བཙན་གནོན་འོག་གི་སྡུག་སྐད།

དཔལ་ལྡན་འབྲས་སྤུངས་ཀྱི་སློབ་གཉེར་བ་དཀར་མཛེས་ཕུར་བུ་ཡིས་འདི་གར་གནས་ཚུལ་མཁོ་སྤྲོད་བྱས་པ་ལྟར་ན། དཀར་མཛེས་དགའ་ལྡན་ཆོས་གླིང་བཙུན་དགོན་གྱི་བཙུན་མ་དཔལ་དགའ་ལགས། ད་ཆར་ཁྲིན་ཏུའུ་ཡི་ཉེ་འཁོར་གྱི་བཙོན་ཁང་ཞིག་ཏུ་བཅུག་ཡོད་འདུག

གྲྭ་ཕུར་བུ་ལགས་ཀྱིས་ངོ་སྤྲོད་གནང་བ་ལྟར་ན། ཇོ་མོ་དཔལ་དགའ་ལགས་ནི་ ༡༩༧༩ ལོར་དཀར་མཛེས་གཙོ་གཞི་ཀླུ་བ་ཚང་གི་ཕ་འཇམ་དབྱངས་བསོད་ནམས་དང། མ་དཔལ་མཛངས་སྒྲོལ་མ་གཉིས་ཀྱི་བུ་ཕྲུག་ལྔ་ལས་ཆུང་ཤོས་དེ་ཡིན་ཞིང། རང་ལོ་བཅུ་དྲུག་སྐབས་སུ་བཙུན་དགོན་དགའ་ལྡན་ཆོས་གླིང་གི་སྒྲིག་ཁོངས་སུ་ཞུགས་ནས་འབྲི་ཀློག་དང། བློ་འཛིན། ལམ་རིམ་ཉམས་ཁྲིད་སོགས་ལ་ཐོས་བསམ་སྒོམ་གསུམ་གནང་སྟེ་བཞུགས་མུར། ༢༠༠༨ ལོའི་སྤྱི་ཟླ་ ༣ པ་ནས་བཟུང་བོད་ས་ཁྱོན་ཡོངས་སུ་ཞི་རྒོལ་བྱུང་ནས་ཕྱོགས་བཞིའི་ཡིད་སྐྱོའི་གནས་ཚུལ་ཤེས་རྟོགས་བྱུང་འཕྲལ། རང་ཉིད་ཅིས་ཀྱང་བདེ་བཟོད་མ་བྱུང་ནས། ལོ་དེའི་ཕྱི་ཟླ་ ༣ པའི་ཚེས་ ༧ ཉིན་འགན་འཛིན་ལ་ནད་དགོངས་ཞུས་ཏེ་དཀར་མཛེས་རྫོང་ཐོག་ཏུ་ཕེབས། སྐབས་འདིར་ཁྲོམ་ལམ་དུ་རྒྱ་མིའི་ཞེ་མེར་བའི་སྤྱོད་ངན་དག་མཐོང་བས་བསྲན་མ་ཐུབ་པར། ང་ཚོའི་མི་མང་ལ་རང་དབང་དགོས། ཉེས་མེད་བཙོན་དུ་འཁྲིད་པ་རྣམས་གློད་གྲོལ་ཐོངས་ཞེས་སྐད་འབོད་དང། སྦྱར་ཡིག་ཕྱོགས་བཅུར་གཏོར་བས། རྒྱ་མིའི་ཉེན་རྟོག་པས་ཞེ་ཁོང་གཏིང་ནས་འབར་ཞིང་ཡ་ང་སྤུ་ཙམ་མེད་པར། མཚོན་ཆ་བེད་སྤྱོད་ཀྱིས་སྡུག་སྦྱོང་ཚད་མེད་བཏང་ནས་བཙན་ཁྲིད་བྱས་པའི་ཁར། མ་ཤི་ཚུན་གྱི་མནར་གཅོད་མྱོང་བཞིན་ཉིན་མཚན་འདའ་བ་དང། ལྷག་པར་རང་གི་ཕ་མ་སྤུན་ཉེ་སོགས་དང་ཐུག་དབང་མེད་པར་ལྷག ད་ལྟའི་ཆར་དཀར་མཛེས་རྫོང་མི་དམངས་ཁྲིམས་ཁང་ནས་ཁོང་ལ་ཁ་བྲལ་བའི་ཉེས་མིང་འོག རྒྱ་ནག་ཁྲིན་ཏུའུ་གྲོང་ཁྱེར་གྱི་ཉེ་འཁོར་༼ཅུའོ་ཀྲོང་རྫོང་ལོ་ཝེའི་ཆུས་༽ཞེས་པའི་བཙོན་ཁང་དུ་ལོ་གསུམ་རིང་གི་བཙོན་འཇུག་ཁྲིམས་ཐག་བཅད་ཡོད་འདུག