ང་ཚོས་བོད་དོན་ལ་རྒྱབ་སྐྱོར་བྱ་རྒྱུ་ཡིན།

ཧྥ་རན་སིའི་གྲོས་ཚོགས་གོང་མའི་བོད་དོན་རྒྱབ་སྐྱོར་ཚོགས་པས་མ་འོངས་པར་ལྷ་ས་ཁོ་ན་མིན་པར་བོད་ཁུལ་ཡོངས་ཀྱི་བོད་མིའི་གནས་སྟངས་ལ་རྒྱུས་ལོན་བྱས་ཏེ། དེ་དག་གི་དཀའ་ངལ་སེལ་བའི་ཐད་ནུས་པ་གང་ཡོད་འདོན་རྒྱུ་ཡིན་ཟེར།

ཁ་སང་ཕྱི་དྲོ་བོད་གཞུང་ཕྱི་དྲིལ་ལྷག་པ་ཚེ་རིང་རྗེས་དྲན་ཚོགས་ཁང་དུ་ཧྤ་རན་སིའི་གྲོས་ཚོགས་གོང་མའི་བོད་དོན་རྒྱབ་སྐྱོར་ཚོགས་པའི་སྐུ་ཚབ་གསུམ་དང་། དེ་བཞིན་བོད་གཞུང་ཕྱི་དྲིལ་བཀའ་བློན་སྟག་ལྷ་སྐལ་བཟང་གཡང་སྐྱིད་མཆོག བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་མཉམ་ཞུགས་ཐོག་ཧྤ་རན་སིའི་གྲོས་ཚོགས་གོང་མའི་སྐུ་ཚབ་རྣམ་པས་གསར་འགོད་གསལ་བསྒྲགས་ཤིག་གནང་སོང་ལ།   སྐབས་དེར། བོད་མི་མང་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་ཐེངས་འདིའི་སྐུ་ཚབ་རྣམ་པ་ངོ་སྤྲོད་དང་འབྲེལ་གསུངས་དོན། དེ་རིང་ང་ཚོ་བཙན་བྱོལ་བོད་མིའི་དམངས་གཙོའི་དུས་ཆེན་དང་སྟབས་བསྟུན་ཏེ་ཧྤ་རན་སིའི་གྲོས་ཚོགས་གོང་མའི་བོད་དོན་རྒྱབ་སྐྱོར་ཚོགས་པའི་འཐུས་མི་སུམ་ཅུའི་ཁྲོད་ཀྱི་སྐུ་ཚབ་གསུམ་ངྷ་སར་ཆིབས་བསྒྱུར་གནང་ཡོད། ༢༠༠༥ ལོར་ཁོང་ཚོ་ཐེངས་དང་པོར་ངྷ་སར་གཟིགས་སྐོར་རུ་ཕེབས་ཡོད་པ་དང་། འདི་ནི་གྲོས་ཚོགས་གོང་མའི་འཐུས་མི་ཁག་བཞུགས་སྒར་དུ་ཕེབས་ཐེངས་གཉིས་པ་ཆགས་ཡོད།  ཐེངས་འདིའི་སྐུ་ཚབ་ཚོགས་རྣམ་པ་ནི། ཧྤ་རན་སིའི་གཞུང་འཛིན་ཚོགས་པའི་ནང་ཕྱག་ལས་གནང་བ་དང་མཉམ་དུ་བོད་དོན་ལ་ཐུགས་ཁུར་རྒྱབ་སྐྱོར་གྱི་ཕྱག་ལས་གནང་མཁན་ཡིན་པ་དང་།  དེའི་ཁྲོད་ཀྱི་སྐུ་ཞབས་རྗོན་ཧྥན་སོར་ཁོ་རང་སྔོན་མ་བོད་ནང་འགྲོ་མྱོང་མཁན་ཞིག་དང་། དེ་བཞིན་ལོ་སྔོན་མའི་ཞི་རྒོལ་གྱི་སྐབས་དང་བསྟུན་ཏེ་བལ་ཡུལ་ནང་ཆིབས་བསྒྱུར་གནང་སྟེ། བོད་མིའི་བདེ་སྡུག་དང་འབྲེལ་བའི་ཐད་ཐུགས་ཁུར་རྒྱབ་སྐྱོར་གནང་བ་མ་ཟད། ཁོང་ཚོའི་ཚོགས་པ་འདི་ཉིད་ཀྱང་བོད་དོན་ལ་དུས་ཡུན་རིང་བོར་ཐུགས་ཁུར་དང་རྒྱབ་སྐྱོར་གནང་མཁན་ཞིག་ཆགས་ཡོད།  ཐེངས་འདིར་ཡང་ཁོང་ཚོ་བཙན་བྱོལ་བོད་མིའི་གཞུང་དང་གཞུང་འབྲེལ་མ་ཡིན་པའི་ཚོགས་པ་སྒྲིག་འཛུགས་དང་སློབ་གྲྭ་ཁག་སོགས་སུ་གཟིགས་སྐོར་དུ་བསྐྱོད་དེ་བཙན་བྱོལ་བོད་མིའི་གནས་སྟངས་རྒྱུས་ལོན་བྱས་ཡོད་པ་དང་། ཐེངས་འདིའི་དམངས་གཙོའི་མཛད་སྒོའི་ཐོག་ལའང་ཆིབས་བསྒྱུར་གནང་ཡོད། ཟླ་འདིའི་ཚེས་ལྔ་ཉིན་༧གོང་ས་མཆོག་དང་མཇལ་འཕྲད་གནང་རྒྱུ་ཡིན་པ་དང་། ༢༠༡༡ ལོར་ཧྤ་རན་སིའི་གྲོས་ཚོགས་འོག་མིའི་འཐུས་མི་ཁག་ཅིག་ཡང་ངྷ་སར་ཆིབས་བསྒྱུར་གནང་འཆར་ཡོད་པ་རེད།  ཅེས་གསུངས་བྱུང་།

དེ་བཞིན།  ཧྤ་རན་སིའི་གྲོས་ཚོགས་གོང་མའི་སྐུ་ཚབ་རྗོན་ཧྤན་སོར་ལགས་གཙོས་པའི་སྐུ་ཚབ་ཚོགས་པས་གསུངས་དོན། ང་ཚོ་ཧྤ་རན་སིའི་གྲོས་ཚོགས་གོང་མའི་འཐུས་མི་ཡིན་པ་མ་ཟད། ནམ་རྒྱུན་བོད་དོན་ལ་སེམས་ཁྲལ་བྱས་བསྡད་མཁན་ཞིག་ཡིན།  ད་ལྟ་ང་ཚོ་གྲོས་ཚོགས་གོང་མའི་ནང་ཚོགས་མི་ ༤༠ ལྷག་བོད་དོན་ཚོགས་ཆུང་ནང་མཉམ་ཞུགས་བྱས་ཡོད་ལ། ང་ཚོས་བོད་ཀྱི་གནད་དོན་འདི་དྲང་བདེན་དང་འཚེ་བ་མེད་པའི་འཐབ་རྩོད་ཞིག་ཡིན་པའི་ཤེས་སྟབས་རང་ཤུགས་ཀྱིས་རྒྱབ་སྐྱོར་བྱེད་འདོད་ཀྱི་འདུན་པ་ཞིག་སླེབས་འོང་གི་འདུག  དེ་བཞིན། ཐེངས་འདིར་ང་ཚོ་ཧྤ་རན་སི་གྲོས་ཚོགས་གོང་མའི་ཐུགས་ཁུར་དང་རྒྱབ་སྐྱོར་འོག་ངྷ་རམ་ས་ལར་ཡོང་བ་དེ་ཧྤ་རན་སི་མི་མང་དང་བོད་མི་མང་གི་འབྲེལ་ལམ་དང་བོད་དོན་ལ་དོ་སྣང་དང་ཐུགས་ཁུར་གྱི་རྣམ་པའི་ཐོག་ནས་ཡོང་བ་ཡིན་ཚུལ་བརྗོད་བྱུང་ལ། དེ་བཞིན་ཁོང་ཚོས་བོད་ཀྱི་གནད་དོན་འདི་ནི་བོད་མི་རང་གིས་ཐག་གཅོད་བྱ་དགོས་པའི་གནད་དོན་ཞིག་ཆགས་ཡོད་པ་ལས། བོད་ཀྱི་གནད་དོན་དེ་རྒྱ་ནག་གི་ནང་སྲིད་ཀྱི་གནད་དོན་ཞིག་མིན་པར་དེ་ནི་དུས་ཡུན་རིང་བོའི་ལོ་རྒྱུས་ཡོད་པའི་བོད་རྒྱའི་བར་གྱི་དཀའ་རྙོག་གི་གནད་དོན་ཞིག་རེད། དེ་བས། ད་ལྟའི་བར་༧གོང་ས་མཆོག་དབུས་པའི་བཙན་བྱོལ་བོད་གཞུང་གི་ཆབ་སྲིད་ཀྱི་ལམ་ཕྱོགས་དེ་ཡང་དག་ཞིག་དང་མ་འོངས་བར་མུ་མཐུད་༧གོང་ས་མཆོག་དབུས་པའི་བོད་མི་ཚོས་བོད་དོན་བདེན་མཐའ་སེལ་བའི་ཐད་ནུས་བ་གང་ཡོད་འདོན་དགོས་པ་ཞིག་རེད། རྒྱ་ནག་གཞུང་ངོས་ནས་ཀྱང་ཐབས་ལམ་གང་འདྲ་ཞིག་སྤྱད་ཀྱང་བོད་མི་རིགས་ལ་གཞི་རྩའི་མིའི་རིགས་ལ་དགོས་པའི་ཐོབ་ཐང་ཞིག་སྤྲོད་དགོས་པ་རེད་ལ། མ་འོངས་པར་འཐོབ་ཀྱང་ངེས་པ་ཞིག་རེད། གནས་ཚུལ་འདི་དག་ལ་བརྟེན་ནས་ང་ཚོའི་ངོས་ནས་ཀྱང་ཐེངས་འདིའི་མཐོང་སྣང་དང་དངོས་ཡོད་གནས་ཚུལ་ཧྤ་རན་སིའི་གྲོས་ཚོགས་གོང་མར་སྙན་སེང་ཞུ་རྒྱུ་ཡིན་ལ། ཧྤ་རན་སི་མི་མང་ལ་བོད་དོན་ཐད་རྒྱབ་སྐྱོར་གནང་བའི་འབོད་སྐུལ་ཞུ་རྒྱུ་ཡིན། དེ་མིན་ང་ཚོ་བོད་དོན་རྒྱབ་སྐྱོར་ཚོགས་པའི་ངོས་ནས་བོད་ཀྱི་རྒྱལ་ས་ལྷ་ས་ཁོ་ན་མིན་པར་བོད་ཁུལ་གྱི་ས་ཁུལ་གང་སར་ཆས་ཏེ་དེ་དག་གི་དངོས་ཡོད་གནས་ཚུལ་རྒྱུས་ལོན་དང་འཚོལ་ཞིབ་བྱས་ཏེ། བོད་མིའི་རྩ་དོན་དང་འབྲེལ་བའི་ཐོག་རྒྱབ་སྐྱོར་བྱ་རྒྱུ་ཡིན་ཅེས་བརྗོད་བྱུང།

ཐེངས་འདིའི་གསལ་འགོད་གསལ་བསྒྲགས་སྟེང་བོད་གཞུང་ཧྤ་རན་སིའི་སྐུ་ཚབ་དོན་གཅོད་ལས་ཁུངས་ཀྱི་ལས་བྱེད་འབའ་གཞིས་དབང་བོ་ལགས་ནས་སྐད་བསྒྱུར་བྱས་ཏེ་ཁོང་ཚོའི་ཐེངས་འདིའི་ཆིབས་བསྒྱུར་གྱི་དམིགས་ཡུལ་དང་མ་འོངས་བའི་འཆར་གཞི་སོགས་འགྲེལ་བརྗོད་གནང་སོང་ལ། དེ་བཞིན་གསར་འགོད་པ་དང་ལྷན་དུ་དྲི་བ་དྲིས་ལན་ཡང་གནང་སོང།