སྤྱིན་བདག་མི་དགོས། གྲྭ་བ་མི་བྱེད། {དངོས་སྒྲུང་།} བཅུ་གཅིག

བསྟན་འཛིན་ཚེ་སྐྱིད་སྔར་གྱི་རྐུབ་སྟེགས་དེའི་སྟེང་དུ་བསྡོད་ཞོར་དུ། ཁྱེད་རང་རྒྱ་གར་དུ་སླེབས་ནས་ལོ་ག་ཚོད་ཅིག་འགྲོ་བཞིན་འདུག་ཟེར་ནས་དྲི་བ་ཞིག་དྲིས་དུས།

བསྟན་འཛིན་ཚེ་སྐྱིད་ཀྱིས་ད་ལྟའི་འཆར་མེད། ང་རང་གི་ནང་དངོས་ནས་སྐྱོ་བོ་ཡིན། ང་རང་རྡ་སར་ཡོང་དོན་གྱི་དམིགས་ཡུལ་གཙོ་བོ་གངས་སྐྱིད་དུ་གཞུང་ཞབས་ལ་འཛུལ་ནས་གཞུང་ཞབས་ཀྱི་མིང་ཐོག་ནས་ཕྱི་རྒྱལ་ཞིག་ལ་འགྲོ་ཐུབ་ན་བསམ་པ་ཡིན། རེད་དེ། དེ་བྱུང་མ་སོང་། ང་རང་ལ་བོད་ཡིག་ཡག་པོ་ཞིག་འབྲི་ཀློག་ཤེས་ཀྱི་མེད་པའི་སྒང་ལ་དབྱིན་ཡིག་ཀྱང་ཡག་པོ་ཞིག་ཤེས་ཀྱི་མེད་སྟབས། འདོད་བློ་འཁེང་བའི་ལས་ཀ་ཞིག་རེག་གི་མི་འདུག སྨན་ཞབས་དང་ནད་གཡོག་མ། ལས་ཁུངས་ཁག་དུ་གཙང་མ་བཟོ་བ་སོགས་ཀྱི་ལས་ཀ་རེག་གི་འདུག་ཀྱང་། དེ་ནི་ང་རང་གི་དམིགས་ཡུལ་དང་སླེབས་ཐུབ་མི་འདུག་སྟབས། མེག་ལོར་དུ་ཡོང་ནས་ལས་ཀ་ཞིག་བྱེད་ཞོར་ལ་ཕྱི་རྒྱལ་དུ་འགྲོ་བའི་ལམ་སྣེ་རེ་ཨེ་ཟིན་ལ་བསམ་བློ་བཏང་ནས་འདི་རུ་ལས་ཀར་ཡོང་བ་ཡིན་ཞེས་དྲང་མོ་བཤད།

དེ་དུས་བློ་བཟང་གིས་སེམས་པ་ཡང་ཁོ་མོའི་སྐད་ཆ་དེ་དག་གི་ཁྲོད་ནས་ཁོ་མོའི་ནང་མི་སྐྱོ་བོ་ཡིན་ཟེར་བ་དེ་ལ་འཁོར་ནས། གལ་ཏེ། མེག་ལོར་ནས་བསྡད་ན་ཕྱི་རྒྱལ་དུ་འགྲོ་བའི་ཐབས་ལམ་ཇི་ལྟར་རྙེད་ངེས་ཡིན་ནམ་ཟེར་ནས་དྲིས།

བསྟན་འཛིན་ཚེ་སྐྱིད་ཀྱིས་ང་ལྟ་བུ་ཞིག་ལ་མཚོན་ན། རྒྱུ་མེད་པའི་སྒང་ལ་ཡོན་ཏན་ཡང་མེད། དེ་ཡིན་དུས་ཕྱི་རྒྱལ་གྱི་མི་ཞིག་བཙལ་ནས་གཉེན་སྒྲིག་གི་ལམ་ནས་འགྲོ་ཐབས་བྱེད་རྒྱུ་ལས་མེད་པ་རེད་ཅེས་བཤད།

སྐབས་དེ་འདྲ་ཞིག་ལ་ཕོ་གསར་མི་ཉུང་བ་ཞིག་ཟ་ཁང་དུ་སླེབས་ནས། བསྟན་འཛིན་ཚེ་སྐྱིད་ལ་སྐད་བཏང་། བསྟན་འཛིན་ཚེ་སྐྱིད་ཀྱིས་བློ་བཟང་། ད་འུ་གཉིས་ལ་མགྲོན་པོ་ཁ་ཤས་ཤིག་སླེབས་འདུག་ཟེར་ཞོར་དུ་ཟ་ཁང་ནང་དུ་ཕྱིན།

བསྟན་འཛིན་ཚེ་སྐྱིད་ཀྱིས་བློ་བཟང་ཅི་ཞིག་ལ་འདང་རྒྱག་བཞིན་ཡོད། ད་ཟ་མ་ཟོས་ཚར་རྗེས་སུ་ང་རང་སྤུན་མཆེད་འདིས་སྤག་སྤག་གི་རྒྱབ་དུ་ཞོན་ནས་སྔུན་ལ་བུད་སོང་ན་ཁྱེད་རང་ལ་བསམ་འཆར་མེད་ལ། ཟ་ཁང་སྒོ་རྒྱག་རྒྱུར་སྐར་མ་སུམ་བཅུ་ལས་མི་འདུག སྒོར་སྒམ་གྱི་ལྡེ་མིག་འདི། གལ་སྲིད་མགྲོན་པོ་སླེབས་སོང་བ་ཡིན་ན། ཁྱེད་རང་ལ་དགོས་མཁོ་ཡོད་ངེས་ཡིན་ཟེར་ནས་བཤད།

བློ་བཟང་བསམ་གཞིགས་ཀྱི་ཀློང་ནས་ཕྱིར་དྲངས། མེད་མེད་མེད། བསམ་བློ་གཏོང་གི་མེད། ཡིན་དང་ཡིན། ཁྱེད་རང་སྔོན་དུ་སོང་ན་འགྲིག་གི་རེད། དེས་ན་སྒོར་སྒམ་ལྡེ་མིག་ག་རེ་བྱེད་ཅེས་དྲིས།

བསྟན་འཛིན་ཚེ་སྐྱིད་ཀྱིས་ཁྱེད་རང་གི་འཁྱེར་ནས་སོང་། ཟ་ཁང་ནང་དུ་མ་འཇོག་མ་གཏོགས་ཡག་པོ་མེད་པ་རེད་ཅེས་ལན་བཏབ།

བློ་བཟང་གིས་ཟ་ཁང་གི་ལྕགས་སྒོ་ཁྲོག་སྒྲ་དང་བཅས་བརྒྱབ་དེ། གློག་འོད་ཐར་ཐོར་ལས་མེད་པའི་རྡ་ས་མེག་ལོར་གྱི་གཏོར་མའི་དབྱིབས་ཅན་གྱི་སྲང་ལམ་ནང་བརྒྱུད་དེ་རང་གི་བསྡོད་གནས་ཕྱོགས་སུ་ཆས་ཞོར་དུ། སང་ཉིན་ག་རེ་བཤད་སྲིད། བསྟན་འཛིན་ཚེ་སྐྱིད་དེ་དངོས་ནས་སྙིང་རེ་རྗེ། བུད་མེད་དེ་འདྲའི་མཛེས་མ་ཞིག་གིས་རང་གི་ནང་མི་དག་དཀའ་ངལ་ལས་སྐྱོབས་ཆེད་དུ་ལམ་ཁ་འདི་འདྲ་ཞིག་འདེམས་པ་ལས་ཐབས་ཤེས་གཞན་མེད་པ་དེ་ནི་སྐྱོ་བ་ལའང་སྙམ་བཞིན་བསམ་བློ་འདྲ་མིན་འཁོར་ཞོར་དུ་རང་གི་ལྕགས་ཤོག་ཁང་བའི་འགྲམ་དུ་འབྱོར།