ཀྱེ། ཤེས་ཡོན་པའི་ཉེས་དམིགས་གང༌།

ཀྱེ། ཤེས་ཡོན་པའི་ཉེས་དམིགས་གང༌།  

རྩོམ་པ་པོ་ལན་དྲུག་དུད་སྒྲེང༌།  ༼བོད་འབྱོར།༽

འུ་ཅག་གི་ཁོར་ཡུག་འདི་ནས་ན་མཉམ་གྲོགས་པོ་དག་དང་གླེང་མོལ་བྱེད་དུས།  ཁོང་ཚོས༼རང་ཉིད་ཀྱང་འདུ༽གཞན་གྱི་དཀའ་སྡུག་དང་རྒྱབ་ལྗོངས་ཀྱི་གནོན་ཤུགས་ལ་ཁྱད་གསོད་བྱས་རྗེས་རྒྱུན་པར་སྡིག་དམོད་གཏོང་བར་མཁས། རྒྱུན་པར་མི་རིགས་ཀྱི་གནད་དོན་དེ་གཞན་གྱི་མགོ་ལ་གཡོག་རྗེས། རང་ཉིད་ཀྱིས་ལྐོག་ནས་ཟུར་མིག་བགྲད་མཁན་དེ་དག་ནི་མ་གཞི་ནས་རང་ཉིད་ལ་ནོར་འཁྲུལ་དང་ཉེས་པ་ཅི་ཡང་མེད་པར་འདོད་མཁན་དང་བོ་རེད། ང་ཚོའི་སྤྱི་ཚོགས་འདི་ན་རྒན་ཁོག་དག་གཙོ་བྱས་ཏེ་རྩོམ་རིག་པ་དང་ཞིབ་འཇུག་པ། ལྷག་པར་ཏུ་ཤེས་ཡོན་པའི་སྡེ་དང་སློབ་ཆེན་པ་གང་མང་ཞིག་གིས་སྤྱི་ཚོགས་སྟེང་ལས་སྣེ་གལ་ཆེན་རེ་འཛིན་པའི་མི་བོད་རིགས་དག་ལ་སྡིག་དམོད་ཆེས་ཆེར་བྱེད། འདི་དག་གིས་དེ་དག་ལ་གོང་ནས་གོང་རིམ་གྱི་གནོན་ཤུགས་དང་འོག་ནས་མང་ཚོགས་ཀྱི་གཅིལ་ཤུགས་ཡོད་ལ། བར་དུ་དེ་དག་ལ་རང་ཉིད་ཀྱི་འཚོ་བ་ཡོད་པའི་གནས་ཚུལ་གཏན་ནས་མི་མཁྱེན་པར། གན་དང་འདི་ཞེས་བམ་བཤད་རེ་འཐེན་ནས་ཅི་ཡང་མི་ནུས་ཟེར།  ལྷག་པར་ཏུ་འུ་ཅག་གི་ཤེས་ལྡན་པ་དག་གིས་སྤྱི་ཚོགས་སྟེང་གི་སློབ་གསོའི་གར་སྟེགས་ཀྱི་གོ་གནས་སོགས་ལ་ཉེས་འགེལ་བྱས་རྗེས་གཡོལ་ཐབས་བྱེད་ལ།  ལྐོག་དང་ཕག་ལ་གཡོལ་ནས་དེ་དག་ལ་སྡིག་དམོད་ཆེས་ཆེར་དང་རང་ཉིད་ཀྱིས་ཉེས་གཡོལ་བྱས་ཏེ་ཅ་ཅོའི་གཏམ་སྣ་ཚོགས་སྨྲ།  ངས་བལྟས་ན་འདི་ནི་ནོར་འཁྲུལ་ཚབས་ཆེན་ཞིག་རེད། 
དེང་གི་དུས་སྐབས་འདི་ལ་མཚོན་ན། དབང་དང་གོ་ས་ནི་ཡོད་དགོས་པ་ཞིག་རེད་ལ་དམིགས་ཡུལ་ངེས་ཅན་ཞིག་འགྲུབ་པའི་སྔོན་འགྲོ་ཡིན་པས། ང་ཚོ་ལ་མཁོ་བ་ནི་དབང་དང་གོ་གནས་རེད། གལ་ཏེ་གོ་གནས་རེ་ཟིན་པའི་དབང་དུ་བྱས་ནའང༌། གོ་སྐབས་ཤིག་ལ་བརྩི་མི་ཤེས་པའི་དྲན་འཕྲུལ་ནི་གཞན་མ་ཡིན་ཏེ། རང་གི་ལྟོ་དོན་ལས་མི་སེམས་པ་དག་གི་བྱ་སྤྱོད་ཅིག་རེད། མི་རིགས་བྱ་བ་དང་དུས་ལ་བབས་པའི་འོས་འགན་དག་ལ་ཆེས་ཆེར་རྨོངས་པའི་མི་དག་ཚོར། ནམ་རྒྱུན་དབང་དང་གོ་ས་སྟེར་བ་ནི་འུ་ཅག་གི་དབུགས་རྒྱུན་གཅོད་ཐབས་ཐུན་མོང་མ་ཡིན་པ་ཞིག་དང་གོ་སྐབས་གཞན་ལ་བྱིན་ནས་ཟུར་འདུག་བྱེད་པའི་རང་མཚང་འཁྲུལ་མེད་ཅིག་རེད། ངེས་པར་ཏུ་འཐབ་རྩོད་བྱེད་དགོས་པ་དང་ཡི་རངས་གཏོང་ཡུལ་ནི་ཤེས་ཡོན་པས་གར་སྟེགས་དེ་འཕྲོག་ལེན་བྱས་རྗེས།  རླབས་ཆེ་བའི་བྱ་བ་གང་ཞིག་གི་འགོ་འཛུགས་ཐུབ་མིན་གྱི་སྙིང་སྟོབས་རེད། དེ་ལས་ལྡོག་སྟེ། སྐོར་ཞིག་ཕག་དང་ཟུར་ལ་གཡོལ་ནས་ཉེས་དམིགས་བགྲང་བ་ནི་རང་ཉིད་སྲུང་སྐྱོབ་དང་མི་རིགས་ཀྱི་ལས་དོན་ཐད་ལ་རྨོངས་པའི་སྡར་མ་ཞིག་གི་མཚོན་བྱེད་ཤ་སྟག་རེད། དེ་དག་གིས་གཅིག་བྱས་ན་མི་རིགས་བྱ་བའི་ལས་དོན་གླེང་བ་ལས་སྒྲུབ་པར་རྨོངས་པ་དང༌།  གཅིག་བྱས་ན་གར་གྱི་སྟེགས་བུ་དེར་བྱུང་ན་སྒྱིད་པ་ལུག་པའི་ཉེན་ཁ་སོགས་གཡོལ་བཞིན་ཡོད་པས་གཏན་ནས་བྱེད་ཐབས་དང་གོ་སྐབས་ནི་མཐུན་རྐྱེན་ཞིག་ཡིན་པར་རྨོངས་པའི་བླུན་རྨོངས་ཀྱང་ཡིན་ཚོད་རེད། 
ཁོང་ཚོས་མཁྲེགས་འཛིན་རིང་ལུགས་དང་མཁས་རློམ་དག་གི་བསྒམ་ཚུགས་བཟུང་སྟེ། ཟུར་ཞིག་ནས་སྐད་ཆ་བསྐུར་བ་ནི་བླུན་པོ་དག་འབེན་ལ་རྫོང་ཐབས་དང་གྲུ་ཟུར་ནས་ལྟད་མོར་གཡེང་ཐབས་ཤིག་རེད། ཁོང་ཚོའི་བསམ་པར་ཤེས་ཡོན་པ་ནི་རྒྱུ་དང་འབྱོར་བ་ལ་མི་ལྟ་ཞིང་དབང་དང་གོ་ས་ལ་མི་དགའ་བ་ཞིག་རེད་སྙམ་ནས་ལུགས་དེ་འདེད་འདོད་ཡོད་ཀྱང༌། དོན་དམ་བཤད་ན། ཤེས་ཡོན་པས་དབང་དང་གོ་གནས། སྟོབས་དང་འབྱོར་བ་སོགས་ཅི་ལའང་མི་བལྟ་བ་དེ་མཐར་དེད་ན་སྒེར་དོན་མི་སྒྲུབ་པའི་དོན་ཡིན་པ་ལས་གཞན་མིན། འདིའི་ཐད་ནས་དོན་དམ་གྱི་ཤེས་ཡོན་པ་རེ་གཉིས་ཀྱི་གཏམ་རྒྱུད་ཀྱིས་དཔང་རྟགས་བཅོལ་ཐུབ། མཐར་དེད་ན། ཤེས་ཡོན་པ་ནི་བཤད་ཕོད་པ་དང་སྒྲུབ་ཕོད་པའི་དམ་པ་ཞིག་ཡིན་པ་མ་ཟད། གོ་སྐབས་གོ་སྐབས་སུ་ཤེས་པར་ནུས་ལ་འོས་འགན་གཙང་ལེན་གྱི་འགན་འཁུར་ཕོད་པའི་བླ་མེད་ཀྱི་རིང་ལུགས་ལྡན་པའི་དཔའ་བོ་ཞིག་ཀྱང་ཡིན། ཤེས་ཡོན་པ་དང་བསམ་བློ་བ་དབྱེར་མེད་པས། ཁོང་ཚོས་རླབས་ཆེ་བའི་བྱ་བ་ནི་ཅི་ཞིག་ཡིན་ཡང་སྒྲུབ་ཕོད་པ་མ་ཟད།  སྒྲུབ་དགོས་པ་དེར་ཅིས་ཀྱང་གདོང་གཏད་ལ། ཐབས་ཤེས་དང་དུས་བསྟུན་གྱིས་ཕ་རོལ་བོའི་བསམ་གཞིགས་འདི་ལྟར་གཏོང་ན་བདག་གིས་འདི་ལྟར་བྱས་ཏེ་གདོང་གཏད་པའི་སྙིང་སྟོབས་དང་ཐབས་ཤེས་ཀྱིས་ཀུན་ནས་ཕྱུག་པ་ཞིག་ཡིན། དེའི་ཆེད་དུ་རང་སྲོག་ཀྱང་ཕངས་པ་མེད་པར་འདོར་ཐུབ་པ་ནི་ཤེས་ཡོན་པའི་ཁྱད་ཆོས་ཤིག་ལས། འུ་ཅག་གི་ཤེས་ཡོན་པ་སྐོར་ཞིག་གཞན་གྱི་གོ་གནས་དེ་ལ་ཡིད་མི་དགའ་བའི་རྣམ་འགྱུར་དང་ཕོག་ཐུག་འཛིན་པ་ལས་ཞི་མཐུན་གྱི་ངང་ནས་གོ་སྐབས་བསྒྲིགས་རྗེས་རླབས་ཆེ་བའི་ལས་དོན་ལ་བརྩོན་པར་མི་ཕོད་པའི་སྡར་མ་དེ་རེད། འུ་ཅག་གི་ཤེས་ཡོན་པས་གཞན་ལ་སྐྱོན་འཛུགས་ཕོད་པ་ལས་གནད་འགག་གི་སྐབས་སུ་གདོང་གཏད་མི་ཕོད་ལ། འུ་ཅག་གི་ཤེས་ཡོན་པ་ནི་དཔོན་པོའི་གོ་ས་ལ་སྡང་མཁན་ཞིག་ལས་དེ་ལ་འཛེགས་ནས་རང་གི་ཞེན་དོན་དེ་སྒྲུབ་པར་མི་ཕོད་པའི་སྡར་མ་ཞིག་ཡིན། འུ་ཅག་གི་ཤེས་ཡོན་པས་དེ་ནི་རང་གི་ཉེས་པ་དང་ནུས་མེད་ཀྱི་མཚོན་བྱེད་ལ་མི་བརྩི་བར། དེ་ལས་ལྡོག་སྟེ་རང་གི་བཟང་ཐང་ཞིག་བསྒྲགས་བཞིན་ཡོད།  ཚ་ཚ་འུར་འུར་གྱི་དུས་རབས་འདི་ལ་མཚོན་ན།  ཤེས་ཡོན་པའི་འགན་འཁྲི་ནི་བདེན་ལུགས་ཡིན་པས།  བདེན་ལུགས་ཡོད་ཀྱང་དེ་ལ་གཟུར་བ་ནི་ཤེས་ཡོན་པའི་མཚང་དང་ཤེས་ཡོན་པ་མ་ཡིན་པས་སྔ་རྟགས་འཁྲུལ་མེད་ཅིག་རེད། མཐར་དེད་ན་འུ་ཅག་གི་ཤེས་ཡོན་པ་ནི་ཆབ་སྲིད་ལ་སྐྲག་པ་དང་ཆབ་སྲིད་ལ་རྨོངས་པ་རེད། ཁོང་ཚོ་ཆབ་སྲིད་ལ་རྨོངས་པའི་སྟབས་ཀྱིས་ཁོང་ཚོས་ཆབ་སྲིད་ཀྱི་ལས་ཀ་ལ་དགའ་བོ་མི་བྱེད་པར་མ་ཟད། དབང་བསྒྱུར་བའི་གཤམ་ནས་གཉའ་ལྷེམ་ལྷེམ་གྱིས་ངོ་རིག་བྱེད་ལ་ཕག་ལ་གཡོལ་ནས་བླ་བཙགས་རྒྱུ་དེ་རེད། ངས་བལྟས་ན་འདི་ནི་ཤེས་ཡོན་པ་རྣལ་མ་ཞིག་གི་བྱ་སྤྱོད་དང་གཏན་ནས་མི་མཐུན།  ཤེས་ཡོན་པ་ནི་གནས་ལུགས་འཚོལ་མཁན་དང་དྲང་བདེན་བརྩི་མཁན་ཞིག་ཡིན་པ་མ་ཟད།  གནས་ལུགས་དང་དྲང་བདེན་གྱི་ཆེད་དུ་གདོང་གཏད་ཕོད་པ་དེ་དང་བོ་ཡིན།  གང་ན་གནས་ལུགས་ཡོད་ན་དེར་སྙིང་སྟོབས་ཀྱིས་འཇུག་པ་ནི་ཤེས་ཡོན་པའི་ཁྱད་ཆོས་ཤིག་ཡིན་ལ།  གང་ནས་ཀྱང་བློ་རིག་གྲུང་མོས་གོ་སྐབས་བརྩོན་ལེན་གྱིས་བསྒྲིགས་པ་ནི་ཤེས་ཡོན་པའི་ཁྱད་ཆོས་ཤིག་ཡིན།  ཤེས་ཡོན་པས་བཤད་ཚད་མཐའ་དག་འགན་འཁུར་བྱེད་པ་མ་ཟད་ལག་ལེན་སྟེང་ནས་དངོས་སུ་གདོང་གཏད་པ་ཞིག་ཡིན།  
ཤེས་ཡོན་པས་བཤད་ཚད་མཐའ་དག་ལ་འགན་འཁུར་བྱེད་པར།  སྐབས་འགར་ཨུ་ཚུགས་ཀྱིས་སྔོན་ལ་མཆོངས་བསྐྱོད་མི་བྱེད་མཐུ་མེད་ཅིག་ཡིན།  འོན་ཀྱང་བྱ་བ་མཐའ་དག་ལ་གནས་ཚུལ་གཅིག་ལྟར་ཐག་གཅོད་བྱེད་ཐབས་ལས་མེད་པ་ཞིག་གཏན་ནས་མིན།   མི་མང་བོ་དེ་ལ་རྨོངས་སྟབས།  ཤེས་ཡོན་པ་ཡིན་མིན་གྱི་ཁྱད་པར་བྱུང་བ་རེད།   འདིའི་ཐད་ནས་ང་ཚོས་པཎ་ཆེན་ལ་སློབ་སྦྱོང་བྱེད་དགོས་པ་རེད།   པཎ་ཆེན་ནི་མི་རིགས་ཀྱི་ཆེད་དུ་བཤད་ཕོད་པའི་གྲས་ཀྱི་དང་བོ་ཡིན་པ་མ་ཟད།   སྒྲུབ་ཕོད་པའི་བླ་མེད་ཀྱི་སྙིང་སྟོབས་ཅན་དེའང་ཡིན་ངེས་རེད།  ཁོས་མི་རིགས་ལ་ཕན་པའི་བྱ་བ་ཞིག་ཅི་ལྟར་སྒྲུབ་དགོས་པ་དེ་རྒྱུན་པར་བསམ་གཞིགས་གཏོང་ས་ཉག་གཅིག་རེད་ལ།  གོ་གནས་ནི་གོ་སྐབས་ཤིག་ལ་བརྩིས་རྗེས། སྟེགས་བུ་དེ་ནས་གོ་སྐབས་དམ་པོར་སྤྱད་དེ་བྱ་བ་སྒྲུབ་སྟངས་ནི་བླ་མེད་ཀྱི་ཐབས་ཤེས་ནུས་ཅན་ཞིག་རེད། ཁོས་ལུས་ཀྱི་སྟེང་ན་གོ་སྐབས་གཉིས་ཡོད་པ་རེད།  དེ་ནི་བླ་མ་དང་སྤྱི་ཚོགས་ཀྱི་གོ་གནས་རེད།  ཁོས་གོ་སྐབས་དེ་གཉིས་དམ་པོར་འཛིན་པ་ལས་གང་ལའང་མཐོང་ཆུང་བྱེད་པ་མ་རེད། 


ང་ཚོས་སྤྱི་ཚོགས་དང་ཤེས་ཡོན་པའི་སྡེ་འདི་ནི་མིག་ཡ་མེད་པའི་གཡག་ཞར་ཞིག་དང་མཚུངས་པར།   ཁོ་ལྟ་བུའི་མི་རིགས་རིང་ལུགས་པའི་བྱས་རྗེས་ལ་བསྟོད་བསྔགས་དང་རྒྱང་འབོད་མེད་ལ།  ཡི་རངས་དང་ཞིབ་འཇུག་མེད།  ཁོ་ལྟ་བུ་ནི་ཤེས་ཡོན་པའི་སྡེ་ལ་མི་བརྩི་་ཞིང་དཔྱད་རིན་མེད་པའི་ངོས་འཛིན་བྱེད།   ཁོང་ཚོས་རང་ཉིད་ཀྱི་མདུན་ན་ལྷག་པའི་དཔེ་དེབ་རེ་གཉིས་ལས་རྩོམ་མཁན་རེ་འགའི་བསམ་བློ་བཙལ་ཏེ་ཡིན་སྙམ་གྱི་དཔྱད་གླེང་གཏོང་བ་ནི།    དཔེ་དེབ་དང་ལུང་འཛིན་རིང་ལུགས་པས་དཔེ་ཆ་ལས་གཞན་མི་མཐོང་བའི་གནས་ཚུལ་ཤ་སྟག་ཅིག་ལས་གཞན་གང་ལའང་རྨོངས་པའི་བརྟུལ་ཞུགས་ཁོ་ན་ཡིན།   ཁོང་ཚོའི་བསམ་པར་ང་ཚོའི་སྤྱི་ཚོགས་དང་མི་རིགས་ཀྱི་བྱ་བ་ནི་རྩོམ་རིག་པ་དང་ཞིབ་འཇུག་པ་ཁོ་ནར་རག་ལས་སྙམ་སྟེ་རྒྱང་འབོད་གཏོང་བ་ནི་དུས་བསྟུན་གྱི་བསམ་བློ་མ་སྨིན་པའི་སྔ་རྟགས་རེད།  དོན་དམ་བཤད་ན། འུ་ཅག་གི་ཤེས་ཡོན་པ་ཡིན་ཚུལ་རློམ་མཁན་དག་གིས། རྩོམ་རིག་དང་ལོ་རྒྱུས་དེབ་ཐེར་གྱི་ངོས་ན་བཀོད་པའི་མི་ཕོ་དག་ལ་བསྟོད་བསྔགས་བྱེད་པ་ལས།   ཆབ་སྲིད་ཀྱི་སྟེགས་བུར་འཛེགས་ནས་མི་རིགས་ཀྱི་བྱ་བ་སྒྲུབ་ཐུབ་པ་གཏན་ནས་མེད།  དེ་ནི་པཎ་ཆེན་ཁོ་རང་གཅིག་པུ་རེད།   མི་རིགས་ཀྱི་བྱ་བ་ནི་ཆབ་སྲིད་དང་གཏན་ནས་འབྲལ་ཐབས་མེད།   དེ་ལ་དམིགས་ཏེ་ཆབ་སྲིད་ལ་གཡོལ་བ་ནི་རང་ཅག་རྒུད་པའི་རྩ་བ་ཡིན། སྤྱི་ཚོགས་གསར་བརྗེ་བ་ཞིག་ལ་མཚོན་ན་ཆབ་སྲིད་ཀྱི་གོ་གནས་ནི་རང་གི་བསམ་བློ་དབང་ཚུགས་པའི་ཆ་རྐྱེན་ཞིག་རེད།  སྤྱི་ཚོགས་ཤིག་གི་ཁ་ཕྱོགས་དེ་དབང་བསྒྱུར་བ་དང་འབྲེལ་བ་དམ་པོ་ཡོད་པས།  དབང་ནི་རང་གི་བསམ་བློ་དེ་ཚུགས་པའི་སྔོན་འགྲོ་རེད།   འུ་ཅག་གིས་ལྔ་བཞིའི་ལས་འགུལ་གྱིས་མཚོན་པའི་སྤྱི་ཚོགས་གསར་བརྗེ་ལ་ཕྱིར་དྲན་བྱས་ནའང༌།   ཤེས་ཡོན་པས་རང་གི་བསམ་བློས་དབང་བསྒྱུར་བྱེད་པ་ལ་གོ་གནས་འཕྲོག་ལེན་དགོས་པ་ཚུར་སྣང་བྱས་ཡོད།   འུ་ཅག་གི་ཤེས་ཡོན་པས་མི་རིགས་ཀྱི་བདེན་དོན་ལ་རྨོངས་པ་དང་ཡང་ན་གནད་དོན་ལ་མཐོང་ཆུང་བྱེད་པའི་ཆབ་སྲིད་པ་དེ་དག་སྤྱུགས་དགོས་པ་མི་ཤེས་པར།  ལྐོག་དང་ཟུར་ལ་བུད་རྗེས་འཇམ་པའི་ངང་བླ་བཙགས་པ་རེད།   འུ་ཅག་གི་ཤེས་ཡོན་པའི་ཐོག་མར་རང་ཉིད་ཀྱི་བདེ་ཐང་དང་འཚོ་བ་ཐག་གཅོད་བྱས་རྗེས་སྐད་ཆ་རླུང་ལ་བསྐུར།   གནས་ཚུལ་དེ་འདྲ་ཞིག་གི་མངའ་འོག་ནས་ཆབ་སྲིད་པ་ལ་གཏན་ནས་ཡི་རངས་དང་ཞིབ་འཇུག་མི་བྱེད་པ་འདི་ནི།   འུ་ཅག་རྒུད་པའི་མཐར་ཐུག་དང་གནས་ཚུལ་ཆེ་ཞིག་ནས་སྲིད་འབྱོར་རིག་གསུམ་གྱི་འབྲེལ་བ་གལ་ཆེན་དེ་མཁྱེན་བཞིན་མེད་པའི་མཚོན་བྱེད་འཁྲུལ་མེད་རེད།   ཆབ་སྲིད་ལས་ཀའི་སྟེང་ནས་བལྟས་ན།   འུ་ཅག་གི་ཤེས་ཡོན་པ་ནི་ཆབ་སྲིད་ལ་རྨོངས་ཤིང་སྐྲག་པའི་སྡར་མ་ཤ་སྟག་ལས།  ཆབ་སྲིད་དཔལ་འབྱོར་ལ་ཞིབ་འཇུག་དང་དེའི་ཕྱོགས་ནས་ཞིབ་འཇུག་གི་ཚད་ཐིག་ངེས་ཅན་སྨིན་པའི་དམ་པ་མིན་ལ་འཐབ་མཁན་ཡང་དེ་བས་མིན།  འུ་ཅག་གི་ཤེས་ཡོན་པའི་སྡེ་ན་གླེང་བའི་གླེང་གཞི་བསྐོར་ཞིག་ལ་རླབས་ཆེ་བའི་བསམ་བློའི་བདེན་སྟོབས་མངའ་ཡང༌།  དེ་ཅུང་ཟད་ཡིན་ཡང་ལག་ལེན་སྟེང་ནས་སྒྲུབ་སྙམ་པའི་འདོད་ཚུལ་ཀུན་ནས་དབེན་པ་ནི་རང་རློམ་ཐལ་དྲག་པ་དང་ཕྱི་ཚུལ་སྨྲ་བའི་རྫུན་སྤྱོད་ཁོ་ན་ཡིན།  འུ་ཅག་གི་བསམ་བློའི་གཡོན་ལྷུང་གི་མཁྲེགས་འཛིན་འདིའི་དབང་གིས།   འུ་ཅག་གི་སྲིད་འབྱོར་རིག་གསུམ་གྱིས་དམིགས་ཡུལ་གཅིག་ལ་ནུས་ཤུགས་དང་གོམ་པ་གཏན་ནས་བསྒྱུར་མི་ཐུབ་ལ། འུ་ཅག་གི་གནས་བབས་ནི་སྲིད་འབྱོར་རིག་གསུམ་གཏན་ནས་དོ་མཉམ་པ་དེ་ཡིན།   འུ་ཅག་གི་ཆབ་སྲིད་ནི་གཞན་གྱིས་བསྒྱུར་ཞིང་དཔལ་འབྱོར་ལ་ཚོད་འཛིན་ཐེབས་པའི་འོག་ཡོད་ནའང་།    འུ་ཅག་གིས་དེ་ལ་ཁ་ཡ་མི་བྱེད་པར་བསམ་བློའི་འཆར་ཡན་གཏོང་བ་རེད།   འུ་ཅག་གི་ལས་དོན་ནི་ཆབ་སྲིད་དང་ཁ་འབྲལ་ཐབས་གཏན་ནས་མེད་པས།   ད་ནི་འུ་ཅག་གིས་ཀྱང་ཆབ་སྲིད་ལ་སློབ་སྦྱོང་དང་ཞིབ་འཇུག་བྱ་བའི་དུས་ཚོད་ལ་ཐོན་འདུག་པ་མ་ཟད་ཧ་ཅང་འཕྱི་དྲག  འདི་ནི་འུ་ཅག་གི་ཤེས་ཡོན་པའི་སྡེ་ལ་མཚོན་ན།   འཇིགས་སྐྲག་གི་སྐྲང་འབུར་ཞིག་ཡིན་པས་ང་ཚོས་ངེས་པར་ཏུ་གཏར་དགོས།   ཆབ་སྲིད་ནི་ཞི་དྲག་གཉིས་ཀྱི་སྒོ་ནས་སྤྱོད་ལམ་ཡོད་པ་ཞིག་ཡིན་ལ། དེང་སྐབས་ཀྱི་གནས་ཚུལ་ནི་ཞི་མཐུན་གྱི་སྒོ་ནས་གོ་སྐབས་བསྒྲིགས་དགོས་པ་ཞིག་ཡིན་མོད།  ཤེས་ཡོན་པས་མི་ཤེས་པའི་མདོག་གིས་འུར་བསྒྲགས་ཏེ་ཆབ་སྲིད་ཀྱི་གོ་སྐབས་མང་བོ་ཞིག་ལ་ནག་ཐིག་ཕབ་ཟིན་པས་ཡིན་ངེས། 


ཆབ་སྲིད་ཀྱི་སྟེང་ནས་ང་ཚོས་འདས་ཟིན་པའི་དོན་རྐྱེན་མང་པོ་ཞིག་ཡིད་ལ་འཛིན་པ་ལས་ངག་ནས་འཁྲོལ་རྒྱུ་གཏན་ནས་མེད།  ཡིན་ནའང་ལུས་ཀྱིས་རྣམ་འགྱུར་དང་བསམ་པ་ནི་ལག་ལེན་སྟེང་ལ་འབབ་དགོས་པ་དེ་རེད།  འདི་ནི་པཎ་ཆེན་གྱི་བྱ་བ་སྒྲུབ་སྟངས་ཐུན་མོང་མ་ཡིན་པ་ཞིག་ཀྱང་རེད།  གལ་ཏེ་འུ་ཅག་གིས་ཀྱང༌། བཅིངས་འགྲོལ་ཚུན་གྱི་རིག་གནས་ཐོན་སྐྱེད་ལ་ཕྱི་མིག་ཕངས་ན།   དེང་རབས་བོད་ཀྱི་ན་གཞོན་མཁས་པ་མང་ཤོས་ནི་ཁྱིམ་པ་ཡིན་ལ།   ཁྱིམ་པ་འདི་དག་གིས་རིག་གནས་བྱ་བཞག་ལ་རླབས་ཆེ་བའི་འབྲས་བུ་ངེས་ཅན་ཞིག་ཐོན་པའི་རྒྱུ་མཚན་གང་རེད་ཅེས་ན།    དེ་ནི་རིག་གནས་ཁོར་ཡུག་དང་གཏིང་འབྲེལ་ཟབ་མོ་ཞིག་ཡོད་པས།  ཕྱི་བལྟས་ཀྱིས་རིག་གནས་ཁོར་ཡུག་དེ་ནས་ཐོན་པའི་བུ་སློབ་སྟེ་སྐུ་ཞབས་དོན་འགྲུབ་རྒྱལ་ལྟ་བུར་འབྲེལ་ཞིང༌།  ཁོང་དང་འགྲོས་མཉམ་པའི་མི་བོ་དག་གི་འཐབ་རྩོད་ཀྱིས་འུ་ཅག་ལ་རིག་གནས་ཁོར་ཡུག་ཆུང་ངུ་ཞིག་གི་མཐུན་རྐྱེན་སྐྲུན་ཡོད།  འོན་ཀྱང་འུ་ཅག་གིས་ཁ་ནང་བལྟས་ཀྱིས་བརྗོད་ན།   འདི་ནི་བསམ་བློའི་ཐད་ཀྱི་ཆ་རྐྱེན་ཞིག་ཀྱང་རེད།  བསམ་བློའི་ཆ་རྐྱེན་འདི་ལ་དངོས་པོའི་ཁོར་ཡུག་གལ་ཆེན་ཞིག་གི་རྨང་གཞི་མེད་ན་མཁའ་དབུགས་དེ་རྒྱས་ཐབས་གཏན་ནས་མེད།    རྨང་གཞི་དེ་འདིང་བའི་བྱེད་པོ་ནི་པཎ་ཆེན་ཁོ་ན་རེད།  འདིས་སྟེང་ནས་བལྟས་ན་ད་བཟོད་འུ་ཅག་གི་ལོག་ལྟའི་དབང་གིས་ཆབ་སྲིད་དང་རིང་དུ་བྲལ་བའི་ཉེས་དམིགས་རྟོགས་སླ།  ཁོའི་བླ་མེད་ཀྱི་སྙིང་སྟོབས་དང་དཀྱེད་ཡངས་ཀྱི་ཤེས་རྒྱ་ལ་བརྟེན་ནས་འུ་ཅག་ལ་ཁོར་ཡུག་མང་བོ་ཞིག་སྩལ་བ་མིན་རྒྱུ་ན།  འུ་ཅག་གི་གོ་གནས་དང་དབང་མང་བོ་ཞིག་གཞན་གྱིས་སྤྱད་ཟིན་ལ་སྒྲུབ་ཟིན་པའི་བྱ་བཞག་མང་བོ་ཞིག་ཀྱང་ད་དུང་སྒྲུབ་མ་ཐུབ་པར་ལུས་ཡོད་པར་མ་ཟད།  བཤད་དགོས་པའི་སྐད་ཆ་མང་བོ་ཞིག་ཀྱང་ད་དུང་ལུས་ཡོད་ངེས།  འདི་ནི་བླ་ན་མེད་པའི་ཤེས་ཡོན་པ་ཞིག་གི་སྤོབས་པ་དང་བློ་གྲོས་ཀྱི་འཐབ་རྩོད་ཡིན་པས་ང་ཚོས་དགའ་མགུ་ཡི་རངས་དང་ཞིབ་འཇུག་མི་བྱེད་པར། ཁོའི་ཆོས་ལུགས་ལྟ་བའི་ཕྱི་ཚུལ་ཁོ་ནར་བལྟས་ཏེ་སྨྲ་སྒོ་འགག་པ་ནི་ཇི་འདྲའི་བློ་དོགས་པོ་དང་མིག་ཆུང་བའི་མཚོན་བྱེད་ཅིག་རེད་ཨང་།   དེང་གི་སྐབས་སུ་ཐོན་ན་བོད་མིའི་བདེ་སྡུག་དང་རིག་གནས་ཀྱི་གནས་བབས་མཁྱེན་པའི་མཁས་པ་དག་གིས་གོ་སྐབས་དེ་ཟུར་ཟ་དང་ཉེས་གཡོལ་བྱས་སྟབས།  འུ་ཅག་གིས་སྟོང་བསམ་ཞིག་ལས་འཆིང་མ་ཐུབ་ལ།  བཤད་དགོས་པའི་སྐད་ཆ་མང་བོ་ཞིག་ཀྱང་རང་སེམས་ནས་སྦྲུམ་ཏེ་འཆི་ཁར་དཔྱང་ཡོད།  འདིའི་ཐད་ནས་བལྟས་ན།  འུ་ཅག་གིས་ཀྱང་གོ་སྐབས་བརྩོན་ལེན་ལས་དམའ་འབེབ་མི་རུང་བའི་ལྕི་ཚད་ཤེས་ཐུབ། 
ད་དུང་མི་རིགས་སློབ་གསོ་མྱོང་བའི་སྡེ་ཁག་སོ་སོའི་བོད་རིགས་སློབ་གྲོགས་དག་དང་ཁ་བརྡ་བྱེད་དུས།  ཁོང་ཚོས་མི་རིགས་ཀྱི་གནད་དོན་དེ་རྒན་པ་ཚོའི་མགོ་ལ་བསྐོར་ཏེ་ཁོང་ཚོས་ཅི་ཡང་མ་ནུས་ཚུལ་གྱི་གླེང་མོལ་རྒྱུན་པར་འཛིན།   ནད་ཡམས་འདི་སྤྱི་ཚོགས་སྟེང་གི་ཤེས་ཡོན་པས་བསླངས་པ་རེད།   ངས་བལྟས་ན་གནད་དོན་དེར་ང་ཚོ་ཕྱི་རབས་པས་ཀྱང་གཞོལ་ཐབས་མེད་པས།  འདི་ནའང་དཔྱད་འཇོག་དང་སྟ་གོན་ཅི་ཡང་མེད་པར་ཁ་རང་ཐོག་གིས་སྐད་ཆ་རླུང་ལ་བསྐུར་བའི་རྫུན་སྤྱོད་དང་འདྲེས་པའི་ནོར་འཁྲུལ་ཚབས་ཆེན་ཞིག་ལྷགས་ཡོད།  འབྲེལ་ཡོད་འགོ་ཁྲིད་དག་ལ་ཉེས་དང་ཞན་ཆ་མེད་པ་ག་ལ་ཡིན།  དེ་ཚོ་ནི་ཕར་ལ་སྤྱུགས་དགོས་པའི་མི་ཚད་ཧ་ཅང་འཕྱི་དྲག་པའི་ཚོད་ཡིན།   འོན་ཀྱང༌།  དེ་ཚོ་ཕར་སྤྲད་རྗེས།  སྟེགས་བུ་དེ་གཞན་ལ་སྟེར་རམ་རང་གིས་བྱེད་དགོས་པ་དེ་ནི་གནད་དོན་ཞིག་རེད།  གནད་དོན་དེ་ལ་ཞིབ་འཇུག་བྱེད་དུས།   བདག་གི་ཁྲག་རྩ་རིད་ཅིང་སྦུག་ལམ་ཀུན་ནས་འཚུབ་འགྲོ།   སྐོར་ཞིག་ཁོང་ཚོས་སྒྲུབ་འདོད་ཀྱང་གོ་སྐབས་མེད་སོང་བར་བཤད་པ་དེའང་རྒྱུས་ལོན་སྤུ་ཙམ་མེད་པའི་སྐད་ཆ་ཞིག་ཡིན་པས།  བདག་གིས་ལགས་སོའི་བརྡ་མི་སྦྱོར།  དེ་ལས་ལྡོག་སྟེ།   བདག་གིས་ནི་གོ་སྐབས་འཕྲོག་པར་འདོད་ལ་བྱ་བ་ཞིག་སྒྲུབ་པར་འདོད།  འོན་ཀྱང་དེ་ནི་དཀའ་མོ་ཞིག་རེད་ཅེ་ན།  ཡིན་དུ་ངེས་ལ། འུ་ཅག་གིས་ཅི་ཡང་མི་ནུས་པ་དེ་རེད།   ངས་བལྟས་ན་མ་འོངས་པ་ན་ང་ཚོ་དང་ན་མཉམ་པའི་གྲོགས་པོ་སྐོར་ཞིག་རྒན་པ་དག་གི་གོ་ས་དེར་འགྱངས་ངེས་ལ།  གོ་སྐབས་དེ་ཅི་ལྟར་བེད་སྤྱོད་མིན་ད་ལྟ་ནས་འདང་རྒྱག་བྱ་དགོས་པའི་གཞི་གལ་ཆེན་ཞིག་ཡིན་པ་མ་ཟད།   ནམ་ཞིག་རང་ཉིད་ལའང་དེ་ལྟར་ཕྱི་རབས་ན་གཞོན་མང་བོ་ཞིག་གིས་སྡིག་དམོད་བྱེད་པ་ལ་སྔོན་འགོག་བྱ་དགོས།   ངས་བལྟས་ན་འུ་ཅག་ལ་གནད་འགག་གི་སྐབས་འདིར་སྟ་གོན་དབེན།   གཅིག་བྱས་ན་འུ་ཅག་གིས་གོ་སྐབས་གཞན་ལ་བྱིན་ནས་དེ་ཚོར་སྡིག་ཉེས་བཏང་རྗེས་རང་སྤྱིལ་གྱི་གྲུ་ཟུར་ཞིག་སྐྱོང་ངེས་མོད། སྐབས་དེར་མཚོན་ན་མི་རིགས་ཀྱི་ལས་དོན་དང་ཁེ་ཕན་དེ་སྒྲུབ་པའི་ལས་བཟོ་བ་ནི་སྟོང་ངེས་ལ།   དེ་རིང་ནང་བཞིན་སྡིག་དམོད་གཏོང་ས་ཉག་གཅིག་ཀྱང་མེད་ཚོད་རེད།   གཅིག་བྱས་ན་འུ་ཅག་ནི་གོ་ས་དེར་འགྱངས་ངེས་མོད།   ད་ལྟའི་སློབ་ཆེན་པ་གཙོས་བོད་རིགས་ན་གཞོན་དག་གི་དཔེ་ཀློག་དང་རྒྱུན་ཐོས་ཀྱི་ཤེས་བྱའི་བརྩོན་ལེན་འདི་ལ་འཁྱུགས་ཙམ་བལྟས་ཚེ་ཧ་མི་གོ་བ་ཞིག་གཏན་ནས་མིན།   ད་ལྟ་ནས་སྐོར་ཞིག་གིས་རང་ཉིད་ལའང་ཤེས་ཡོན་པའི་མཚན་ཞིག་བཏགས་ནས་ཟུར་ལ་འབུལ་འདོད་ཀྱི་སྟ་གོན་བྱེད།  ངས་བལྟས་ན།  གནད་འགག་གི་སྐབས་འདིར་མེད་ན་ཤེས་ཡོན་པ་ག་ལ་ཡིན།  ལས་བྱེད་རྒན་པ་སྐོར་ཞིག་གིས་བུ་ཕྲུག་ཕྱིའི་སློབ་གྲྭར་བཅུག་ནས་མི་རིགས་ཀྱི་སྐད་ཡིག་རིག་གནས་མི་ཤེས་པའི་གནས་ཚུལ་ལ་གད་མོ་དང་སྡིག་ཉེས་གཏོང་གི་གདའ་མོད།  བདག་གིས་བལྟས་ན་འདི་ནི་ཡིད་སྐྱོ་དགོས་པའི་བསླབ་བྱ་དང་ཉམས་མྱོང་ཞིག་ལས་སྒྲུབ་ཟིན་པ་དེར་སྡིག་ཉེས་དང་དམོད་མོ་བྱས་ཀྱང་ཅི་ཡང་མི་ཕན།   ཡིན་རྒྱུ་ནི་ང་ཚོ་ན་གཞོན་དག་གིས་མ་འོངས་པའི་ཁྱིམ་གཞི་དེ་མི་རིགས་རང་ལ་གཏོགས་པའི་ཁྱད་ཆོས་ལྟར་ཅི་ལྟར་སྒྲུབ་དགོས་པ་དེ་རེད།   བདག་གིས་གཞིགས་ན།  མ་འོངས་པ་ནི་དེ་རིང་ནང་བཞིན་གྱི་འབྱོར་བས་དབུལ་བའི་མི་སེར་དག་གི་བུ་ཕྲུག་གི་རྒྱལ་ཁམས་བཟློག་སྟེ་ཅུང་ཟད་འབྱོར་བའི་ཕྱུག་པའི་བུ་ཡི་རྣམ་ཐར་ལ་ཐོན་ངེས་པ་ཞིག་རེད།   སྐབས་དེར་འུ་ཅག་སུས་ཀྱང་མ་དངུལ་བཏང་ནས་ཕྱིའི་རིགས་ཀྱི་སྔོན་ཐོན་རིག་གནས་མྱོང་རོལ་བྱེད་དུ་གཏོང་བའི་འགྲན་རྩོད་ལ་འཇུག་པ་ནི་ཁེག་ཐག་ཡིན་མོད།  འོན་ཀྱང་མི་རིགས་ཀྱི་གནད་དོན་སྟེང་ནས་གླེང་ན།  རང་ཉིད་ཀྱི་བུ་ཕྲུག་དེ་ཕྱིར་མ་འཁྱམས་གོང་རོལ་ནས་རང་ཅག་གི་རིག་གནས་སློབ་གསོ་དང་རང་ཅག་ལ་གཏོགས་པའི་འདུ་ཤེས་ཟབ་མོ་ཞིག་སེམས་ཁམས་ལ་འགོས་སུ་མ་བཅུག་ཚེ་མི་རིགས་ཞེས་པ་དེ་སྟོང་གཏམ་རེད།  དཀའ་ཁག་གི་མདུན་ནས་ང་ཚོས་དེ་རིང་གི་དམོད་མོ་འདིར་ཕྱི་དྲན་བྱས་ན། འདིས་ད་དུང་འུ་ཅག་ལ་དང་ལེན་ཅུང་ཟད་དང་ལས་ཀ་ཅུང་ཟད་བྱེད་རྒྱུའི་བསམ་འདུན་གནས་པ་མཚོན་ཡོད་པ་འདྲ་ལ། རྒྱུ་རྐྱེན་དེ་ལ་དམིགས་ཏེ་ང་ཚོས་ཐོག་མ་ནས་སྟ་གོན་བགྱི་དགོས་པ་རང་ཉིད་ཀྱི་སྟེང་ཡིན་ལ། བསམ་གཞིག་ཀྱང་རང་སྟེང་ནས་ཤར་མར་གཏོང་དགོས།