སྤྱིན་བདག་མི་དགོས། གྲྭ་བ་མི་བྱེད། {དངོས་སྒྲུང་།} བཅུ་གཉིས།

བློ་བཟང་གིས་འུ་གཉིས་ཟ་ཁང་འདིར་ལྷན་དུ་ལས་ཀ་བྱོས་དེ་ཟླ་ངོ་གཅིག་ཙམ་འགྲོ་གྲབས་འདུག་པ་འདིའི་ནང་དུ་འུ་གཉིས་ཀྱིས་ཕན་ཚུན་ལ་རྒྱུས་ལོན་བྱས་པ་དངོས་ནས་མི་ཉུང་བ་ཞིག་ཡིན་ཟེར་ན་ཆོག ཁྱེད་རང་དངོས་ནས་བུད་མེད་ཡ་རབས་ཤིག་རེད། རང་གི་ནང་མིའི་ཆེད་དུ་རང་གི་མི་ཚེ་ལ་བསམ་བློ་མ་བཏང་བ་དེ་དག་བསམ་ནས་འོང་དུས་སེམས་པ་ཡང་སྐྱོ་བ་ཞིག་རེད། ཁྱེད་རང་གིས་ག་རེ་གསུང་འདོད་ཡོད་ན་ང་ལ་གསུང་ན་འགྲིག་གི་རེད། ཡིན་ཡང་། རེ་བ་དེ་སྒྲུབ་ཐུབ་མཁན་གྱི་མི་དེ་ནི་ང་རང་ཡིན་མིན་ནི་བསམ་བློ་གཏོང་དགོས་པ་ཞིག་ལོས་ཡིན།

བསྟན་འཛིན་ཚེ་སྐྱིད་ཀྱིས། ང་རང་ལ་ཕྱི་བསྐྱོད་ལག་ཁྱེར་སོགས་ཚང་མ་ཡོད་ཀྱང་། མི་ཞིག་ལ་མ་བརྟེན་པར་འགྲོ་ཐབས་མེད་པ་ནི་སྔོན་ཆད་ནས་ངས་ཁྱེད་རང་ལ་བཤད་ཟིན་པ་དེ་ལྟར་རེད། ཡིན་ཡང་། མི་ཞིག་ལ་བརྟེན་དགོས་ན་བརྟེན་ས་དེ་ཡང་བོད་མི་ཞིག་ཆགས་མི་སྲིད་པ་ལྟ་བུ་ཞིག་འདུག་ན། ང་རང་ལ་དངོས་ནས་རེ་བ་དངོས་ནས་ཞིག་ཡོད་པ་དེ་ནི་རང་གི་མི་ཚེའི་བཟའ་ཚང་བོད་པ་ཞིག་གི་ལྷན་དུ་བསྐྱེལ་འདོད་འདུག་ལ། དེ་ཡང་རང་ཉིད་ཀྱི་སྣང་བ་མཐུན་ས་ཞིག་དངོས་ནས་གལ་ཆེན་པོ་ཆགས་ཡོད་དུས། འུ་གཉིས་དངོས་ནས་སྣང་བ་མཐུན་གྱི་འདུག དེ་ཡིན་དུས་ཁྱེད་རང་གིས་ང་ལ་ལོ་ངོ་ཁ་ཤས་ཤིག་ལ་སྒུག་ན་འགྲིག་གི་རེད་དམ། ད་ལྟ་འུ་གཉིས་ཀྱི་བར་དུ་འགྲེལ་བ་གང་ཡང་མེད་ཀྱང་། ཁྱེད་རང་ལ་འདོད་པ་ཡོད་ན་ངས་ཁྱེད་རང་གི་འདོད་པ་སྐོང་འདོད་འདུག་ལ། ང་རང་ཕྱི་རྒྱལ་དུ་སོང་ནས་ལོ་ངོ་ཁ་ཤས་ཤིག་གི་རྗེས་སུ་ཁྱེད་རང་ཕར་འཐེན་ཐབས་བྱེད་ཆོག་ཟེར་ནས་བཤད།

བློ་བཟང་གིས་སྐད་ཆ་དེ་ནི་རྒྱུན་ལྡན་ཁོ་གཉིས་ཀྱི་ལས་ཞོར་དུ་གླེང་མོལ་བྱས་པ་དེ་དག་དང་མི་འདྲ་བར་ཁོ་མོའི་སྐད་ཆའི་ནང་དུ་གཟབ་ནན་དང་ཡིད་ཆེས། རེ་བ་ཞིག་བཅས་ཡོད་པ་ཞིག་ཡིན་པ་ཤེས་ནས། ཁྱེད་ཀྱིས་དངོས་ནས་དེ་འདྲའི་ཡིད་ཆེས་ཤིག་ང་རང་ལ་གནང་བ་དེར་དངོས་ནས་ང་རང་དགའ་ནི་ཡིན། ཡིན་ཡང་། ཁྱེད་རང་གི་རེ་བ་རྒྱག་ས་ནོར་བ་རེད། དངོས་ནས་ང་རང་ཁྱེད་ལྟ་བུའི་བུད་མེད་ཅིག་ཐོབ་རྒྱུ་བྱུང་ན་ལོས་དགའ། དངོས་ནས་དགའ་མོད། འོན་ཀྱང་། གནས་སྐབས་རིང་ང་རང་དགའ་རོགས་འཚོལ་རྩིས་མེད་པ་མ་ཟད། རང་ཉིད་ཀྱི་གནས་བབ་འདི་འདྲ་ཞིག་གི་འོག་ནས་དགའ་རོགས་ཞིག་འཚོལ་རྒྱུ་དང་དུས་ཆད་བཟོས་དེ་སྒུག་རྒྱུ་བྱེད་པ་སོགས་ནི་དངོས་ནས་ང་ལ་མཚོན་ན་བློ་ཡིད་དུ་མེད་པ་ཞིག་ཡིན་དུས། སེམས་གཏིང་ནས་ཁྱེད་རང་གི་རེ་བ་དང་ལེན་བྱེད་མ་ཐུབ་པ་དེར་དགོངས་དག་ཞུ་ཟེར་ནས་བཤད།

བསྟན་འཛིན་ཚེ་སྐྱིད་ནི་དངོས་ནས་ཟླ་ངོ་གཅིག་གི་རྗེས་སུ་ཟ་ཁང་དང་ཁ་ཁར་ནས་འགྲོ་ཁར་བློ་བཟང་ལ་དྲན་རྟེན་གྱི་འདྲ་དཔར་ཞིག་གི་རྒྱབ་ངོས་སུ། བློ་བཟང་ལགས། དངོས་ནས་དྲང་གནས་ཀྱི་ཁྱེད་རང་ནི་བདག་གི་མི་ཚེ་ནང་དུ་མཐོང་བའི་ཆེས་གྲོགས་པོ་ཡག་ཤོས་ཤིག་ཡིན་ལ། ང་གང་དུ་སོང་ཡང་ཁྱེད་རང་མི་བརྗེད་ཁོ་ཐག་ཡིན། ཁྱེད་ཀྱིས་ཀྱང་ང་རང་མ་བརྗེད་ཅིག བསྟན་འཛིན་ཚེ་སྐྱིད་ཀྱིས་ཟླ་ཚེ་ལ། ཟེར་བ་འདི་འདྲ་ཞིག་བྲིས་ཡོད་པ་སྤྲོད་ཞོར་དུ། བློ་བཟང་གི་སྐེ་རུ་འཐམ་ནས་བདེ་མོ་བྱོས། ཡང་ཡང་ཐུག་ངེས་ཡིན་ཞེས་བཤད་དེ་བསྟན་འཛིན་ཚེ་སྐྱིད་ཟ་ཁང་དེ་ནས་བུད་སོང་།

ཉིན་མ་བཅོ་ལྔ་ཙམ་ཞིག་གི་རྗེས་སུ། བློ་བཟང་གིས་ཟ་ཁང་ནང་དུ་དེབ་ཞིག་ཀློག་བཞིན་བསྡད་ཡོད་སྐབས། བུད་མེད་ཅིག་གིས་བློ་བཟང་ཟེར་ནས་འབོད་བཞིན་པའི་སྐད་ཞིག་གོ་བ་དང་བསྟུན་ཟ་ཁང་གི་སྒོའི་ཕྱོགས་སུ་བལྟས་དུས། གློ་བུར་དུ་མིག་ཤེལ་ནག་པོ་བརྒྱབ་པའི་བུད་མེད་གཅིག་དང་ཕྱི་རྒྱལ་བ་མགོ་སེར་ཞིག་དང་མི་གཉིས་ནང་དུ་འཛུལ་ནས་འོང་གི་འདུག་པ་མཐོང་མ་ཐག་མི་ངོ་ཡང་མ་ཟིན་པ་ལྟ་བུ་ཞིག་ཆགས།

བུད་མེད་དེས་མིག་ཤེལ་འཕུད་ཞོར་དུ། བློ་བཟང་བདེ་མོ་ཡིན་ནམ་ཟེར་ནས་ལག་པ་བསྲིངས་དེ་འོང་དུས། གཞི་ནས་བུད་མེད་དེ་ནི་རང་གི་ལས་རོགས་མ་བསྟན་འཛིན་ཚེ་སྐྱིད་ཡིན་པ་ཤེས་ནས་ཧང་སངས་ཞོར་དུ། ཡིན་ཡིན། དེར་སྡོད་ཟེར་ཞོར་གང་མགྱོགས་རྐུབ་སྟེགས་སྟེང་ནས་ཡར་བླངས།

བསྟན་འཛིན་ཚེ་སྐྱིད་ཀྱིས། བློ་བཟང་འདི་ངའི་དགའ་རོགས་རེད། ཁོ་ཨ་རི་ན་ཡིན། མིང་ལ་རྗོར་རྗི་ཟེར་བ་རེད་ཅེས་ངོ་སྤྲོད་བྱས། དེ་དུས་གཟུགས་སྟོབས་ཅན་གྱི་ཕོ་གསར་རྗོར་རྗི་ཡིས་ཁྱེད་རང་འཕྲད་པར་དགའ་བོ་བྱུང་ཟེར་ནས་ལག་པ་བསྲིངས། བློ་བཟང་གིས་མགོ་བོ་གཡུགས་ཞོར་དུ་ལག་འཇུ་བྱས།

བློ་བཟང་གིས་བསམ་བློ་འདྲ་མིན་ཞིག་འཁོར་ཞོར་དུ་ཐབ་ཚང་ནང་དུ་ཁོ་གཉིས་ལ་ཟ་མ་ཞིག་བཟོ་བཞིན་ཡོད། བློ་བཟང་གིས་ཁྱེད་གཉིས་ཀྱིས་ཇ་མངར་མོ་འཐུང་རྒྱུུ་ཡིན་ནམ་ངས་མངར་ཇ་ཞིག་བཟོས་ཡོད་ཟེར་ནས་འདྲི་རུ་ཐབ་ཚང་ལས་འབུད་དེ་ཟ་ཁང་ནང་དུ་འོང་དུས། ཕོ་གསར་རྗོར་རྗི་ཡིས་བསྟན་འཛིན་ཚེ་སྐྱིད་ཀྱི་ཕྲག་པར་ལག་པ་བཞག་ནས་སྙིང་གཏམ་ཞིག་བཤད་བཞིན་པའི་སྒང་དང་འཁེལ་བས་སྐད་ཆ་གང་ཡང་མ་དྲིས་པར་ཕྱིར་ཐབ་ཚང་ནང་དུ་འཛུལ།