གཉེན་སྟོན་བཀྲ་ཤིས་གཡང་འཁྱིལ།

ཡུལ་ཤུལ་ཁུལ་ཁྲི་མདོ་རྫོང་གིས། བོད་ཁམས་ཁུལ་གྱི་སྲོལ་རྒྱུན་གཉེན་སྟོན་གྱི་གོ་རིམ་ཆ་ཚང་ལྡན་པའི་གློག་བརྙན་ཞིག་ཕབ་བསྐྲུན་བྱས་འདུག

ཕྱི་ཚེས་ ༢༤ ཉིན་བོད་ཀྱི་རིག་གནས་དྲ་བའི་སྟེང་གནས་ཚུལ་སྤེལ་བ་ལྟར་ན། ཉེ་ཆར་མཚོ་སྔོན་ཞིང་ཆེན་ཡུལ་ཤུལ་བོད་རིགས་རང་སྐྱོལ་ཁུལ་ཁྲི་མདོ་རྫོང་སྲིད་གཞུང་དང་མཚོ་སྔོན་བོད་སྐད་བརྙན་འཕྲིན་ཁང་གཉིས་མཉམ་འབྲེལ་ཐོག་ཡུལ་ཤུལ་ཁམས་ཁུལ་ཁྲི་མདོ་རྫོང་གི་བོད་ཁམས་ཁུལ་གྱི་སྲོལ་རྒྱུན་གྱི་ཁམས་པའི་གཉེན་སྲོལ་དང་མཐུན་པའི་དངོས་བྲིས་གློག་བརྙན་ཞིག་ཕབ་སྐྲུན་བྱས་ཡོད་འདུག   གློག་བརྙན་དེའི་ནང་བོད་མི་རིགས་ཀྱི་སྲོལ་རྒྱུན་གྱི་གཉེན་སྒྲིག་གི་ཆེས་ཐོག་མའི་དགའ་རོགས་སྒྲིག་སྟངས་ནས་བཟུང་སྟེ། གཉེན་འདུམ་བྱེད་སྟངས་དང་མནའ་མ་བསུ་སྟངས།  གཉེན་སྟོན་བཤམས་ཚུལ་སོགས་སྲོལ་རྒྱུན་གཉེན་སྟོན་གྱི་ཆོ་ག་དང་གོ་རིམ་ཆ་ཚང་བ་ཞིག་བརྙན་ཕབ་བྱས་ཡོད་འདུག་ལ།  སྤྱི་ལོ་ ༢༠༡༠ ལོའི་བོད་ཀྱི་ལོ་གསར་གྱི་སྐབས་དང་བསྟུན་ཏེ་དངོས་སུ་རྒྱ་ཆེའི་མང་ཚོགས་ཀྱི་སྤྱན་ལམ་དུ་འབུལ་འཆར་ཡོད་འདུག

མཚོ་སྔོན་ཞིང་ཆེན་ལྷོ་ཕྱོགས་སུ་ཡོད་པའི་ཡུལ་ཤུལ་བོད་རིགས་རང་སྐྱོང་ཁུལ་ཁྲི་མདོ་རྫོང་ནི། བོད་མི་རིགས་ཀྱི་ཡུལ་སྲོལ་གོམས་གཤིས་ཀྱི་ལོ་རྒྱུས་རྒྱུན་རིང་ཞིང་། རང་བྱུང་གི་བཀོད་པ་མཛེས་པ་མ་ཟད། བོད་མི་རིགས་ཀྱི་སྲོལ་རྒྱུན་གླུ་དང་གར་གྱི་གནས་ཁྱད་པར་ཅན་ཞིག་ཆགས་ཡོད་སྟབས། མི་རྣམས་ཀྱིས་གླུ་གར་གྱི་ཕ་ཡུལ་ཞེས་པའི་མཚན་སྙན་གནང་ཡོད་འདུག་ལ། ཐེངས་འདིའི་གློག་བརྙན་དེའང་བོད་མི་རིགས་ཀྱི་སྲོལ་རྒྱུན་རིག་གནས་རྒྱུད་འཛིན་གྱི་མཚོན་བྱེད་ཅིག་ཏུ་གྱུར་ཡོད་པ་རེད།