སློབ་གྲྭ་གཞུང་བཞེས།

རྒྱ་གཞུང་གིས་གསེར་རྟ་རྫོང་གི་བོད་མི་གཉིས་ཀྱིས་གསར་འཛུགས་བྱས་པའི་སློབ་གྲྭ་ཞིག་ལ་ཁ་བྲལ་རིང་ལུགས་པའི་ལས་ཀ་བསྒྲུབས་པའི་ཉེས་མིང་འོག་གཞུང་བཞེས་བཏང་འདུག་ཟེར།
 
ཉེ་ཆར་བོད་ནས་གསར་དུ་འབྱོར་ཞིང་ཕ་ཡུལ་གསེར་རྟ་རྫོང་སྙི་ཆུ་ཞང་གནུབས་ཟུར་དགོན་པ་ནས་ཡིན་པའི་གྲྭ་ཆོས་གྲགས་ལགས་ཀྱིས་འདི་གའི་གསར་ཁང་ལ་གནས་ཚུལ་མཁོ་སྤྲོད་བྱས་པ་ལྟར་ན། རྒྱ་གཞུང་གིས་འདི་ལོ་ཕྱི་ཟླ་ ༡ པའི་ནང་གསེར་རྟ་རྫོང་རྐུ་རྩ་ཚོ་བ་གཞོ་རོག་དགོན་པའི་མདོ་བསྔགས་རིན་པོ་ཆེ་དང་བོད་རིགས་ཚོང་བ་རིག་ཤེར་གཉིས་ཀྱིས་མཉམ་འབྲེལ་གྱིས་རྒྱ་སྒོར་ཁྲི་ ༥༠༠ ལྷག་གི་འགྲོ་གྲོན་བཏང་སྟེ། གསེར་རྟ་རྫོང་ཐོག་ཏུ་སློབ་ཆུང་དང་སློབ་འབྲིང་། མཐོ་འབྲིང་བཅས་ཡོད་པའི་གཞི་རྒྱ་ཆེ་བའི་བོད་ཀྱི་སློབ་གྲྭ་ཞིག་གསར་རྒྱག་བྱས་ཏེ།  སློབ་གྲྭའི་ཕྱིའི་འཛུགས་སྐྲུན་ཡོངས་སུ་གྲུབ་ཅིང་ནང་གི་མདུན་ཅོག་དང་རྐུབ་སྟེགས་སོགས་མཐུན་རྐྱེན་གང་ལེགས་གསར་དུ་སྒྲིག་བཞིན་པའི་དུས་སྐབས་དེར། རྒྱ་ནག་གཞུང་གི་འབྲེལ་ཡོད་མི་སྣས་སློབ་གྲྭ་དེ་ལས་མཚམས་འཇོག་དགོས་པའི་བཙན་བཀའ་བཏང་སྟེ་སྒོ་བརྒྱབས་ཡོད་པ་མ་ཟད། སློབ་གྲྭ་འདིའི་སྦྱིན་བདག་གཉིས་ཀྱིས་ཁ་བྲལ་རིང་ལུགས་ཀྱི་བྱ་བ་བསྒྲུབ་ཀྱིན་པའི་ཉེས་མིང་འོག་སློབ་གྲྭ་གཞུང་བཞེས་བཏང་ཡོད་འདུག

ད་ལྟའི་ཆར་སློབ་གྲྭ་འདིའི་སྦྱིན་བདག་རྣམ་གཉིས་ལ་གནོད་སྐྱོན་ཅི་ཡང་བྱུང་མི་འདུག་ནའང། དེར་ཡོད་ས་གནས་འབྲོག་པ་མང་ཚོགས་ཀྱིས་རྒྱ་གཞུང་གི་བྱེད་སྟངས་ལ་ངོས་ལེན་བྱེད་ཐུབ་ཀྱིན་མེད་པ་དང་།  དུས་ད་ལྟའང་སློབ་གྲྭ་འདི་སྒོ་བརྒྱབས་སྟེ་དུས་ཡུན་རིང་བོར་ཁང་སྟོང་དུ་སྐྱུར་ཡོད་པ་དང་། སློབ་གྲྭ་སླར་གསོ་བྱ་བའི་ཐད་བཟང་ཕྱོགས་ཀྱི་གནས་ཚུལ་ཅི་ཡང་མི་འདུག་ཅེས་བརྗོད་བྱུང།