སྤྱིན་བདག་མི་དགོས། གྲྭ་བ་མི་བྱེད། {དངོས་སྒྲུང་།} དགུ

བློ་བཟང་གིས་ཐབ་ཚང་ནང་དུ་ཟ་མ་ཞིག་བཟོ་བཞིན་ཡོད་པའི་འཁྲིས་སུ་གཞིས་ཆགས་བུད་མེད་མཛེས་མ་དེ་ཡོང་ནས། བློ་བཟང་ཁྱེད་རང་གིས་དངོས་ནས་ཁ་ལག་འདི་འདྲའི་མགྱོགས་པོ་ཞིག་བཟོ་ཤེས་ཀྱི་འདུག་ལ། དངོས་ནས་བྲོ་བ་ཡང་་འདུག་ཟེར་ནས་ཁ་ཡག་ཞིག་བཤད་དུས། བློ་བཟང་གིས་ངས་ད་ལྟ་དངོས་ནས་ཡག་པོ་ཞིག་བཟོ་ཤེས་ཀྱི་མེད་པ་རེད། ཡིན་ཡང་། ཐེངས་གཅིག་གཉིས་ཤིག་ལ་མི་གཞན་གྱིས་བཟོ་བ་མཐོང་རྗེས་རང་གིས་དེ་ལྟར་དུ་བཟོ་ཐུབ་ཀྱི་འདུག བྲོ་བ་ཡོད་མེད་དེ་ནི་མི་རེ་རེ་ཡིས་ལྕེ་ཡིས་བྲོ་བ་ལེན་སྟངས་མི་འདྲ་སྟབས། ངས་བཤད་ཚོད་ཐུག་གི་མི་འདུག་ཟེར་ནས་བཤད།

གོ་སྐབས་དེ་དང་བསྟུན་ནས། གཞིས་ཆགས་བུ་མོ་བསྟན་འཛིན་ཚེ་སྐྱིད་ཀྱིས་བློ་བཟང་ལ་འདི་ལྟར་དྲིས། སྤྱིན་བདག་གིས་ཁྱེད་རང་ལ་ཁང་བ་ཞིག་སྤྲད་ཡོད་པ་དེའི་ནང་དུ་མི་ག་ཚོད་ཅིག་འདུག་ཐུབ་ཀྱི་ཡོད་པ་རེད་ཅེས་དྲིས། བློ་བཟང་གིས་སྣང་བ་རྣམ་དོག་གང་ཡང་མེད་པར་མི་མང་བོ་ཞིག་གཤོང་གི་ཡོད་པ་རེད། ཡིན་ཡང་། ཁང་བ་ལྕགས་ཤོག་ཁང་བ་རེད། ཆུ་ལེན་དུ་ཕྱི་ལོག་དུ་འགྲོ་དགོས་པ་དང་གཙང་སྤྱོད་དཀྲུས་ཁང་སོགས་གང་ཡང་ནང་དུ་མེད་པ་རེད། ཕྱི་ལོག་དུ་འགྲོ་དགོས། དེ་མིན་ཁང་བའི་ཆེ་ཆུང་ནི་དངོས་ནས་ཆེན་པོ་ཡོད་ལ་སྐབས་རེ་ང་རང་གིས་ངོ་ཤེས་མི་ཉུང་བ་རེ་འཛོམ་ས་ཡང་ཉན་ཡོད་ཅེས་བཤད།

བསྟན་འཛིན་ཚེ་སྐྱིད་ཀྱིས་དེ་ན་ཁྱེད་རང་ལ་དགའ་ས་ཡོད་དམ་ཟེར་བའི་སྐད་ཆ་དེའི་བློ་བཟང་གི་སྙིང་ཆུང་དྲག་དུ་ལྡིང་དུ་བཅུགས་སོང་། བློ་བཟང་གིས་སེམས་ནང་གི་མི་དེ་སྤས་སོང་བྱས། ང་རང་ལ་དགའ་ས་མེད་ཅེས་བཤད།

བསྟན་འཛིན་ཚེ་སྐྱིད་ཀྱིས་དེས་ན་དགའ་རོགས་ཡོད་དམ་ཟེར་བས་དེ་བས་ཀྱང་བློ་བཟང་འཚབ་འཚུབ་དུ་གྱུར་ནས། མེད་མེད་མེད་ཅེས་ལན་བྱིན་དུས། བསྟན་འཛིན་ཚེ་སྐྱིད་ཀྱིས་བློ་བཟང་ངས་ཁྱེད་རང་ལ་སྐད་ཆ་ཞིག་དྲིས་པ་ཡིན་ན་ཁྱེད་རང་གིས་ང་ལ་དྲང་མོ་ལན་རྒྱག་རྒྱུ་ཡིན་ནམ་ཟེར་བ་དེས་བློ་བཟང་གློ་བུར་བའི་འཇིགས་ངང་ཞིག་དང་ལྷན་དུ་ལན་དྲང་མོ་རྒྱག་དང་རྒྱག་ཞེས་བཤད།

བསྟན་འཛིན་ཚེ་སྐྱིད་ཀྱིས། དེས་ན་ཁྱེད་རང་གིས་ད་ལྟའི་བར་དུ་བུད་མེད་གཞན་ལ་ལུས་འབྲེལ་བྱེད་མྱོང་ཡོད་དམ་ཟེར་བ་དེས་བློ་བཟང་དངོས་ནས་ཨ་རག་གིས་མངར་ཁ་ཞིག་གིས་སེམས་ཁམས་ཡོངས་སུ་བཟི་རུ་བཅུགས་པ་ལྟར། གང་ཡིན་ཅི་ཡིན་མེད་པར། དེ་དྲིས་དེ་གང་བྱེད་ཅེས་ཁ་ནས་ཤོར་དུས། བསྟན་འཛིན་ཚེ་སྐྱིད་ཀྱིས་ཁྱེད་རང་གིས་དྲང་མོ་ལན་འདེབས་ཟེར་བ་མ་ཡིན་ནམ། འུ་གཉིས་ཟ་ཁང་འདིར་ཡུན་རིང་འགྲོག་འདྲིས་བྱས་དེ་བསྡད་ན་ཡང་། ཁྱེད་ཀྱིས་ང་རང་ལ་དེ་འདྲའི་བསྐོར་གྱི་སྐད་ཆ་ཚིག་གཅིག་ཀྱང་བཤད་མྱོང་མེད་པ་མ་ཟད། འདི་རུ་བུད་མེད་འདྲ་ཁྱེད་རང་ལ་ཆེད་དུ་ཐུག་འཕྲད་བྱེད་དུ་ཡོང་བའི་བུད་མེད་ཀྱང་རིག་མྱོང་མེད་པས་དྲིས་པ་ཡིན་ཞེས་བཤད།

སྐད་ཆ་དེས་བློ་བཟང་གིས་རང་གི་ཁས་ལེན་བྱས་པ་དེ་དྲན་ནས། རེད། ངས་དྲང་མོ་ལན་འདེབས་རྒྱུ་བྱོས་ཡོད་པ་རེད། ང་ལ་ད་ལྟའི་བར་དུ་ལུས་འབྲེལ་བྱུང་མྱོང་སའི་བུད་མེད་གཅིག་ཀྱང་བྱུང་མྱོང་མེད་ཅེས་དྲང་མོར་བཤད།

བསྟན་འཛིན་ཚེ་སྐྱིད་ཀྱིས་ཁྱེད་རང་གིས་བུད་མེད་སུ་ལ་ཡང་ཐུག་མྱོང་མེད་ན། བུད་མེད་གཞན་ལ་ཁ་བསྐྱེལ་མྱོང་ཡོད་དམ་ཟེར་ནས་སླར་ཡང་། བློ་བཟང་གི་སྙིང་ལྡིང་མཚམས་བཞག་ཡོད་མེད་ཀྱི་མཚམས་དེར་དྲི་བ་འདི་འདྲ་ཞིག་དྲིས།

མེད། མེད། མེད།

བསྟན་འཛིན་ཚེ་སྐྱིད་ཀྱིས་ང་རང་དོ་ནུབ་གངས་སྐྱིད་དུ་འགྲོ་འདོད་མི་འདུག ཁྱེད་རང་གི་ནང་དུ་ཉལ་དུ་སོང་ན་འགྲིག་གི་རེད་དམ་ཟེར་ནས་དྲིས་དུས། བློ་བཟང་དགོད་ཞོར་དུ་འགྲིག་དང་འགྲིག ངས་ནང་དུ་ཉལ་ཁྲི་གཉིས་ཡོད་ཅེས་བཤད། ཉལ་ཁྲི་གཉིས་དགོས་ཀྱི་མི་འདུག གཅིག་གིས་སྟེང་དུ་ཉལ་ན་འགྲིག་གི་རེད་དམ་ཟེར་ནས་བཤད་དུས།

བློ་བཟང་དགོད་ཞོར་དུ་འགྲིག་དང་འགྲིག ཁྱེད་རང་ང་ལ་མི་སྐྲག་ན་ཟེར་ནས་སྤོབས་པ་ཆེན་པོས་ཀུ་རེ་དེ་འདྲ་ཞིག་གིས་བསྟན་འཛིན་ཆོས་སྐྱིད་ལ་ལན་སྤྲད།