སྐབས་བཅུ་བཞི་བའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ བརྒྱད་པའི་ཉིན་ ༡༢ པ་སྟེ། དེ་རིང་ཕྱི་ཚེས་ ༡༨ ཉིན་གྱི་ཕྱི་དྲོའི་ཆུ་ཚོད་ ༤ དང་ཕྱེད་ཀའི་སྟེང་། སྤྱི་འཐུས་སྒེར་གྱི་གྲོས་ཆོད་གྲོས་འཆར་ཞིག་གི་ཐད། སྤྱི་འཐུས་ནང་ཁུལ་དགོངས་ཚུལ་མ་མཐུན་པ་བྱུང་སྟབས། གྲོས་ཚོགས་འཐུས་མི་ ༡༢ ཙམ་གཅིག་རྗེས་གཉིས་མཐུད་ཀྱིས་གྲོས་ཚོགས་ལས་ཕྱིར་ཐོན་ཡོད་པ་དང་། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་འདུའི་འགྲོ་ལུགས་དང་ལས་དོན་བྱེད་ ཕྱོགས་ཀྱི་སྒྲིག་གཞིའི་ནང་། སྤྱི་འཐུས་རྩ་འབོར་གྱི་གསུམ་ཆ་གཉིས་མ་ཚང་བ་ཡིན་ན། ལས་དོན་གང་ཡང་ཐག་གཅོད་བྱ་ཐབས་མེད་སྐོར་གཏན་འབེབས་བྱས་ཡོད་སྟབས། གྲོས་ཚོགས་དུས་མིན་གྱིས་མི་གྲོལ་ཐབས་མེད་བྱུང་ཡོད།
ཉེ་ལམ་ཆབ་སྲིད་བཙོན་ཟུར་གྱི་འོས་ཁོངས་ནས་ཨོ་སི་ཊི་ལེ་ཡར་གཏན་སྡོད་དུ་ཕེབས་ པ། མདོ་སྟོད་སྤྱི་འཐུས་བསོད་ནམས་སྟོབས་རྒྱལ་ལགས། ཐེངས་འདིའི་གྲོས་ཚོགས་ཚོགས་དུས་བརྒྱུད་པར་ཆེད་ཕེབས་གནང་བའི་ལམ་གྲོན་དེ་བོད་ མི་མང་སྤྱི་འཐུས་རྒྱུན་ལས་ནས་ཕུལ་ཡོད་སྟབས། དེ་འདྲའི་ལམ་སྲོལ་སྔར་བྱུང་མྱོང་མེད་པའི་ངོས་འཛིན་ཐོག སྤྱི་འཐུས་སྒྲོལ་མ་མཚོ་མོ་ལགས་ཀྱིས་རྒྱ་བལ་འབྲུག་གསུམ་ཕུད་བའི་ཆེད་འཛུགས་ ཕྱི་རྒྱལ་ཁག་གི་སྤྱི་འཐུས་མ་ཡིན་པ་དག་ལ། སྔར་ལམ་ལྟར་འགྲོ་སོང་དོ་བདག་གིས་འགན་འཁུར་དགོས་པའི་གྲོས་འཆར་བཏོན་ཡོད་པ་མ་ ཟད། གྲོས་འཆར་དེ་ལ་སྤྱི་འཐུས་ ༡༤ ཙམ་གྱིས་རྒྱབ་སྐྱོར་གྱི་ས་རྟགས་སྐྱོན་འདུག
གྲོས་ཚོགས་འཐུས་མི་འགའ་རེ་ཡིས་སྔར་ལམ་སྲོལ་མེད་བཞིན་དུ། ཐེངས་འདིར་སྤྱི་འཐུས་བསོད་ནམས་སྟོབས་རྒྱལ་ལགས་སུ་འགྲོ་སོང་བཏང་བ་དེ་སྤྱི་ འཐུས་རྒྱུན་ལས་ཀྱིས་དྲང་མོ་བྱས་མེད་ཚུལ་དང་། ཡང་སྤྱི་འཐུས་འགའ་རེ་ཡིས་གྲོས་ཆོད་གྲོས་འཆར་འདི་ལ་ཧ་ཅང་ཛ་དྲག་གི་རྣམ་པའི་ ཐོག་ནས་སྤྱི་འཐུས་ ༡༤ ཙམ་གྱིས་རྒྱབ་སྐྱོར་ས་རྟགས་སྐྱོན་པ་ཚུལ་མཐུན་མིན་ལུགས་སོགས། གྲོས་འཆར་དེ་གྲོས་ཚོགས་ནང་སྙན་སྒྲོན་ཞུས་མ་ཐག་སྤྱི་འཐུས་ ༡༥ ལྷག་གིས་དགོངས་ཚུལ་གསུངས་མཐར་བསམ་ཚུལ་མ་མཐུན་པ་བྱུང་སྟེ། གྲོས་ཚོགས་འཐུས་མི་ ༡༢ ཙམ་གཅིག་རྗེས་གཉིས་མཐུད་ཀྱིས་གྲོས་ཚོགས་ར་བ་ལས་ཕྱིར་ཐོན་ཡོད་སྟབས། སྤྱི་འཐུས་རྩ་འབོར་གྱི་གསུམ་ཆའི་གཉིས་མ་ལོངས་སྟབས། ཕྱི་དྲོའི་ཆུ་ཚོད་ ༤ དང་ཕྱེད་ཀའི་ཐོག་དུས་མིན་གྱིས་ཚོགས་གསེང་མི་སྤྲོད་ཐབས་མེད་བྱུང་ཡོད།
སྤྱི་འཐུས་སྒྲོམ་མ་མཚོ་མོ་ལགས་ཀྱིས་བཏོན་པའི་སྤྱི་འཐུས་སྒེར་གྱི་གྲོས་ཆོད་ གྲོས་འཆར་གྱི་སྔོན་གླེང་ནང་བཀོད་དོན། བཅའ་སྒྲིག་དང་ལམ་ལུགས་དགོངས་དོན་ཆོལ་ཁ་དང་ཆོས་ལུགས། ཆོས་བརྒྱུད་སྤྱི་འཐུས་རྒྱ་བལ་འབྲུག་གསུམ་ནས་ཡོང་དགོས་པ་ལྟར། རྒྱ་བལ་འབྲུག་གསུན་ཕུད་ཕྱིའི་རྒྱལ་ཁབ་ནས་ཆོལ་ཁ་དང་ཆོས་བརྒྱུད་ཀྱི་སྤྱི་ འཐུས་ཡོང་སྲོལ་མེད་གཤིས། ཁུངས་སོ་སོར་འདེམས་ཐོན་བྱུང་བའི་སྤྱི་འཐུས་ཕྱི་རྒྱལ་དུ་གནས་སྤོས་བྱས་པ་ བྱུང་ཚེ། སྔར་ལམ་ལྟར་སོ་སོར་རྒྱག་རང་འཁུར་བྱེད་དགོས་པ་ལས། གཞུང་གྲོན་གཏོང་ལུགས་མེད་པས་གྲོས་ཆོད་ཅིག་འཇོག་དགོས་གལ་མཐོང་། ཞེས་དང་། གྲོས་ཆོད་དངོས་གཞིའི་ནང་བཀོད་དོན། རྒྱལ་བལ་འབྲུག་གསུམ་ནས་ཆོལ་ཁ་དང་ཆོས་ལུགས། ཆོས་བརྒྱུད་ཁུངས་སོ་སོར་འོས་འདེམས་བྱུང་བའི་སྤྱི་འཐུས་ཞིག་གོང་གསལ་ལས་ཕྱི་ རྒྱལ་དུ་གནས་སྤོ་བྱ་དགོས་བྱུང་ཚེ་སྔར་ལམ་ལྟར་སྤྱི་འཐུས་སོ་སོས་རྒྱག་རང་ འཁུར་བྱེད་དགོས་པ་ལས། གཞུང་གྲོན་གཏོང་མི་ཆོག་པའི་སྤྱི་མོས་སམ་མང་མོས་གྲོས་ཆོད་དུ། ཞེས་བཀོད་འདུག
སྤྱི་འཐུས་སྒེར་གྱི་གྲོས་ཆོད་གྲོས་ཚོད་དེའི་འོག་ཏུ་སྤྱི་འཐུས་ཚེ་རིང་སྒྲོལ་ མ་དང་སྤྱི་འཐུས་ཚེ་རིང་གཡུ་སྒྲོན། སྤྱི་འཐུས་པད་མ་འབྱུང་གནས། སྤྱི་འཐུས་ཟླ་བ་ཚེ་རིང་། སྤྱི་འཐུས་ངག་དབང་ལྷ་མོ། སྤྱི་འཐུས་སྒྲོལ་མ་ཚེ་རིང་། སྤྱི་འཐུས་ཆབ་བྲག་ལྷ་མོ་སྐྱབས། སྤྱི་འཐུས་བསོད་ནམས་ཚེ་རིང་ཕིར་སི། སྤྱི་འཐུས་ཀིརྟི་སྒྲོན་དཀར་ལྷ་མོ། སྤྱི་འཐུས་འོད་དཀར་ཚང་གཡུ་སྒྲོན། སྤྱི་འཐུས་རྒྱལ་ནོར་ཚེ་དབང་། སྤྱི་འཐུས་ཡེ་ཤེས་སྒྲོན་མ། སྤྱི་འཐུས་སྨོན་དཀར་བསོད་ནམས་ཕུན་ཚོགས། དེ་བཞིན་གྲོས་འཆར་འདོན་མཁན་སྤྱི་འཐུས་སྒྲོལ་མ་མཚོ་མོ་བཅས་གྲོས་ཚོགས་འཐུས་ མི་ ༡༤ ཙམ་གྱིས་ས་རྟགས་སྐྱོན་འདུག
