མཐའ་དོན་ཁྱེད་རྣམ་པར་ཞུ་རྒྱུ་ཞིག་ལ། གལ་སྲིད་ང་རང་ཉིད་ལ་མངོན་ཤེས་དང་རྫུ་འཕྲུལ་སོགས་ཀྱི་ནུས་པ་ཞིག་ཡོད་ན། ང་རང་གི་གཟུགས་ཕུང་རྣམ་ཤེས་དང་བཅས་པ་འདི་འཛམ་གླིང་སའི་གོ་ལ་འདི་ཉིད་སྲུང་བར་བྱེད་པའི་བླ་བྲེ་ལྟ་བུ་ཞིག་ཏུ་བསྒྱུར་ན་ཅི་མ་རུང་སྙམ་པའི་ཚོར་བ་ཞིག་དུས་རྒྱུན་དུ་ཡོང་བསྡད་ཡོད། ཅེས་དཔལ་རྒྱལ་བ་ཀརྨ་པ་མཆོག་གིས་བཀའ་བརྒྱུད་ཁོར་ཡུག་སྲུང་སྐྱོབ་ཚོགས་ཆེན་ཐེངས་གཉིས་པའི་སྟེང་གསུངས་ཡོད།
ཉིན་འདི་འགར་དཔལ་ལྡན་རྒྱུད་སྟོད་གྲྭ་ཚང་དུ་འཚོགས་བཞིན་པའི་བཀའ་བརྒྱུད་རྒྱལ་ཡོངས་ཁོར་ཡུག་སྲུང་སྐྱོབ་ཚོགས་ཆེན་ཐེངས་གཉིས་པ་དེ་ཕྱི་ཚེས་ ༨ ཉིན་གྱི་ཕྱི་དྲོ་ཡོངས་སུ་མཇུག་སྒྲིལ་ཡོད་ལ། ཐེངས་འདིའི་ཉིན་གྲངས་ ༦ རིང་གི་ཚོགས་འདུའི་སྟེང་། རྒྱ་བལ་འབྲུག་གསུམ་དང་ཧི་མ་ལ་ཡའི་རི་བརྒྱུད་ཀྱི་ས་གནས་ ༡༥ ཙམ་གྱི་བཀའ་བརྒྱུད་དགོན་ཁག་ ༣༢ ཙམ་ནས་སྐུ་ཚབ་འཐུས་མི་བརྒྱ་ལ་ཉེ་བ་ཚོགས་ཞུགས་ཀྱིས་མ་འོངས་པར་དགོན་ཁག་སོ་སོ་ནས་ཁོར་ཡུག་སྲུང་སྐྱོབ་ཐད་ལས་དོན་བྱེད་ཕྱོགས་དང་། མང་ཚོགས་ལ་གོ་རྟོགས་སྤེལ་ཕྱོགས་བཅས་ལ་བགྲོ་གླེང་ཞིབ་ལྷུག་གནང་སྟེ་ལས་འཆར་སྒྲིག་ཡོད་ལ། ཁོར་ཡུག་ལས་གཞི་སྒྲོག་སྤེལ་བྱེད་སའི་དྲ་རྒྱ་དང་། བཀའ་བརྒྱུད་ཁོར་ཡུག་སྲུང་སྐྱོབ་ཚོགས་པའི་ལས་རྟགས། དེ་བཞིན། དགོན་ཁག་སོ་སོར་ཁོར་ཡུག་སྲུང་སྐྱོབ་ཚོགས་ཆུང་དང་རྒྱུན་ལས་བསྐོ་བཞག་བཅས་གནང་ཡོད།
བཀའ་བརྒྱུད་ཁོར་ཡུག་སྲུང་སྐྱོབ་ཚོགས་པའི་ལས་གཞིའི་ཁོངས་སུ་ནགས་ཚུལ་སྲུང་སྐྱོབ་དང་ཆུ་སྲུང་སྐྱོབ། རི་དྭགས་སྲུང་སྐྱོབ། གད་སྙིགས་དོ་དམ། གནམ་གཤིས་འགྱུར་ལྡོག་གི་བློ་འདོན་བཅས་རིགས་ལྔ་ཡོད་ལ། ཐེངས་འདིར་དཔལ་རྒྱལ་བ་ཀརྨ་པ་མཆོག་གིས་འབྱུང་འགྱུར་གྱི་ལས་དོན་གལ་ཆེན་ཁག་ཅིག་ངོ་སྤྲོད་གནང་དོན་ལྟར་ན། མ་འོངས་པར་གང་ནུས་ཅི་འཇོན་གྱིས་ཐེབས་རྩ་ཕུལ་ཏེ་དགོན་པ་ཁག་གི་ཁོར་ཡུག་སྲུང་སྐྱོབ་སྡེ་ཚན་གྱི་འགྲོ་གྲོན་གཏོང་རྒྱུ་ཡིན་པ་དང་། སྤྱི་ལོ་ ༢༠༡༠ ལོར་དགོན་པ་ཁག་ཏུ་ཉི་འོད་ནུས་པའི་གློག་འདོན་འཕྲུལ་ཆས་འཛུགས་རྒྱུ། བཀའ་བརྒྱུད་སྨོན་ལམ་སོགས་མི་མང་འདུ་འཛོམས་ཆེ་བའི་སྐབས་དག་ཏུ་གཏམ་བཤད་དང་གློག་བརྙན་སོགས་བརྒྱུད་དེ་ཁོར་ཡུག་སྐོར་ལ་གོ་རྟོགས་སྤེལ་རྒྱུ། དེ་བཞིན་ལ་དྭགས་ཁུལ་དུ་ཚོད་ལྟའི་ཚུལ་དུ་བཀའ་བརྒྱུད་ཁོར་ཡུག་ཚོགས་པས་ལྗོན་ཤིང་བཙུགས་ཏེ། སྔོ་ལྗང་ཅན་དུ་བསྒྱུར་ཐབས་ལ་འབད་བརྩོན་བྱ་རྒྱུ་བཅས་ཡིན་འདུག
ཕྱི་ཚེས་ ༨ ཉིན་རྒྱབ་ལས་གཞི་ཡོངས་ཐག་གཅོད་གཏན་འབེབས་བྱས་མཐར། དཔལ་རྒྱལ་བ་ཀརྨ་པ་མཆོག་གིས་མཇུག་སྡོམ་གསུང་བཤད་དང་སྦྲགས། ཐེངས་འདིར་གྲོས་བསྡུར་བྱས་པའི་སྙིང་དོན་ཁག་ཁ་ནས་བཤད་རྒྱུ་ཙམ་མ་ཡིན་པར་དངོས་སུ་ལག་བསྟར་བྱ་གལ་ཆེ་སྐོར་ནན་གྱིས་གསུངས་དོན། ཐེངས་འདི་ཚོགས་འདུའི་མགོ་མཇུག་བར་གསུམ་ལ་རྒྱབ་སྐྱོར་ཐུགས་ཁུར་གནང་མཁན་བདེ་སྐྱིད་ཅུང་རྒྱལ་པ་ལགས་སུ་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན་ལ། འདས་པའི་ཟླ་དྲུག་རིང་དགོན་པ་སོ་སོ་ནས་ཁོར་ཡུག་གི་ཐོག་ལ་ལས་ཀ་ཡག་པོ་གནང་འདུག་པར་ཐུགས་རྗེ་ཆེ་ཞུ་རྒྱུ་ཡིན། ངའི་ངོ་སྲུང་ཆེད་དང་། འདྲ་འདྲའི་ནང་ནས་མི་འདྲ་བ་ཞིག་ཡོང་རྒྱུ་ཙམ་མ་ཡིན་པར་སྤྱི་ཕན་གྱི་བསམ་བློ་དང་ལྷག་བསམ་རྣམ་པར་དག་པས་ཀུན་ནས་བསླངས་ཏེ། ལས་འཆར་དེའི་འཕྲོས་ཐིགས་པ་བསགས་པའི་རྒྱ་མཚོ་བཞིན། ལས་དོན་འདི་བརྒྱུད་དེ་འཛམ་གླིང་གོ་ལ་ཧྲིལ་བོ་དང་། སྐྱེ་འགྲོ་སེམས་ཅན་བགྲངས་ལས་འདས་པར་ཕན་བདེ་གཞི་རྩ་ཆེན་པོ་ཞིག་ཏུ་འགྱུར་ཐུབ་པར་ཡིད་ཆེས་བྱས་ཆོག ཅེས་དང་།
ཉིན་འདི་འགར་ཁོར་ཡུག་གལ་ཆེན་ཡིན་སྐོར་མང་དག་ཅིག་བཤད་སོང་། གཙོ་བོ་ལག་ལེན་བསྟར་རྒྱུ་དེ་རེད། ང་ཚོར་ཐོས་བསམ་སྒོམ་གསུམ་དང་། འཆད་རྩོད་རྩོམ་གསུམ། ལྟ་སྒོམ་སྤྱོད་གསུམ་མང་པོ་ཞིག་བགྲང་རྒྱུ་ཡོད། དེ་དག་ལས་ཐུག་ས་སྤྱོད་པ་ལ་ཐུག་ཡོད། ལྟ་སྒོམ་སྤྱོད་གསུམ་ལས་ལྟ་བ་བཤད་ཡོང་སྐབས། རང་ཉིད་ཀྱི་ལྟ་བ་སེན་མོ་ཙམ་ཞིག་སྒྲུབ་ཆེད་གཞན་སྡེ་ཡི་གྲུབ་མཐའ་རི་རབས་ཙམ་ཞིག་བཀག་སྟེ། རང་ཉིད་ཀྱི་ལྟ་བ་མཐོ་བསམ་བསམ་གྱིས་ཆོས་སྤངས་ཀྱི་ལས་ཆེན་པོ་གསོག་གིན་ཡོད། དེ་བཞིན་སྒོམ་པ་དེ་ཡང་མཚམས་ལ་བསྡད་ན་ཨེ་དྲག ལོ་གསུམ་ཞག་གསུམ་སྒོམ་ན་ཨེ་བཟང་བསམས་ཏེ་གང་ཡོང་ཅི་ཡོང་བྱེད་ཀྱིན་ཡོད། འོན་ཀྱང་། སྤྱོད་པའི་སྣེ་ལ་ཐུག་ཡོང་དུས་དཔའ་ཞུམ་བསྡད་ཡོད། སྔར་གྲྭ་ས་ན་ཡོད་དུས་ཐོས་བསམ་ཡག་པོ་ཡོད། ཉམས་ལེན་ཡག་པོ་ཡོད་ཟེར་བ་ཙམ་གྱིས་མི་ཡོང་། བསྟན་པ་དང་སེམས་ཅན་གྱི་དོན་དངོས་སུ་བྱས་པའི་ཚེ་ན། གཞན་ཕན་དང་སྙིང་རྗེ་ཆེ་བ། བཟོད་པ་དང་དཀའ་སྤྱད་ཆེ་བ་ཞིག་བྱུང་ན། གཞི་ནས་སྔོན་མ་ཡོད་ཟེར་བ་དེ་ལ་ཡོད་སྙིང་ལྡན་པ་ཞིག་རེད། འོན་ཀྱང་། སྔོན་མ་ཡོད་མོད། ད་ཆར་དགོས་དབང་ལ་བརྟེན་ནས་ཟེར་བ་སོགས་ཐབས་མཁས་པོས་འགྲེལ་བཤད་མང་པོ་སྐྱོན་ཡོང་དུས་ཚར་བ་རེད། ཅེས་གསུངས་བྱུང་།
ཁོང་གིས་མུ་མཐུད་དོན། ནམ་རྒྱུན་ང་རང་གི་གོ་བ་ལེན་སྟངས་ལ། སྤྱོད་ཟེར་དུས་བེད་སྤྱོད་བཏང་བ་དང་ལག་ལེན་བསྟར་བ་ཞིག་ལ་གོ་བཞིན་ཡོད། སེམས་ལ་སྙིང་རྗེ་ཡི་ཉམས་བཟང་པོ་ཞིག་བྱུང་ཙམ་གྱིས་ཕན་ཐོགས་གང་ཡང་མེད། ཉམས་ལེན་ཟེར་བ་ལས་ཉམས་སྟོན་ཟེར་གྱིན་མེད། ཉམས་ག་རེ་བྱུང་བ་དེ་ལག་ལེན་བསྟར་ཏེ། དོན་གྱི་གནད་དུ་འཁེལ་བ་ཞིག་ཡོང་དགོས་པ་རེད། དེ་འདྲ་བྱུང་བ་ཡིན་ན། གཞི་ནས་ཉམས་ལེན་ཟེར་བ་དེ་ཡོང་གིན་ཡོད། སོ་སོའི་ཆོས་ཁང་དང་སྒོམ་ཁང་ནང་དུ་བྱང་ཆུབ་ཀྱི་སེམས་དང་། དད་པ་དག་སྣང་སོགས་ཀྱི་ཉམས་བཟང་པོ་ཡོད་ཀྱང་། དངོས་སུ་བསྟན་འགྲོའི་དོན་བྱེད་པའི་ཚེ་ན། ཁོང་ཁྲོ་ཚ་བ་དང་ང་རྒྱལ་ཆེ་བ། ཕྲག་དོག་ཆེ་བ་སོགས་ཉོན་མོངས་པའི་རྣམ་རྟོག་ཇེ་ཆེ་དང་ཇེ་མང་། ཇེ་རགས་ཏུ་སོང་སྟེ། འཇིག་རྟེན་ཐ་མལ་བ་ལས་སྡུག་པའི་རྣམ་འགྱུར་དྲག་ལ་རྩུབ་པ་མང་པོ་བསྟན་ཡོང་ན། དེ་ལ་སྤྱོད་པ་ཟེར་བ་ཞིག་ལྷག་མེད། ང་ཚོ་འཚོ་སྡོད་བྱེད་སའི་འཛམ་གླིང་འདིར་སྲོག་ཆགས་རིགས་གྲངས་ལས་འདས་པ་དང་རྩི་ཤིང་རིགས་གྲངས་ལས་འདས་པ་ཞིག་ཡོད། དེ་དག་མེད་ན་ང་ཚོ་གཅིག་པུ་འཚོ་ཐབས་མེད། ང་ཚོའི་འཚོ་གནས་བདེ་སྐྱིད་ལྡན་པ་ཞིག་ཡོང་དགོས་ན། བརྟེན་གཞིའི་སྣོད་བཅུད་ཐ་དག་ལ་སེམས་ཁུར་དང་དོ་སྣང་མི་བྱེད་རང་བྱེད་རེད། སྟོན་པ་སངས་རྒྱས་བཅོམ་ལྡན་འདས་ཀྱི་ཐེག་པ་ཆེ་ཆུང་ཚང་མའི་ནང་། གཞན་ཕན་སྒྲུབས་ཟེར་བའི་བཀའ་མོལ་ཞིག་ཡང་ཡང་གནང་ཡོད། ང་ཚོའི་སྤྱོད་པ་དེར་གཞན་ལ་འཚེ་བ་སྤང་དགོས་པ་ཞིག་དང་། གཞན་དོན་བསྒྲུབ་དགོས་པའི་ལམ་ཁ་གསལ་བོ་ཞིག་བསྟན་ཡོད། དེའི་སྟེང་ལ་འགྲོ་དགོས་པ་རེད། གཞན་ལ་འཚེ་བ་སྤང་ཟེར་དུས་མི་ལ་མ་རྡུང་ཙམ་དང་སོ་མ་བརྒྱབས་ཙམ་གྱིས་འགྲིག་གིན་མེད། ཅེས་དང་།
མཇུག་མཐར་ཁོང་གིས་ཐུགས་སྐྱེད་ཀྱི་རེ་འདུན་གསུངས་དོན། མཐའ་དོན་ཁྱེད་རྣམ་པར་ཞུ་རྒྱུ་ཞིག་ལ། གལ་སྲིད་ང་རང་ཉིད་ལ་མངོན་ཤེས་དང་རྫུ་འཕྲུལ་སོགས་ཀྱི་ནུས་པ་ཞིག་ཡོད་ན། ང་རང་གི་གཟུགས་ཕུང་རྣམ་ཤེས་དང་བཅས་པ་འདི་འཛམ་གླིང་སའི་གོ་ལ་འདི་ཉིད་སྲུང་བར་བྱེད་པའི་བླ་བྲེ་ལྟ་བུ་ཞིག་ཏུ་བསྒྱུར་ན་ཅི་མ་རུང་སྙམ་པའི་ཚོར་བ་ཞིག་དུས་རྒྱུན་དུ་ཡོང་བསྡད་ཡོད། ང་ལ་མཚོན་ན་དེ་རིང་འདིར་འཛོམས་པ་དག་ལས་ལོ་ཆུང་ཤོས་ཡིན་རྒྱུ་རེད། ངས་བསམ་བློ་འདྲ་མིན་ཞིག་བཏང་སྟེ་འཆར་གཞི་སྣ་ཚོགས་ཤིག་སྤེལ་ན། ཕྱོགས་གཅིག་ནས་བྱིས་པ་ཞིག་གིས་གཉིད་མི་ཁུག་པའི་ལས་ཀ་འདྲ་མིན་བྱས་པ་ཁྱད་མཚར་ཞིག་རེད་དེ། ཕྱོགས་གཞན་ཞིག་ནས་བལྟས་ན། ང་ལྟ་བུའི་བྱིས་པ་ན་གཞོན་ཞིག་ཡིན་ན་ཡང་། འཛམ་གླིང་འདིར་བརྩེ་དུང་དང་ཤ་ཚ་ཞིག་བཅིངས་ཏེ། མ་འོངས་པའི་མི་རབས་ཚ་བརྒྱུད་ཀྱི་ཆེད་དུ་ལེགས་སྐྱེས་བཟང་པོ་ཞིག་འབུལ་ཐུབ་རྒྱུ་བྱུང་ན་ཅི་མ་རུང་སྙམ་པ་དྲན་བསྡད་ཡོད། དེར་བརྟེན། རྣམ་པ་ཚོ་ང་ལས་དགུང་ལོ་བགྲེས་པ་དང་ཉམས་མྱོང་མང་བ་ཡོད། ངར་མཚོན་ན་དུས་རྒྱུན་ཁང་པའི་ནང་ལ་འཛུལ་ནས་འདུག་དགོས། ཁྱེད་ཅག་གང་ལ་ཕྱིན་ཡང་རང་དབང་རེད། ཁོར་ཡུག་གི་གནས་ཚུལ་རྒྱུས་ལོན་བྱེད་པ་དང་ཉམས་མྱོང་སྤེལ་རེས། གནས་ཚུལ་བརྗེ་ལེན་བྱེད་པའི་གོ་སྐབས་མང་པོ་ཡོད། ཅེས་དང་།
ཁོར་ཡུག་ཟེར་བ་དེ་མི་གཙོ་བོར་གྱུར་བའི་སྐྱེ་དངོས་སེམས་ཅན་ཐམས་ཅད་ཀྱི་འཚོ་གནས་ཤིག་ཆགས་ཡོད་སྟབས། འདི་ནི་ཆབ་སྲིད་དང་ཆོས་ལུགས་ལས་ཀྱང་རིང་དུ་བརྒལ་བ་ཞིག་ཡིན། མི་གསོན་པོར་སྡོད་མ་ཐུབ་ན། ཆབ་སྲིད་ཟེར་བ་མེད་ལ། ཆོས་ལུགས་ཟེར་བ་ཡང་མེད། ཁོར་ཡུག་ཟེར་བ་དེ་ཆབ་སྲིད་དང་ཆོས་ལུགས། མི་རིགས་དང་རིག་གཞུང་སོགས་ལས་བརྒལ་བའི་གནད་དོན་ཞིག་ཡིན། འདིའི་ཐད་ཀྱི་ལས་དོན་སྒྲུབ་པའི་སྐབས་སུ་མི་འོས་པའི་ཕྱོགས་ཞེན་དང་། སྒེར་གྱི་ཁེ་ཕན་ལ་སོགས་མ་རུང་བ་དང་མི་གཙང་བ། དྲི་མ་ཅན་གྱི་བསམ་བློ་དེ་འདྲ་དྲན་ན་ཡག་པོ་མ་རེད། མི་ཚེ་ནང་རྣམ་པར་དཀར་བའི་ལས་ཀ་ཁ་ཤས་ཤིག་སྟོན་རྒྱུ་མེད་ན་བློ་ཕམ་པོ་རེད། ཤི་སྐབས་ལས་ཀ་ཚང་མ་རྩ་གེ་བཙོག་གེ་དྲི་མ་ཅན་རྐྱང་རྐྱང་ལས་ལས་དོན་གཙང་མ་གཅིག་ཀྱང་དྲན་རྒྱུ་མེད་ན། དབུགས་ཆད་ཐུབ་རྒྱུ་དཀའ་ལས་ཁག་པོ་རེད། དེར་བརྟེན། སྙིང་ནས་འཕགས་པ་དང་། སྙིང་ནས་གཅེས་པའི་ལས་ཀ་གཙང་མ་ཁ་ཤས་ཤིག་འཛམ་གླིང་འདིར་འཇོག་ཐུབ་པ་ཡིན་ན། དེའི་བསོད་ནམས་དང་དེའི་མཐུ་སྟོབས་མི་རབས་ནས་མི་རབས་དང་། དུས་རབས་ནས་དུས་རབས་བར་ས་སྟེང་གི་འགྲོ་བ་ཐམས་ཅད་ཀྱིས་ཚོར་ཐུབ་པ་ཞིག་ཡོང་གི་རེད་བསམ་ཡོད། དེ་ལ་ཚང་མས་ཐུགས་སྐྱེད་གནང་རོགས། ཞེས་གསུངས་སོང་།
ལུང་རིགས་ལགས་ཀྱི་དགོངས་འཆར་འདི་འདྲ་ཞིག་དངོས་སུ་བསྒྲུབ་ཐུབ་པ་ཞིག་བྱུང་ན་བོད་པའི་ཆོས་པ་རྣམས་༸གོང་ས་མཆོག་ནས་ཐུགས་རེ་ཤིན་ཏུ་ཆེན་པོ་གནང་སའི་དུས་རབས་ཉེར་གཅིག་པའི་ཆོས་པ་ངོ་མ་དེ་ཆགས་པ་རེད།
འོན་ཀྱང་ཨ་ནེ་ཚོས་ཨ་མའི་གནས་བབ་ལ་ལྟ་རྟོག་བྱེད་རྒྱུ་དང་གཞོན་སྐྱེས་བུ་མོ་ཚོར་ལམ་སྟོན་བྱེད་རྒྱུ་དེ་དགོད་བྲོ་པོ་ཞིག་ཆགས་རྒྱུའི་ཉེན་ཁ་མེད་འགྲོ།
འོན་ཀྱང་སྨན་ཞབས་མའི་ལས་འགན་བསྒྲུབ་རྒྱུ་དེ་ནི་འོས་འཚམ་ཤིན་ཏུ་ཆེ་ཞིང་ཡེ་ཤུའི་ཆོས་མ་ཚོའི་ངོས་ནས་བཤད་ན་ངོ་ཚ་ཉོ་དགོས་པའི་གནས་སྟངས་ཤིག་ཀྱང་ཡིན།
རྒྱལ་བ་ཀརྨ་པ་མཆོག་གིས་ཐུགས་རེ་ཧ་ཅང་གི་ཆེ་དགའ་བའི་རྗེས་སུ་ཡིད་རང་ཡོད། འོན་ཀྱང་ནང་ཆོས་ཀྱི་གཞུང་ཆེན་ཁག་ད་དུང་ཅུང་ཟད་གཟིགས་ཐུབ་ན་ཡག་པོ་འདུག གོང་གི་བཀའ་སློབ་མཇལ་དུས་ང་རང་གིས་བོད་པའི་ཁ་དཔེ་ཞིག་དྲན་བྱུང་། གཡོག་པོས་ང་རང་རྒྱལ་པོ་ཡིན་ན་དགའ་བ་དང་། རྒྱལ་པོས་ང་རང་གཡོག་པོ་ཡིན་ན་གང་སར་བསྐྱོད་ཆོག་པ་དང་། ། གནང་ཆོག་པ་སོགས་མཐོང་གི་རེད་བཤད་སྲོལ་ཡོད་པ་དངོས་བདེན་རེད་འདུག ཀརྨ་པ་མཆོག་གིས་ཀྱང་དེ་འདྲར་གཟིགས་འདུག
གོ་སྐབས་འདི་དང་བསྟུན་ནས་ངས་བོད་ཀྱི་ཆོས་བརྒྱུད་སོ་སོར་ལས་བགོས་ཤིག་བྱ་འདོད་བྱུང་། ལས་བགོས་བྱས་རྗེས་ཀྱང་མུ་མཐུད་ནས་ཆོས་བརྒྱུད་ཁག་ཕན་ཚུན་བར་མཉམ་ལས་བྱ་དགོས་པ་ལས་ཁེར་ཚུགས་ཀྱི་སྒོ་ནས་འདུག་མི་རུང་བ་ནི་སྔོན་བརྡ་ཡིན།
དེང་གི་མི་སྡེ་སྤྱི་ཚོགས་འདིར་ཛ་དྲག་དང་ཉེན་ཁའི་རང་བཞིན་གྱི་གནད་དོན་མང་པོ་གཅིག་འཕྲོད་གཅིག་མཐུད་ཀྱིས་ཡོང་གིན་ཡོད་ལ། དེ་ལ་གདོང་ལེན་བྱ་མ་ཐུབ་པའི་དཀའ་ངལ་ནི་ཇེ་ཆེ་ཇེ་ལྕི་རེད།
བཀའ་བརྒྱུད་ཚང་གིས་ད་ཆར་ཁོག་ཡུག་གི་གནད་དོན་ཐད་ལྟ་གྲུབ་དང་ལག་ལེན་གཉིས་ཐད་ནས་བོད་མིའི་སྤྱི་ཚོགས་དང་ཧི་མ་ལ་ཡའི་རི་བརྒྱུད་ཀྱི་སྤྱི་ཚོགས་ནང་དངོས་སུ་ལས་གཞི་སྤེལ་བཞིན་པ་ནི་ཁ་ཚ་དུས་གཏུགས་ཆགས་ཡོད་པ་རེད།
ད་ནི་ཆོས་བརྒྱུད་གཞན་པ་རྣམས་ཀྱིས་ཀྱང་སྤྱི་ཚོགས་ཀྱི་དཀའ་རྙོག་ཆེན་པོའི་རིགས་ལ་འགན་ལེན་པའི་དུས་ལ་བབ་འདུག དགེ་ལུགས་པ་ཚང་གིས་ཚན་རིག་གི་ཐོག་ཤུགས་བརྒྱབས་ན་ལེགས་པར་འདོད། བོད་མི་རིགས་ལ་ཚན་རིག་པ་རྐང་གཅིག་ཀྱང་མཐོང་རྒྱུ་མེད་པའི་ལོ་རྒྱུས་ཀྱི་ཤོག་ངོས་འདི་ཁ་སྐོང་དགོས་པ་རེད།
རྙིང་མ་བ་ཚང་གིས་འཕྲོད་བསྟེན་གྱི་ཕྱོགས་ལ་ཤུགས་བརྒྱབས་ཏེ་བོད་མིའི་སྤྱི་ཚོགས་ཁྲོད་འཕྲོད་བསྟེན་གྱི་གོ་རྟོགས་སྤེལ་བ་དང་། བོད་ལུགས་གསོ་བ་རིག་པ་ཙམ་དུ་མ་ཟད། ཕྱི་ལུགས་ཀྱི་གསོ་བ་རིག་པའི་ཐད་ནས་ལག་རྗེས་ཤིག་འཇོག་ཐུབ་ན་ཧ་ལས་པའི་ཡག་པོ་རེད།
ས་སྐྱ་པ་ཚང་གིས་སྐད་ཡིག་སྲུང་སྐྱོབ་ཀྱི་ཕྱོགས་ལ་འགན་ཁུར་ཏེ། ས་སྐྱ་མཐོ་སློབ་ཀྱི་སྤུས་ཀ་ཇེ་ལེགས་སུ་བཏང་སྟེ་བོད་ཀྱི་རིག་གཞུང་གི་ཐོག་ལག་རྗེས་མི་དམན་པ་ཞིག་བཞག་ན་རེད།
བོན་པོ་ཚང་གིས་བོད་ཀྱི་གནའ་བོའི་ལོ་རྒྱུས་དང་རིག་དངོས་བརྟག་དཔྱད་རིག་པ་སོགས་ལ་ཆེད་དུ་སྦྱངས་ཏེ། མ་འོངས་པའི་མི་རབས་དག་ལ་རང་གི་མི་རིགས་དང་རྒྱལ་ཁབ། རིག་གཞུང་བཅས་ཀྱི་སྐོར་ནས་ཁུངས་གསལ་བོ་ཞིག་བཟོ་དགོས་པར་འདོད།
ཇོ་ནང་ཚང་གིས་དམངས་གཙོ་དང་འགྲོ་བ་མིའི་ཐོབ་ཐང་། ཁྲིམས་ལུགས་ཀྱི་དབང་སྒྱུར་སོགས་ཀྱི་སྟེང་ཆེད་དུ་ཞིབ་འཇུག་དང་སློབ་གཉེར་བརྒྱུད། སྤྱི་ཚོགས་ཁྲོད་དངོས་སུ་གོ་རྟོགས་སྤེལ་བ་དང་། ལག་ལེན་ལ་འབེབས་ཐུབ་པ་ཞིག་བཟོས་ན་སྤྱི་ཚོགས་འདིའི་གཞི་རྩ་ཇེ་བརྟན་ལ་འགྲོ་གི་རེད།
བཙུན་དགོན་ཚང་མས་མཉམ་རུབ་སྒོས་བུད་མེད་ཀྱི་ནུས་སྟོབས་ཡར་སྤེལ་དང་། ཨ་མ་དག་གི་གནས་བབ་ལ་ལྟ་རྟོག་བྱེད་པ། གཞོན་སྐྱེས་བུ་མོ་ཚོར་ལམ་སྟོན། དེ་བཞིན་ནད་གཡོག་མའི་སྐོར་ལ་ཆེད་སྦྱངས་བྱས་ཏེ་བོད་མིའི་སྤྱི་ཚོགས་ཁྲོད་ནུས་པ་གལ་ཆེན་ཞིག་འདོན་དགོས་པ་རེད།
འདི་ལྟར་དགོན་པ་སོ་སོ་ནས་དངོས་སུ་གོམ་པ་སྤོས་པ་ཡིན་ན་བོད་མི་རིགས་འདི་སྐྱོབ་ཐུབ་རྒྱུ་རེད། མང་ཚོགས་ཀྱིས་ཀྱང་ཆོས་བྱེད་སྐྱེ་བུ་དམ་པ་དག་གི་བཀའ་དྲིན་ལ་བསྟེན་ནས་སོ་སོའི་ནུས་པ་འབུལ་ངེས་རེད།