ལད་མོ་ལས་འཕྲོས་པའི་གཏམ།

ལད་ཟློས་ཟེར་ན་རེད། ལད་མོ་ཟེར་ན་རེད། མགོ་ཁུངས་གང་ལ་དེད་ཀྱང་། ངེད་ཅག་གིས་རང་རང་གི་གང་བཤད་པ་གཅིག་བུར་བདེན་པ་མ་བཟུང་བ་དང་རང་རང་གི་གང་ཤེས་པ་གཅིག་བུར་གནས་ལུགས་དུ་མི་འཛིན་པར་སྤུན་གྲོགས་ཚང་མ་ལ་བསམ་ཤེས་ཉན་ཤེས་གླེང་ཤེས་བྱེད་རྒྱུ་དེ་ནི་དགོས་དོན་མཐར་ཐུག་རེད་སྙམ་བཞིན་ཡོད། དེ་མིན་ངས་ཤེས་ཚུལ་དང་ཁྱེད་ཀྱི་བསམ་ཚུལ་ནོར་ཚུལ་ཟེར་ནས་རང་བདེན་གཞན་རྫུན་ཁོ་ནའི་བསམ་ཚུལ་ཞིག་བསྐྱེད་སྲུང་བྱས་པ་ཡིན་ན་གསར་གཏོད་ཟེར་བ་ནི་དོན་དངོས་སུ་མིང་གྲགས་གཉེར་མཁན་གྱི་ནུབ་ཕྱོགས་པ་དག་གིས་རང་གི་གནས་སྐབས་རིང་གི་ཁེ་ཕན་དང་སྙན་གྲགས་ཁོ་ན་ལ་དམིགས་པ་ཞིག་ལས་འགྲོ་བ་མིའི་བདེ་སྡུག་ལ་དམིགས་པ་ཞིག་གཏན་ནས་མིན། དེའི་སྟབས་ཀྱིས་གསར་གཏོད་ཟེར་ནས་རྒྱུགས་ཀྱང་བྱེད་མི་རུང་། དེ་ནི་ཆེས་ཉེན་ཚབ་ཆེ་བའི་ལས་ཤིག་ཡིན་ཟེར་ཡང་ཆོག དེ་མིན་དེང་སང་བོད་ཕྱི་ནང་གཉིས་སུ་བོད་མི་གཞོན་ཐོག་པ་མི་ཉུང་བ་ཞིག་གིས་གསར་གཏོད་ཟེར་བ་ནི་རང་གི་རིག་ལམ་ཁོ་ན་ལས་རྙེད་པ་ཞིག་ཡིན་པར་འཁྲུལ་བཞིན་ཡོད། དེ་འདྲ་ཞིག་གཏན་ནས་མིན། དེ་ནི་འབྱུང་བ་བཞི་དང་རང་གི་ཁོར་ཡུག ཡང་ན་རང་ཉེ་དུ། གྲོགས་པོ་དང་གྲོགས་མོ་སོགས་མང་བོ་ཞིག་ལ་བརྟེན་ནས་བྱུང་གི་ཡོད། དེའི་སྟབས་ཀྱི་གསར་གཏོད་ལ་དགའ་མཁན་བོད་ཕྱི་ནང་གཉིས་ཀྱི་སྤུན་ཟླ་ཚང་མས་ལད་ཟློས་དང་ལད་མོ་འདི་ལས་འཕྲོས་པའི་བསམ་ཚུལ་འདིས་ཁྲོད་ནས་རང་རང་གི་གང་ཤེས་པ་དེ་དག་གནས་ལུགས་ཡིན་པར་ཨུ་ཚུགས་མི་བྱེད་པར། བདེན་པའི་མཐའ་དཔྱོད་རྒྱུ་དེ་ནི་དངོས་ནས་གལ་ཆེན་ཡིན། དཔེར་ན་གསར་གཏོད་ནི་མཆོག་གོ་ཟེར་ན་དེང་སང་འཛམ་གླིང་འདིའི་སྟེང་གི་ཆེས་ཉེན་འཚབ་ཆེ་བའི་རྡུལ་ཕྲན་དུག་རྫས་གསར་གཏོད་བྱེད་མཁན་དེ་དག་གིས་དུས་དང་རྣམ་པ་ཀུན་ཏུ་འགྲོ་བ་མིའི་རིགས་ལ་གནོད་འཚེ་ཞིག་གི་ལམ་ཁ་བསྐྲུན་ཡོད་པ་ལས་བདེ་འཇགས་དང་འཆམ་མཐུན་ཞིག་གི་ལམ་ཁ་ནམ་ཡང་བསྐྲུན་མེད་པ་རེད། དེས་ན་འུ་ཅག་གིས་ཀྱང་གསར་གཏོད་དེ་ལ་ཡི་རུང་བྱེད་རུང་བ་ཡིན་ནམ་ཅི།