བདག་གིས་བཀླགས་པའི་ཝང་ལི་ཞོང་། ཐེ་བོ་ཤེས་རབ་རྒྱ་མཚོ།

ཝང་ལི་ཞོང་གིས་བོད་དོན་ལ་རྒྱབ་སྐྱོར་གྱི་རྩོམ་ཡིག་མང་པོ་བྲིས་པས། བོད་མི་མང་པོ་ཞིག་གི་སེམས་ལ་ཁོ་རྒྱ་ནག་ལ་ངོ་ལོག་སྟེ་བོད་མིར་འགྱུར་ཡོད་པ་རེད་བསམས་ཏེ་བོད་ཕྱོགས་ཁོ་ནར་བཟུང་བ་ནི་འཛིན་སྟངས་ནོར་བ་ཞིག་རེད། ཁོའི་རྩོམ་ཡིག་ལ་ཞིབ་པར་བལྟས་ན་ཁོ་བོད་ཕྱོགས་ཁོ་ནར་སྔར་ཡང་ལངས་མེད་ལ་ད་ལྟའང་ལངས་མེད། ལྷག་པར་ད་རེས་ཀྱི་ཁོའི་སྐད་ཆ་ལས་ཚུལ་དེ་གསལ་པོར་མཐོང་ཐུབ། བོད་ཁོ་ནར་མ་ཕྱོགས་པར་རྒྱ་ནག་ལའང་བསམ་བློ་བཏང་བ་དེ་ནི་ཁོ་རྒྱ་མི་ཞིག་ཡིན་པའི་ཆ་ནས་འོས་བབས་ཀྱི་བྱེད་སྟངས་ཤིག་རེད། ད་དུང་རྒྱ་ནག་ཁོ་ནའི་ཕྱོགས་སུ་མ་ལངས་པར་བོད་ཀྱི་དངོས་ཡོད་གནས་ཚུལ་ལ་རྒྱུས་ལོན་དང་རྒྱབ་སྐྱོར་གྱིས་རྩོམ་ཡིག་སྤེལ་བ་ནི་དྲང་བདེན་གྱི་བྱེད་སྟངས་ཤིག་རེད། འདི་ནི་༸གོང་ས་མཆོག་གིས་རྟག་ཏུ་གསུང་བཞིན་པ་ལྟར་བོད་ལ་རྒྱབ་སྐྱོར་བྱས་པ་ཙམ་མིན་པར་དྲང་བདེན་ལ་རྒྱབ་སྐྱོར་བྱས་པ་ཞིག་ཀྱང་རེད། སྤྱིར་ཝང་ལི་ཞོང་གི་རྩོམ་ཡིག་དང་སྐད་ཆ་དག་ལ་གནས་ཚུལ་ཆ་ཚང་རྟོགས་མ་རྟོགས་དང་ཆ་ཚང་བདེན་པ་ཡིན་མིན་ཅི་རིགས་ཡོད་ཀྱང། གང་བཤད་པ་དེ་ཁོ་རང་གི་ངོས་ནས་དྲང་པོར་ཤོད་ཀྱི་ཡོད་པའི་རྣམ་པ་ཞིག་ཡོངས་ཁྱབ་ཏུ་ཡོད་པ་ནི་བློ་གཟུ་བོར་གནས་པའི་སྒོ་ནས་བལྟས་ན་ཤིན་ཏུ་གསལ་པོར་མཐོང་ཐུབ།
ཡང་གཅིག་བཤད་ན་ཝང་ལི་ཞོང་གི་བྱེད་སྟངས་ནི་རྒྱ་བོད་གཉིས་ཕན་ཡོང་ཐབས་ལ་བརྩོན་བཞིན་པ་ཞིག་ཡིན་པ་འདི་༸གོང་ས་མཆོག་གི་དགོངས་གཞི་དང་བོད་གཞུང་གི་སྲིད་ཇུས་དང་ཡོངས་སུ་མཐུན་པ་ཞིག་ཡིན་པས། ད་ལྟའི་ཆར་ང་ཚོར་འདི་རིགས་ཧ་ཅང་དགོས་ངེས་ཤིག་ཡིན། ད་རེས་༸གོང་ས་མཆོག་དང་བོད་གཞུང་གིས་ཁོ་པ་དྷ་སར་མགྲོན་འབོད་གནང་བའི་རྒྱུ་མཚན་གྱི་གཙོ་བོའང་འདི་ཉིད་ཡིན་པ་ལས། ཁོ་རྒྱ་ནག་ལ་ངོ་ལོག་སྟེ་བོད་ཕྱོགས་ཁོ་ནར་ཡོད་མཁན་ཞིག་ཡིན་པའི་ངོས་འཛིན་གྱིས་མགྲོན་འབོད་གནང་བ་ཞིག་གཏན་ནས་ཡིན་མི་སྲིད།
དེས་ན་ཝང་ལི་ཞོང་གི་སྤྱིར་བཏང་གི་བོད་དོན་ཐད་ཀྱི་བསམ་བློ་དང་སྐད་ཆ། ད་རེས་དྷ་སར་ཡོང་ཚུལ་སོགས་གང་ལ་བལྟས་ཀྱང་ཁོ་ལ་བོད་མིས་ངོ་རྒོལ་བྱེད་རྒྱུ་ནི་མི་འོས་པ་དང་མི་དགོས་པ་ཞིག་རེད། ད་དུང་ནོར་བ་ཞིག་རེད། ལྷག་པར་ཡང་ད་ལྟ་བོད་གཞུང་གིས་རྒྱ་རིགས་ཤེས་ཡོན་ཅན་ཚོ་དང་འབྲེལ་བ་ཇེ་ཟབ་ཏུ་བཏང་སྟེ་བོད་དོན་བདེན་མཐའ་གསལ་ཐབས་ཀྱི་དམིགས་བསལ་སྲིད་ཇུས་ཤིག་ལག་བསྟར་བྱེད་བཞིན་པ་འདི་ལ་འགལ་རྐྱེན་བཟོས་པ་ཞིག་ཏུ་འགྱུར་བཞིན་པས། འདི་འདྲའི་གནད་འགག་གི་སྐབས་སུ་རང་དབང་དང་མང་གཙོའི་ཐོབ་ཐང་ལོངས་སུ་སྤྱད་རྒྱུ་ཙམ་དང་དེའི་སྒོ་ནས་སྐད་ཆ་གང་བྱུང་བཤད་རྒྱུ་ཙམ་གཙོ་བོ་མིན་པར། རང་རང་སོ་སོས་འགན་འཁྱེར་རྒྱུ་དང་ཕན་གནོད་ལ་བལྟ་རྒྱུ་དེ་གཙོ་བོ་རེད།
དེས་ན་ད་རེས་ཝང་ལི་ཞོང་ལ་ངོ་རྒོལ་བྱེད་མཁན་ཚོའི་རིགས་ཞེན་དང་རྒྱལ་ཞེན་ལ་སྐྱོན་མེད་ངེས་ཀྱང་། བྱེད་སྟངས་ལ་སྐྱོན་ཡོད་པ་གསལ་པོ་རེད། འདི་ནི་ཤ་ཚ་ནའང་ཚ་སྟངས་མ་ཤེས་པ་ཞིག་སྟེ། སྔར་བུ་གླེན་པ་ཞིག་གིས་རང་གི་ཕའི་མགོ་ལ་བབས་པའི་འབུ་གསོད་ཆེད་ཨ་ཕའི་མགོར་སྟ་རེ་གཞུས་པ་དང་འདྲ་པོ་ཆགས་ཉེན་འདུག་པས། ངོ་རྒོལ་བ་ཚོས་མུ་མཐུད་ཨུ་ཚུགས་མ་བརྒྱབས་ན་ལེགས། སྐད་ཆ་འདི་དྲང་མོ་ཡིན།

འོག་གི་སྐད་ཆ་གནས་ལུགས་ཅན་པོ་འདི་ཚོ་སྣང་བར་འགྲོ་སོང༌། རྩོམ་པ་པོ་ཐེ་བོ་ལགས་ལ་ཐུགས་རྗེ་ཆེ་ཞུ།

ཉིན་འདི་ཚོའི་རིང་ངས་ཁོང་ལ་ངོ་རྒོལ་བྱེད་མཁན་ཚོར་དེ་བས་གཟབ་ནན་གྱིས་ཉན་པ་ཡིན། ངས་དེ་ལྟར་གཟབ་ནན་གྱིས་ཉན་སྐབས་ཁོང་ལ་ངོ་རྒོལ་བྱེད་མཁན་ཚོའི་རྣམ་འགྱུར་སྟོན་སྟངས་ལ་ངང་ཐུང་དང་འཚང་འཚུབ།ཁོང་ཁྲོ་དང་ཧོལ་རྒྱུག་གི་ཆ་འདྲེས་ཤིང་། ཁོང་ཚོའི་བཤད་སྟངས་ལ་འུར་འདྲོག་དང་མུན་འཐོམ་གྱི་ཆ་འདྲེས་པས་ངས་སྔོན་ཆད་རེ་བ་བཅངས་མྱོང་ཞིང་ངའི་སེམས་ཁོང་ན་གོ་གནས་ངེས་ཅན་ཟིན་ཡོད་པའི་བཙན་བྱོལ་ནང་གི་གཞོན་སྐྱེས་རྩོམ་པ་པོ་འགས་དེ་རིང་ང་ལ་ཡིད་ཆད་དུ་བཅུག་བྱུང་། སྦས་གསང་མེད་པར་བཤད་ན་ཁོང་ཚོའི་བྱེད་སྟངས་དེ་ནི་དུས་རབས་སྔོན་མའི་ནང་དམར་པོའི་རིང་ལུགས་ལ་ཨ་གསར་གྱིས་དབྱིངས་ཞུགས་པའི་དམར་སྲུང་དམག་མི་ཚོའི་བྱེད་སྟངས་ལས་ལག་ཏུ་སྨྱུ་གུ་ཐོགས་མཁན་གྱི་དུས་རབས་གསར་པའི་ནང་གི་ན་གཞོན་གསར་པ་ཚོའི་བྱེད་སྟངས་ཤིག་དང་གཏན་ནས་མི་འཚམ།

དྲ་གྲོགས་ཚོ་ཁམས་བཟང་། རྒྱ་རིགས་རྩོམ་པ་པོ་ཝང་ལི་ཞོང་གི་གཙོས་པའི་རྒྱ་རིགས་སུ་ཞིག་ང་ཚོའི་སར་ཕེབས་འབྱོར་གནང་ནའང་ང་ཚོས་ངེས་པར་དུ་ཁོང་ཚོར་དགའ་བསུ་ཞུ་དགོས།

༸ གོང་ས་མཆོག་གིས་བོད་ཙམ་མ་ཟད་བརྩེ་བའི་རྒྱ་རིགས་མི་དམངས་དུང་ཕྱུར་བཅུ་གསུམ་ལ་དོན་དམ་གྱི་རང་དབང་དང་། བདེ་སྐྱིད་ཅིག་འཐོབ་ཐུབ་པའི་ཐུགས་རེ་ཚད་གནང་བཞིན་ཡོད།
གུས་པར་བཀུར་བ་འོས་པའི་སྐུ་ཞབས་ཝང་ལི་ཞོང་སོགས་རྒྱ་རིགས་བསམ་བློ་བ་ཚོས་ཕྱོགས་གཉིས་ཀའི་གནད་དོན་ལ་ཐུགས་ཁུར་ཆེན་པོ་བཞེས་བཞིན་པ་འདི་དངོས་གནས་རླབས་ཆེན་རེད།

དེར་བརྟེན་རྒྱ་རིགས་དང་། བོད་རིགས་ཚོསཕན་ཚུན་ཕྱོགས་གཉིས་ཀས་གཅིག་གིས་གཅིག་ལ་གུས་བརྩིདང་། ཆ་འཇོག མཐུན་སྒྲིལ་ཆེན་པོ་ཞིག་བསྐྲུན་ཐུབ་ན་དེ་ནི་དངོས་འབྲེལ་བོད་རྒྱ་མི་རིགས་གཉིས་ཀར་ཁེ་ཕན་ཡོད་པ་ཞིག་རེད།

གོང་གི་ཐེ་བོ་ཤེས་རབ་ཟེར་བའི་རྟོག་གེ་བ་འདིས་ངས་བོད། དུས་རབས་ཉེར་གཅིག་པའི་རྩིབས་རུས་མཉན་མོ་དང་རང་བཙན་ལམ་ཡིག་བཀླགས་ནས་རྒྱ་བོང་ཞོན་ལ་དགའ་སོང་ཟེར་བ་ཙམ་ལས་གང་ཡང་ཤོད་མི་འདུག དྲང་ཐད་ནས་བཤད་ན་འདི་ནི་ཨ་གསར་དང་རྨོངས་འཐོམ་རང་རེད། ཨོ་ན་ངོ་རྒོལ་བ་དག་གིས་ཁྱོད་ཀྱིས་མཐོང་བའི་དེབ་དེ་དག་མ་མཐོང་བ་རེད་དམ། ཡང་ན་ཐུགས་རྒྱ་ཡངས་མདོག་བསྟན་པ་ལས་ཕན་ཚུན་གྱི་ཁྲག་མ་བཞུར་ན་དགའ་སོགས་ཟེར་རྗེས་འབྲང་ཁུལ་བྱས་པ་ནི་དངོས་གནས་རང་སེམས་ན་མི་རིགས་ཀྱི་ན་ཚ་གང་ཡང་མེད་པར་རི་བོང་ཟླ་དཀར་ལ་རྒྱུག་པ་ལྟ་བུ་རེད། བོད་མི་ས་ཡ་གཅིག་གི་ཁྲག་བཞུར་ཚར་བ་རེད། ད་དུང་ན་ནིང་ནས་དེ་རིང་བར། དེ་རིང་ནས་མུ་མཐུད་དུ་རང་གི་སྤུན་ཟླ་དག་གི་མགོ་ལ་ཅི་ཡོང་གི་ཡོད་མེད་སོགས་ལ་ཅིའི་ཕྱིར་བལྟ་མ་ཐུབ་པ་རེད། བོང་ཞོན་གྱི་རྒྱབ་རྩར་ལངས་ཏེ་རང་གི་ངོ་རྒོལ་བ་ལ་དམའ་འབེབས་པ་འདི་ཤེས་ཡོན་པ་ཡིན་ཟེར་མཁན་ཞིག་གི་བཤད་རྒྱུ་ཡིན་ནམ། འདིའི་སྐོར་ནས་ངོ་རྒོལ་བ་དག་ལ་དམར་སྲུང་དམག་མིའི་མིང་བཀལ་བ་སོགས་ལ་གཞིག་ན་རང་གི་ངོ་བོ་གཞན་ལ་བསྒྱུར་གྱིན་མེད་དམ་སྙམ། ངས་བལྟས་ན་ཁྱོད་བོང་ཞོན་ལ་དགའ་བ་ནང་བཞིན་ངོ་རྒོལ་བ་དག་མ་དགའ་བ་རེད། ཁྱོད་ལྟ་བུ་ཅལ་འདྲོགས་ལ་དགའ་མཁན་ཞིག་གིས་བོང་ཞོན་དང་ངོ་རྒོལ་བ་དག་གི་བར་གྱི་གནད་དོན་གང་ཡང་ཐག་གི་གཅོད་ཐུབ་པ་མ་རེད། དངོས་གནས་བཤད་ན་རང་གི་བསམ་ཚུལ་བཤད་ཆོག་པ་ལས་འདི་ལ་དམའ་འབེབས་བྱས་པ་བླུན་རྟགས་ཁོ་ནར་ངོས་འཛིན་ངེས།

ད་ནི་རང་ཕྱོགས་ཀྱི་སྐྱོན་ཆ་ནི་གླེང་ཚར་སོང་། དེས་ན་ཉིད་ཀྱིས་ཝང་ལི་ཞོང་ལ་ཞིབ་འཇུག་བྱས་པའི་བསྐོར་ལ་སྐད་ཆ་ཕྲན་པུ་ཞིག་རིགས་ཀྱི་སེམས་རྩ་དྲོན་མོ་དེ་ནས་བཞུར་ནས་ཤོག་དང་། ངེད་ཅག་གིས་ག་ལེར་ཀློག་འདོད་འདུག་ལགས།

རེད་ཡ། རྒྱ་མི་ཞིག་གིས་ཁོག་རྒྱ་ཡངས་མདོག་བསྟན་པའི་ལན་དུ་ང་ཚོས་ཀྱང་ཁོག་རྒྱ་དེ་ལས་ཡངས་ཙམ་ཡོད་མདོག་མ་བསྟན་ན་ག་ལ་འགྲིག ང་ཚོ་ནི་འཛམ་གླིང་གི་དབུ་ཁྲིད་ཁོག་རྒྱ་ཡངས་ཤོས་དེའི་གཉོར་སྐྱོང་འོག་ནས་འཚར་ལོངས་བྱུང་བའི་མི་རབས་ཤིག་ཡིན་པ་མ་བརྗེད་ན་ལེགས།