རང་དབང་གིས་ཐོབ་ཐང་སྤྲོད་ཀྱིན་ཡོད་ལ། ཁྱེད་ཚོས་ངེས་པར་དུ་ཚོར་དགོས་པ་ཞིག་ནི་དེ་ལྟ་བུའི་ཐོབ་ཐང་ལའང་བྱ་གཞག་དང་། འོས་འགན་གཉིས་ཡོད་པ་ཤེས་དགོས་ཀྱི་རེད།
ཕྱི་ཚེས་ ༢༧ ཉིན་༸གོང་ས་མཆོག་རྒྱ་གར་ནས་མུ་ནི་ཆུ་མཁའ་ལམ་བརྒྱུད་ཉིན་དེའི་དགོང་མོར་པོ་ལན་ཌིའི་རྒྱལ་ས་ཝར་སཱོ་ཡི་གནམ་ཐང་དུ་བདེ་བར་ཕེབས་འབྱོར་གནང་ཡོད་ལ། ཝར་སྭོ་གྲོང་ཁྱེར་སྤྱི་ཁྱབ་ཡིག་ཚང་གི་འགན་འཛིན་ཇཱ་རོ་སུ་ལོ་ཇོ་རྫུ་ཝིག་མཆོག་དང། པོ་ལི་ཤིའི་གྲོས་ཚོགས་ཀྱི་ཚོགས་གཙོ་མས་བྷེ་ཊ་བྷུ་བྷེལ་ཝི་རྫུ་མཆོགདེ་བཞིན་དབྱིིན་ཡུལ་བོད་ཀྱི་སྐུ་ཚབ་དོན་གཅོད་ཁང་གི་འགན་འཛིན་ཚེ་རིང་བཀྲ ཤིས་བཅས་ཀྱིས་ཕེབས་བསུ་གཟབ་རྒྱས་ཞུས་ཡོད་པ་རེད། དེའི་རྗེས་ཁོང་མགྲོན་ཁང་དུ་སྤྱན་དྲངས་པ་དང། མགྲོན་ཁང་གི་སྦྱིན་བདག་གཙོས་ཡུལ་མི་དང་བོད་མི་རྣམས་ཀྱིས་འཚམས་འདྲིའི་ཕེབས་བསུ་ཞུས་ཡོད། ཕྱི་ཚེས་ ༢༨ ཉིན་༸གོང་ས་མཆོག་གིས་ཝར་སྭོ་གཙུག་ལག་སློབ་གཉེར་ཁང་དུ། མཐོ་སློབ་དེའི་ངེས་སྟོན་པ་མཁས་དབང་ཀ་ཏར་ཛེ་ནཱ། ཇ་ལ་སིན་ཀ མ་ཀུ་ཀོ་མཆོག་དང། མཛད་གཙོ་རྣམ་པ། དེ་བཞིན་དམིགས་བསལ་སྐུ་མགྲོན་ལྷན་དུ་མཇལ་འཕྲད་གནང་ཡོད་པ་དང། མཐོ་སློབ་དེར་ “ཤེས་ཡོན་གྱི་རིན་ཐང་དང་རྒྱལ་སྤྱིའི་འགན་འཁུར།” ཞེས་པའི་བརྗོད་གཞིའི་ཐོག་གསུང་བཤད་གནང་ཡོད་ལ། ཝར་སྭོའི་ས་གནས་འགོ་འཛིན་དང། ཝར་སོའི་གྲོང་འཁྱེར་ལྷན་ཁང་གི་གཙོ་འཛིན་མ་གཉིས་ནས་རེ་འདུན་ཞུས་པ་བཞིན་གཞུང་འབྲེལ་གྱི་གུང་ཚིགས་སུ་ཕེབས་ཡོད། དེའི་རྗེས་སུ་པོ་ལན་ཌིའི་རང་དབང་དོན་དུ་རང་སྲོག་བློས་བཏང་བའི་རྒྱལ་གཅེས་དཔའ་བོ་སྟོང་ཕྲག་མང་པོར་དྲན་རྟེན་དུ་བསྐྲུན་པའི་ཝེ་སྭོ་གྱེན་ལངས་འགྲེམས་སྟོན་ཁང་དུ་ཆིབས་བསྒྱུར་དང་འབྲེལ། བོད་དང་པོ་ལན་ཌིའི་མི་རིགས་ཀྱི་ལས་དབང་མཚུངས་ཆོས་སྐོར་ནས་བཀའ་སློབ་གནང་དོན། ཕྱི་ལོ་ ༡༩༤༤ ལོའི་ཝར་སྭོའི་གྱེན་ལངས་ནང་ཇར་མི་ནིའི་ནཱ་ཛི་མི་རིགས་ཚོས་ཇི་ལྟར་གཉའ་གནོན་བྱས་ཡོད་པ་ཇི་བཞིན། རྒྱ་མིས་ ༡༩༥༦ ལོར་བོད་ཀྱི་ས་ཁུལ་ཁག་ཏུ་འབར་མདེལ་གཡུག་པ་དང། གནམ་གྲུ་བེད་སྤྱད་པ་སོགས་བྱུང་ཡོད། ཅེས་དང། སྔར་པོ་ལི་ཤིའི་ཉིན་ ༦༣ རིང་གི་གྱེན་ལོག་གི་ནང་དུ་ནཱ་ཛི་མི་རིགས་ཚོས་མི་སེར་དཀྱུས་མ་ ༢༠༠།༠༠༠ དང་། གྱེལ་ལངས་པ་ ༡༨།༠༠༠ ཙམ་དམར་གསོད་བཏང་ཡོད། དེའི་དྲན་རྟེན་གྱི་ཚུལ་དུ་རྩིག་ངོས་ནག་པོ་ཞིག་བཟོས་ཡོད་པའི་ཐོག་ཏུ་དེ་དག་ཚང་མའི་མིང་བཀོད་ཡོད་པ་ཞིག་ལ་༧གོང་ས་མཆོག་ནས་མཆོད་མེ་སྒྲོན་ཡོད་པ་དང། འགྲེམས་སྟོན་ཁང་གིི་དྲིལ་བུ་དཀྲོལ་ཞོར་རྟེན་འབྲེལ་མཚོན་བྱེད་ཀྱི་མཇལ་དར་དཀར་པོ་ཡུག་གཅིག་སྒྲོན་ནས་གསུངས་དོན། ངོས་ནས་དུས་རྒྱུན་ཏུ་པོ་ལི་ཤི་མི་རིགས་ཚོའི་སེམས་ཤུགས་ལ་ཡི་རངས་བསྔགས་བརྗོད་བྱེད་ཀྱིན་ཡོད་ལ། རང་དབང་གི་འདུན་པ་དེའང་ངོས་ནས་རྟོགས་ཐུབ་ཀྱིན་འདུག གང་ལྟར་ཡང་སྟབས་མི་ལེགས་པ་ཞིག་ལ་དགྲ་བོ་གཅིག་ཕྱིན་རྗེས་དགྲ་བོ་གཞན་ཞིག་ཡོང་རྒྱུ་ཡོད་པ་ནི་འགྲེམས་སྟོན་ཁང་འདིའི་ནང་ནས་མངོན་གསལ་དོད་པོས་མཐོང་ཐུབ་ལ། ད་ཆ་པོ་ལི་ཤི་ཁྱེད་ཚོར་དོན་དམ་གྱི་རང་དབང་ཐོབ་ཡོད་ཅིང། རང་དབང་དེས་ཐོབ་ཐང་སྤྲོད་ཀྱི་ཡོད་ལ། ངའི་ཚོར་བར་ཁྱེད་ཚོས་ངེས་པར་དུ་ཚོར་དགོས་པ་ཞིག་ནི་དེ་ལྟ་བུའི་ཐོབ་ཐང་ལའང་བྱ་གཞག་དང་། འོས་འགན་གཉིས་ཡོད་པ་ཤེས་དགོས་ཀྱི་རེད་ཅེས་བཀའ་སློབ་གནང་ཡོད་པ་དང།
ཉིན་འདིའི་སྔ་དྲོར་ཁོང་གིས་ཝར་སཱོ་གཙུག་ལག་སློབ་གཉེར་ཁང་གི་སློབ་ཕྲུག་ཚོར་ད་ལྟའི་དཔལ་འབྱོར་ཉམས་རྒུད་ཀྱི་སྐོར་ནས་གསུངས་དོན། ད་ལྟའི་དཔལ་འབྱོར་ཉམས་རྒུད་འདིས་མི་རྣམས་ལ་སྒོར་མོ་ཕུད་པའི་རིན་ཐང་གཞན་པའི་སྐོར་ལ་བསམ་བློ་གཏོང་དགོས་པའི་བསླབ་བྱ་ཞིག་སྤྲད་ཡོད་པ་རེད། དཔལ་འབྱོར་ཉམས་རྒུད་འདི་ནི་སྟབས་ཉེས་པའི་ཆག་སྒོ་ཞིག་རེད། མི་རྣམས་ལ་སྒོར་མོའི་གནད་དོན་གྱི་ཐད་ནས་བདེན་པ་དང་དྲང་ཚུགས་དགོས་པ་རེད། ཅེས་དང་། ཁོང་གིས་དཔལ་འབྱོར་གྱི་ཕྱོགས་ནས་གང་ཤེས་པ་དེ་ནི་མི་རྣམས་ལ་སྒོར་མོ་མེད་ན་འཚོ་ཐབས་མེད་པ་དེ་ཡིན་ཞེས་ཀྱང་གསུངས་འདུག
ཡང་ཁོང་གིས་གསར་འགོད་པའི་ལྷན་དུ་མཇལ་འཕྲད་གནང་དུས་བཀའ་སློབ་གནང་དོན། ངོས་རང་དུས་རྒྱུན་གསར་འགོད་པ་དང་བརྒྱུད་ལམ་གྱི་མི་དེ་འདྲར་ཐུག་དུས་བཤད་ཀྱིན་ཡོད། ཁྱེད་ཚོ་གསར་འགོད་པ་ཚོ་དུས་རྒྱུན་དུ་ནས་རྒྱལ་ཁབ་ཀྱི་བདེ་དོན་གྱི་ཆེད་དུ་གནས་ཚུལ་འཚོལ་ཞིབ་བྱེད་དུས་ཁྱེད་ཚོར་གླང་ཆེན་གྱི་སྣ་ཞགས་རིང་པོ་ལྟར་རྒྱབ་མདུན་གཉིས་ཀའི་དྲི་མ་སྣོམ་ཐུབ་མཁན་ཞིག་དགོས་པ་གལ་ཆེན་པོ་རེད། རྒྱ་གཞུང་གི་དཔོན་རིགས་ཚོས་ཀྱང་གསར་འགོད་པར་གནས་ཚུལ་མཁོ་སྒྲུབ་བྱ་རྒྱུའི་རང་དབང་སྤྲོད་དགོས། སྲིད་དབང་སྒེར་འཛིན་གྱི་རྒྱ་ནག་ལྟ་བུར་མཚོན་ན། བཀག་སྡོམ་མང་དྲག་པས་གནས་ཚུལ་གྱི་རང་དབང་མེད། དེ་ནི་ཀུན་སྤྱོད་ཀྱི་ཆ་ནས་ནོར་བ་ཙམ་དུ་མ་ཟད་ལག་ལེན་གྱི་ཆ་ནས་ཀྱང་མཐའ་མ་དབུལ་ཕོངས་ཆགས་རྒྱུའི་རྒྱུ་རུ་འགྱུར་གྱིན་ཡོད། གནས་ཚུལ་ཚང་མར་དམ་དྲག་དང་འགོག་སྡོམ་བྱས་ན་ཡིད་ཆེས་ཀྱི་རྩ་བ་ཇི་ལྟར་བསྐྲུན་དགོས། ཡིད་ཆེས་མེད་ན་འཆམ་མཐུན་དང་མཛའ་མཐུན་ནི་ཇི་ལྟར་ཡོང་བར་བྱེད་དགོས་པ་རེད། ཡོང་མི་སྲིད་པ་ཞིག་རེད་ཅེས་བཀའ་སློབ་གནང་ཡོད།
ཕྱི་ཚེས་ ༢༩ ཉིན་གྲོང་ཁྱེར་རྙིང་པའི་ལོ་རྒྱུས་ལྡན་པའི་ས་ཚིགས་རྒྱལ་པོའི་ཕོ་བྲང་ནས་ཁོང་ལ་མི་སེར་མཚན་མཐོང་དེ་འབུལ་རྒྱུ་ཡིན་འདུག
མིག་གིས་གང་མཐོང་བ་དེ་རྣམས་བཅོས་ཡོད།
མ་དག་པ། དག་པ།
གྲོང་འཁྱེར། གྲོང་ཁྱེར།
གྱེལ་ལངས། གྱེན་ལངས།
འགྲེམས་སྟོན། འགྲེམ་སྟོན།
ཆིབས་བསྒྱུར། ཆིབས་སྒྱུར།
མང་དྲག་པ། མང་དྲགས་པ།