བྲག་བརྐོས་རི་མོ་གསར་རྙེད།

ཟླ་སྔོན་མའི་ཕྱི་ཚེས་ ༧ ཉིན་ནས་བཟུང་ལྷ་ས་རིག་དངོས་ཞིབ་བཤེར་ཚོགས་ཆུང་གིས་འདམ་གཞུང་རྫོང་དུ་ཞིབ་བཤེར་བྱས་ཏེ། འདམ་གཞུང་གནམ་མཚོ་ཞང་བཀྲ་ཤིས་གླིང་ཕྲན་སྟེང་ནས་རིག་དངོས་ས་ཚིགས་ ༤༢ ཙམ་ངོས་ཟིན་དང་། བོད་བཙན་པོའི་སྐབས་ཀྱི་བྲག་བརྐོས་རི་མོ་ ༢༠ ལྷག་གསར་རྙེད་བྱུང་ཡོད་འདུག

དེ་རིང་སྔ་དྲོ་བོད་ལྗོངས་ཆ་འཕྲིན་སོགས་སུ་བཀོད་པའི་གནས་ཚུལ་ལྟར་ན།  ད་ལོའི་ཟླ་༩ཚེས་༧ཉིན། ལྷ་ས་གྲོང་ཁྱེར་གྱི་རིག་དངོས་ཡོངས་ཁྱབ་ཞིབ་བཤེར་ཐེངས་གསུམ་པའི་ཚོགས་ཆུང་གིས་འདམ་གཞུང་རྫོང་དུ་རིག་དངོས་ཞིབ་བཤེར་བྱེད་འགོ་བརྩམས་ཤིང་། ཞིབ་བཤེར་བྱེད་ཡུལ་གྱི་རྒྱ་ཁྱོན་ལ་རྫོང་ཁོངས་ཀྱི་སྤྱི་ལེ་ངོས་སྙོམས་གྲུ་བཞི་མ་ ༡༢༠༠༠ ཙམ་གྱི་ཁྱོན་ཟིན་ཡོད་པ་རེད། ཕྱི་ཟླ་ ༡༠ ཚེས་ ༤ ཉིན་གྱི་བར། ཐེངས་འདིའི་རིག་དངོས་ཡོངས་ཁྱབ་ཞིབ་བཤེར་གྱི་ཁྲོད་དུ་ཁྱོན་སྡོམ་སྒུལ་མི་ཆོག་པའི་རིག་དངོས་ས་ཚིགས་ ༦༠ ལ་ཞིབ་བཤེར་བྱས་ཤིང་། དེའི་ཁྲོད་ཞིབ་བཤེར་ཐེངས་གཉིས་བྱས་པའི་རིག་དངོས་ས་ཚིགས་ ༡༨ དང་། གསར་དུ་རྙེད་པའི་རིག་དངོས་ས་ཚིགས་ ༤༢ ཡོད་པ་རེད།

ཐེངས་འདིའི་རིག་དངོས་ཡོངས་ཁྱབ་ཞིབ་བཤེར་ལས་དོན་གྱི་ཁྲོད་དུ། ལས་ཀ་བས་འདམ་གཞུང་རྫོང་གནམ་མཚོ་ཞང་བཀྲ་ཤིས་གླིང་ཕྲན་སྟེང་གི་སྔར་རྙེད་ཟིན་པའི་བྲག་བརྐོས་རི་མོའི་འགྲམ་ནས་ཡང་བསྐྱར་བོད་བཙན་པོའི་སྐབས་ཀྱི་བྲག་བརྐོས་རི་མོ་ ༢༠ ལྷག་རྙེད་ཡོད་ལ། རི་མོའི་ནང་དོན་ལ་རྟ་ནོར་ལུག་གསུམ་དང་། རྟ་བ། དམག་མི།  མོ་བ། ལྗོན་ཤིང་། ཉི་མ། དར་ལྩོག མདའ། གཡུང་དྲུང་སོགས་ཚུད་ཡོད། དེ་དག་གིས་རི་དྭགས་རྔོན་ཚུལ་དང་། ཕྱུགས་འཚོ་ཚུལ། གཡུལ་འགྱེད་ཚུལ་སོགས་ཀྱི་སྣང་ཚུལ་མཚོན་ཡོད་པ་རེད།

ལྷ་ས་གྲོང་ཁྱེར་གྱི་རིག་དངོས་ཡོངས་ཁྱབ་ཞིབ་བཤེར་ཐེངས་གསུམ་པའི་ཚོ་ཆུང་གི་འགན་ཁུར་བས་ངོ་སྤྲོད་གནང་བ་ལྟར་ན། དེ་སྔོན་རྙེད་པའི་བཀྲ་ཤིས་གླིང་ཕྲན་གྱི་བྲག་བརྐོས་རི་མོ་ནི་འདམ་གཞུང་རྫོང་གནམ་མཚོ་ཞང་གི་ཤར་འགྲམ་དུ་ཡོད་ཅིང་།  དེ་དག་ནི་ཡི་གེ་མ་བྱུང་བའི་གོང་གི་དུས་ནས་བོད་བཙན་པོའི་སྐབས་བར་བྲིས་པ་ཡིན་ལ། དེ་རྙེད་པ་ཡིས་བོད་ལྗོངས་སུ་དེ་སྔོན་གནའ་རབས་ཀྱི་བྲག་བརྐོས་རི་མོ་རྙེད་མེད་པའི་སྟོང་ཆའི་ཁ་བསྐངས་པ་དང་། རང་རྒྱལ་གྱི་བྲག་བརྐོས་རི་མོའི་རྣམ་པ་དང་ནང་དོན་ཕུན་སུམ་ཇེ་ཚོགས་སུ་བཏང་བ་རེད། ཅེས་བཀོད་འདུག