས་སྐབས་ཕྱི་མ་མགོ་བཙུགས་ཟིན་པར་མ་ལྟོས་པར། པེ་ཅིན་གྱིས་ཞིན་ཅང་དུ་ཡང་དེ་ལྟར་ལེགས་འགྲུབ་འབྱུང་བར་ཡིད་ཆེས་བྱེད་པ་ནི་སྤྱིར་བཏང་བ་ཞིག་རེད།
ཡིན་ཡང་། ཧན་རྒྱ་རིགས་རྣམས་ཀྱིས་རྒྱ་ནག་གི་ས་ཆ་གཞན་པ་རྣམས་སུ་གོ་སྐབས་ཡག་པོ་ཡོད་པ་མཐོང་བར་བརྟེན་ཟིང་འཁྲུག་མ་བྱུང་བའི་སྔོན་ནས་བཟུང་ས་འདིར་ཡུལ་མི་གནས་སྤོར་གྱི་རྒྱུད་རིམ་དེ་འགག་བསྡད་ཡོད། རྒྱ་ནག་གི་མི་འབོར་གྱིས་མི་སེར་སྤེལ་བའི་སྲིད་བྱུས་ཀྱི་འོག་ནས་རྒྱ་ནག་ཧན་རིགས་རྒྱ་སྐྱེད་བྱེད་པར་རོགས་འདེགས་མི་ཐུབ།
རྒྱ་ནག་གིས་ཡུ་གར་བ་ཚོའི་སྡུག་བསྔལ་བསལ་བ་ཡིན་ན་འཕྱི་དྲགས་མེད་སྲིད་ཀྱང་། རྒྱག་ནག་དམར་ཤོག་ཚོགས་པའི་གཅིག་སྡུད་རིང་ལུགས་དང་གཞན་གྱི་རིག་གཞུང་ལ་དམའ་འབེབ་པའི་འདུ་ཤེས་ཀྱི་དབང་གིས་དེ་ལྟར་འབྱུང་ཁག་པོ་ཡིན། རྒྱ་ནག་གི་གསར་འགྱུར་བརྒྱུད་ལམ་ཁག་གིས་ཟིང་འཁྲུག་འདིའི་སྐོར་སྤེལ་སྟངས་ལ་བལྟས་ན་ད་དུང་བསླབ་བྱ་ཅི་ཡང་ལོན་མི་འདུག གལ་ཆེ་བའི་གནད་དོན་རྣམས་གླེང་མེད་པ་མ་ཟད། རྒྱ་མི་རྣམས་གྱོང་འཁུར་མཁན་དང་ཡུ་གར་བ་རྣམས་ནི་སྔོན་ཆད་ཤར་ཏུར་ཀི་སི་ཐན་དུ་གྲགས་པའི་ཡུལ་འདིར་རྒྱ་ནག་གིས་ཕྱིའི་དངོས་པོ་ཡར་རྒྱས་བཏང་བར་བཀའ་དྲིན་མི་ཤེས་མཁན་ཞིག་ཏུ་བསྟན་ཡོད།
དེའི་འཕྲོར་ཁ་ཆེའི་ཆོས་ལུགས་ཀྱི་གནད་དོན་ཡོད། དབུས་ཨེ་ཤ་ཡའི་ཁ་ཆེའི་ཆོས་ནི་སྤྱིར་བཏང་ཞི་དལ་གྱི་རིགས་ཤིག་ཡིན་ཡང་། ཆོས་ཕྱོགས་ཀྱི་བྱེད་སྒོ་བཀག་འགོག་དང་འཛམ་གླིང་ཁྱོན་ཡོངས་ཀྱི་ཁ་ཆེའི་འདུ་ཤེས་ཤུགས་ཆེ་རུ་སོང་བ་གཉིས་ཀྱིས་ཞིན་ཅང་ནང་གི་ཁ་ཆེའི་ངོ་བོ་སྲ་བརྟན་དུ་བཏང་ཡོད།
རྒྱ་ནག་གིས་ཞིན་ཅང་གི་ཁ་བྲལ་བ་ཚོར་ཨལ་ཁེ་ཌ་འཇིགས་སྐུལ་བའི་མིང་འདོགས་པར་འབད་བརྩོན་བྱས་ཡོད་ལ། མུ་མཐུད་ནས་དེ་ལྟར་བྱ་ངེས་པར་དོགས་པ་མེད། ལྷག་པར་དུ་ཨལ་ཁེ་ཌས་ཝུ་རུ་མུ་ཆིའི་དམར་གསོད་ལ་དགྲ་ཤ་ལེན་རྒྱུ་ཡིན་སྐོར་བཤད་པ་ཡིས་དེ་ལ་རམ་འདེགས་བྱས་ཡོད།
ཡིན་ཡང་། ཁ་ཆེ་མི་དམངས་མང་ཕྱོགས་ཀྱི་སེམས་པ་སྡུག་ཡོད་པར་སྣང་། ཨིན་ཌོ་ནེ་ཤི་ཡའི་ནང་དུ་ཡུ་གར་བ་རྣམས་ལ་རྒྱབ་སྐྱོར་གྱི་རྔམ་སྟོན་ཁྲོམ་སྐོར་ཡང་བྱས་འདུག
ཨེིན་ཌོ་ནེ་ཤི་ཡ་ལ་ཕ་པུ་ཝ་ཞེས་པའི་ཁ་བྲལ་བའི་དཀའ་རྙོག་ཡོད་པ་དང་ཡུན་རིང་དུ་གནས་པའི་རྒྱ་མི་རིགས་ཀྱི་ཐོབ་ཐང་གི་གནད་དོན་ཡོད་པས། ཨེིན་ཌོ་ནེ་ཤི་ཡའི་གཞུང་གིས་ཨེར་ཌོ་གྷན་གྱི་གཏམ་དེ་འདྲ་བཤད་མདོག་ཁ་བོ་མ་རེད། མ་ལེ་ཤི་ཡ་ཡང་གཅིག་མཚུངས་རེད། མ་ལེ་ཤི་ཡའི་ནང་གི་ཡུལ་དེའི་མི་རིགས་མིན་པ་རྣམས་ལ་དམའ་འབེབས་དང་རིགས་བགར་བྱེད་ཀྱིན་ཡོད་སྟབས། ངོ་རྒོལ་ཅི་བྱས་ཀྱང་བཅོས་མ་ལྟ་བུ་ཞིག་ཏུ་སྣང་ངེས་པ་མ་ཟད། དེས་མ་ལེ་ཤི་ཡར་ཡོད་པའི་རྒྱ་མི་རྣམས་ལ་རྒྱ་ནག་གཞུང་གི་རྒྱབ་སྐྱོར་འཁྱེར་ཡོང་ངེས་ཡིན།
དེ་ལྟར་ཡང་ལྷོ་ཤར་ཨེ་ཤ་ཡའི་ཡུལ་གྲུ་མང་ཆེ་བས་ཞིན་ཅང་གི་གནད་དོན་ནི་མི་རིགས་ཀྱི་གནད་དོན་ཞིག་ལས་ཆོས་ལུགས་ཀྱི་གནད་དོན་ཞིག་ཏུ་དེ་ཙམ་མཐོང་གི་མེད་པ་དང་། གནད་དོན་འདིས་རྒྱ་ནག་གིས་ལྷོ་ཕྱོགས་རྒྱ་མཚོ་དང་དེའི་ནང་གི་གླིང་ཕྲན་དག་གི་བདག་དབང་རྒྱ་ནག་ལ་ཡོད་པར་སྨྲ་རྒྱུར་ཞེད་སྣང་སློང་བཞིན་ཡོད་པ་མ་ཟད། རྒྱ་ནག་གི་གསར་འགྱུར་བརྒྱུད་ལམ་ཁག་གིས་ཀྱང་མཚམས་རེར་ཁོང་ཚོ་དང་ཁྱིམ་མཚེས་རྒྱལ་ཁབ་དག་གི་བར་གྱི་སྔོན་བྱུང་གི་འབྲེལ་བའི་སྐོར་གླེང་བཞིན་ཡོད།
གོང་དུ་སྨྲས་བའི་གྲས་ཀྱི་གཅིག་གིས་ཀྱང་ཡུ་གར་བར་བརྟེན་ནས་རྒྱ་ནག་ལ་འཛིན་པའི་སྲིད་བྱུས་ལ་འགྱུར་བ་འགྲོ་སྲིད་པ་ཞིག་སྟོན་གྱིན་མེད་ལ། རྒྱལ་སྤྱིའི་ལས་དོན་ཆེ་ཁག་གི་ནང་དུ་ཡུ་གར་གྱི་གནད་དོན་ནི་ཆུང་ཆུང་ཞིག་ཆགས་ཡོད། ཡིན་ཡང་ཁོང་ཚོ་ནི་སྔོན་ཆད་ཤར་ཊི་མོར་འདི་ཨིན་ཌོ་ནེ་ཤི་ཡ་ལ་གང་འདྲ་ཞིག་ཡིན་པ་ཇི་བཞིན། རྒྱ་ནག་གི་ཕྱི་འབྲེལ་གྱི་ཐད་ནས་ལྷམ་ནང་གི་རྡེའུ་ལྟ་བུ་ཞིག་ཏུ་གནས་ནས་འདུག་སྲིད།
ནེའུ་ཡོག་དུས་བབ་ལས་ཕབ་བསྒྱུར་བྱས།
དབྱེ་ཞིབ་བྱས་པའི་རྩོམ་ཡིག་འདི་འདྲ་ཡག་པོ་འདུག ཊར་ཀའི་སྲིད་བློན་གྱིས་གསུངས་པ་ལྟར་ཤིན་ཅང་ཙམ་མ་ཟད་བོད་དུའང་རྒྱ་རིགས་ཕོན་ཆེན་ཞིག་གནས་སྤོར་བྱས་ཏེ་མིརིགས་རྩགཏོར་གཏོང་རྒྱུའི་སྲིད་བྱུས་ཤིག་བཟུང་ཡོད།
ཕྱི་རྒྱལ་དུ་ཤིན་ཅང་ལ་ཁ་ཆེའི་ངོ་རྟགས་ཡོད་པ་འདི་བོད་ལ་མེད་ཅེས་པར་རྒྱརིགས་ཤིག་ཡིན་ཚེ་ཕྱིའི་ཤ་རྩི་དཀར་ལ་སྐྱ་ཤས་ཆེ་བ་དང་། བོད་རིགས་ནི་ཤ་མདངས་ཅུང་སེར་ལ་གཏིང་དུ་སྣུམ་མདངས་ཀྱི་ཁྱད་པར་ཡོད། དེ་མིན་ཟས་རིགས་དང་། འཚོ་བའི་ཀུན་སྤྱོད། བསམ་བློའི་འདུ་ཤེས་སོགས་ཀྱི་ཁྱད་པར་སྨྲོས་མེད་རེད།
ཡུ་གུར་བ་ཚོ་ཨོལ་ཁོ་ཊའི་འཇིག་བསྐུལ་བ་ཡིན་པར་འབད་བརྩོན་བྱེད་པ་འདི་རྒྱལ་སྤྱིའི་གནས་བབ་དང་བསྟུན་ནས་དོན་དངོས་ཐོག་མེ་མདའི་ཁ་ནས་དྲག་གནོན་བྱེད་རྒྱུའི་སྲིད་བྱུས་ཤིག་ཞིག་རེད།
གྲངས་ཉུང་མི་རིགས་ཚོ་མེ་མདའི་ཁར་ཇི་ཙམ་ཤོར་ན་དེ་ཙམ་འཕངས་ཉེས་ཡིན་ལ་ཇི་ཙམ་མེ་མདའི་ཁ་ནས་གཡོལ་ཐུབ་ན་དེ་ཙམ་ང་ཚོའི་མཐའ་མཇུག་གི་རྒྱལ་ཁ་ཡིན།
མོ་རྩེ་ཏུང་གིས་དམར་ཤོག་ཚོགས་ཆེན་ཐེངས་གསུམ་པའི་སྟེང་མེ་མདའི་ཁ་ནས་སྲིད་དབང་ཐོབ་ཟེར་བའི་བལྟ་ཚུལ་ཐོག་མར་བསྟན་ནས་ཏང་གིས་མེ་མདའ་ལ་བཀོད་མདོམས་བྱེད་དགོས་པའི་བླང་བྱ་བསྟན་ཡོད་སྟབས། ང་ཚོས་ཀྱང་དྲག་གནོན་དང་མེ་མདའ་ལ་དོ་སྣང་ཡིད་གཟབ་བྱེད་དགོས་གནད་བབ་ཞིག་རེད།།
ཐུགས་རྗེ་ཆེ། རྩོམ་ཡིག་འདིའི་རིགས་ངོ་མ་གལ་ཆེན་རེད། དབྱེ་ཞིབ་དང་དཔྱད་ཞིབ་བྱས་ནས་བཤད་འདུག བོད་པ་ཚོར་རང་གི་སྤྱི་ཚོགས་ནང་དུ་འདི་ལྟའི་དཔྱད་པ་བྱེད་ཤེས་མཁན་དཀོན་པོ་རེད། དེ་བས་འདིའི་རིགས་མང་ཙམ་སྤེལ་ཐུབ་ན་རྒྱལ་སྤྱིའི་སྤྱི་ཚོགས་ཀྱི་འགལ་འབྲེལ་དང་གནས་བབ། ཤར་ཨེ་ཤ་ཡའི་ནང་གི་རྒྱ་ནག་དང་ཁྱིམ་མཚེས་རྒྱལ་ཁབ་ཚོའི་འབྲེལ་བ་ཤེས་རྒྱུར་ཕན་ཐོགས་འདུག