གལ་ཆེ་ཤོས་ནི་བོད་དོན་གྱི་གླེང་གཞི་འདི་འབོར་མི་རུང་།

གཟའ་ལྷག་པའི་ཉིན་ཏཱ་ལའི་བླ་མ་འཇར་མན་དུ་འཚམས་གཟིགས་སུ་ཕེབས་ཡོད་པ་རེད། འདི་ནི་ཁོང་འཇར་མན་ལ་འཚམས་གཟིགས་སུ་ཕེབས་ཐེངས་ ༣༥ པ་དེ་ཆགས་ཡོད་པ་དང་། བོད་མི་རིགས་ཀྱི་བསམ་བློའི་དབུ་ཁྲིད་འདི་ཉིད་ཕེབས་ཡུལ་གྱི་ས་ཁུལ་དག་གི་སེར་སྐྱ་མང་ཚོགས་ནས་སྔོན་དང་འདྲ་བར་ལྷག་བསམ་ཁོལ་བའི་དགའ་བསུ་ཐོབ་ཡོད་པ་རེད། དེར་མ་ཟད། ཐེངས་འདིར་ཕེབས་ཡུལ་གཙོ་བོ་ཧེ་སེ་ Hesse མངའ་སྡེའི་བློན་ཆེན་རོ་ལན་ཌི་ཁོ་ཆི་ Roland Koch ལགས་ནི་ཏཱ་ལའི་བླ་མ་ཁོང་གི་བློས་ཐུབ་གྲོགས་པོའང་རེད། དེ་བས་འདི་ག་རླུང་འཕྲིན་ཁང་གི་གསར་འགོད་པ་རཱལ་ཧྥུ་བྷུ་ཆེན་རྗེར་  Ralf Buchinger ལགས་ཀྱིས་ཁ་པར་བརྒྱུད་མངའ་སྡེ་བློན་ཆེན་མཆོག་ལ་ཏཱ་ལའི་བླ་མའི་འཚམས་གཟིགས་དང་འབྲེལ་ཏེ་བོད་ཀྱི་གནད་དོན་སེལ་ཐབས་ཐད་བཅར་འདྲི་བྱས་པ་ཡིན།
 
རླུང་འཕྲིན།  སྐུ་ཞབས་ཁོ་ཆི་ལགས། ཏཱ་ལའི་བླ་མས་ང་ཚོ་ཡུ་རོབ་གླིང་གི་མི་དམངས་ལ་ཐེབས་པའི་ཡིད་འགུག་གི་ནུས་བ་འདིར་ཁྱེད་རང་ངོས་ནས་ཇི་ལྟར་འགྲེལ་བཤད་སྐྱོན་གིན་ཡོད།
ཁོ་ཆི།  གཅིག་ནི་མི་དམངས་ཀྱི་ཆོས་ལུགས་དད་མོས་ཀྱི་རེ་སྙེག་ཅིག་རེད། ཏཱ་ལའི་བླ་མས་མཚོན་པའི་བོད་བརྒྱུད་ནང་བསྟན་ནི་མི་ཁག་ཅིག་ལ་མཚོན་ནས་བཤད་ན། ཡི་ཤུ་ཆོས་ལུགས་ཕུད་པའི་དད་མོས་གཞན་ཞིག་གི་གདམ་ཀའང་རེད། ཕྱོགས་འདིའི་ཐད་ནས་ང་ལ་འགྲེལ་བཤད་དེ་ཙམ་ཞིག་ལས་གཞན་མེད། རྒྱུ་མཚན། ང་རང་ཉིད་གནས་ཚུལ་འདིའི་ཁྲོད་དུ་མི་ཚུད་པས་རེད། ཡིན་ནའང་། ངས་དེའི་སྐོར་གྱི་སྣང་ཚུལ་དེ་ཤེས་རྟོགས་བྱེད་ཐུབ།  ལྷག་པར་དུ་ཧྥུ་རན་ཁུ་ཧྥུར་ཊི་ Frankfurt  ཚོང་དོན་དངུལ་ཁང་གི་ལུས་རྩལ་ར་བའི་ནང་ཏཱ་ལའི་བླ་མའི་སངས་རྒྱས་ཆོས་ལུགས་སྐོར་གྱི་བཀའ་སློབ་དེས་མི་མང་པོར་ཡིད་འགུག་ཐེབས་པ་དེར་དོ་སྣང་ཆེན་པོ་བྱུང་ཡོད། གཞན་ཞིག་ནི། ངས་བསམ་ན། ང་རང་ཐེ་བའི་མི་མང་པོ་ཞིག་གིས་ཏཱ་ལའི་བླ་མ་མཆོག་ལ་གུས་བརྩི་དང་མཐོང་ཆེན་བྱེད་བཞིན་ཡོད་ངེས། དེ་ནི་ཁོས་རང་གི་མི་རིགས་ཀྱི་ཐུན་མིན་ཁྱད་ཆོས་ལ་སྲུང་སྐྱོབ་དང་། མི་རིགས་ཡུན་གནས་ཀྱི་ཐད་ལ་འབད་བརྩོན་གནང་པར་མ་ཟད། འཛམ་གླིང་སྟེང་མི་རིགས་གཞན་མང་པོ་ཞིག་དང་མི་འདྲ་ས་ནི། ཁོང་གི་འབད་བརྩོན་ཐམས་ཅད་ནི་ཞི་བདེ་ཁོ་ནའི་ལམ་ནས་གནང་གིན་ཡོད་པའི་རྐྱེན་གྱིས་རེད།  གསུམ་པ་ནི་ཁོང་མི་སྒེར་གྱི་རང་གཤིས་ལའང་འབྲེལ་བ་ཡོད་བསྡད་པ་ཞིག་ཡིན་པ་སྨྲས་མ་དགོས་པ་རེད།

རླུང་འཕྲིན།  མི་འགའ་ཤས་ཀྱིས་ཏཱ་ལའི་བླ་མའི་ཐེངས་འདིའི་རྒྱ་ཆེ་བའི་གཏམ་བཤད་དེ། དཔེར་ན། ཧྥུ་རན་ཁུ་ཧྥུར་ཊིའི་ཚོང་དོན་དངུལ་ཁང་གི་ལུས་རྩལ་ར་བར་གནང་བའི་སངས་རྒྱས་ཆོས་ལུགས་སྐོར་གྱི་གཏམ་བཤད་ནི། དཔལ་འབྱོར་ཁོ་ནའི་ཐད་ཀྱི་བྱ་འགུལ་ཙམ་ཡིན་པར་བཤད།  ཁྱེད་ཀྱིས་ལྟ་ཚུལ་འདིར་ལན་ཅི་ལྟར་སྐྱོན་གྱི་ཡིན།
ཁོ་ཆི།  ངས་ཁ་གསལ་པོའི་སྒོ་ནས་བརྗོད་རྒྱུར། ངས་ཏཱ་ལའི་བླ་མའི་ཆོས་ལུགས་ཀྱི་བྱ་འགུལ་ལ་ཐེ་གཏོགས་བྱེད་ཀྱི་མིན། ང་རང་ཉིད་ལུས་རྩལ་ཐང་དུ་འགྲོ་གི་མ་རེད། ཡིན་ནའང་། ངས་ངོ་ཤེས་པའི་མི་མང་པོ་ཞིག་གིས་ཏཱ་ལའི་བླ་མར་དངོས་སུ་ཞལ་མཇལ་ཐུབ་པ་བྱུང་བར་དགའ་སྤྲོ་ཚད་མེད་སྐྱེས་བཞིན་འདུག ལུས་རྩལ་ཐང་ཆེན་དེ་གར་དེང་རབས་ཀྱི་གཞས་པ་དག་གིས་གླུ་གཞས་མཚན་ཚོགས་ཀྱི་བྱ་འགུལ་ཞིག་སྤེལ་བ་དེའི་འཛིན་བྱང་གི་ཡོངས་སྒོ་ནི་སྤྱིར་རྒྱ་གར་དུ་ཡོད་པའི་བཙན་བྱོལ་བོད་མི་རྣམས་ཀྱི་ཆེད་ཡིན་སྲིད་མོད།  ཡིན་ནའང་། དོན་དངོས་ཐོག་འཛིན་བྱང་གི་ཡོང་འབབ་སྒོར་མོ་ཡོད་ཚད་བྱ་འགུལ་འདི་སྤེལ་མཁན་གྱི་རྩ་འཛུགས་ལས་གཞིའི་ཐད་བཏང་བ་རེད།

རླུང་འཕྲིན།  གཤམ་ནས་ཏཱ་ལའི་བླ་མའི་ཆབ་སྲིད་ཀྱི་ཐུགས་རེ་སྟེ། བོད་མི་རྣམས་ཀྱི་རང་དབང་གི་ཐོབ་ཐང་རྩོད་ལེན་གྱི་སྐོར་ནས་གླེང་མོལ་ཞིག་བྱེད། ཁྱེད་རང་ནི་ཁོང་གི་གྲོགས་པོ་ཡིན་པས་ཆ་ནས་་ལས་དོན་དེའི་ཐད་རོགས་རམ་ཅི་ཞིག་གནང་ཐུབ་ངེས།
ཁོ་ཆི།  འདས་པའི་ལོ་མང་པོའི་རིང་ངས་རང་ཉིད་ཀྱི་བློ་འདྲི་ཡུལ་ཞིག་ལ་ངོས་འཛིན་གནང་གི་ཡོད་ལ། གཞན་ཡང་ཡུ་རོབ་གླིང་དུ་ཕན་ཚུན་བར་འབྲེལ་བ་གནང་རོགས་བྱེད་བཞིན་ཡོད། དེའི་དམིགས་ཡུལ་ནི་བོད་ཀྱི་གནད་དོན་ཐད་ཐུགས་ཁུར་གནང་བཞིན་པའི་མི་རྣམས་ཀྱིས་མཉམ་དུ་ནུས་ཤུགས་བཏོན་ཏེ། མི་དམངས་ཀྱིས་གླེང་གཞི་འདི་མི་བརྗེད་པ་བྱེད་རྒྱུ་དེ་ཡིན། ཕྱོགས་གཅིག་ནས་གསར་ལམ་ཁག་གིས་གླེང་གཞི་འདི་མ་བརྗེད་པར་དཔྱད་གླེང་བརྒྱུད་དོ་སྣང་ཡོང་ཐབས་དང་། ཕྱོགས་གཞན་ཞིག་ནས། སྲིད་འཛིན་ལས་རིགས་དང་སྲིད་གཞུང་དག་གི་ཉིན་རྒྱུན་ལས་གཞིའི་ཁྲོད་གླེང་གཞི་འདི་བོར་བརླག་ཏུ་འགྲོ་མི་རུང་བའི་ཆེད་དུ་ཡིན། རྒྱུ་མཚན་ནི་མ་འོངས་པར་བོད་མིའི་དཀའ་ངལ་སེལ་ཏེ་ནམ་ཞིག་ཁོ་ཚོར་མིང་དོན་མཚུངས་པའི་རང་སྐྱོང་ཞིག་རག་མིན་དང་། མི་རིགས་རང་གི་སྐད་ཡིག་སློབ་སྦྱོང་དང་བེད་སྤྱོད།  ཆོས་དད་རང་དབང་གི་བདག་དབང་ཐོབ་རྒྱུ་དང་། དེ་མིན་རྒྱ་རིགས་གནས་སྤོར་གྱིས་ཁོ་ཚོ་རང་ཉིད་ཀྱི་ས་ཐོག་ནས་གྲངས་ཉུང་མི་རིགས་སུ་མི་འགྱུར་བའི་ཁག་ཐེག་ཅིག་ཡོང་མིན་བཅས་ཡིན། གལ་སྲིད་དཔྱད་གླེང་དང་སྲིད་འཛིན་ལས་རིགས་དག་གིས་ཐོག་མཐའ་བར་གསུམ་དུ་གནད་དོན་འདིའི་སྐོར་ལ་མུ་མཐུད་ནས་དོ་སྣང་དང་། རྒྱ་ནག་གིས་ཚོར་ཐུབ་པའི་རྒྱལ་སྤྱིའི་གནོན་ཤུགས་ཤིག་སྤྲོད་ཐུབ་པ་བྱུང་ན་ད་གཟོད་བརྡ་ལན་ཞིག་འབྱུང་གི་རེད།

རླུང་འཕྲིན། རྒྱལ་སྤྱིའི་སྤྱི་ཚོགས་ཀྱིས་གནོན་ཤུགས་སྤྲོད་རྒྱུ་ནི་ཧ་ཅང་གི་ཁག་པོ་ཞིག་རེད། དཔེར་ན། འཇར་མན་གྱི་ཆབ་སྲིད་པ་དག་གིས་རྒྱ་ནག་དང་ཏཱ་ལའི་བླ་མའི་བར་དོ་མཉམ་གྱི་ལམ་བུ་ཞིག་འཚོལ་རྒྱུ་དེ་ཧ་ཅང་ཁག་པོ་རེད། ཐེངས་འདིའི་ཏཱ་ལའི་བླ་མའི་འཚམས་གཟིགས་ཇི་བཞིན། ཕལ་ཆེར་ཁྱེད་རང་མི་སྒེར་ཕུད་པའི་རྒྱལ་ཚོགས་ཀྱི་མཐོ་རིམ་ཆབ་སྲིད་པ་དག་གིས་ཁོང་ལ་མཇལ་འཕྲད་གནང་མེད་པ་རེད། ཁོ་ཚོའི་ཁྲོད་ཁ་བཤད་ཁོ་ན་ཙམ་ལས་ལག་ལེན་དངོས་ལ་གཞོལ་མཁན་ཧ་ཅང་ཉུང་ཉུང་རེད། དེ་འདྲ་ཞིག་རེད་དམ་མ་རེད།
ཁོ་ཆི།  མི་ཚང་མའི་ངོས་ནས་བཤད་ན། ཕྱོགས་གཅིག་ནས་ཤུགས་རྐྱེན་ཚད་ངེས་ཅན་ཞིག་བཟུང་ནས། རྒྱ་ནག་གི་མགོ་ཁྲིད་ཚོར་གདོང་ཐུག་རྒྱག་རྒྱུར་གཞོལ་བ་དང་། ཕྱོགས་གཞན་ཞིག་ནས་མི་དམངས་ཀྱིས་གནད་དོན་འདིའི་ཐད་གླེང་བརྗོད་དང་མུ་མཐུད་དོ་སྣང་ཡོང་བར་བྱེད་རྒྱུ་དེ་དངོས་གནས་ཁག་པོ་རེད། རྒྱལ་ཁབ་མི་ཉུང་བ་ཞིག་གིས་རང་ཉིད་ཀྱི་དཔལ་འབྱོར་ལ་ཤུགས་རྐྱེན་འབྱུང་བར་སྐྲག་སྣང་སྐྱེས་ཏེ་ཏཱ་ལའི་བླ་མ་གདན་ཞུ་གནང་གི་ཡོད་པ་མ་རེད། ཚང་མ་གནད་དོན་འདི་ལ་ཐུག་ཡོད་པ་རེད། ངས་བསམ་ན། མཐའ་གཅིག་ཏུ་ངོ་རྒོལ་བྱེད་རྒྱུ་ནི་ཧ་ཅང་ཁག་པོ་རེད། རྒྱུ་མཚན་ནི་རྒྱ་ནག་སྟོབས་ཆེན་རེད། དེར་མ་ཟད། གལ་སྲིད་མཐའ་གཅིག་ཏུ་ངོ་རྒོལ་གྱི་ལྟ་སྟངས་འཛིན་མཁན་ཞིག་བྱུང་ནའང་།  གཅིག་བྱས་ན་ཉམས་ཆུང་བའི་བོད་མི་རྣམས་ཀྱི་ངོས་ཐད་ནས་བཤད་ན་སྔར་བས་ཀྱང་ཉེན་ཁ་ཆེན་པོ་རེད། དེའི་རྐྱེན་གྱིས་ང་ཚོའི་དམིགས་ཡུལ་ནི། རྒྱལ་སྤྱིའི་ཆབ་སྲིད་དང་གླེང་བརྗོད་ཀྱིས་མུ་མཐུད་ནས་བོད་ཀྱི་གནད་དོན་ལ་དོ་སྣང་བྱེད་རྒྱུ་དེ་རེད། ངས་བསམ་ན་དེའི་ཕྱོགས་ནས་ཉེ་ཆར་གྱི་གནས་སྟངས་ལ་བལྟས་ནའང་ཅུང་ཙམ་ལེགས་པོ་བྱུང་འདུག ང་ཚོའི་རེ་བ་ནི་རྒྱ་ནག་གཞུང་དང་ཏཱ་ལའི་བླ་མའི་བར་ཡང་བསྐྱར་གསར་དུ་གྲོས་མོལ་མགོ་ཚུགས་ཐུབ་རྒྱུ་དེ་ཡིན། དེ་ནི་དམག་དོན་རང་བཞིན་ཅན་གྱི་དམིགས་ཡུལ་ཞིག་མ་ཡིན་པར་གླེང་མོལ་གྱི་སྒོ་ཕྱེ་རྒྱུ་ཙམ་རེད།

རླུང་འཕྲིན།  དེ་ལྟར་བཤད་ན། ཁྱེད་ཀྱི་བསམ་ཚུལ་ནི་ཕྱོགས་གཉིས་བར་གླེང་མོལ་བྱེད་རྒྱུ་དེ་ནི་ཆབ་སྲིད་ཀྱི་གནོན་ཤུགས་དྲག་པོ་ལས་ཀྱང་ཕན་ནུས་ལྡན་པ་ཞིག་རེད་འདོད་དམ།
ཁོ་ཆི།  རྒྱ་ནག་སྲིད་གཞུང་ནི་སྔར་བཞིན་སྒེར་གཅོད་རང་བཞིན་ལྡན་པའི་སྲིད་དབང་ཞིག་རེད། དེར་མ་ཟད། ཉེ་བའི་གནས་སྟངས་ལ་བལྟས་ནའང་བྱ་སྤྱོད་མཐའ་དག་གི་ནུས་ཤུགས་ཡོད་ཚད་ཁོའི་ལག་འོག་ཏུ་སྟངས་འཛིན་བྱས་འདུག དེར་བརྟེན། ང་ཚོའི་རེ་བ་ནི་རྒྱ་ནག་གི་མགོ་ཁྲིད་རིམ་པས་རང་གི་ཁེ་ཕན་ལ་བསམ་བློ་གཏོང་བའི་གོ་རིམ་ཁྲོད་ཀུ་ཡངས་བསམ་ཤེས་ཀྱི་ཕན་ནུས་ཀྱང་མཐོང་ཐུབ་པ་བྱེད་རྒྱུ་དང་། དེ་དང་མཉམ་དུ་ཁོ་ཚོ་རང་ཉིད་ལའང་ངོ་ཚ་ཁ་སྐྱེངས་མི་ཡོང་བ་བྱེད་རྒྱུ་གལ། འདི་ནི་ཏཱ་ལའི་བླ་མ་མི་སྒེར་གྱིས་རྒྱུན་འཁྱོངས་བྱེད་པའི་ལྟ་ཚུལ་ཡང་རེད། དེར་མ་ཟད། ཏཱ་ལའི་བླ་མས་ལོ་མང་པོའི་སྔོན་ནས་བཟུང་མའོ་ཙེ་ཏུང་གིས་མགོ་ཁྲིད་པའི་རྒྱ་ནག་སྲིད་གཞུང་ལ་འབྲེལ་འདྲིས་བྱས་པའི་བརྒྱུད་རིམ་གྱི་ཉམས་མྱོང་གི་ཐད་ནས་བལྟས་ན། ཞི་བདེ་ཡི་ལམ་ནས་རྒྱ་ནག་སྲིད་གཞུང་ལ་གོ་སྐོན་བློ་འགུག་ཡོང་ཐབས་བྱས་ཏེ་རྒྱ་ནག་གི་ངོ་གདོང་གཙང་མར་བསྒྱུར་བའི་ཐབས་ལམ་དེ་ནི་བློ་ཡིད་ལ་མི་ཤོང་བ་ཞིག་རེད། ང་ཚོའི་ངོས་ནས་སྒྲུབ་དགོས་པ་ནི། རྒྱ་ནག་གི་བཅའ་ཁྲིམས་ནང་དུ་གསལ་བོར་བཀོད་བའི་མི་རིགས་རང་སྐྱོང་བཅའ་ཡིག་གིས་གཏན་ལ་ཕབས་པ་དག་གནད་དུ་བཏོན་ཏེ། རྒྱ་ནག་སྲིད་གཞུང་གིས་མི་རིགས་མང་པོའི་རྒྱལ་ཁབ་འདིའི་མགོ་འཁྲིད་པའི་སྔོན་འགྲོའི་ཆ་རྐྱེན་འོག  གནད་དོན་ཐག་གཅོད་ཀྱི་ལམ་ཁ་ཞིག་རྙེད་རྒྱུ་དང་། དེ་དང་མཉམ་དུ་རྒྱ་ནག་སྲིད་གཞུང་ལ་རྒྱལ་སྤྱིའི་སྤྱི་ཚོགས་ཀྱི་བརྩི་མཐོང་ཐོབ་རྒྱུ། དེ་བཞིན་རྒྱལ་སྤྱིའི་སྤྱི་ཚོགས་ཀྱི་ཡོངས་ཁྱབ་རང་བཞིན་གྱི་སྡང་སེམས་ལ་བརྟེན་དེ་རྒྱ་ནག་ལ་གནོན་ཤུགས་སྤྲོད་པའི་བྱེད་ཐབས་དེ་དུས་ཡུན་རིང་པོར་མུ་མཐུད་རྒྱུན་སྐྱོང་མི་ཡོང་བ་བྱེད་རྒྱུ་བཅས་རེད།
 
ཚེ་རིང་རྒྱལ་གྱིས་འཇར་མན་རླུང་འཕྲིན་ཁང་གི་རྒྱ་ཡིག་དྲ་ཚིགས་ལས་བོད་སྒྱུར་བྱས།