འདས་ལོའི་ཞི་རྒོལ་གྱི་རྗེས་ནས་བཟུང་རྒྱ་ནག་གཞུང་གིས་ཐེངས་དང་པོར་ཨ་རིའི་གྲོས་ཚོགས་འོག་མའི་མི་སྣ་ ༡༠ བོད་ནང་གཟིགས་སྐོར་དུ་ཕེབས་བཅུག་ཡོད་ལ། བཙན་བྱོལ་བོད་གཞུང་གིས་འདི་བརྒྱུད་བོད་ནང་གི་གནས་སྟངས་ངོ་མ་དེ་ཕྱི་ལོགས་ནས་ཤེས་རྟོག་ཡོང་རྒྱུར་རེ་བ་རྒྱག་གིན་ཡོད་པ་རེད།
ཕྱི་ཚེས་ ༡༣ ཉིན་རྒྱལ་སྤྱིའི་བོད་དོན་ལས་འགུལ་ཁང་གིས་བསྒྲགས་པ་ལྟར་ན། བདུན་ཕྲག་འདིའི་ནང་ཨ་རིའི་གྲོས་ཚོགས་འོག་མའི་མི་སྣ་ ༡༠ པའི་གྲུབ་པའི་གཟིགས་སྐོར་ཚོགས་པ་ཞིག་བོད་ནང་ཕེབས་ཡོད་ལ། དེ་ནི་འདས་པའི་གྱེར་ལངས་བྱུང་བ་ནས་ད་བར་གྱི་གཟིགས་སྐོར་ཐེངས་དང་པོ་དེ་ཡིན་འདུག འདིའི་ཐད། བཙན་བྱོལ་བོད་གཞུང་གི་མགྲིན་ཚབ་པ་ཐུབ་བསྟན་བསམ་འཕེལ་ལགས་སུ། ད་རེབ་ཨ་རིའི་གྲོས་ཚོགས་འོག་མའི་མི་སྣ་བཅུ་བོད་ས་ཁུལ་དུ་གཟིགས་སྐོར་ལ་ཕེབས་པ་རེད། ཁོང་ཚོ་བོད་ལ་ཕེབས་པའི་ལས་དོན་གཙོ་བོ་གང་འདྲ་ཞིག་ལ་ངོས་འཛིན་གནང་གི་ཡོད། དེ་བཞིན་བཙན་བྱོལ་བོད་གཞུང་གི་ངོས་ནས་ཁོང་ཚོ་བོད་ནང་མ་ཕེབས་པའི་སྔོན་ལ་དམིགས་བསལ་གྱི་འབོད་སྐུལ་འདྲ་ཞུ་རྒྱུ་བྱུང་ཡོད་མེད་བཀའ་འདྲི་ཞུས་པར་ཁོང་གིས། ད་རེེབ་ཨ་རིའི་གྲོས་ཚོགས་འོག་མའི་མི་སྣ་བཅུ་བོད་ཁུལ་དུ་གཟིགས་སྐོར་ལ་ཕེབས་ཐུབ་པ་བྱུང་བ་དེ་ཞེ་དྲག་གི་ཕན་རླབས་ཆེན་པོ་རེད། ད་ཐེངས་ཁོང་རྣམ་པ་ཚོ་བོད་ལ་ཕེབས་རྒྱུ་དེའང་བོད་ཀྱི་དངོས་དོན་གནས་སྟངས་གང་ཡིན་ཐད་ལ་རྟོག་ཞིབ་བྱ་རྒྱུ་དེ་རེད་བསམ་གྱིན་ཡོད། བཙན་བྱོལ་བོད་གཞུང་གི་ངོས་ནས་དམིགས་བསལ་འབོད་སྐུལ་ཟེར་ནའང་འདྲ། ང་ཚོས་དུས་རྒྱུན་ཏུ་ནས་རྒྱལ་སྤྱིའི་མགོ་ཁྲིད་ཚོར་བོད་དུ་ཆེད་ཕེབས་ཀྱིས་བོད་དུ་བོད་མིར་རང་དབང་ཡོད་མེད་དང། བོད་ཀྱི་ཆབ་སྲིད་བཙོན་པ་ཚོས་དཀའ་སྡུག་ཇི་འདྲ་མྱངས་ཡོད་མེད་ལ་སོགས་ཀྱིས་མཚོན་པའི་དངོས་ཡོད་གནས་ཚུལ་རྟོག་ཞིབ་བྱ་རོགས་ཞེས་རེ་སྐུལ་ཞུ་བཞིན་ལྟར། ད་རེབ་ཨ་རིའི་གྲོས་ཚོགས་འོག་མའི་མི་སྣ་ ༡༠ ཕེབས་ཐུབ་པ་བྱུང་བ་རེད།
ཡང་ཁོང་ལ། ད་རེབ་རྒྱ་ནག་གིས་ཨ་རིའི་མཐོ་རིམ་མི་སྣ་འདི་དག་བོད་ནང་དུ་ཕེབས་བཅུག་པ་འདི་ནི་ཁོ་ཚོས་བོད་ནང་གི་གནས་སྟངས་དེ་ཞི་བདེ་དང་བརྟན་ལྷིང་ཡིན་པ་གསལ་བཤད་དང་དངོས་སུ་སྟོན་པ་ལྟ་བུ་ཞིག་ལ་མཐོང་གི་ཡོད་མེད་དྲིས་པར་ཁོང་གིས། དེ་འདྲ་ཞིག་ཡིན་ཁག་པོ་རེད། གང་ཡིན་ཟེར་ན། གལ་སྲིད་བོད་ལ་དོན་དམ་གྱི་ཞི་བདེ་ལྷིང་འཇགས་ཤིག་ཡོད་ཚེ་ཐེངས་འདིའི་མཐོ་རིམ་མི་སྣ་ཕེབས་དགོས་དོན་མེད། གལ་སྲིད་དེ་འདྲའི་དམིགས་ཡུལ་ཞིག་ཡོད་པའི་དབང་དུ་བཏང་ཡང། ཁོང་ཚོས་དོན་དངོས་སྦས་འགེབ་བྱས་ཀྱང་དངོས་གནས་བཤད་ན་འཛམ་བུ་གླིང་མགོ་སྐོར་གཏོང་མི་ཐུབ་གི་མ་རེད། ཅེས་གསུངས་བྱུང་།
དེ་བཞིན་རྒྱལ་སྤྱིའི་བོད་དོན་ལས་འགུལ་ཁང་གི་གཞུང་འབྲེལ་འབྲེལ་མཐུད་པ་ཊོ་ཌ་སི་ཊིན་ Todd Stein མཆོག་ནས་གསུངས་དོན། ཨ་རིའི་གྲོས་ཚོགས་འོག་མ་ནི་བོད་དོན་གྱི་ཐད་དོ་སྣང་ཆེ་བ་མ་ཟད། ད་བར་དུ་འདིའི་ཐད་མཉམ་འབྲེལ་བྱས་ནས་བསྡད་པ་རེད། ཐེངས་འདིར་རྒྱ་ནག་གཞུང་གིས་གཟིགས་སྐོར་བ་དེ་དག་ལ་མཐོང་ཆོག་པ་གང་དང། སྒྲུབ་ཆོག་པ་ཅི་ཡིན་སོགས་ཀྱི་ཆོག་མཆན་སྟེར་ཕྱོགས་དེ་ནི་ཁོང་ཚོས་བོད་ཀྱི་གནས་སྟངས་དེ་རྒྱལ་སྤྱིའི་ཐོག་ཏུ་ཇི་ལྟར་འགྲེལ་བརྗོད་བྱ་འདུན་ཡོད་པའི་བརྡ་ལན་གཞན་ཞིག་རེད། ད་བར་དུ་རྒྱ་ནག་གཞུང་ཕྱོགས་ནས་བོད་དེ་ནི་ཞི་བདེ་ལྷིང་འཇགས་ཡིན་ཡང་རྙོག་གླེང་བྱེ་བྲག་པ་རེ་བྱུང་བ་དག་ནི་ཕྱི་ཕྱོགས་ཀྱི་ཐེ་བྱུས་ལས་འབྱུང་གི་ཡོད་པར་འགྲེལ་བརྗོད་བྱེད་ཀྱིན་ཡོད་པ་རེད། ང་ཚོའི་རེ་བ་ལ་ཐེངས་འདིའི་འཚམས་གཟིགས་པ་དག་གིས་བོད་ཀྱི་གནས་སྟངས་ལ་འདང་ངེས་ཀྱི་རྒྱུས་ལོན་བྱས་ཏེ། བོད་དུ་རྒྱ་མིའི་སྲིད་བྱུས་འཛིན་ཕྱོགས་དང། བོད་ནང་གི་བོད་མི་ཚོའི་ད་ལྟ་དང། མ་འོངས་པའི་མངོན་འདོད་བཅས་ལ་རང་སྒེར་གྱི་མཐོང་ཚུལ་དེ་འཁྱེར་ཡོང་ཐུབ་རྒྱུ་དེ་ཡིན་ཅེས་གསུངས་ཡོད་པ་རེད།
![This satellite image shows Hurricane Melissa southeast of Jamaica at 12:10 GMT on October 27, 2025 [AFP]](https://tibettimes.net/wp-content/uploads/2025/10/Screenshot-2025-10-28-at-5.13.58-PM-360x180.png)
མ་གཞི་ནུབ་ཕྱོགས་པ་དེ་ཚོ་རང་དོན་ཨང་དང་པོར་བྱེད་མཁན་གྱི་མགོ་བདེ་ཤ་སྟག་ཡིན་པས་སྐབས་རེར་ཚིག་པ་ཟ་བཅུག་ན་ཡང་། ཕྱོགས་གཞན་ཞིག་ནས་ཁོང་ཚོར་བོད་དང་བོད་ཀྱི་རིག་གནས་ལ་མཚར་འཛིན་དང་དགའ་ཞེན་ཞིག་ཡོད་པ་དངོས་ཡོད་ཡིན་འདྲ་བས་གང་ལྟར་རྟོག་དཔྱོད་རང་ཚུགས་ཐུབ་པ་ཞིག་ཡོང་རྒྱུའི་རེ་བ་ཡོད།
དུས་བབ་གསར་ཁང་ནས་གནས་ཚུལ་དུས་ཐོག་སྤེལ་བར་ཐུགས་རྗེ་ཆེ་ཞུས། བོད་ནང་དང་དམིགས་བསལ་རྒྱ་ནག་གི་གནས་སྟངས་མ་མཁྱེན་མཁན་ཟེར་ནའང་འདྲ། བཙན་བྱོལ་བོད་གཞུང་མང་ཕལ་མོ་ཆེས་གནས་ཚུལ་འདི་རིགས་ཐོས་སྐབས་ཧ་ལམ་རང་རེའི་བདེན་མཐའ་གསལ་ལ་ཉེ་བའམ་རྒྱ་ནག་ཐོར་ལ་ཉེ་བ། ཡང་ན་ཨ་རི་གཙོས་པའི་རྒྱལ་སྤྱི་ཚོགས་ཀྱིས་རྒྱ་ནག་ལ་གནོན་ཤུགས་སྤྲད་དེ་བོད་དོན་ཐོག་གཅོད་བྱེད་འཇུག་གི་རེད་བསམ་པའི་འཆར་ཡན་ཞིག་གིས་མི་ལོ་ལྔ་བཅུ་འདས་ཤིང་། ད་དུང་ཡང་དུས་ཡུན་ཅི་ཙམ་ཞིག་ལ་འདི་ལྟར་རེ་སྨོན་གྱིས་རང་སེམས་གསོས་ཏེ་བསྐྱལ་རྒྱུ་ཡིན་པ་ཚོད་དཔག་བྱེད་དཀའ་བ་ཞིག་ཡིན།
གོང་དུ་སྐུ་ངོ་ཐུབ་བསམ་ལགས་དང་ Todd Stein རྣམ་གཉིས་ཀྱི་འབྲེལ་བརྗོད་དེ་དག་ནི་སྒྲ་འཇུག་ཞུས་ཏེ་མི་ལོ་ལྔ་བཅུའི་རིང་དགོས་མཁོ་ནམ་བྱུང་ལ་གཏོང་བཞིན་པའི་གཞས་རྙིང་ཞིག་ལས་མ་འདས་ལ། ཨ་རི་དང་ཡོ་རོབ་གྲོས་ཚོགས་འཐུས་མིས་མཚོན་པའི་སྲིད་དོན་མི་སྣ་ཕལ་མོ་ཆེ་དེ་དག་བོད་ལ་ཕེབས་པ་དེ་དག་གཅིག་བྱས་ན་བོད་དོན་མཁྱེན་རྟོགས་ཆེད་དང་བོད་དོན་ལ་ཐུགས་འཁུར་ཡོད་སྲིད་ཀྱང་། གཙོ་ཆེ་བ་འཛམ་གླིང་ཟླུམ་པོའི་མཐའ་གསུམ་པར་གྲགས་པའི་ཡང་རྩེ་དེར་ལྗོངས་རྒྱུ་ཐེངས་ཤིག་བྱེད་རྒྱུ་དེ་ནུབ་ཕྱོགས་པ་རྣམས་ཀྱི་མི་ཚེའི་དམིགས་ཡུལ་ཡང་ཡིན་པར་འདོད།
དེ་ལས་བོད་མི་རྣམས་ནས་༸གོང་ས་མཆོག་ཞལ་བཞུགས་པའི་སྐབས་འདིར་ལམ་ཕྱོགས་མ་ནོར་བར་བོད་སྤྱིའི་རྩ་དོན་ལ་རང་འཁྲིའི་ལས་འགན་ཕྲག་ཏུ་འཁུར་ཏེ་རྡོག་རྩ་གཅིག་སྒྲིལ་དང་དཔུང་བ་མཉམ་གཤིབ་བྱེད་རྒྱུ་དེ་གལ་ཆེ་བར་མཐོང་ངོ་།