ལ་དྭགས་ཀྱི་འཇམ་དབྱངས་སློབ་གྲྭ།

ཟླ་འདིའི་ཚེས་ ༡༤ ཉིན་༧གོང་ས་མཆོག་གིས་ལ་དྭགས་ཁུལ་དུ་འཇམ་དབྱངས་སློབ་གྲྭ་ཞེས་པའི་སློབ་གྲྭ་གསར་པ་ཞིག་དབུ་འབྱེད་གནང་ཡོད་པ་རེད། སློབ་གྲྭའི་འཛུགས་བསྐྲུན་གྱི་ཐད་ལ་༧གོང་ས་མཆོག་གི་བདེ་རྩ་ཚོགས་པས་འགྲོ་གྲོན་རྒྱབ་སྐྱོར་གནང་ཡོད་པ་དང། སློབ་གྲྭའི་འཛིན་སྐྱོང་ནི་ལ་དྭགས་ཀྱི་ནཱ་ལནྜའི་ནང་ཆོས་ལྟེ་གནས་ཁང་གིས་གནང་རྒྱུ་ཡིན་འདུག སློབ་གྲྭའི་དམིགས་ཡུལ་གཙོ་བོ་ནི་ཟངས་དཀར་དང།  དཀར་གྷལ། དེ་བཞིན་ནུབ་རྭ་ལྟ་བུའི་ཐག་རིང་གྲོང་གསེབ་ཁག་གི་སློབ་སྦྱོང་གི་བགོ་སྐལ་མ་ཐོབ་པའི་བུ་ཕྲུག་ཚོར་བོད་ཀྱི་ནང་ཆོས་དང། དེང་དུས་ཤེས་བྱ་སྤྲོད་རྒྱུའི་ཆེད་དུ་ཡིན་འདུག ༧གོང་ས་མཆོག་གིས་སློབ་སྦྱོང་གི་བགོ་སྐལ་མེད་པའི་བུ་ཕྲུག་ཉམ་ཐག་ཚོར་དེང་དུས་ཀྱི་ཤེས་བྱ་དང།  བོད་ཀྱི་ནང་ཆོས་དང་རིགས་ལམ་ཀྱི་སློབ་ཁྲིད་བྱེད་དགོས་གལ་ཆེ་བའི་བཀའ་སློབ་གནང་ཡོད་ཅིང། ད་ལྟའི་ཆར་སློབ་གྲྭ་འདིར་སློབ་མ་ ༦༠ ཙམ་ཡོད་པ་དང། འཛིན་རིམ་ལྔ་པ་བར་ཡོད་ཅིང་སྡོད་ཁང་དང་བཅས་པའི་མཐུན་རྐྱེན་མཐའ་དག་ཡོད་འདུག ཆར་ཟླའི་ནང་༧གོང་ས་མཆོག་ལྷོ་ཨ་ཧྤི་རི་ཀའི་ས་གནས་ས་ལོ་ཝ་ཀི་ཡ་ Slovakia ཞེས་པར་ཆིབས་བསྒྱུར་གནང་རྒྱུ་ཡིན་པ་དང། དེ་རྗེས་ཅེག་སྤྱི་མཐུན་རྒྱལ་ཁབ་ཀྱི་པུ་ར་གྷུ་ Prague ས་གནས་སུ་ཨེ་ཤ་ཡའི་དམངས་གཙོ་དང་འགྲོ་བ་མིའི་ཐོབ་ཐང་ཞེས་པའི་ཉིན་གཉིས་ཀྱི་ཚོགས་ཆེན་དུ་ཆིབས་བསྒྱུར་གནང་རྒྱུ་ཡིན་འདུག་པ་དང། ཚོགས་ཆེན་དེ་འཆར་ཟླའི་ཚེས་ ༡༠ ཉིན་ནས་འཚོགས་གཏན་འཁེལ་ཡོད་པ་རེད།