བདག་ཉིད་ཆེན་པོ་གཱྂདྷིའི་ལྷན་དུ་ཕྱག་ཚོད་ལྔ་མཉམ་གནས།

 བོད་དགེ་ལྷག་པ་དོན་གྲུབ།

བདག་ཉིད་ཆེན་པོ་གཱྂདྷཱིས་མཛད་པའི་རང་སྲིད་རང་སྐྱོང་གི་རྩ་ཆེན་ཕྱག་དེབ་དེ་ཉིད་དུས་རབས་བརྒྱ་ཕྲག་གཅིག་འཁོར་བ་དང། ལྷག་པར་བོད་རྒྱལ་ཁབ་ཀྱི་མངའ་དབང་ཆ་ཚང་རྒྱ་ནག་གི་དབང་འོག་ཏུ་ཚུད་ནས་ལོ་བརྒྱ་ཕྲག་ཕྱེད་ཕྱིན་པ་དང་། རྒྱ་ནག་ཏུ་མང་གཙོ་མངོན་འདོད་ཅན་གྱི་སློབ་ཕྲུག་གྱེན་ལངས་པ་མང་པོ་རྒྱ་གཞུང་གིས་མཉམ་གསོད་བྱས་ནས་ལོ་ངོ་ཉེར་ལྔ་འཁོར་བ་བཅས་རྗེས་དྲན་ཞུ་འོས་པའི་དོན་གནད་གལ་ཆེན་གསུམ་ལ་བརྟེན་ནས་བཀའ་ཁྲིས་གཙོ་འགན་བཞེས་ཐོག་ཉིན་ལྔའི་གཱྂདྷཱིའི་མཛད་རྣམ་གྱི་ལས་རིམ་ཞིག་དབུ་འཛུགས་གནང་པའི་ཁྲོད་དུ་ཁོ་བོའང་མཉམ་ཞུགས་ཀྱིས་ཟུར་ཉན་བྱེད་སྐལ་ཐོབ་པ་དེ་ཉིད་ཁོ་བོའི་མི་ཚེའི་ཁྲོད་ཀྱི་ཉིན་མ་བཟང་ཤོས་དང་། དེར་དུས་ཚོད་བཏང་པ་དེ་ཉིད་དོན་དང་ལྡན་པར་གྱུར་སོང་སྙམ་པའི་ཚོར་ཤུགས་དྲག་པོ་བསྐྱེད་བྱུང་། ལྷག་པར་ཉིན་དང་པོར་སློབ་གྲྭའི་དགེ་ཆེ་མཆོག་གིས་བཀའ་གནང་པ་ལྟར་སློབ་ཕྲུག་མཉམ་འཁྲིད་ཀྱི་ལས་འགན་བབས་ཏེ་ཕྱིན་མོད་ཀྱང་། ཉིན་གཉིས་པར་ཉིན་རྒྱབ་དམིགས་བསལ་དགོངས་ཞུའི་ཐོག་ཐོབ་དཀའི་ལས་རིམ་བཟང་པོ་དེར་མཉམ་ཞུགས་བྱས་ཡིན། མིའི་དུས་ཚོད་དང་བསམ་བློ་ལ་རང་དབང་མེད་པས་ཉིན་གསུམ་པར་ལས་རིམ་དེར་ཞུགས་ཐུབ་མིན་འཆད་དཀའ། ཉིན་གཉིས་པོ་དེར་ཁོ་བོར་བསླབ་བྱ་འགའ་ཞིག་ཐོབ་པ་རྒྱ་ཆེའི་ཀློག་པ་པོའི་ལྷན་དུ་མཉམ་སྤྱོད་བྱེད་ན། བྱ་བ་གང་ཡང་བདེན་པ་དང་དྲང་པོའི་རྒྱུ་མཚན་གྱི་རིགས་པའི་ཐོག་ནས་བསྒྲུབ་དགོས་ཤིང་། ནམ་ཞིག་རྒྱུ་མཚན་གྱི་རིགས་པ་མ་འདངས་ཚེ་དད་པ་དང་ཡིད་ཆེས་ཀྱིས་མདུན་སྐྱོད་བྱེད་དགོས་པ་དང། དེབ་ཆས་ཀྱི་སློབ་སྦྱོང་ལས་སྒོ་གསུམ་གྱི་སྤྱོད་ཚུལ་ངན་པ་རྣམས་བཟོ་བཅོས་བྱེད་རྒྱུ་གལ་ཆེ་ཡིན་པ་དང། སྤྱི་ཚོགས་དང་མི་བྱེ་བྲག་པའི་དབར་འགྱངས་ཁྱད་མ་བཟུང་པར་ཁྱད་མེད་གཅིག་མཚུངས་འཛིན་པའི་ཆོད་སེམས་བརྟན་པོ་དགོས་པ་དང། རང་གི་སྒོ་གསུམ་གྱི་སྤྱོད་པར་ལེགས་པར་བལྟ་དགོས་པ་དང་། བལྟས་ནས་སྤྱོད་ཚུལ་དེ་ཉིད་རང་རྒྱུད་དུ་སྦྱར་ཐུབ་མིན་བརྟག་དགོས་པ་དང། བརྟགས་ནས་མ་ཐུབ་པ་རྣམས་བཅོས་བསྒྱུར་གྱིས་ཐུབ་པ་བྱེད་དགོས་ཚུལ་གྱི་དགོངས་ཚུལ་ནི་ཧ་ཅང་གི་རླབས་ཆེན་དུ་སྣང་། བདེན་པ་རྙེད་པའི་ཐབས་ལམ་བཟང་ཤོས་ཤིག་ནི་རང་སྐྱོན་ཆུང་ཡང་ཆེན་པོ་དང་གཞན་སྐྱོན་ཆེ་ཡང་ཆུང་ངུར་བལྟ་དགོས་པར་གསུངས། དེ་ཡང་བདག་ཉིད་ཆེན་པོ་གཱྂདྷཱི་རང་ཉིད་དགུང་ན་ཕྲ་སྐབས་ཐེངས་ཤིག་སྐྱེ་སྐར་ཉིན་མོ་སྲུང་བརྩི་ཞུ་རྒྱུའི་མ་ཡུམ་གྱིས་བཀའ་གནང་པ་ལྟར་སྐྱེ་སྐར་སྲུང་བརྩི་ཞུས་ཤིང་། འོན་ཀྱང་སྐྱེ་སྐར་ཉིན་མོར་རང་གི་ཉེ་གྲོགས་ཤིག་མགྲོན་འབོད་ཞུ་རྒྱུ་བརྗེད་པ་ཕྱིས་སུ་ཁོང་གི་མཁྱེན་སྐབས་དེ་ནི་རང་སྐྱོན་ཆེན་པོར་བརྩིས་ཏེ་སྐབས་དེར་ཨམྲའི་འབྲས་བུ་ཤར་བའི་ནམ་དུས་འཁེལ་སྟབས་ཁོང་གིས་དགའ་ཤོས་སུ་འཛིན་པའི་ཨ་མྲའི་འབྲས་བུ་ནམ་དུས་དེར་གཏན་ནས་མི་བཟའ་རྒྱུའི་རང་ལ་ཉེས་ཆད་བཀལ་པ་སོགས་ནི་དེ་བས་རླབས་ཆེའི་བསླབ་བྱ་ཞིག་བསྟན་སྙམ། དེ་བཞིན་གཞན་གྱི་དབང་བསྒྱུར་ལ་ངོ་རྒོལ་བྱེད་སྐབས་ཐོག་མར་རང་སྐྱོན་ངོས་འཛིན་ཐུབ་པ་དགོས་ཤིང། དེ་ནས་རིམ་བཞིན་གཅིག་སྒྲིལ་དང་ཚོགས་པ་དགོས་ཞེས་ལོ་རྒྱུས་དང་སྦྱར་ནས་གསུངས། ལྷར་པར་གཱྂདྷིའི་ལོ་རྒྱུས་སྨྲ་བ་པོ་རང་ཉིད་ཆུང་དུས་དངོས་སུ་གཱྂདྷིའི་ལྷན་དུ་ལོ་མང་མཉམ་གནས་བྱས་མྱོང་པ་ཞིག་ཡིན་པས་ཁོང་གི་ཞལ་ནས་བདག་ཉིད་ཆེན་པོ་གཱྂདྷཱིའི་མཛད་རྣམ་ཉན་རྒྱུའི་གོ་སྐབས་དེ་ནི་དངོས་སུ་གཱྂདྷཱིའི་ལྷན་དུ་མཉམ་གནས་ཀྱི་ཚོར་བ་བསྐྱེད་པ་དང་། ལྷག་པར་མཛད་རྣམ་གསུངས་པའི་བར་ལ་མཛད་རྣམ་དང་འབྲེལ་བའི་སྙན་ཚིག་གནའ་བོའི་རྒྱ་གར་གྱི་སྲོལ་རྒྱུན་གྱི་སྒྲ་གདངས་དང་མཐུན་པར་གླུ་གཞས་ཀྱི་བརྒྱུད་ལམ་ནས་བོད་གཞུང་ཟློས་གར་ཚོགས་པའི་གཞས་པ་དང་གཞས་མའི་ངག་ནས་གཏོང་དུ་བཅུག་པ་སོགས་རྒྱ་གར་གྱི་གནའ་བོའི་དགའ་བྱེད་ཀྱི་གཏམ་རྒྱུད་འཆད་སྲོལ་དང་མཐུན་པར་ཉན་པ་པོའི་བློ་བྱིངས་མ་བཅུག་པ་སོགས་ཐབས་ཤེས་མཁས་པའི་ཐོག་ནས་གསུངས་པ་སོགས་མདོར་ན་ཉིན་གཉིས་ཆུ་ཚོད་ལྔའི་དུས་ཚོད་དེ་ཉིད་ཧ་ཅང་དོན་དང་ལྡན་པར་འགྱུར་སྙམ་མོ།།